Sefanaia 1
1
1 #
2Tui 22.1–23.30; 2Vei 34.1–35.27 Oqo na i tukutuku sa solia vei Sefanaia o Jiova ena gauna a tui Juta tiko kina o Josaia na luve i Emoni. (E kawa i Esekaia na tui o Sefanaia ka basika mai vei Amaraia, Kitalaia, kei Kusi.)
Na Siga ni Veilewai i Jiova
2A sa kaya o Jiova, “Au sa na vakarau vakarusa na veika kecega e tu e dela i vuravura, 3na tamata kei na manumanu kecega, na manumanu vuka kei na ika. Au na vakavuna na nodra vakamalumalumutaki na tamata ca. Au na vakarusa vakadua na kawa tamata, ka'u na sega ni vakavoca tale e dua e vuravura. Oi au, o Jiova, sa vosa vakaoqo.
4“Au na vakanakuitaki ira na tamata mai Jerusalemi kei Juta taucoko. Au na vaqeyavutaka vakadua na i vovo ni veiqaravi vei Peali mai kea, ka na sega ni dua e nanuma rawa na yacadra na kena bete era sa dau qaravi koya. 5Au na vakarusai koya ena cabe ki na delanivale me qarava na matanisiga, na vula, kei na veikalokalo. Au na vakarusai ira talega era sa dauqaravi au ka yalataka vei au na nodra yalodina, ia era sa qai vosa bubului tale ena yaca ni kalou o Moloke. 6Au na vakarusai ira era sa vuki tani ka sa sega ni muri au, o ira era sa sega ni lako mai vei au se ra kerei au me'u dusimaki ira.”
7Sa voleka mai na siga me na dabe kina o Jiova ena i dabedabe ni veilewai; mo ni tiko vakanomodi sara kina e matana. Sa vakarau tu o Jiova me soli ira yani na nona tamata ka sa sureti ira na meca me ra mai kauta na i yau nei Juta. 8Sa kaya o Jiova, “Ena siga ni veivakamatei o ya, au na vakanakuitaki ira kina na i vakalesilesi, o iratou na luvenitui kei ira kece era vakamuria voli na nodra i valavala na kai vanua tani. 9Au na totogitaki ira kece era sa ia na sokalou me vakataki ira na tawalotu, ka ra daubutako ka veivakamatei me ra vakasinaita kina na vale ni nodra turaga#1.9 na vale ni nodra turaga; se na burekalou ni nodra kalou. ena i yaya butakoci.
10A sa kaya o Jiova, “Ena siga o ya, o ni na rogoca na domo ni tagi ena Matamata ni Ika mai Jerusalemi. O ni na rogoca na veitagicaki ena yasa ni koro sa tara vou, ka rogoca talega na rorogo levu mai na veidelana. 11Ni o ni sa rogoca oqo, mo ni qai qoqolou ka tagi, oi kemuni o ni sa tiko ena yasa ni koro ena buca, baleta ni ra sa na mate kece kina o ira na dauveivoli!
12“Ena gauna o ya, au na kauta kina e dua na cina ka la'ki vakadikevi Jerusalemi. Au na totogitaki ira na tamata sa dau murimuri lomadra ka nuitaki ira vakataki ira ga, ni ra sa dau kaya voli e lomadra, “Sa sega ni cakava rawa o Jiova e dua na ka, se ka vinaka se ca.” 13Ena kovei vakaukauwa na nodra i yau, ka vakarusai na nodra veivale. Era na sega ni tawana na veivale era sa tara tiko, se gunuva na waini mai na veivaini era sa tea tu.”
14Sa voleka mai na siga cecere i Jiova; sa voleka sara ka sega tale ni qai berabera! Ena dua dina na siga ca o ya, ka ni na bau tagi talega ena rarawa levu o ira na sotia yaloqaqa! 15Ena siga ni cudru levu sara na siga o ya, e dua na siga ni leqa kei na rarawa, e dua na siga ni veivakacacani kei na veivakarusai, e dua na siga ni butobuto kei na yalobibi, 16e dua na siga e rogo kina na domo ni davui ni valu kei na nodra na vakacibi i valu na sotia era sa valuta tiko na veikoro lelevu kei na kedra valeniyadra cere i cake.
17A qai kaya o Jiova, “Au na kauta mai na ka ni veivakaleqai oqo ki na kawa tamata me ra na qai vakayayamo voli me vakataka na tamata mataboko. Era sai valavala ca vei au, ia oqo ena sovaraki yani na nodra dra me vaka na wai, ka ra na dui vuca na yagodra mate ena dela ni qele.”
18Ena sega sara ni vakabulai ira na nodra siliva kei na koula taucoko ena siga sa vakaraitaka kina o Jiova na nona cudru katakata. Na waqa ni nona cudru ena vakarusa na vuravura taucoko. Ena muduka vakasauri kina o koya na bula ni tamata yadua era sa tiko e vuravura.
Currently Selected:
Sefanaia 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.