Maika 1
1
1 #
2Tui 15.32-38; 2Vei 27.1-7;
2Tui 16.1-20; 2Vei 28.1-27;
2Tui 18.1–20.21; 2Vei 29.1–32.33 Sa tu ena i vola oqo na i tukutuku i Jiova sa tukuna vei Maika na kai Moreseci ena gauna e ratou tui Juta kina o Jocame, o Easi kei Esekaia. Sa vakaraitaka vei Maika o Jiova na veika oqo me baleti Samaria kei Jerusalemi.
Sa Tagicaki o Samaria kei Jerusalemi
2Ni rogoca oqo, na veivanua kecega:
Ni vakatudaliga, oi kemuni kece na kai vuravura!
Ena beitaki kemuni na Turaga o Jiova.
Rogoca! Sa vosa mai o koya mai na nona vale tabu.
3Sa lako mai o Jiova mai na nona i tikotiko tabu;
Ena siro sobu mai ka lako voli ena dela ni veiulunivanua.
4Era na qai waicala e rukuna na veiulunivanua
Me vaka na dago ni kadrala ena bukawaqa;
Era na qai sovaraki sobu ki na veiqakilo
Me vaka na tasova sobu ni wai mai na delana.
5Na ka kecega oqo ena yaco baleta ni ra sai valavala ca ka dauvorata na Kalou o ira na Isireli. O cei me na beitaki vua na nodra talaidredre na Isireli? O Samaria ga, na koro turaga! O cei sa vakadinadinataka na cala ni qaravi kalou matakau mai Juta? O Jerusalemi ga! 6O koya oqo sa mani kaya kina o Jiova, “Au na vukici Samaria me vaka na i rusarusa ni koro e tu ena dua na vanua lala, ka rauta ga me vanua ni tei vaini. Au na sovaraka sobu ki na qakilo na yavuyavu ni ka sa kama ka rusa mai na koro levu oqo, ka me qai vo wale sara ga na yavu ni koro. 7Na nodra veivakatakarakara talei ka voli dredre ena koro era na vorovorolaki vakamatailalai, na veika kece sa soli vei ira na bete ni burekalou ena kama laivi me ra rusa vakadua, kei na nodra i vakatakarakara kece sara ena yaco me dua na i rusarusa ni koro sa bini cake tu. Sa tu vei Samaria na veika kece oqo me rawa ni vuavuai kina, ia era sa na kauta tani yani na kedra meca me nodra na bete ni burekalou ena veivanua tale eso.”
8A sa qai kaya o Maika, “Ena vuku ni ka oqo, au sa na vakaloloku ga ka tagicaka. Au na veilakoyaki voli ka'u na sega ni vakaivava se vakaisulu me'u vakaraitaka kina na noqu rarawa. Au na tagi me vaka na jekeli ka tagiyaso me vaka na ositeriji. 9Ni sa sega ni maca rawa na mavoa i Samaria, na mavoa vata vakaoqo sa vakarau yacovi Juta; ni sa yaco mai na veivakarusai ki na veimatamata ni koro e Jerusalemi, na koro era sa tiko kina na noqu tamata.”
Era sa Torovi Jerusalemi na Meca
10Ni kakua ni tukuna vei ira mai Kaca na ka e baleta na noda sa vakamalumalumutaki; ni kakua ni vakalaiva me ra raica ni o ni sa tagi. Oi kemuni na kai Peci Leafira, ni qiqi voli ga ena kuvu ni soso me vakaraitaki kina na nomuni yaluma! 11Oi kemuni na kai Safiri, ni lako ga yani vakabobula ka luvawale kei na madua. O ira era tiko mai Sianani me ra se kakua ni lako tani mai na nodra koro. Ni o ni sa rogoca ni ra sa vakaloloku na kai Peci-eseli, o ni sa na kila sara ni sa sega mai kea na vanua me i drodro. 12Era sa veidoloyaki ena mosi na kai Meroca; ka ra sa gadreva vakalevu na veivuke, baleta ni sa volekati Jerusalemi tiko yani na veivakarusai i Jiova. 13Kemuni na kai Lakisi, ni vesuka vata na nomuni ose ki na kedra qiqinivalu. O kemuni o ni a vakamurimuria na nodra i valavala ca na Isireli, ka sa vakavuna kina me valavala ca o Jerusalemi. 14O koya oqo, oi kemuni na Juta, mo ni solia kina na nomuni ka ni loloma ni vakamoce ena gauna oqo ki na koro o Mereseci Kaca. O ira na tui e Isireli era na sega sara ni vukei mai na koro o Akasipi.
15Kemuni na kai Maresa, ena soli kemuni o Jiova ki vua e dua na kemuni meca, o koya ena qai taura vakaukauwa na nomuni koro. Ena qai dro na dauveilitaki e Isireli ka la'ki vuni ena qara vatu mai Etulama. 16Kemuni na kai Juta, ni kotiva vakadua sara na ulumuni me kedra i loloku na luvemuni o ni daulomani ira. Ni cakava sara mo ni ulu cou me vaka na ikeli baleta ni ra sa na kau tani mai vei kemuni o ira na nomuni gone.
Currently Selected:
Maika 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.