Luke 1
1
A Kena i Kau
1Kivei Ceofilo:
Era sa lewe vuqa era tovolea ena nodra i gu taucoko me ra vola na i tukutuku ni veika sa yaco vakaidina ena keda maliwa. 2Era sa vola na veika sa tukuni vei keda mai vei ira era a raica e matadra ka vakadewataka na kena i tukutuku mai na i vakatekivu. 3O koya oqo, au sa nanuma kina ni na vinaka me'u vola vei kemuni, na turaga dokai, e dua na kena i tukutuku sa tuvani vakamatau, baleta ni'u sa vakatarotaroga matua sara na veika kece sa yaco mai na i vakatekivu. 4Au sa vakayacora oqo mo ni kila kina na dina ni veika o ni sa vakatavulici kina.
Na Vakarogoi ni Sucu i Joni na Dauveipapitaisotaki
5Ena gauna e tui tiko kina mai Jutia o Eroti, a sa tiko kina e dua na bete o Sakaraia na yacana, ena matabete i Apaijia; a watina e dua vei ira na kawa i Eroni, ka yacana o Ilisapeci.#1Vei 24.10 6E rau dodonu ruarua ena mata ni Kalou oi rau oqo, e rau dau muria na i vakaro kei na lawa kecega ni Turaga, ka rau sega ni vakalewai rawa. 7E sega na luvedrau, ni a yava o Ilisapeci ka rau sa qase ruarua talega mai.
8Ena dua na gauna ni a cakacaka vakabete tiko ena mata ni Kalou o Sakaraia, o ya ni a vakaitavi kina na nona matabete, 9a mani donui koya ena vakawirimadigi me vaka na i vakarau vakabete, me curu ki na Valenisoro ni Turaga ka vakama na ka boi vinaka. 10Ia o ira na lewe vuqa era a masu tu ga e tautuba ni sa kama tiko na ka boi vinaka.
11Sa qai rairai vua e dua na agilosi ni Turaga, ni sa tucake tu ena yasa i matau ni cabocabonisoro ni ka boi vinaka. 12Ia ni sa raica o Sakaraia, a sa kidroa ka tuburi koya na rere. 13Sa qai kaya vua na agilosi, “I Sakaraia, mo kakua ni rere! Sa rogoca na Kalou na nomu masu, ka na vakasucuma e dua na luvemu tagane o Ilisapeci na watimu, ia mo qai vakayacani koya me o Joni. 14O na reki ka marau kina, era na reki talega na lewe vuqa ni sa sucu! 15Ni na dokai vakalevu o koya ena mata ni Turaga, ka na sega ni gunuva na waini se na gunu kaukauwa. Ena vakasinaiti ena Yalo Tabu me tekivu sara mai na kete i tinana,#1Vei 24.10 16ka na vakalesuya mai o koya vua na Turaga na nodra Kalou e lewe vuqa vei ira na Isireli. 17O koya ena liu tiko vua na Turaga ena qaqa kei na kaukauwa i Ilaijia na parofita. Ena kauti ira vata tale mai na qase kei ira na gone o koya; ena saumaki ira lesu na tamata dautalaidredre ki na sala ni yalododonu; ena vakavuna talega me ra vakarau tu vua na Turaga o ira na tamata ni Kalou.”#Mala 4.5,6; Sr 48.10,11
18Sa qai kaya vua na agilosi o Sakaraia, “Au na kila vakacava na ka oqo, ni'u sa qase, ka sa qase talega na watiqu?”
19Sa qai sauma na agilosi ka kaya vua, “Oi au o Kaverieli, au sa dau tu me'u veiqaravi ena mata ni Kalou, ka'u sa talai mai me'u vosa vei iko ka tukuna vei iko na i tukutuku vinaka oqo.#Tani 8.16; 9.21; Tb 12.15 20Ia o na galu tu mada ka sega ni vosa rawa me yacova na siga ena vakayacori kina na veika oqo, ni o sega ni vakadinata na noqu vosa, ka ni na vakayacori ga ena kena gauna.”
21Era a waraki Sakaraia tiko na tamata, ka ra kurabui ni sa la'ki dede tiko o koya ena loma ni Valenisoro. 22Ia ni sa curu mai ki tautuba o koya, sa sega ni vosa rawa vei ira, ka ra sa qai kila ni a raica o koya e dua na raivotu ena Valenisoro. E a vakatabataba ga vei ira o koya ni sa galu tu.
23Ia ni sa oti na nona cakacaka vakabete, sa qai lesu tale ki na nona vale o Sakaraia. 24Ni sa oti yani na veisiga o ya, sa qai kunekune na watina, o Ilisapeci, ka sa tiko voli ga e vale me vula lima, ka sa kaya, 25“Sa i koya oqo na cakacaka ni Turaga vei au, ni sa raici au o koya ena mataloloma, me kauta laivi kina na levu ni noqu madua ena kedra maliwa na tamata!”
Na Vakarogoi ni Sucu i Jisu
26Ena i kaono ni vula sa talai na agilosi o Kaverieli mai vua na Kalou, ki na dua na koro mai Kalili o Nasareci na yacana, 27ki vua e dua na goneyalewa ka sa musuki tu vua e dua na tagane o Iosefo na yacana, ena mataqali i Tevita; a yaca ni goneyalewa koya o Maria.#Maciu 1.18 28Sa yaco yani vua na agilosi ka kidavaki koya, ka kaya, “Mo reki mada, o iko o sa lomani vakalevu! Sa tiko vata kei iko na Turaga! O sa kalougata vakalevu o iko mai vei ira kecega na yalewa.”
29Sa kidroa o koya ena vosa o ya, ka vakasamataka e lomana se cava na i balebale ni veikidavaki vaka o ya. 30Sa qai kaya vua na agilosi, “I Maria, mo kakua ni rere, ni sa lomani iko na Kalou. 31Raica, o na kunekune, ka vakasucuma e dua na gonetagane; ia mo vakayacani koya o Jisu.#Maciu 1.21 32Ena dokai vakalevu o koya, ka na vakatokai me Luve i Koya sa Cecere Sara.#2Samu 7.12,13,16; Aisea 9.7 Na Turaga na Kalou ena solia vua na i tutu vakatui, me vakataka na nona qase o Tevita, 33ka na tui tiko o koya ena mataqali i Jekope ka sega ni mudu; ena sega talega ni mudu na nona matanitu!”
34Sa qai kaya o Maria vua na agilosi, “Ena yaco rawa vakacava na ka oqo, ni'u sa sega ni veiyacovi kei na dua na tagane?”
35Sa qai sauma na agilosi ka kaya vua, “Ena lako sobu mai vei iko na Yalo Tabu, ka na sobuti iko na kaukauwa i Koya sa Cecere Sara. Ena ka oqo, ena vakatokai kina na gonelailai tabu sa sucu mai vei iko me Luve ni Kalou. 36Raici koya mada na wekamu o Ilisapeci. A sa dau tukuni tu ni sa sega ni rawa vua me vakaluveni, ia sa vula ono oqo na nona kunekunetaka tiko e dua na gone, e dina ga ni sa qase sara o koya. 37Ni sa sega ni dredre vua na Kalou e dua na ka.”#Vteki 18.14
38Sa qai kaya o Maria, “Oi au na vada ni Turaga; me yaco mada ga vei au na veika oqori me vaka na nomuni vosa.” Sa qai biuti koya sara na agilosi.
Sa La'ki Sikovi Ilisapeci o Maria
39Ni oti o ya, a sa vakarautaki koya o Maria ka lako vakusakusa ki na dua na koro ena veidelana mai Jutia. 40A sa lako ki na vale i Sakaraia ka sa kidavaki Ilisapeci. 41Ia ni sa rogoca na vosa ni veikidavaki i Maria o Ilisapeci, a sa yavala e ketena na gone. A sa vakasinaiti o Ilisapeci ena Yalo Tabu 42ka sa tabalaka cake na domona, ka kaya, “O sa kalougata vakalevu mai vei ira kece na yalewa, ka sa kalougata talega na lewe ni ketemu!#Ud 13.18 43A cava au sa rui kalougata kina, me mai sikovi au kina na tina ni noqu Turaga? 44Kila ga, ni sa rorogo e daligaqu na nomu vosa ni veikidavaki, sa yavala ena reki na gone e ketequ. 45Sa kalougata o koya sa vakadinata ni na vakayacori dina ga na veika sa tukuna vua na Turaga.”
Na Sere ni Veivakalagilagi i Maria
46Sa qai kaya o Maria,
“Sa vakalagilagia na Turaga na yaloqu,
47Ka sa reki na yaloqu vua na Kalou na noqu i Vakabula!
48Ni sa nanuma na i tutu vakaloloma ni nona vada.#1Samu 1.11
Ka raica, me tekivu mai na gauna oqo era na kaya na veitabatamata kecega ni'u sa kalougata;
49Ni sa cakava vei au na veika lelevu o koya sa qaqa.
Ka sa yaca tabu na yacana.
50Sa tu na nona yalololoma vei ira sa rerevaki koya
ena veitabatamata kecega.
51Sa dodoka na ligana kaukauwa,
Ka ra sa veiseyaki na viavialevu ena vakanananu ni yalodra.
52Sa talaraki ira na kaukauwa mai na nodra i tikotiko vakatui,#Jope 5.11; 12.19; Sr 10.14
Ka laveti ira cake na tamata lalai.
53Sa vakamamautaki ira na viakana ena ka vinaka;
Ka vakatalai ira wale na vutuniyau.
54Sa vukei ira na nona tamata na Isireli,
Ni sa nanuma lesu na nona mataloloma,
55Me vaka sa vosa kina vei ira na noda qase,#Vteki 17.7 #1Samu 2.1-10
Vei Epara-ama kei na nona kawa ka tawamudu!”
56A tiko vata kei Ilisapeci o Maria ka rauta e vula tolu, ka sa qai lesu tale ki na nona vale.
Na Sucu i Joni na Dauveipapitaisotaki
57Sa mani yaco na gauna me vakasucu kina o Ilisapeci, ka a vakasucuma e dua na gonetagane. 58Era sa mani rogoca o ira era tiko voleka e kea kei ira na wekana ni sa lomani koya vakalevu na Turaga, ka ra sa qai reki vata kaya.
59Ena i kawalu ni siga era sa qai lako me ra ciliva na gone, ka ra a nanuma me rau sa veiyacani kei tamana o Sakaraia.#Vsoro 12.3 60Ia sa qai kaya o tinana, “Sega, me yacana ga o Joni.”
61Era sa qai kaya vua, “E sega ni dua na wekamu e vakayacani ena yaca oqo.” 62Era sa qai vosa dusidusi me vaka na galu vei tamana se cava e vinakata o koya me yacana.
63Sa qai kerea o koya e dua na papa ni volavola, ka vola kina, “Na yacana o Joni.” Era sa kurabui kecega. 64Sa qai sereki vakasauri na gusu i Sakaraia kei na yamena, ka sa qai vosa ka vakarokorokotaka na Kalou. 65Era sa rere kecega o ira era tiko vakavolivoliti ira, ka sa veitalanoataki na veika oqo e loma ni vanua taucoko vaka-Jutia. 66O ira kece era rogoca na veika oqo era sa tugana e lomadra, ka ra kaya, “Ena yaco beka me cava na gone oqo?” Ni sa tiko vakaidina kei koya na kaukauwa ni Turaga.
Na Parofisai i Sakaraia
67Sa qai vakasinaiti ena Yalo Tabu o Sakaraia na tamana, ka sa parofisai kaya,
68“Me vakacaucautaki na Turaga na Kalou ni Isireli,
Ni sa mai sikovi ira ka vakabulai ira na nona tamata.
69Ka sa vakatubura vei keda e dua na i vakabula kaukauwa,
Ena mataqali i Tevita na nona tamata.
70Me vaka a vosataka o koya ena gusudra na nona parofita ena gauna makawa sara,
71Me da vakabulai mai na noda meca,
Kei na ligadra kecega era cati keda.
72A sa kaya ni na vakatakila na yalololoma sa yalataki vei ira na noda qase
Ka me nanuma talega na nona veiyalayalati tabu.
73Na bubului ka a bubului kina vei Epara-ama na tamada,
Me solia vei keda
74Me rawa kina vei keda, ni da sa vakabulai mai na ligadra na noda meca,
Me da qaravi koya ka sega ni rere,
75Ena yalosavasava kei na i valavala dodonu
Ena matana ena veisiga ni noda bula.
76“Ia o iko na gone, o na vakatokai na parofita i Koya sa Cecere Sara.
Ni o na liu ena mata ni Turaga
Mo caramaka na nona sala;#Mala 3.1
77Mo vakatakila vei ira na nona tamata na ka me ra vakabulai kina,
Ni sa bokoci na nodra i valavala ca.
78Ena yaloveivosoti ni noda Kalou,
Ka na kida mai kina vei keda na rarama mai cake,
79Me vakararamataki ira na tiko ena butobuto kei na yaloyalo ni mate,
Ka vakauta na yavada ki na sala ni veisaututaki.”#Aisea 9.2
80A sa tubu cake na gone, ka yaco me yalomatua sara, ka sa dau tiko voli ga ena loma ni vanua lala me yacova na gauna sa qai vakaraitaki koya kina vei ira na Isireli.
Currently Selected:
Luke 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.