Joni 19
19
1Sa qai kauti Jisu o Pailato ka vakanakuitataka. 2Era a talia e dua na i sala wavakavotona o ira na sotia, ka vakaisalataki Jisu kina, ka vakaisulutaki koya ena dua na i sulu lokaloka, 3ka ra sa kaya, “Me bula balavu na nodra Tui na Jiu!” Era sa qai lako cake ka sabici koya.
4Sa qai curu tale ki tautuba vei ira na lewe vuqa o Pailato, ka kaya vei ira, “Raica, au na kauti koya mai ki tautuba vei kemuni, mo ni raica kina ni'u sa sega ni kunea vua e dua na cala me cudruvi kina.” 5Sa qai curu ki tuba o Jisu; ka sa vakaisala tu ena i sala wavakavotona ka vakaisulu ena i sulu lokaloka. Sa qai kaya vei ira o Pailato, “Raica! Sa tu oqo o koya!”
6Ni ra sa raici koya o ira na bete levu kei ira na ovisa, era sa qai kailavaka mai, “Vakota ki na kauveilatai! Vakota ki na kauveilatai!”
Sa qai kaya vei ira o Pailato, “Ni kauti koya o kemuni, ka vakota ki na kauveilatai. Au sa sega ni kunea vua e dua na cala.”
7Era a kaya yani vua o ira na Jiu, “Sa vauci tu ena neimami lawa ni sa dodonu me mate o koya oqo, baleta ni sa tukuna ni sa Luve ni Kalou o koya.”
8Ni sa rogoca o Pailato na vosa o ya, sa qai levu cake ga kina na nona rere; 9ka sa curu tale ki na valeniveilewai, ka kaya vei Jisu, “E vei na vanua o lako mai kina?”
Ia sa sega ni sauma o Jisu. 10Sa qai kaya kina vua o Pailato, “O na sega li ni vosa vei au? O sega beka ni kila ni tu vei au na kaukauwa me'u sereki iko, ka tu talega vei au na kaukauwa me'u vakoti iko ki na kauveilatai?”
11Sa qai sauma vua o Jisu, ka kaya, “E sega ni dua na kaukauwa e tu vei iko me baleti au, kevaka e sega ni soli vei iko mai vua na Kalou; o koya oqo e levu cake kina na nona i valavala ca o koya ka a soli au yani vei iko.”#Ym 6.3
12Ni sa rogoca oqo o Pailato, sa qai saga eso na sala me sereki koya kina. Ia o ira na Jiu era sa qai qoqolou ga, ka kaya, “Kevaka o ni sereki koya na tamata oqo, o ni sa sega ni to vata kei Sisa. O koya ga e tukuni koya tiko ni tui sa saqati Sisa tiko.”
13Ni sa rogoca na veivosa o ya o Pailato, sa qai kauti Jisu ki tautuba ka dabe ena i dabedabe ni veilewai ena vanua sa vakatokai “Na Raravatu”. (Oqo na vanua o “Kapaca” ena vosavakaiperiu.) 14Na gauna oqo sa rauta toka na siga levu tutu ni siga ni Vakavakarau ni Lakosivia. Sa qai kaya vei ira na Jiu o Pailato, “Sa i koya oqo na nomuni tui!”
15Era sa qai kailavaka lesu, “Vakamatei koya! Vakamatei koya! Vakoti koya ki na kauveilatai!”
Sa qai tarogi ira tale o Pailato, “O ni sa vinakata li me'u vakota na nomuni tui ki na kauveilatai?”
Era a qai sauma yani na bete levu, “Sa neimami tui duadua ga o Sisa!”
16Sa qai soli Jisu yani vei ira o Pailato me vakoti ki na kauveilatai.
Sa Vakoti ki na Kauveilatai o Jisu
(Maciu 27.32-44; Mari 15.21-32; Luke 23.26-43)
Era sa qai tauri Jisu. 17Sa qai lako yani o koya, ka colata na nona kauveilatai, ka yaco ki na vanua e vakatokai na “Vanua ni Qavokavoka” ka vakatokai o Kolikoca ena vosa vakaiperiu. 18E kea era sa qai vakoti koya kina, vata kei na lewe rua tale na tamata, e rau a yadua na yasana, ka tiko o Jisu ena kedrau maliwa. 19Sa qai vola o Pailato e dua na i vakatakilakila, ka tokara ena ulu ni kauveilatai. E volai toka kina, “O Jisu na kai Nasareci, na nodra Tui na Jiu.” 20Era a wilika na i vakatakilakila o ya e lewe vuqa vei ira na Jiu, ka ni voleka tikoga ki na koro na vanua ka a vakoti kina ki na kauveilatai o Jisu. E a volai na i vakatakilakila ena vosa vakaiperiu, vaka-Roma, kei na vosa vaka-Kirisi. 21Era a qai kaya vei Pailato na nodra bete levu, “Mo ni kakua ni vola, ‘Na nodra Tui na Jiu’; me volai ga, ‘E kaya, Oi au na nodra Tui na Jiu.’ ”
22Sa qai sauma o Pailato, ka kaya, “Na ka au sa vola, au sa vola!”
23Ni ra sa vakoti Jisu oti ki na kauveilatai o ira na sotia, era sa qai taura na nona i sulu, ka wasea vakava, me ra yadua na tikina o ira na sotia; era a taura talega vakakina na i tutuvi: ia na i tutuvi o ya e sega ni cula, ka ni tali taucoko ga na tutuna mai cake ka kauta sara ki ra. 24Era a mani veivosakitaka kina na sotia, “Me da kakua ni dresuka; me da vakawirimadigi ga, se o cei me qai nona.” A sa yaco oqo me vakayacori kina na i Vola Tabu, ni sa kaya,
“Era sa qai veivotayaka na noqu i sulu.
Ia na noqu i tutuvi era sa vakawirimadigi kina.”
Sa i koya o ya na ka era a cakava na sotia.#Same 22.18
25E ratou a tu voleka tu ena kauveilatai i Jisu o tinana, kei na taci tinana, o Maria na wati Kilopa kei Maria na yalewa ni Makitala. 26A sa raici tinana o Jisu kei koya na tisaipeli sa dau lomana ni rau tucake vata tu e kea; a sa qai kaya kina vei tinana, “Yalewa, na luvemu oqori.”
27Sa qai kaya vua na tisaipeli, “Oqori na tinamu!” Mai na tiki ni gauna o ya, a sa kauti koya sara na tisaipeli o ya ki na nona vale.
Na Mate i Jisu
(Maciu 27.45-56; Mari 15.33-41; Luke 23.44-49)
28Ni sa oti o ya, ka sa kila o Jisu ni sa vakacavari na ka kecega, me vakayacori sara kina na i Vola Tabu, sa qai kaya, “Au sa viagunu.”#Same 69.21; 22.15
29E a tu e kea e dua na bilo sinai ena wai wiwi. Era a mani tonisua e dua na vutovuto ena wai wiwi, ka ciqira ena dua na taba ni isopi, ka dulaka cake ki gusuna. 30Ni sa gunuva oti na wai wiwi o Jisu, sa qai kaya, “Sa oti!”
Ni sa oti o ya sa qai vakacuvara na uluna, ka solia yani na yalona.
Lausua na Sarisari i Jisu
31Me vaka ni sa Siga Vakaraubuka na siga o ya, ka sega ni dodonu kina me na rube tu na yagodratou me yacova yani na Siga ni Vakacecegu, era a mani kerei Pailato kina o ira na Jiu me musuki na yavadratou ka me ratou kau tani mai kea. 32Era sa mani lako na sotia ka musuka na yavana na i matai ni tamata ka vakakina na kena i karua erau sa vakoti vata kei Jisu ki na kauveilatai. 33Ia ni ratou sa yacovi Jisu yani, e ratou sa raica ni sa mate oti tu, era sa sega kina ni musuka na yavana. 34Ia e dua vei ira na sotia sa qai suaka na sarisarina ena dua na moto, ka sa dave mai kina na dra kei na wai. 35(Sa tukuna na veika oqo o koya ka sa vakadinadinataka e matana, me rawa kina ni o ni vakabauta vakakina. Sa dina sara na veika sa tukuna, ka sa kila talega vakai koya ni sa tukuna voli na i tukutuku dina.) 36Era sa yaco na veika oqo me vakayacori sara kina na i Vola Tabu:
“Ena sega ni ramusu e dua na suina.”#Lako 12.46; Tiko 9.12; Same 34.20 37E dua tale na tiki ni Vola Tabu e kaya,
“Era na rai yani vua, o koya era a suaka.”#Saka 12.10; Vtaki 1.7
Na Bulu i Jisu
(Maciu 27.57-61; Mari 15.42-47; Luke 23.50-56)
38Ni sa oti na veika o ya, sa qai kerei Pailato o Iosefo na kai Arimacea me kauta na yago i Jisu. O Iosefo oqo e dua na tisaipeli i Jisu, ia sa dau muri koya vunivuni tu ga, ka ni a rerevaki ira tiko na Jiu. A mani vakadonuya vua o Pailato, ka sa lako sara o Iosefo ka la'ki kauta na yagona. 39E a lako talega yani o Nikotimo, o koya ka a la'ki raici Jisu ena dua na bogi, ka kauta yani na mura e veiwaki vata kei na yasi, ka rauta e tolusagavulu na kilokaramu na kena bibi.#Joni 3.1,2 40E rau sa qai kauta na yago i Jisu ka solega vata kei na ka boi vinaka ena i sole lineni, me vaka na i vakarau ni nodra veibulu na Jiu. 41A sa tiko ena dua na i teitei ena vanua sa vakamatei kina o Jisu, ka sa tiko e kea e dua na i bulubulu vou ka sega mada ni se bau vakayagataki. 42E rau sa mani buluti Jisu e kea me vaka ni sa voleka sara na Siga ni Vakacecegu kei na kena sa toka voleka ga e kea na i bulubulu oqo.
Currently Selected:
Joni 19: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.