YouVersion Logo
Search Icon

Dauveilewai 1

1
Vesuki Etonipeseki o Ira na Yavusa o Juta kei Simione
1Ni sa mate oti o Josua era sa taroga vei Jiova na Isireli ka kaya, “O cei na mataqali vei keimami e dodonu me liutaka na nodra valuti na kai Kenani?”
2A sa sauma o Jiova ka kaya, “Na yavusa o Juta ena liu taumada, ka ni'u sa solia vei ira me ra lewa na vanua.”
3Era sa kaya na Juta vei ira na yavusa i Simione, “Me da mai lako vata ka la'ki taura na vanua sa soli vei keda, io me da la'ki valuti ira vata na kai Kenani. Ia eda na qai lako vata ka valuta na vanua sa soli vei iko.” E rau a mani lako vata kei na yavusa i Simione, 4Sa qai lako cake na yavusa i Juta me tekivu na i valu. A sa solia vei ira o Jiova me ra qaqa vei ira na kai Kenani kei ira na Perisaiti ka vakamalumalumutaka e tini na udolu na tamata i valu mai Peseki. 5Era sa kunei Etonipeseki e Peseki ka valuti koya ka vakamalumalumutaki ira na kai Kenani kei ira na Perisaiti. 6A sa dro yani o koya, ia era a cici muri koya ka vesuka; era a musuka na i qaqalo levu ni ligana kei na qaqalo levu ni yavana. 7Sa qai kaya o Etonipeseki, “Era sa lewe vitusagavulu na tui sa musu na i qaqalo levu ni ligadra kei na i qaqalo levu ni yavadra ka ra sa tomika na meme ni kakana mai na ruku ni noqu teveli. Ia oqo sa vakayacora vei au o Jiova na ka au dau cakava vei ira.” Era a kauti koya ki Jerusalemi ka la'ki mate kina.
Kabai Jerusalemi kei Epironi na Yavusa Juta
8Era a kabai Jerusalemi na mataivalu i Juta ka vakamalumalumutaka. Era a vakamatei na kena tamata ka vakamai na koro. 9Ia ni ra vakayacora oti oqo era a lako yani ka valuti ira na kai Kenani era tiko ena veidelana kei na ruku ni veiulunivanua kei na veivanua talasiga vaka ki na ceva. 10Era sa kabai ira na kai Kenani ka ra tiko ena koro o Epironi, ka dau vakatokai e liu me o Kiriaci Aripa. Ia mai kea era sa vakamalumalumutaka na yavusa i Sesei, Eimani, kei Talimei.
Valuta na Koro Levu o Tipira o Ocenieli
(Josua 15.13-19)
11Mai kea era a lako ka valuti ira na kai Tipira na yaca ni vanua o ya e liu o Kiriaci-seferi. 12A sa kaya o Kelevi, “Ia o koya ena vakamalumalumutaki Kiriaci-seferi ka taura, au na solia vua na luvequ yalewa o Akesa me watina.” 13A sa vakamalumalumutaka na koro o ya o Ocenieli, na luve i koya e gone vei Kelevi ka yacana o Kenasi, ka sa mani solia kina vua o Kelevi na luvena yalewa o Akesa me watina. 14Ni sa lako mai na goneyalewa, a sa vakauqeti watina me kerea vei tamana e dua na tiki ni vanua. Ia ni sobu mai na nona asa o Akesa, a tarogi koya sara o Kelevi ka kaya, “E sa vakaevei?” 15A sa kaya vua o Akesa, “Au gadreva eso na mataniwai. Na tiki ni qele o sa solia oti vei au e tiko ena vanua mamaca.” A sa solia kina vua o Kelevi na mataniwai e yasana i cake kei na mataniwai e yasana i ra.
Na Nodra Qaqa na Yavusa o Juta kei Penijamini
16Na kawa nei vugoi Mosese, o ira na Kenaiti, era a lako vata cake kei ira na kai Juta mai Jeriko, na koro ni veiniusawa, me yaco sara ki na vanua lala ena ceva kei Arati ena loma i Juta. Mai kea, era a vakaitikotiko vata kei ira na Amalekaiti.#1.16 Eso na i vakavakadewa makawa Amalekaiti; Vakaiperiu tamata. 17O ira na Juta era a lako vata kei ira na Simione, ka ra vakamalumalumutaki ira na kai Kenani era sa vakaitikotiko e Sefaci, ka ra vakarusa. A sa vakatokai kina na koro o ya me yacana o Oma.#1.17 Oma: Na yaca oqo ena vosa vakaiperiu e kena i balebale “vakarusai.” 18Era a valuta ka taura na vanua o Qasa na Juta kei na veivanua volekati Asikiloni ena kena veiyasana kecega, kei Ekironi, kei na kena veiyasana talega. 19A sa tiko kei ira na Juta o Jiova, ka ra vakadruka kina na vanua veidelana, ia era a sega ga ni vakasavi ira tani rawa era tiko ena buca, baleta ni tiko vei ira na qiqi kaukamea. 20Me vaka na vosa ni yalayala taumada i Mosese, sa soli o Epironi vei Kelevi, ka a vakasevi iratou tani kina e tolu na matatamata era kawa mai vei Anaki. 21Ia o ira na Penijamini era a sega ni vakasavi ira tani na Jepusaiti era tiko e Jerusalemi, ka ra sa mani tiko ga kina na Jepusaiti e Jerusalemi vata kei ira na Penijamini me yacova na siga oqo.#Josua 15.63; 2Samu 5.6; 1Vei 11.4
Rau Ravuti Peceli o Ifereimi kei Manasa
22A sa lako cake na vuvale i Iosefo me valuti Peceli ka sa tiko vata kei ira o Jiova. 23Era a vakatala yani eso na yamata o ira na vuvale i Iosefo ki Peceli (na yaca ni koro o ya e liu o Lusa). 24Ni ra raica na yamata ni sa lako mai na koro levu e dua na tamata, era a kaya vua, me vakaraitaka mada vei ira na gaunisala ki na koro levu, era na qai vakabulai koya. 25Sa qai vakaraitaka o koya na sala ki na koro levu; ia era sa valuta na koro o ya ena i seleiwau; ka ra laivi koya na tamata o ya kei na nona matavuvale me bula. 26A sa lako yani na tamata o ya ki na nodra vanua na Itaiti ka tara kina na nona koro, sa vakatoka me yacana o Lusa ka sa yacana tikoga me yacova na siga oqo. 27O ira na yavusa i Manasa era a sega ni vakatalai ira laivi na tamata era tiko ena veikoro lelevu e Peci Siani, kei Tenaki, kei Toro, kei Ipiliami, kei Mekito, kei na kena veikoro lalai e volekata; ia o ira na kai Kenani era sa bula voli ga ena vanua o ya.#Josua 17.11-13 28Ia ni sa tubu me kaukauwa cake o ira na Isireli, era sa qai vakasaurarataki ira na kai Kenani me ra cakacaka vakabobula vei ira, ia era sega ga ni vakatalai ira tani mai na vanua o ya. 29O ira na Ifereimi era a sega ni vakatalai ira tani na kai Kenani era a tiko e Keseri, ka vakavuna oqo me ra bula vata voli ga kina kei ira na kai Kenani.#Josua 16.10
30O ira na Sevuloni era sa sega ni vakatalai ira tani na kai Kitironi se o ira era sa tiko e Nelioli, ia o ira na kai Kenani era a tiko kei ira ka ra sa yaco me ra vakarorogo vei ira ka vakacakacakataki vakaukauwa. 31O ira na luve i Aseri era sa sega ni vakatalai ira tani na kai Ako na kai Saitoni, na kai Alapi, na kai Esikipi, na kai Elipa, na kai Afiki kei na kai Riopi. 32Ia o ira na Aseri era sa bula ka tiko kei ira na kai Kenani ena veivanua kecega oqo ka sega ni vakatalai ira tani.
33Ia o ira na luve i Navitalai era sa sega ni vakatalai ira tani na tiko e Pecisemesi se o ira era sa vakaitikotiko e Pecianaci, ia era sa bula vata ga kei ira na kai Kenani o ira na vakaitikotiko ena vanua, ka vaka talega kina vei ira era sa tiko e Pecisemesi kei Pecianaci ka ra yaco me ra vakarorogo vei ira ka nodra tamata cakacaka talega.
34O ira na Amoraiti era sa tarovi ira vakaukauwa na luve i Tani me ra vakasuka ki na veidelana, ka sega ni vakatarai ira me ra lako sobu mai ki na buca. 35O ira na Amoraiti era sa vakatekivu me ra tiko ena veivanua o Eresi, mai Eijaloni ka vaka talega kina mai Selipimi, ia na ligadra na luve i Iosefo a vakararavi vakatabakidua vei ira ka yaco me nodra tamata cakacaka talega. 36Na i yalayala ni nodra vanua na kai Amoraiti sa cici vaka ki Akirapimi mai Sela ka vakakina ki cake.

Currently Selected:

Dauveilewai 1: FNVDC12

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy