Efeso 1
1
1 #
Caka 18.19-21; 19.1 Oqo na i vola i Paula e dua na i apositolo i Karisito Jisu me vaka na lewa ni Kalou.
Ki vei ira na tamata lotu mai Efeso, era sa yalodina tiko vei Karisito Jisu. 2Me nomuni na loloma kei na vakacegu mai vua na Kalou o Tamada kei na Turaga o Jisu Karisito.
Na Veivakalougatataki Vakayalo ena Vuku i Karisito
3Me vakavinavinakataki na Kalou na Tama ni noda Turaga o Jisu Karisito, o koya ka sa vakalougatataki keda ena ka ni veivakalougatataki vakayalo kecega, mai na veiyasana vakalomalagi ena vuku i Karisito. 4Ni sa bera ni tauyavutaki o vuravura, sa digitaki keda tu na Kalou me da nona ena vuku i Karisito, me da savasava ka sega ni cala e matana. 5A sa lesi keda o koya ena nona loloma me da vakabau me da luvena ena vuku i Jisu, me vaka na i naki ni lomana. 6Me da vakacaucautaka kina na Kalou ena uasivi ni nona loloma-savu, ena i loloma soli wale vei keda ena vukuna na Luvena lomani! 7#Kolo 1.14Ni da sa sereki ena vuku ni nona mate ka sa bokoci na noda i valavala ca me vaka na levu ni nona loloma-savu, 8sa sovaraka vakayauyau mai vei keda. 9Ni sa vakatakila mai vei keda na Kalou na nona i naki vuni, na nona i naki vinaka sa vakarautaka me cakava na Karisito. 10Na i naki ni Kalou, sai koya ena vakataucokotaka ena gauna sa lokuca, me vakaduavatataka na veika kecega mai lomalagi kei na veika e vuravura vei Karisito.
11Ni sa caka na ka kecega me vaka na i naki kei na lewa ni Kalou; ka sa digitaki kemuni na Kalou mo ni nona tamata ena vuku i Karisito me vaka na nona i naki, ka sa yavutaki na i naki oqo mai na veika sa vakatulewataka mai na i vakatekivu. 12O koya oqo me da qai vakacaucautaka kina na lagilagi ni Kalou, oi keda na i sevu ni tamata ka vakanuinui taumada vei Karisito.
13Oi kemuni talega sa yaco mo ni tamata ni Kalou ena vuku ni nomuni sa rogoca na i tukutuku dina, na Tukutuku Vinaka sa kauta mai na veivakabulai. O ni sa vakabauti Karisito, ka sa dregata kina na Kalou na nona i vakatakilakilataki ni sa taukeni kemuni, ni sa solia vei kemuni na Yalo Tabu sa yalataka. 14Na Yalo Tabu sai koya na i vakadei ni noda na vakaivotavota ena veika sa yalataka na Kalou vei ira na nona tamata, ka vakataudeitaka talega na soli ni bula galala mai vua na Kalou vei ira sa nona. Me vakacaucautaki kina na lagilagi ni Kalou!
Na Masu i Paula
15Ena vuku ni ka oqo, ena gauna ga au rogoca kina na nomuni vakabauta na Turaga o Jisu kei na nomuni loloma vei ira na tamata lotu, 16au sa sega ni mudu ni vakavinavinaka tiko vua na Kalou ena vukumuni. Au sa dau nanumi kemuni tikoga ena noqu masu 17vua na Kalou ni noda Turaga o Jisu Karisito, na Tamada lagilagi me solia vei kemuni na Yalo ni Kalou, mo ni kilai koya kina. 18Me vakararamataki talega na yalomuni, mo ni kila kina na ka sa nuitaki ka sa kacivi kemuni kina o koya, na nona veivakalougatataki lagilagi me baleti ira na nona tamata. 19Kei na kena levu ni nona kaukauwa sa cakacaka tiko vei keda eda vakabauta, me vaka na cakacaka ni nona kaukauwa 20#Same 110.1sa vakayagataka ena nona vakaturi Karisito cake tale mai na mate, ka vakatikori koya ena ligana i matau ena veiyasana vakalomalagi. 21Sa cecere cake kina o Karisito vei ira kecega sa liu, kei ira sa nodra na lewa, kei ira era sa kaukauwa ka qaqa, ka sa cecere cake mai na veiyaca sa dau cavuti ena gauna oqo kei na veigauna e muri. 22#Same 8.6 #Kolo 1.18A sa vakamalumalumutaka na veika kecega na Kalou ka biuta ena ruku ni yava i Karisito, ka sa lesi koya me lewa na veika kecega ena vuku ni soqosoqo lotu. 23Na i soqosoqo lotu sai koya na yago i Karisito, ka sa vakataucokotaki mai vei Karisito, o koya sa vakataucokotaka na ka kecega.
Currently Selected:
Efeso 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.