YouVersion Logo
Search Icon

2 Timoci 1

1
1Oqo na i vola mai vei Paula, e dua na i apositolo i Karisito Jisu ena lewa ni Kalou, ka sa talai me vunautaka na bula yalataki sa noda ena vuku ni noda sa tu vata kei Karisito.
2 # Caka 16.1 Kivei Timoci, na luvequ lomani:
Me solia vei iko na loloma-savu, yalololoma kei na vakacegu o koya na Kalou na Tamada kei Karisito Jisu na noda Turaga.
Na Vakavinavinaka kei na Veivakayaloqaqataki
3Au sa vakavinavinaka vua na Kalou, o koya au sa qarava ena lewa-e-loma sa savasava, me vaka era sa vakayacora na noqu qase eliu. Au sa vakavinavinaka vua ena veigauna au dau nanumi iko kina ena noqu masu wasoma ena bogi kei na siga. 4Au sega ni dau guilecava na nomu tagi, ka'u sa gadreva vakalevu kina me'u raici iko tale, me rawa ni'u vakasinaiti ena reki. 5#Caka 16.1Sa vakadeitaki tale vei au na vakabauta dina sa tu vei iko, na vakabauta e tu e liu vei Loi na bumu, ka kune talega vei Unaisi na tinamu, ka'u vakadinata ni sa tiko talega vei iko. 6Oqo na vuna au sa vakananumi iko yani kina mo vakabulabulataka tikoga na i solisoli sa solia vei iko na Kalou ena vuku ni veitabaki ni ligaqu vei iko. 7Ni sa sega ni solia na Kalou vei keda na yalo ni rere, ia na yalo ga sa solia vei keda na kaukauwa, na loloma, kei na bula vakaivakarau.
8Mo kakua ni madua kina ena nomu vakadinadinataki Karisito; se mo maduataki au, na nona tamata sa vesu tu. Ia mo ciqoma ga na nomu i votavota ni veivakararawataki ena vuku ni Tukutuku Vinaka, ni sa solia na Kalou vei iko na kaukauwa mo vakayacora vakakina. 9Sa vakabulai keda na Kalou ka sa kacivi keda me da nona tamata, ka sa sega ni vu oqo mai na veika eda sa cakava, ia sa vu ga mai na nona i naki kei na nona loloma-savu. A sa solia vei keda o koya na nona loloma-savu oqo ena vuku i Karisito Jisu ni bera ni vakatekivutaki o vuravura, 10ia oqo sa qai vakatakilai vei keda ni sa rairai mai na noda i Vakabula, o Jisu Karisito. Sa mai muduka o koya na kaukauwa ni mate ka vakatakila ena kosipeli na bula sa tawamudu rawa.
11 # 1Timo 2.7 Sa digitaki au kina na Kalou ena vuku ni kosipeli me'u kena daunikacikacivaki, ka kena i apositolo, ka kena qasenivuli talega. 12Sa i koya oqo na vuna ka'u sa sotava kina na veika dredre oqo. Ia ka'u sa sega ni madua baleta ni'u sa kilai koya au sa vakabauta, ka'u vakadinata ni sa rawa vua me maroroya vinaka tiko na veika sa solia vei au me yacova na Siga o ya. 13Mo taura matua na veivosa vinaka eso ka'u a vakatavulica vei iko, me i vakaraitaki ni veika mo muria, ka vakataudeitaki iko tikoga ena vakabauta kei na loloma sa noda ena noda tu vata kei Karisito Jisu. 14Taura matua na i solisoli vinaka sa nuitaki vei iko ena kaukauwa ni Yalo Tabu.
15Me vaka o sa kila, era sa biuti au o ira kece sara mai Esia, ka wili kina o Faijelo kei Erimojini. 16Me yalololoma na Turaga ki na vuvale i Onisivoro, ni sa dau vakacegui au sara vakavuqa o koya ka sega ni maduataki au ena noqu vesu tu, 17ia ena gauna ga sa yaco yani kina ki Roma, a sa vaqarai au sara me yacova ni sa raici au. 18Me qai solia vua na Turaga na nona mataloloma ena Siga o ya! Io, o ni sa kila vinaka na levu ni cakacaka sa qarava o koya mai Efeso.

Currently Selected:

2 Timoci 1: FNVDC12

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy