1 Korinica 1
1
1Oi au o Paula, au sa kacivi ena lewa ni Kalou me'u i apositolo i Jisu Karisito; au sa vakayagataki Sosiceni na wekada me vola yani na noqu i vola oqo. 2Ki na i soqosoqo lewenilotu ni Kalou mai Korinica, vei ira era sa tu vata kei Karisito ka ra sa vakasavasavataki me ra nona, vata kei ira kecega mai na veivanua kecega era sa dau masuta na yaca ni noda Turaga o Jisu Karisito, o koya sa nodra Turaga ka noda talega:#Caka 18.1 3Me nomuni mada ga na loloma kei na vakacegu mai vua na Kalou o Tamada, kei na Turaga o Jisu Karisito.
Na Veivakalougatataki ena Vuku i Karisito
4Au sa dau vakavinavinaka tikoga vua na noqu Kalou ena vukumuni, ena vuku ni nona loloma-savu sa solia vei kemuni ena vuku i Karisito Jisu. 5Ni o ni sa vakavutuniyautaki kina ena ka kecega ena vukuna, ena i vakarau ni nomuni vosa kecega kei na nomuni kila-ka. 6Me vaka ni sa vakadinadinataki ena nomuni bula na i tukutuku kei Karisito, 7sa sinai tu kina vei kemuni ena gauna oqo na veisolisoli vakayalo kecega ena nomuni waraka tiko na gauna ena basika tale mai kina na noda Turaga o Jisu Karisito. 8Ena vakataudeitaki kemuni tu o koya, mo ni kakua ni vakacalai me yacova na i vakataotioti, na Siga ena lesu tale mai kina na noda Turaga o Jisu Karisito. 9Sa yalodina na Kalou, o koya sa kacivi kemuni mo ni veitokani vata kei na luvena, o Jisu Karisito na noda Turaga.
Na Tatawasewase e Tu ena Lotu
10Au sa vakamasuti kemuni na veiwekani ena yaca ni Turaga o Jisu Karisito, me duavata ga na ka o ni kaya me kakua kina na veisei ena kemuni maliwa; ia mo ni sa duavata sara ena vakasama kei na lewa. 11Eratou vakaraitaka mai vei au na lewe ni vuvale i Kiloi ni yaco tiko na veisei ena kemuni maliwa na wekaqu. 12Sa vakaoqo na ka au sa vosa kina, ni sa duidui na veika o ni sa kaya tiko. Ni sa kaya e dua, “Au sa muri Paula”; e dua tale, “Au sa muri Apolosa”; e dua tale, “Au sa muri Pita”; kei na dua tale, “Au sa muri Karisito”.#Caka 18.24 13Sa tatawasewase beka na Karisito? A vakoti beka ki na kauveilatai ena vukumuni o Paula? O ni a papitaisotaki beka mo ni tisaipeli i Paula?
14Au sa vakavinavinaka vua na Kalou ni'u a sega ni papitaisotaka e dua vei kemuni, oi rau ga o Kirisipo kei Keio;#Caka 18.8; Caka 19.29; Roma 16.23 15de qai kaya kina e dua vei kemuni ni a papitaisotaki ena yacaqu. 16(Au a papitaisotaki iratou talega na vuvale i Sitifana; ia au sa sega ni nanuma rawa tale e dua ka'u a papitaisotaka.)#1Kori 16.15 17Ni sa sega ni talai au mai na Karisito me'u mai veipapitaisotaki, ia me'u vunautaka ga na i Tukutuku Vinaka, sa segai ena vosa ni vuku vakatamata de vakatawayagataki kina na kaukauwa ni kauveilatai i Karisito.
O Karisito na Kaukauwa kei na Vuku ni Kalou
18Ni sa ka lialia vei ira sa yali ka lako sese na vunautaki ni kauveilatai, ia sa kaukauwa ga ni Kalou vei keda eda sa vakabulai kina. 19Ni sa kaya na Kalou ena i Vola Tabu:
“Au na vakarusa na nodra vuku na daunivuku,
Ka'u na vakatawayagataka na nodra kila-ka na tamata kila-ka.”#Aisea 29.14 (LXX)
20Sa evei kina na vuku? Sa evei o ira na daunivolavola? Sa evei o ira na dauveileti ni vuravura oqo? Sa vakatakila ga na Kalou ni sa ka lialia na vuku ni vuravura oqo!#Jope 12.17; Aisea 19.12; 33.18; Aisea 44.25
21A sa cakava na Kalou, ena dela ni nona vuku, me ra kakua ni kilai koya rawa na tamata mai na nodra vuku vakatamata. Ia sa lesia ga na Kalou me ra qai kilai koya mai na ka e vakatokai na i tukutuku “lialia” keitou sa vunautaka, me ra vakabulai kina o ira yadua sa vakabauta.#Ym 13.1-9 22Era sa dau vinakata na ka veivakurabuitaki me i vakadinadina o ira na Jiu, ka ra vakasaqara na vuku na kai Kirisi. 23Ia oi keitou, keitou sa vunautaka na Karisito ka sa lauvako ki na kauveilatai, ai tukutuku sa veivakatarabetaki vei ira na Jiu ka sa ka lialia vei ira na kai Kirisi; 24ia kivei ira sa kaciva na Kalou, se ra Jiu se ra kai Kirisi, na Karisito na kaukauwa ni Kalou kei na vuku ni Kalou. 25Ni veika e nanumi ni ka lialia ni Kalou sa vuku cake sara mai na vuku vakatamata, kei na veika e nanumi ni ka malumalumu ni Kalou sa kaukauwa cake sara mai na kaukauwa vakatamata.
26Ni vakasamataka lesu mada na nomuni i tutu ni bula, oi kemuni na veiwekani, ena gauna e kacivi kemuni kina na Kalou. Mai na rai vakatamata, era a lewe vica wale sara vei kemuni era tamata vuku se ra cecere se ra sucu turaga. 27A sa nakita na Kalou me digitaka na ka sa okata o vuravura me ka lialia, me vakamadualaki ira kina na vuku; ka sa digitaka na ka sa okata o vuravura me ka malumalumu, me vakamadualaki ira kina sa kaukauwa. 28Sa digitaka na Kalou na veika sa raica sobu ka beca e vuravura, ka sa nanuma ni sa tawa yaga, me vakarusa kina na veika sa nanuma o vuravura ni yaga vakalevu, 29me kakua kina ni dua me dokadokai koya ena mata ni Kalou. 30Ia sai koya ga na Kalou sa vu ni nomuni veiwekani kei Karisito Jisu, ka sa vakayacori Karisito na Kalou me noda vu ni vuku, kei na vu ni veivakadonui, kei na vu ni veivakasavasavataki, kei na vu ni bula, 31me vakayacori kina na ka sa volai tu, “O koya sa via boletaka e dua na ka, me boletaka ga na veika sa cakava na Turaga.”#Jere 9.24
Currently Selected:
1 Korinica 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.