Juan 2
2
Yakuta vïnuman Jesús tikrasishqan
1Saypita kimsa junaqtanami casaray fiesta karqan Galileacho kaykaq Caná markacho. Say fiestachömi kaykarqan Jesúspa mamanpis. 2Saymanmi Jesústapis discïpulunkunatawan qayasiyarqan. 3Fiesta manaraq ushakaptinmi vïnuta ushakäpakuyarqan. Saymi Jesústa maman nirqan: <<Vïnunkunami ushakaskish>>.
4Sayno niptinmi Jesús nirqan: <<Mamay, ¿imanirtaq jatikämunki? Manaraqmi hörä chämunraqsu>>.
5Jesúspa mamannami sirvientikunata nirqan: <<Jesús niyäshushqaykita lapanta rurayay>>.
6Saychömi rumipita rurash soqta urpukuna kaykarqan. Say urpukunamanmi costumbrin kashqanno yakuta winayaq purificakuyänanpaq. Say urpukunaman pachak (100) litrunömi yaku yaykuq. 7Saymi sirvientikunata Jesús nirqan: <<Say urpukunaman yakuta juntaqpaq winayay>>.
Saymi yakuta winayarqan juntashqanyaq. 8Juntarkasiyaptinnami Jesús nirqan: <<Ichiklata chaqarkur mayor sirvienti yawananpaq apayay>>.
Sayno niptinmi Jesús nishqannöla chaqarkur apapäyarqan. 9Mayor sirvienti yawarkurmi ali kaq vïnu kashqanta tantiyarqan. Isanqa manami musyarqansu maypita apayashqantapis. Yanapaq kaq sirvientikunalami maypita kashqantapis musyayarqan. Yawarkurnami casaraq maqtata qayaykur 10nirqan: <<Wakin runakunaqa fiesta qalaykunalanchömi alinnin kaq vïnuta qarakasiyan. Askata upuskiyaptinnami sheqi kaqlatana qarakuyan. Sayno kaptinpis qamqa fiesta ushananchöraq mas alinnin kaq vïnuta qarakaykäsinki>>.
11Saynömi Galileacho kaykaq Caná markacho punta kaq milagruta Jesús rurarqan. Munayyuq kashqanta rikarmi discïpulunkuna payman yärakuyarqan.
12Saypitanami mamanwan, wawqinkunawan y discïpulunkunawanpis Capernaúm markaman Jesús aywarqan.#Mat. 4.13. Saychömi juk ishkay junaq qoyäyarqan.
Templucho rantikuqkunata Jesús qarqushqan
Mateo 21.12-13; Marcos 11.15-17; Lucas 19.45-46
13Israel runakunapa Pascua#Éxo. 12.1-27; Deut. 16.1-8. fiestan qalaykunanpaqna kaykaptinmi Jerusalénman Jesús aywarqan. 14Chashpanmi templu patiucho törukunata, uyshakunata y palumakunatapis runakuna rantikuykäyaqta tarirqan. Saynöpis qellay rantikuqkunata tarirqan.#2.14 Jesús kawanan wisanmi Roma runakunapa qellayninta Israel runakuna imatapis rantipakuyänanpaq manijayaq. Tayta Diospaq ofrendata apayänanpaqmi isanqa templuman apananpaq kaq qellaytaraq rantiyaq. 15Sayno tariykurmi sumbadorta ruraskir uyshantinta töruntinta templu patiupita Jesús qarqurqan. Qellay trukasiqkunapa mësankunatapis tikrarmi qellayninkunatapis mashir usharqan. 16Paluma rantikuqkunatanami nirqan: <<¡Kaykunata jorquyay! ¡Imanirtaq papänïpa wayinta mercäduman tikrasiyashkanki!>>
17Jesús sayno ruraptinmi discïpulunkuna yarpäyarqan Tayta Diospa palabrancho kayno qelqaraykashqanta: <<Templuykitaqa wanuy kawaymi respitasishaq>>.#Sal. 69.9.
18Israel autoridäkunanami Jesústa niyarqan: <<¿Ima munaynikiwantaq rantikuqkunata qarqushkanki? Mä milagruta ruray munayyuq kashqaykita musyayänäpaq>>.
19Saymi Jesús nirqan: <<Kay templuta juchusiyay. Juchusiyaptiki kimsa junaqlatami sharkasishaq>>.#Mat. 26.61; 27.40; Mar. 14.58; 15.29.
20Sayno niptinmi autoridäkuna niyarqan: <<Kay templuta chusku chunka soqta (46) watatami sharkasiyash. ¿Imanöpataq qam kimsa junaqlata sharkarasinkiman?>>
21Sayno parlarqa Jesús manami templupaqsu parlarqan, sinöqa templuman tinkusikur kikinpaqmi parlarqan. 22Jesús wanushqanpita kawarimuptinnami discïpulunkuna yarpäyarqan sayno nishqanta. Saynöpami Jesús nishqanta y Tayta Diospa palabran nishqantapis criyiyarqan.
Runakuna imata yarpäyashqantapis Jesús musyashqan
23 Pascua fiestacho milagrukunata Jesús ruraykashqanta rikarmi Jesúsman aska runakuna criyiyarqan. 24Sayno kaptinpis janan shonqula criyiyashqanta musyarmi paykunaman Jesús yärakurqansu. 25Mana wilapaykäyaptinmi runakuna imata yarpäyashqantapis musyarqan.
Currently Selected:
Juan 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.