Juan 18
18
Jesústa prësu sariyashqan
Mateo 26.47-56; Marcos 14.43-50; Lucas 22.47-53
1Tayta Diosta Jesús manakuskirnami discïpulunkunawan Cedrón raqrata simpar jatun huertaman yaykuyarqan.#Mat. 26.36; Mar. 14.32.
2Sayman discïpulunkunawan Jesús cadala aywash kaptinmi Jesústa rantikuq Judas musyarqan sayman aywayashqanta. 3Saymi Jesústa prësu sariyänanpaq aksinkunawan y espädankunawan wardiakunata y aska soldädukunata pushakurkur Judas aywarqan. Say wardiakunata y soldädukunatami mandaq cürakuna y fariseukuna kachayarqan.
4Jesúsmi lapan päsananpaq kaqkunata musyar prësu sariyänanpaq aywaqkunata tinkupaykur tapurqan: <<¿Pitataq ashiykäyanki?>> nir.
5Saymi niyarqan: <<Nazaretpita kaq Jesústami ashiykäyä>>.
Saymi Jesús nirqan: <<Noqami Kä>>.#18.5 Noqami Kä nirqa Jesucristo tantiyasirqan kikin Dios kashqantami. Saypita masta musyanaykipaq liyinki Éxo. 3.14; Juan 10.30-33.
(Jesústa prësu sarisiq Judaspis saychömi kaykarqan.)
6<<Noqami Kä>> niptinmi ankalaypa tuniyarqan. 7Saymi yapay tapurqan: <<¿Pitataq ashiykäyanki?>> nir.
Niptinmi yapay niyarqan: <<Nazaretpita kaq Jesústami>>.
8Saymi Jesús nirqan: <<Maynami nishkä: <Noqami Kä>. Noqata ashimarqa noqalata prësu sariyämay. Kay runakunataqa ama sariyaysu>>.
9Sayno kananpaqmi nawpata manakur Tayta Diosta nirqan: <<Makïman churamushqayki kaqkunata manami mayqantapis oqrashkäsu>>.#Juan 17.12.
10Saymi Simón Pedro espädanta jorqurir juk runapa aluq kaq rinrinta walluriykurqan. Say runa karqan mas mandaq cürapa ashmayninmi. Paypa jutinmi karqan Malco. 11Sayno ruraptinmi Pedruta Jesús nirqan: <<¡Espädaykita kutisiy! Taytä qomashqan cöpata ¿manaku upüman?>>#18.11 Tayta Diospa cöpanqa mana cäsukuq runakunata castigashqanmi kaykan. Saymi say cöpata upunanpaq Jesús nirqa Diosta mana cäsukuq runakunapa trukan castigash kananpaq kashqanta nirqan.#Sal. 75.8; Isa. 51.17, 22; Jer. 25.15-17; Eze. 23.31-34; Hab. 2.16; Apoc. 14.9-10; 16.19.
Mas mandaq cürapa wayinman Jesústa apayashqan
Mateo 26.57-58; Marcos 14.53-54; Lucas 22.54
12Saypitanami capitanninwan soldädukuna y templu täpaq wardiakunapis Jesústa prësu sarir liyayarqan. 13Nirkurnami Caifáspa suedrun Anáspa wayinman apayarqan. Say wataqa Caifásmi mas mandaq cüra karqan. 14Paymi autoridä mayinkunata nish karqan: <<Lapansi wanunansipa trukanqa mas alimi kanman juk runala wanuptin>>.#Juan 11.49-50.
Jesústa Pedro ñëgashqan
Mateo 26.69-70; Marcos 14.66-68; Lucas 22.55-57
15Simón Pedrunami juk discïpulu mayinwan Jesúspa qepanta aywayarqan. Say discïpulumi mas mandaq cürawan reqinakush kar sawan rurinman yaykurqan. 16Pedrunami punkulacho quëdakuykurqan. Saymi ruriman yaykuq discïpuluqa punkucho cuidaq warmita ruwakurqan Pedrutapis yaykasinanpaq.
17Saymi say warmi Pedruta tapurqan: <<¿Manaku qampis taqay runapa discïpulun kaykanki?>>
Saymi Pedro nirqan: <<Manami>>.
18Saypitanami fiyupa alaptin ashmaykuna y templu täpaq wardiakunapis ninata sarirkasir mashakuykäyarqan. Paykunawanmi Pedrupis mashakuykarqan.
Mas mandaq cüra Anás Jesústa tapushqan
Mateo 26.59-66; Marcos 14.55-64; Lucas 22.66-71
19Saypitanami mas mandaq cüra Jesústa tapurqan: <<¿Pitaq discïpuluykikuna? ¿Imatataq yachasinki?>> nir.
20Saymi Jesús nirqan: <<Noqa manami imatapis pakaylapa yachasishkäsu. Sinagögakunacho y templuchöpis lapan runakunami yachasishqäta wiyayämash. 21¿Imanirtaq noqata tapumanki? Yachasishqäta wiyamaq runakunata tapumuy. Paykunami musyayan imata yachasishqätapis>>.
22Sayno niptinmi juk wardia Jesústa laqyaykur nirqan: <<¿Saynöku mas mandaq cürata contestanki?>>
23Saymi Jesús nirqan: <<Mana alita parlash kaptïqa tantiyasimay. Imatapis lutanta mana parlaykaptïqa ¿imanirtaq laqyamanki?>>
24Nirkurnami liyashlata mas mandaq cüra Caifás kaqman Anás apasirqan.#18.24 Anás mas mandaq cüra kaptinpis Roma runakuna payta qarquskirmi mashan Caifástana churayarqan mas mandaq cüra kananpaq.
Jesústa Pedro yapay ñëgashqan
Mateo 26.71-75; Marcos 14.69-72; Lucas 22.58-62
25Simón Pedro mashakuykaptinmi yapay tapur niyarqan: <<Qampis ¿manaku taqay runapa discïpulun kaykanki?>>
Saymi Pedro nirqan: <<Manami>>.
26Maylantanami mas mandaq cürapa ashmayninpis nirqan: <<Qamta paywan kaykaqtami huertacho rikashkä>>.
(Sayno niq runapa ayllunpa rinrintami Pedro wallurish kash.)
27Saymi Pedro yapay ñëgarqan. Say hörami kakash cantarkurqan.
Pilatuman Jesústa prësu apayashqan
Mateo 27.1-2, 11-14; Marcos 15.1-5; Lucas 23.1-5
28Pasa waraykaptinnami Caifáspa wayinpita Roma gobernadorpa despächunmanna Jesústa apayarqan. Israel autoridäkuna say despächuman manami yaykuyta munayarqansu. Paykuna yarpäyarqan sayman yaykurqa impüru rikakuyashpan Pascua mikuykunata mana mikuyänanpaq kashqantami. 29Pilatunami despächunpita yarquskir tapur nirqan: <<¿Ima jusanpitataq kay runata apayämushkanki?>>
30Sayno tapuptinmi niyarqan: <<Jusayuq kaptinmi apayämushkä. Jusaynaq kaptinqa manami apayämümansu karqan>>.
31Saymi Pilato nirqan: <<Leynikikuna nishqanno juzgayänaykipaq apakuyay>>.
Sayno niptinmi Israel runakunapa autoridäninkuna niyarqan: <<Noqakuna pitapis wanusiyänäpaq manami munayyuqsu kayä>>.
32Sayno nirmi cruzcho wanunanpaq Jesús nishqanta cumpliyarqan.#Juan 3.14; 12.32.
33Despächunman Pilato kutiskirmi Jesústa qayaykur tapurqan: <<¿Rasunpaku Israel runakunapa mandaqnin rey kanki?>> nir.
34Saymi Jesús nirqan: <<¿Kikikipa yarpaylaykipitaku o runakuna niyäshuptikiku sayno tapuykämanki?>>
35Sayno niptinmi Pilato nirqan: <<Noqa manami Israel runasu kä saykunata musyanäpaqqa. Marka mayikikunawan mandaq cürakunami prësu apayämushushkanki. ¿Imatataq rurashkanki prësu apayämushunaykipaq?>>
36Saymi Jesús nirqan: <<Noqa manami kay pasacho mandaqsu kaykä. Kay pasacho mandaq kaptïqa prësu sarimaqkunawan discïpulükuna pelyayanmanmi karqan>>.
37Sayno niptinmi Pilato tapurqan: <<Sayno nirqa ¿rasunpaku rey kaykanki?>>
Saymi Jesús nirqan: <<Rasun kaqtami nikanki. Rasun kaqta wilakunäpaqmi kay pasacho yurishkä y saypaqmi kay pasaman shamushkä. Pipis rasun kaqta musyayta munarqa wilakushqäkunata chaskikunmi>>.
38Sayno niptinmi Pilato nirqan: <<¡Imashi say rasun kaqqa kakunpis!>>
Jesústa crucificayänanpaq Pilato mandashqan
Mateo 27.15-31; Marcos 15.6-20; Lucas 23.13-25
Jesústa tapuskirnami despächunpita Pilato yapay yarqurir Israel runakunata nirqan: <<Noqa manami kay runapa ima jusantapis tarïsu. 39Qamkuna musyayankimi Pascua fiestacho cada wata juk prësuta kacharishqäta. ¿Munayankiku Israel runakunapa mandaqnin reyta kacharinäta?>>
40Sayno niptinmi lapan niyarqan: <<¡Jesústaqa ama kachariysu! ¡Barrabásta kachariyqa!>>
Barrabás karqan Romacho mas mandaq reypa contran sharkuqmi.
Currently Selected:
Juan 18: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.