Juan 13
13
Discïpulunkunapa chakinta Jesús maylapashqan
1 Pascua fiesta manaraq qalaykuptinpis Jesús maynami musyarqanna kay pasapita Taytan kaqman aywakunanpaqna kashqanta. Sayno kaykarpis payman criyiqkunataqa imaypis kuyashqannölami kuyarqan.
2Discïpulunkunawan Jesús manaraq meriendayaptinmi Simónpa surin Judas Iscariotita diablu mayna yarpayta qosh karqan Jesústa rantikunanpaq. 3Jesús musyarqanmi lapantapis munayninman Taytan churashqanta. Saynöpis musyarqanmi pay kaqpita shamushqanta y pay kaqman kutikunanpaq kashqanta. 4Saymi mikuykäyashqanpita sharkur janan kaq mödananta jorquskir toällata seqlanman wachkakurqan. 5Nirkurmi lavatoriuman yakuta winarkur discïpulunkunapa chakinta maylaparqan. Maylaparkurmi wachkaraykashqan toällawan sakisiparqan.
6Simón Pedrupa chakinta maylapänanpaq kaykaptinmi Pedro nirqan: <<Taytay, ¿imanöpataq chakïta qam maylapämankiman?>>
7Sayno niptinmi Jesús nirqan: <<Imanir maylapashqäta kanan manaraq tantiyarpis nirkurqa tantiyankimi>>.
8Sayno niptinpis Pedro nirqan: <<Chakïta manami imaypis maylapämankimansu, Taytay>>.
Sayno niptinmi Jesús nirqan: <<Chakikita mana maylapaptïqa manami discïpulüsu kanki>>.
9Niptinmi nirqan: <<Taytay, sayno kaptinqa ama chakilätaqa maylapämaysu, sinöqa makïtapis umätapis maylapaykalämay>>.
10Saymi Jesús nirqan: <<Pipis armakuskirnaqa chakilantanami maylakun. Qamkunaqa jusaykikunapita limpiunami kaykäyanki. Sayno karpis manami lapaykisu limpiu kaykäyanki>>.
11Sayno nirqan juk discïpulun payta rantikunanpaq kashqanta musyarmi.
12Discïpulunkunapa chakinta maylapayta ushaskirnami jorqushqan mödananta jatikurkur mësaman yapay jamakurqan. Nirkurmi nirqan: <<¿Tantiyayankiku imanir chakikikunata maylapashqätapis? 13Yachasikuq kashqäta y Señorniki kashqäta niyämashpayki rasun kaqtami niyämanki. 14Noqa yachasikuqniki y Señorniki kaykar chakikikunata maylapaykaptïqa qamkunapis chakikikunata jukniki juknikipis maylapänakuyanki. 15Noqata rikakamar qamkunapis rurayänaykipaqmi sayno rurashkä.#13.15 Say wisan ashmaykunalami pipatapis chakinta maylapaq. Saymi kay textucho Jesucristo nirqan ashmayno humillakur jukninsi jukninsi yanapänakunansipaq.#Mat. 20.28; Mar. 10.45; Luc. 22.27. 16Rasunpami nï: Ashmayqa manami patronninpita mas munayyuqsu kaykan.#Mat. 10.24; Luc. 6.40; Juan 15.20. Saynölami kacha aywaqpis kachaqninpita mas munayyuqsu kaykan.#13.16 Sayno nirmi Jesucristo tantiyasirqan patronnin kaykarpis ashmay japuy yanapashqanno discïpulunkunapis ashmay japuy runa mayinta yanapäyänanpaq. 17Kay nishqäta tantiyar cumplirqa kushishqami kawayanki.
18<<Manami lapaykipaqsu sayno nikä. Noqa musyämi mayqan discïpulükunata akrashqätapis. Tayta Diospa palabranpis kaynömi nikan: <Noqawan juntu mikuykarmi conträ sharkush>.#Sal. 41.9. Say qelqaraykaq cumplikanqami. 19Manaraq cumplikaptinmi qamkunata wilapaykä sayno kananpaq kashqanta. Saymi nishqänöla cumplikaptin musyayanki noqa kashqäta#13.19 Noqa kashqäta nirqa Jesucristo tantiyasirqan kikin Dios kashqantami. Saypita masta musyanaykipaq liyinki Éxo. 3.14; Juan 10.30-33..
20<<Rasunpami nï: Kachashqäkunata chaskikuqkunaqa noqatami chaskiykäyäman. Noqata chaskikamaqkunaqa kachamaqnïtapis chaskikuykäyanmi>>.#Mat. 10.40; Mar. 9.37; Luc. 9.48; 10.16.
Judas rantikunanpaq kashqanta wilashqan
Mateo 26.20-25; Marcos 14.17-21; Lucas 22.21-23
21Sayno nirkurmi Jesús fiyupa lakikushpan nirqan: <<Rasunpami nï: Qamkunapita juknikimi prësu sarisimanqa>>.
22Mayqanpaq nikashqantapis mana musyarmi discïpulunkuna jukninpis jukninpis rikapänakuyarqan. 23Say hörami Jesúspa kuyay discïpulun läduncho kaykarqan. 24Paytami Simón Pedro sëñarqan mayqanpaq parlaykashqantapis Jesústa tapunanpaq. 25Saymi kuyashqan discïpulun Jesúspa qasquman#13.25 Wakin runakunaqa pëchuman niyan. witiykur tapurqan: <<Taytay, ¿mayqäkunapaqtaq nikanki?>> nir.
26Jesúsnami nirqan: <<Tantata ushmarkasir makyashqä kaqmi kanqa>>.
Sayno nirmi tantata ushmarkasir Simónpa surin Judas Iscariotita aptaparqan. 27Say tantata chaskirkuptinmi Judasman Satanás yaykurqan. Saymi Jesús nirqan: <<Yarpaykashqaykita jukla ruray>>.
28Imanir sayno nikashqantapis manami mayqan discïpulunpis tantiyarqansu. 29Qellay sararaq kaptinmi wakin yarpäyarqan Pascua fiestapaq rantipakamuq Jesús kachaykashqanta. Wakinnami yarpäyarqan muchuqkunata yanapänanpaq kachaykashqanta. 30Tantata mikuskirnami Judas jukla aywakurqan. Say höra pasa sakashnami karqan.
Mushuq mandamientuta Jesús yachasishqan
31Judas yarquskiptinnami Jesús nirqan: <<Höra chämushnami Runapa Surin glorificash kananpaq#13.31 Glorificash kananpaq nishqanqa kaykan Jesucristo wanunanpaq kashqan, wanuskir kawarimunanpaq kashqan, Tayta Diosman kutikunanpaq kashqan y lapanpaqpis munayyuq kananpaq kashqanmi.. 32Tayta Diosta Runapa Surin glorificaptinmi#13.32 Tayta Diosta Runapa Surin glorificaptinmi nishqanqa Tayta Dios munashqanno wanuptïmi ninanmi. Runapa Surintapis Tayta Dios glorificanqa. Manaraqpis aykätami sayno glorificanqa.
33<<Kuyay wamräkuna, qamkunapita aywakunäpaqnami kaykä. Israel autoridäkunata nishqänölami qamkunatapis nikä: Ashimarpis noqa aywashqä kaqman manami aywayta kamäpakuyankisu.#Juan 7.34.
34<<Qamkunata kuyashqäno jukniki juknikipis kuyanakuyanki. Kay nishqäkunaqa mushuq mandamientumi kaykan.#Juan 15.12, 17; 1Juan 3.23; 2Juan 5. 35Sayno kuyanakuyaptikimi pïmaypis musyayanqa discïpulükuna kayashqaykita>>.
Pedro ñëgananpaq kashqanta Jesús nishqan
Mateo 26.31-35; Marcos 14.27-31; Lucas 22.31-34
36Sayno niptinmi Simón Pedro tapur nirqan: <<Taytay, ¿maypataq aywakunki?>>
Saymi Jesús nirqan: <<Noqa aywashqä kaqman manami aywayankiraqsu. Nirkurraqmi aywayanki>>.
37Saynami Pedro nirqan: <<Taytay, ¿imanirtaq qamwan jukla aywämansu? Qam raykuchir wanushaqpis>>.
38Saymi Jesús nirqan: <<¿Rasunpaku noqa rayku wanunaykipaq listu kaykanki? Rasunpami nï: Kakash manaraq cantaptinmi kimsa kuti mana reqimashqaykita ninkipaq>>.
Currently Selected:
Juan 13: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.