Santiago 1
1
1Maysaychöpis taykaq chunka ishkay trïbu Israel runakuna:
Noqa Santiago,#Mat. 13.55; Mar. 6.3; Gál. 1.19. Tayta Diospa y Señor Jesucristupa sirviqnin karmi qamkunata winchikamü.
Imano nakarpis Tayta Diosman yärakunansipaq nishqan
2Kuyay wawqi panikuna, ima nakaycho karpis lapan shonquykiwan kushikuyay. 3Musyayankimi nakarraq lapan shonquykiwan Tayta Diosman yärakuyashqaykita. 4Mana ajayaypa yärakurqa Tayta Dios munashqanno kawayänaykipaqmi shumaq yachakuyanki.
5Mayqaykipis Tayta Dios munashqanno kawayta mana kamäpakurqa tantiyasishunaykipaq payta manakuyay. Manakuyaptikiqa tantiyasiyäshunkimi. Manakuq kaqtaqa imaypis yanapanmi.#Mat. 7.7-11; Juan 16.23-24. 6Isanqa lapan shonquykikunawan yärakur manakuyay. Manakuyashqayki höra ama yarpäyaysu <<¿wiyamanqasuraq o manasuraq?>> niyashpayki. Sayno yarpaykar manakurqa lamarta wayra wakläman kayläman pulchaqyäsishqannömi kaykäyanki. 7Sayno karqa ama yarpäyaysu Tayta Diospita imatapis chaskiyänaykipaq kashqanta. 8Sayno manakuq runaqa manami shumaq yärakunsu ni Tayta Dios munashqannösu kawan.
Pobrikunata y rïcukunata yäsishqan
9Pobri kaq wawqi panikuna, Tayta Dios ali rikayäshushqaykipita kushikuyay. 10Rïcu kaq wawqi panikuna, qamkunapis kushikuyay riquëzaykikunaman mana atiënikuyänaykipaq Tayta Dios tantiyasiyäshushqaykipita. Mayjina rïcu karpis waytano ushakaqlami kaykäyanki.
11Fiyupa shanaptin qewapis sakinmi.
Waytanpis kuyaylapaq kaykashqancho shushur ushakäkunmi.
Saynölami rïcukunapis mas rïcu kaypaq wachakash kaykäyashlancho ushakäyanqa.#Isa. 40.6-7.
Tayta Dios alilata ruraq kashqan
12Ima nakaycho karpis Tayta Diosman mana ajayaypa yärakuq runaqa kushishqami kawan. Sayno yärakurqa Tayta Diospa nawpanchömi corönata chaskinqa. Say corönaqa mana ushakaq kawaymi kanqa. Kuyaqninkuna chaskiyänanpaqmi say corönata Tayta Dios promitish.
13Yarpaynikikunaman jusalikuy chämuptin ama niyaysu say yarpayta Tayta Dios qoyäshushqaykita. Tayta Diosqa manami imaypis jusalikunsu ni pitapis jusalikunanpaq shakyäsinsu. 14Saypa trukanqa tantiyakuyay say yarpay kikikipa shonquykikunapita kashqanta. 15Shonquykikuna lutan yarpashqankunata rurarmi jusalikuykäyanki. Jusalikur kawaqkunataqa Tayta Dios infiernumanmi qaykunqa.
16Kuyay wawqi panikuna, lutanta ama yarpäyaysu. 17Lapan alikunata chaskiyashqaykiqa asikyaqkunata kamaq Taytansipitami kaykan. Payqa manami lantuy päsaqnösu, sinöqa imaypis kashlanmi kaykan. 18Kikin munashqannölami ali wilakuyninwan mushuq kawayta qomashkansi lapan kamashqankunapitapis mas kuyay wamrankuna kanansipaq.#1Ped. 1.23.
Jesucristupa wilakuyninta cäsukunansipaq nishqan
19Kuyay wawqi panikuna, sayno kaykaptinqa yachaq tukur aläpa parlayaysu, sinöqa wakinpis parlayänanpaq upälakuyay. Saynöpis lutalaqa ama rabyakuyaysu. 20Rabyakurqa manami Tayta Dios munashqannösu kawaykäyanki.
21Mana ali ruraykunatapis y imayka viciukunatapis kachariyay. Wilakuyninta shonquykikunaman Tayta Dios murush kaykaptinqa wilakuyninta shumaq cäsukuyay. Paypa ali wilakuyninqa salvayäshunaykipaq munayyuqmi kaykan. 22Wilakuyninta wiyayashlaykiwanqa ama contentakuyaysu, saypa trukanqa cäsukur kawayay. Sayno mana kawayaptikiqa yachakuyashqaykipis walälapaqmi kanqa.
23Tayta Diospa wilakuyninta wiyaykar mana cäsukuq runaqa qaqlanta espëjucho rikarpis 24aywakur jukla qonqaykuqnömi kaykan. 25Tayta Diospa wilakuyninta mana qonqaypa cäsukurmi isanqa espëjucho rikakur qaqlan imano kashqanta mana qonqaqno kaykan. Sayno kawaqtaqa Tayta Dios imachöpis yanapanqami.
26Mayqaykipis <<Tayta Diosmanmi yärakü>> nikarpis mana alikunata parlarqa manami rasunpaypasu yärakuykäyanki. Sayno kayaptikiqa Tayta Diosman yärakuyashqaykipis manakaqlapaqmi kaykan. 27Tayta Diosman rasunpaypa yärakurqa waksakunata y viüdakunatapis nisidächo kayaptin yanapäyanki. Wakinkuna jusalikur kawayaptinpis noqansiqa ama jusalikushunsu.
Currently Selected:
Santiago 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.