Gálatas 1
1
Carta qalaykunan
1-2Galacia provinciacho kaykaq wawqi panikuna:
Noqa Pablumi kay cartata qamkunapaq apaykäsimü. Apóstol kanäpaq manami runakunasu churayämash, sinöqa Jesucristo y payta kawarisimuq Tayta Diosmi.
Kaycho kaykaq wawqi panikunami qamkunapaq salüdunta apasikayämun. 3Papäninsi Tayta Dios y Señor Jesucristo kuyapäyäshushpayki ali kawayänaykipaq yanapaykuyäläshunki. 4Papäninsi Tayta Dios munashqannömi kay pasacho jusalikuypita salvamänansipaq Jesucristo wanurqan.#Mat. 20.28; Mar. 10.45; 1Tim. 2.6; Tito 2.14. 5Tayta Dios imayyaqpis alabash kaykuläsun. Amén.
Wawqi panikuna lutan yachasikuyta chaskikuyashqan
6Musyayashqaykinöpis Jesucristupa kuyakuyninwanmi Tayta Dios qayayäshurqayki. Sayta musyaykar ¿imanirtaq lutan yachasikuyta chaskikur manaraqpis aykäta Tayta Diospita witikuyashkanki? ¡Saytaqa manami imano tantiyakuytapis atipäsu! 7Jesucristupa wilakuyninpita mas juk wilakuyqa manami salvakunansipaq kansu. Sayno kaptinpis wakin runakuna Jesucristupa wilakuyninman yaparkurmi lutanta yachaykäsiyäshunki.
8Qamkunata yachasiyashqäta manakaqman churar lutanta pipis yachasiptinqa infiernuman Tayta Dios qaykusun. Noqakunatapis lutanta yachasiyaptïqa infiernuman qaykayämäsun. Jana pasapita shamuq angiltapis lutanta yachasiptinqa infiernuman qaykusun. 9Yapaypis nï: Pipis Jesucristupa wilakuynin jananman lutan yachasikuyta takusiq kaqtaqa infiernuman qaykusun.
10Sayno nishpä ¿runakuna alabayämänantasuraq ashiykä? ¿Runakunapita ali rikash kaytasuraq munaykä? Noqa manami runakuna alabayämänanpaqsu yachaykäsï, saypa trukanqa Tayta Dios: <<Alitami rurashkanki>> nimänanpaqmi.#1Tes. 2.4. Runakuna alabayämänan raykula yachasirqa manami Jesucristupa sirviqninsu käman.
Apostolnin kananpaq Pabluta Jesucristo churashqan
11Wawqi panikuna, shumaq tantiyakuyay. Ali wilakuyta wilakushqä manami runakunapa yarpayninsu kaykan. 12Saynöpis manami say wilakuyta runasu yachasimash, saypa trukanqa kikin Jesucristumi revelacioncho tantiyasimash.
13Qamkuna musyayankimi nawpata Israel runakunapa costumbrinkunata cumplir imano kashqätapis. Say wisanqa Jesucristuta chaskikuqkunapa contran sharkur qatikacharmi lapanta ushakäsiyta munarqä.#Hech. 8.3; 22.4-5; 26.9-11. 14Wakin Israel mayïkunapitapis masmi costumbrïkunata välisirqä.#Hech. 22.3. Lapan winay mayïkunapitapis masraqmi Moisés qelqashqankunata cumplirqä.
15Imano kaptinpis manaraq yuriptïmi Tayta Dios kuyapämashpan payta sirvinäpaq akramash.#Isa. 49.1; Jer. 1.5. 16Nirkurmi Jesucristuta chaskikunäpaq shumaq tantiyarkasimar#Hech. 9.3-6; 22.6-10; 26.13-18. mana Israel runakunata wilakuyninta wilapänäpaq kachamash.
Sayno kachamaptinmi wilakuyninta tantiyasimänanpaq pitapis tapukurqänasu. 17Saynöpis manami noqapita mas punta kaq apostolkunawan parlanäpaqpis Jerusalénman aywarqäsu. Saypa trukanqa Arabia partipami aywakurqä. Saypitanami Damasco markaman yapay kutirqä. 18Saypita kimsa watataraqmi Pedruwan parlaq Jerusalénman aywarqä.#Hech. 9.26-30. Saychömi chunka pisqa junaq paywan qoyämurqä. 19Saychömi reqirqä Señor Jesucristupa wawqin Santiaguta. Isanqa wakin apostolkunataqa manami tarirqäsu. 20Tayta Dios musyanmi mana lulakuykashqäta.
21Saypitanami Siria y Cilicia provinciakunapa aywarqä.#1.21 Cilicia provinciachömi Pablupa markan Tarso karqan (Hech. 9.30). Siria provinciachönami Antioquía karqan (Hech. 11.25-26). 22Judea provinciacho#1.22 Judea provinciachömi Jerusalén karqan. wawqi panikuna manaraqmi mayqanpis reqiyämarqanraqsu. 23Paykuna kayno niqtashi wiyayänaq: <<Qatikachämaqninsi runami kananqa Jesucristupa wilakuyninta wilakur puriykan>>.
24Sayno niqta wiyarshi Tayta Diosta alabayänaq.
Currently Selected:
Gálatas 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.