Judas 1
1
Judas Toyase'e Maija'quë Soisicohua'ina
1Yë'ë Judaspi, Jacobo yo'jeipi, Jesucristo jo'yaëpi iye toya ja'hua toyayë, Maija'quë soisicohua'ina, i̱na i̱sisicohua'ina, Jesucristopi ñacaina, pa'icohua'ina. 2Maija'quë jo'cua de'oye pa'iyere, Maija'quë pa̱ire oiyere, cui'ne i̱pi teaye ñani oi co̱caiyere ai jerepa i̱si cua̱ñojë pa'ija̱jë caquë se̱ñë.
Coa Cosoye Ye'yacohua'i
(2 Pe 2.1-17)
3Maija'quë do'ijë, yë'ë cato ai toyaye yëhuë, huaso coca ayere mësaru cui'ne yë'ë mai payere. Ja̱je pa'iquëta'are yure cato yequere toyaquë ai se̱ñe pa'iji, mësarute. Ai cuasajë yo'ojë̱'ë, mai huaso coca ye'yayere nejoñe. Iye ye'yayere si'aye Maija'quë i̱ pa̱ina i̱sise'epi. 4Tsoe coa cosojë ye'yacohua'ipi yahuerepa mai ja̱'re co̱ni cacasicohua'ipi pa'iyë. Ja̱ohua'ire cato tsoe toyase'epi quëaji, nejoja'cohua'ire ca nëosicohua'ipi pa'iye. Ja̱ohua'i cato Maija'quëre sa̱ñope yo'ocohua'ipi i̱ de'o cocare pare ti̱ñe po̱nani si'si yo'oyere de'oye a'ë cajë ye'yayë, cui'ne mai paquë, mai Ëjaë Jesucristo pa'iji cayere coa caye a'ë cacohua'ipi.
5Mësarupi tsoe asacohua'i pa'itoje̱, mësarute caye yëyë, mësarupi Israel pa̱ire Egíptopi etosi jeteyo'je, i̱te i̱re pare cuasama'cohua'ire nejose'ere cuasaja̱jë caquë. 6Cui'ne hui̱ñaohua'ireje̱ nea hue̱'ñare pana cosicohua'ini paji, ti ja̱rote quë̱na meapi hue̱sicohua'i pani huesëyë. Ja̱ohua'i cato i̱ohua'i o̱cue pa'i macarepa pa'ima'pë, Maija'quë ja̱'re co̱ni pa'i sito je̱oconi etasi do'ire. Pa̱i ñape yo'ose'e ña mu'serepa ca huesoja̱'cohua'ipi pa'iyë. 7Hui̱ñaohua'i yo'ose'eje̱ pa'ye Sodoma cui'ne Gomorra cui'ne i̱o yë'quë maca pa'i daripë̱aje, nomi yo'oyena ne huesëni pa̱i yo'ojë pa'iye tëto sani co'aye yo'ojë yaya maca pa'i toana ëo hue̱a cua̱ñoa'huë'ë. Ja̱ yo'ose'e cato si'aohua'ire quëaye a'ë, ja̱je yo'oma'pë pa'ijë̱'ë caquë.
8Ja̱je yo'ose'e asajëta'a iye cosojë ye'yacohua'i, coa huëo ca̱ise'eje̱ pa'yere pa'ijë si'si neñë, i̱ohua'i ca̱pë. Cui'ne si'a ëjaohua'i cui'ne i̱ohua'i cua̱ñese'e coejë mai sehuosicohua'i ëjaohua'ireje̱ ca'rama'pë sa̱ñope co'ayere cajë pa'iyë. 9Miguel hui̱ñaë ai jerepa tutu quë'iohua'i aquëpi Satanás ja̱'re capi, Moisés ca̱përe ë̱sequë. Ësequëta'a Satanásre sa̱ñope cama'ë coa i̱ ñeje capi: Mai Ëjaëpi sa̱i de'huaye pa'iji, më'ëre. 10Ja̱je pa'iquëta'are iye ë̱mëohua'i cato i̱ohua'i asa ti̱'ama' co'amañare ai co'aye cayë, cui'ne i̱ohua'i coa noni yo'ojë asa ti̱'añere, ta̱'ñe asaye peocohua'i nëtëroja̱icohua'i asayeje̱ pa'ye asayë. Ja̱je pa'ina, i̱ohua'i nejo cua̱ño ja̱'ñere yo'ojë pa'iyë.
11¡Teayerepa ja̱ohua'i maña! Caín co'aye yo'ose'eje̱ pa'iohua'i pa'iyë, cui'ne Balaam curi yë do'ire Maija'quë pa̱ire sa̱ñope yo'ose'eje̱ pa'iohua'i pa'iyë. Cui'ne Coré Maija'quëpi pa̱i ëjaë ca nëosiquëre coequë sa̱ñope yo'oquë ju̱'aji'i. Ja̱ëje pa'iohua'i pa'iyë, ja̱ohua'i. Ja̱je pa'i do'ire ai yo'ojë pa'ija̱'cohua'i a'ë, teayerepa. 12Mësaru sa̱'ñe oi do'ire tsi'sini a̱ijë pa'iyere, ja̱ohua'ipi co'aye si'si a'sioje̱ pa'ye i̱ñoñë, mësaru de'oye tsi'sijë pa'iyena, ca'rama'pë mësaru ja̱'re co̱ni a̱ijë, i̱ohua'ise'e co'ye cuasa do'ire. Cui'ne oco peo sirije̱ pa'iohua'i a'ë, cui'ne tutupi siri tutu saouna, ti oco i̱sima'o. Cui'ne o̱cue ñëa quë̱i tëcahuëta'a quë̱iñe pa̱ñeje pa'iohua'i a'ë. Quë̱ima' do'ire ju̱'isicohua'ije̱ pa'iohua'i pa'iyë. Cui'ne si'a so̱quë saihuë duta o̱ase'eje̱ pa'iohua'i a'ë, cayayese'e ju̱'ise'eje̱ pa'iohua'ipi. 13Ja̱ohua'i cato jai tsiaya tuturepa co'poyeje̱ pa'iohua'i a'ë. Ja̱je pa'iohua'ipi i̱ohua'i si'si yo'oyere ma' o̱añë, sirije̱ pa'yere. Ja̱ohua'i cato i̱ohua'i saima'a ne huesosi ma'ñoco a'ë. Ja̱je pa'ina, ti nea hue̱'ñare pare pani huesëja̱'cohua'ire ca huesosicohua'i a'ë.
14Adánpi huëoni pani dao hue̱'ña siete aquë paji'i, Enoc. Ja̱ëpi Maija'quëpi quëaquëna, ja̱ohua'i ayere capi, ñeje: “Ñahuë, Ëjaëre jai merepa jai pa̱i ja̱'re i̱ hui̱ñaohua'i ja̱'re daina, 15si'a pa̱ire tsi'soni i̱ohua'i yo'ose'ere ña de'huasi'i caquë, cui'ne si'aohua'ire co'acohua'ire nejoñe pa'iji ca huesosi'i caquë, ja̱ohua'ipi co'ayere yo'ojë pa'i do'ire, cui'ne Maija'quëre sa̱ñope pë̱ijë ca do'ire caquë.” 16Ja̱ohua'i cato i̱ohua'i payere cuasajë sihuama'pë oi ëa joyo pajë, coa i̱ohua'i co'aye yëyere yo'ojë pa'iyë. Pa'ijë yecohua'i payere neñu'u cuasajë de'o coca mañapi yecohua'ire cacohua'i a'ë, coa jerepa pa'iohua'i a'ë cuasajë.
Sehuosicohua'ire Yëhuoye
17Ja̱je i̱ohua'i pa'iquëta'are mësaru Maija'quë do'ijë, cuasajë̱'ë, mai Ëjaë Jesucristo jëjo saocohua'i mësarute case'ere: 18“Tëji mu'seña cato pa'ija̱'cohua'i a'ë, i̱ohua'i yëyeje̱ pa'ye co'ayere pa'icohua'ipi, Maija'quë ayere cue'cue pa̱ipi pa'ija̱'cohua'ipi.” 19Maija'quë joyo peocohua'ipi, coa noni i̱ohua'i yëyepi pa'icohua'ipi, cui'ne pa̱ire huahuejë yo'ocohua'i a'ë, te'e pa̱ire cuasama'pë.
20Ja̱je pa'iquëta'are mësaru cato, Maija'quë do'ijë, o̱cue pa'i macarepa Maija'quë pa'iji cuasayepi se mëojë pa'ijë̱'ë, Maija'quë joyo yo'oyepi Maija'quëre se̱jë pa'icohua'ipi. 21Maija'quë oiyere pa'ijë̱'ë. Ja̱je pa'ijë Jesucristo daija̱'a mu'sere utejë pa'ijë̱'ë. Ja̱je pa'ijëna, oi teaye maire ñani ti pani huesëyere i̱sija̱'quë api.
22Jëa coecohua'ire teaye ñani oijë pa'ijë̱'ë, nui cocare pare tuija̱jë cajë. 23Pa̱ire oijë pa'icohua'ipi eto huasojë̱'ë, toare pa'icohua'ire Maija'quëre ti̱'ajajë cajë. Ja̱je pa'iquëta'are de'hua ñajë'ë, i̱ohua'i co'aye pa'iyepi si'si ne tuture pacohua'ire.
24Yure cato Maija'quëpi mësarute ta̱ima'pë pa'ija̱'cohua'ire ne tutu paji, cui'ne i̱ de'oquërepa ña hue̱'ñana si'si te̱'ña peocohua'ipi ai sihuacohua'ire eto nëco tutu paji. 25Maija'quë cato te'i api, de'oquërepa ta̱'ñe pa'ipi maire huasoquë, mai Ëjaë Jesucristo yo'o do'ipi. Si'a miañe paquë api, ëjaohua'i mëñe Ëjaëre papi, si'aye i̱ tse̱se'e a'ë cui'ne i̱ api, i̱ti cua̱ñequë, tsoe ja̱'a huëo macaje̱, yureje̱, cui'ne je'nëna ja̱jese'e. Ja̱je pa'ija̱quë.
Currently Selected:
Judas 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.