Jn 3
3
Jesu Nicodemore yahuahye
1Ti macare Nicodemo wame tiriquiro, judio masa pʉhtoa mehna cjʉ̃no ijiri. Tiquiro fariseo masa ya curua cjʉ̃no ijiri. 2Sa yero ihcã ñami tiquiro Jesu cahapʉ ahta, tiquiro mehna yahuducuahye:
—Buhegʉ, mʉhʉ Cohãcjʉ̃ buhe dutiro tiquiro ohorigʉ mʉhʉ ijigʉ̃ ʉsã masiaja. Cohãcjʉ̃ mʉhʉre tiquiro yedohoeragʉ̃ mʉhʉ pehe tiquiro tutuaye mehna ne ye ihñoedaboaga. Mʉhʉ peye tahari Cohãcjʉ̃ tutuaye mehna ye ihñore, niahye Nicodemo Jesure.
3Tiquiro sa nigʉ̃ Jesu pehe yahuahye:
—Ijirota mʉhʉre niita niaja. Wahma masa bajuariquiro yero saha pari turi masa bajuariquiro dihita Cohãcjʉ̃ yaquiro iji masine, niahye Jesu.
4—Yohnah. ¿Bʉcʉro pehe dʉhse ye pari turi masa bajuaboari tiquiro? Tiquiro pacoro niji suhtiropʉ majare sajã, pari turi bajua masiedaboaga tiquiro, niahye Nicodemo.
Tiquiro sa nigʉ̃ Jesu yʉhtiahye:
5—Ijirota niita niaja mʉhʉre. Wahma masa bajuariquiro yero saha aco mehna, Espíritu Santo tiquiro tutuaye mehna pari turi masa bajuariquiro dihita Cohãcjʉ̃ yaquiro iji masine. 6Numia niji pacosãnumia ijiye, macanagãre masa bajuagʉ̃ yere. Espíritu Santo pehe masare Cohãcjʉ̃ pohne ijigʉ̃ yere. 7“Wahma masa bajuariquiro yero saha pari turi masa bajuariquiro dihita Cohãcjʉ̃ yaquiro iji masine”, yʉhʉ nigʉ̃, tʉho wisieracãhña. 8Espíritu Santo masare Cohãcjʉ̃ pohne tiquiro yegʉ̃ ti wihnono yero saha ijire. Wihnono to ahtariropʉ ahtare. To ahtaro ca tagʉ̃ mari tʉhoaja. Sa tʉhoepenata to ahtarirore, to waharirore ne masiedaja. Sata yere Espíritu Santo masare Cohãcjʉ̃ pohne yero, niahye Jesu Nicodemore.
9—Mʉhʉ niñene quehnoano masiedaga, niahye Nicodemo.
10Tiquiro sa nigʉ̃ tʉhoro ohõ saha niahye Jesu:
—¿Mʉhʉ judio masare buhegʉ ijiepegʉta, dʉhsegʉ yʉhʉ niñene tʉhoerajari? 11Ijirota niita niaja mʉhʉre. Ʉsã masidire ʉsã ihñarire ʉsã yahuaja. Ʉsã sa yahuepegʉ̃ta ne mʉsa acaye judio masa ne tʉho duerare. 12Ahri yehpa cjẽ mehna masa tiquina masa bajuari mehna mʉsare queoye mehna yʉhʉ buhe mʉhtarire “Ijirota ijire”, niedare mʉsa. Sa niedana queoye mehna buhero marieno Cohãcjʉ̃ yere yʉhʉ yahugʉ̃ gʉ̃hʉre “Ijirota ijire”, nisi mʉsa.
13’Ne ihcãquiro ʉhmʉsepʉ Cohãcjʉ̃ cahapʉ wahariquiro ne pari turi tojoa tasi. Yʉhʉ masʉ Cohãcjʉ̃ ohorigʉ yʉhʉ dihita ʉhmʉsepʉ ijirigʉ ahri yehpapʉ ahtaʉ. Sa yegʉ yʉhʉ dihita Cohãcjʉ̃ yere mʉsare yahu masiaja. 14Panopʉre masa marienopʉ Moise mʉnano bronce wame tiri come mehna tiquina yeriquirore añare yucʉgʉ tiquina docodʉpʉ duhu yoahye. Yucʉgʉpʉ tiquina duhu yoriro sahata yʉhʉre masʉre Cohãcjʉ̃ ohorigʉre tiquirore tiquina yeriro sahata yʉhʉ gʉ̃hʉre duhu yoeta. 15Yʉhʉre tiquina sa yeri bato ijipihtiyequina yʉhʉre wacũ tutuayequina ijipihtiye decori Cohãcjʉ̃ mehna ijiducueta, niahye Jesu.
Cohãcjʉ̃ ijipihtiyequinare cahĩne
16Sa ni tuhasa ohõ saha ni nemoahye:
—Cohãcjʉ̃ ijipihtiyequina ahri yehpa cjẽnare tutuaro cahĩne. Sa yero yʉhʉre tiquiro macʉre ihcʉ̃ta ijigʉre Cohãcjʉ̃ ohori ijipihtiyequina yʉhʉre wacũ tutuayequina pecapʉ tiquina “Wahaeracãhdo”, nino. Sa ye ijipihtiye decori Cohãcjʉ̃ mehna ijieta tiquina. 17Cohãcjʉ̃ yʉhʉre tiquiro macʉre masare buhiri dahre dutiro ohoerari yʉhʉre ahri yehpapʉre. Sa yero masare pecapʉ wahaboriquinare yʉhdʉoacjʉre yʉhʉre ohori.
18’Yʉhʉre Cohãcjʉ̃ macʉre wacũ tutuayequinare ne buhiri dahresi Cohãcjʉ̃. Yʉhʉre wacũ tutueyequina pũritare Cohãcjʉ̃ buhiri dahre duti tuhasari. Masa yʉhʉre Cohãcjʉ̃ macʉre ihcʉ̃ta ijigʉre tiquina wacũ tutuerari buhiri, buhiri dahrerota tiquinare. 19Yʉhʉ, Cohãcjʉ̃ macʉ ahri yehpapʉ ahtagʉ buhrioro quehnoano marine to ihña masigʉ̃ yero sahata Cohãcjʉ̃ yere quehnoano masigʉ̃ yeaja. Yʉhʉ sa masigʉ̃ yegʉ̃ ihñañe yʉhʉre wacũ tutueyequina yʉhʉre cahmedare. Tiquina ñañe yeye pehere quehnoano cahmene. Tiquina sa cahmedi buhiri tiquinare buhiri dahrerota. 20Ijipihtiyequina ñañene yeyequina tiquina ñañe yeyere duhu duerare. Sa ye buhrioro to bajumehneno sahata tiquina ñañe yerire “Bajumehneari”, niñe, yʉhʉre cahmedari tiquina. 21Quehnoañene yeyequina pehe yʉhʉre, yʉhʉ buheye gʉ̃hʉre cahmene. Cohãcjʉ̃ yere tiquina yeyere yʉhʉ quehnoano bajuro dahregʉ̃ bʉe tierare tiquina. Sa ye yʉhʉre buhrioro yero saha ijigʉre cahmene, ni yahuahye Jesu.
Pari turi Ñu wame yeriquiro Jesure yahuahye
22Came Jesu ʉsãre tiquiro buhenare Judea yehpapʉ siho wahari. Topʉ esaro to cjẽna mehna meheñe decorigã tojoa, wame yeri tiquinare. 23Ñu gʉ̃hʉ masare wame yero niahye Enón wame tiri macapʉ. Enón Salim wame tiri maca cahapʉ ijiri. Topʉ dia ijiri. Sa yero Ñu topʉ wame yero niahye masare. 24Tiquina peresu yeato pano Enópʉ wame yero niahye Ñu. 25Ti pjere Ñu buheyequina mehna cjẽna meheñequinagã judio masʉno mehna wame yeyere yahuducuye niahye. 26Sa ye tiquina Ñu cahapʉ esa, tiquirore yahuahye:
—Buhegʉ, Jordã si pahrẽpʉ mʉhʉ mehna ijiriquiro “Tiquirota ijiaga”, mʉhʉ nidiquiro pehe yojopʉre masare wame yero nine. Tiquiro sa yegʉ̃ ijipihtiyequina tiquiro cahapʉ dihita wahare, niahye tiquina Ñure.
27Tiquina sa nigʉ̃ tʉhoro Ñu yʉhtiahye:
—Tiquiro tutuariquiro ijigʉ̃ Cohãcjʉ̃ pehe tiquirore sa ijigʉ̃ yere. 28“Cristo ijieraja”, yʉhʉ nigʉ̃ mʉsa tʉhori. Sa ijierapegʉta tiquiro pano ohonoho mʉhtarigʉ ijiaja yʉhʉ. 29Cristo mehna masa tiquina wahagʉ̃ ihñagʉ tutuaro bucueaja. Ohõ saha ijire ti: Omoca dʉhtericoro ticoro manʉno mehna ijiro wahare. Omoca dʉhtegʉ̃ cohteriquiro pehe dʉhteatiquiro namo tigʉ̃ ihñano tiquiro yahuducugʉ̃ tʉhoro tutuaro bucuere. Sa yegʉ yʉhʉ omoca dʉhtegʉ̃ cohteriquiro tiquiro bucueriro saha Cristo mehna masa tiquina wahagʉ̃ ihñagʉ tutuaro bucueaja. 30Cristo pehere wacũ tutuaro cahmene masare. Yʉhʉ pehere wacũ tutueraro cahmene masare, ni yʉhtiahye Ñu.
Cohãcjʉ̃ macʉno ʉhmʉsepʉ ahtariquiro ijire
31Sa ni tuhasaro ohõ saha ni nemoahye Ñu:
—Ʉhmʉsepʉ ahtariquiro ijipihtiyequina yʉhdʉoro tutuariquiro ijire. Ahri yehpapʉ masarina ijina ahri yehpa cjãna ijiaja mari. Sa yena ahri yehpa cjẽne yahuducuaja mari. Ʉhmʉsepʉ ahtariquiro pehe ijipihtiyequina yʉhdʉoro tutuariquiro ijire. 32Tiquiro ihñarire, tiquiro tʉhorire tiquiro yahure. Tiquiro sa yahuepegʉ̃ta tiquiro yahuyere masa pehe ne tʉho duerare. 33Ʉhmʉsepʉ ahtariquiro tiquiro yahuyere masa tʉhoye, “Cohãcjʉ̃ potota nidiquiro ijire”, niñe nine tiquina. 34Ahriquiro Cristore Cohãcjʉ̃ ohoriquirore Espíritu Santo ye tutuayere oho pehore Cohãcjʉ̃. Sa yero tiquiro Cohãcjʉ̃ ye yahuducuyere yahure. 35Cohãcjʉ̃ tiquiro macʉnore tutuaro cahĩne. Sa yero ijipihtiyequina pʉhtoro iji dutiri tiquiro macʉnore. Ijipihtiye upʉro iji dutire tiquirore. 36Cohãcjʉ̃ macʉnore wacũ tutuayequina pehe ijipihtiye decori Cohãcjʉ̃ mehna ijieta. Tiquiro macʉnore yʉhdʉdʉcayequina pehe Cohãcjʉ̃ cahapʉ wahasi. Sa ye ijipihtiye decori ʉhmʉsepʉ ijisi. Sa yero Cohãcjʉ̃ tiquinare tutuaro buhiri dahrerota, niahye Ñu.
Currently Selected:
Jn 3: pir
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.