Irocas 24
24
Icaniatanai Jesos, icabiritaja.
(Mt 28.1-10; Mr 16.1-8; Jn 20.1-10)
1Aique oquëtaguetanai tomincoquë, piáigamanë tsinane cara yomianqueri Jesos, págaiganaque casangajengaropague ora pobetsiquëneri. 2Cara paretaigapa omoroquë oniaigapëro oquibe mopë aroque otitigaca ora yasintocoontacari Josë Ira Jesos. 3Ocaigabitanaca tsomagui, carari te oneiri igamaga Atingomi Jesos. 4Iroontita onetsasigabitapaari, oquenganeintasantaca, aitoniati yaratingaigapë pite sërari iquitsagata catarisonoriguinte iguitsagare pobariaguitetasantë. Imabocaparo tsinane, 5otsorogaigabaqueri, poguitasantaigaca. Icantaigapëro:
—¿Pairo picogobiqueri Ira caniatatsi yaca cara yomianqueri igamaga camatsiri? 6Teni irinaje yaca. Aroque icaniatanai. Pinguenguero ora icanque Jesos jirai cara aintaquerai Garireaquë. 7Icantaiguëmi: “Naro paniacha Jonogaguitequë nomatsiguengatapë cara niboguë yaca quibatsica, aiquenta irácagantëna matsiguenga cantagueantatsiri te ongomeite, iribëquëgotaiguëna, aique ongaraque maba cataguiteri, nanganiatanae”.
8Aro oquengaigairo irinibare Jesos. 9Pipiganaja poeboroquë ocomantaigapëri irogomere Jesos aisati ocomantagueiguëri basiniegui quemisantatsiri. 10Ainta María Magararasato, aisati Joana, aisati basini María iniro Santiago, aintasati basini tsinane. Tojai tsinane ocomantaigabitacari iragátane Jesos, 11carari te inguemisantaigabaquero ora ocomantabitaca tsinane cara icaniatanai Jesos. Ijitaigabitaca ocantasitaiga tsinane te ogóigue. 12Paniro Peroro icabiritanaca isiganaca omoroquë, yoguipa, inetsapë tsomagui. Patiro iniopë ora tocoya iponatantabecari Jesos. Aique ipiganaja pongotsiquë, iquenganeintasantaca.
Pite quemisantatsiri iniajiri Ira Jesos abatsiquë.
(Mr 16.12-13)
13Aro irooti cataguiteri iáiguë pite quemisantatsiri cara poeboroquë jitacha Emaos, cosamani 11 quirometoro aiquero Jerosarénquë. 14Cara iquenaigasegui inibatobaca, inibatëgotëri Jesos ati ocanta icantaiguëri matsiguenga, aisati ora icantasantë Iriro. 15Cara iáigasegui inibatobaca iquengamotobaca, yotsitipari Jesos, itsibatanacari abatsiquë. 16Iniaigabitobacari carari Tosorintsi te iranintacaguiri irogótobëri. 17Aro yosamitëri Jesos:
—Cara piquenaigasegui, ¿Pairo picantobitobaca?
Irirojegui yaratingaiguë, yogasëretaigaca. 18Paniro, ijita Quiriopas, yotabitanëri:
—Igóiguë antagaisati Jerosaresati. ¿Obiroco paniro te pigótocotiro?
19Yosamitëri Jesos:
—¿Pairo pinibatëgoti?
Icantaiguëri iriro pitirooti:
—¿Teco pinguemocotiri Jesos Nasaresati? Caninasati icomantaguetaiguëri matsiguengajegui Irinibare Tosorintsi, aisati itasongagueanti. Iniacaninatëri Tosorintsi, aisati naniacaninataiguëri naroegui. 20Irari itingomipague saserirotijegui aisati iraegui obatacagaiguëna yágagantëri, aro yogamagaiguëri ipëicotaiguëri. 21Najitaigabitaca Iriro Agabisaicoontatsirite, iragabisaicocái eiro joríojegui. Icantabeca inganiatanae aisati, carari yamai pabisanaque maba cataguiteri cara icamaque. 22Aintapague tsinane tsipataiguëna, piáigamanë omoroquë, pipigaigapaa omabocapaina cara 23ocomantaiguëna te oniaigairi igamaga Jesos, te irinaje. Aisati ocampë cara yoniagaparo ironomire Tosorintsi icanquero cara ainta Atingomi caniari. 24Aisati ainta naroeguiquë iáiguë cara omoroquë iniaigapëro irooti ora ocanque tsinane, carari te iraniaigairi Iriro.
25Aique icanqueri Jesos:
—¡Te pigótëmataigue; pitsoinguëri comantantatsiri ira quinguitsataiguëmi Irinibare Tosorintsi jirai! Terai pinguemisantiri. 26¿Teco ingantaiguemi cara Iritsita atsipiriaquenguitsine Quirisito Agabisaicoontatsiri ingamaque, aique inganiatanae iriátë Jonogaguitequë?
27Aro yogometasantaiguëri Sanguenari, yotsateanquero omagaro comantëgotëri Iriro. Iparintacaro isanguenare Moisés, aique yogometaiguëri isanguenare basinipague comantantatsiri. 28Aro yaretaigaaro Emaos, irabisanaqueme Jesos 29carari icantaiguëri itsipa pite:
—Quero piáti. Pintiomotina yaca nobangoquë. Aroque ochapinitanë, pënibaque ontsitinitanë.
Aro icanaque Jesos pongotsique, itimaque.
30Cara isobicaiguë mesaquë, yáguëro pan Jesos, icarasiaqueri Tosorintsi, itibatsaaguequero, ipaguetaiguëri itsipa. 31Aito cara ira pitirooti igóiguëri Irianti Jesos; irooti cara ipegopitanacari. 32Aique icantobaca pitirooti:
—¿Teco onganinatasante icancái cara abatsiquë igótacaganacáiro Sanguenari? Tojai ocancái asërequë, poganinasëretacái.
33Aito cara icabiritaigaca, ipigaiganaja cara Jerosarénquë. Iniaigapëri ira irogomere Jesos icarati 11 cara yapatoica irirojegui aisati basini quemisantatsiri. 34Irirojegui icantaigabaqueri:
—Aisonori icaniatanai Atingomi icabiritaja. Iniajiri Simón.
35Aique ira pite Emaosati icomantaigapëri icampë:
—Aisati naro, naniaigairi canta abatsiquë. Yogometaigapëna caninasati cara niáigasegui carari terai nogótiri. Aique canta pongotsiquë itibatsaaguequero pan ipaiguënaro, irooti nigóontacari. Aito cara ipeganaca.
Jesos yoniagaigapari irogomere.
(Mt 28.16-20; Mr 16.14-18; Jn 20.19-23)
36Iroontita icomantaseguiro, Iriguito yoniagaigapari Jesos, yaratingopë aganguisatiquë irirojegui, icantaigapëri:
—Quero pitsorogaigui. Pomagoriasëretaigue obirojegui.
37Itsorogasantaiguë irirojegui, te irogótaigabaqueri. Ijitaigabitaca iniaigabaqueri sëretsi. 38Aro icampë Jesos:
—¿Pairo pitsorogobitaiguë? ¿Pairo pitsoingobitaiguëna Naanti? 39Pinetsaiguero nobaco aisati naguiti cara ipëicoquina. Potsagataiguena pigóontëna aisonori Naro bocatsi; aiti nobatsa aisati notongui, te aisa nangantimaro pibega sëretsi.
40Aique yoniagaigapari ibacoquë aisati iguitiquë. 41Iniaigabitari icaninabentaigabitari, carari terainta iragabiaigue irajitiri cara icaniatanai. Cara iquenganeintasantaigasega, yosamitaiguëri Jesos:
—¿Aiti poperi yaca?
42Aro ipaiguëri sima iritasitaga. 43Yáguëri yaaguëri cara inetsaigaseguiri.
Itsonque Jesos yogometaiguëri irogomere.
(Irag. 1.4-8)
44Aique icantaiguëri:
—Pinguengaiguero nanibare ora nocomantaiguëmi cani: “Tojai itsipiriacagaiguëna irógaiguëna, omoncaraquema antagaisati isanguenatocoquina Moisés aisati comantantatsiri, aisati omoncaraquema omagaro isanguenatocoquina David cara sárimoquë”. Yamai omoncaraca.
45Aique igótacagaiguëri ora ocanti Sanguenaripague, 46icantaiguëri:
—¿Teco ongante Sanguenari, “Iratsipiriaque Quirisito Agabisaicoontatsiri ingamaque, ongaraque maba cataguiteri inganiatanae ingabiritajima; 47aique iriáiguë iragátane imarintëma Jerosarénquë ingomantëgotaiguëri matsiguengajeguiquë cara irojocajiro ora icantagueti te ongomeite aroca inguemisantaiguëri Jesos irabentëmari Tosorintsi, aro Tosorintsi irisetaigaineri ora icantaguetomoqueri quimingari quero iquengairo aisati”? 48Pigóiguëro ocanti negaca Sanguenari. Yamai piniaiguëro cara omoncaraca ora isanguenatocoiguëna jirai. Yamai nocoguini pinguenguitsatocotaiguena. 49Pinëni yaca Jerosarénquë yamai queronta ocosamaniti cara nagátaiguëmiro ora icantasantaiguëmi Pabati, Iroonti imagantëmi Isëre Tosorintsi inantaigapëmi coshoni ogaiguëmi. Ogabiagagaiguëmi pingantaiguëneri Pabati pairoraca ingocagaiguëmi.
Cara yogainocanaa Jesos Jonogaguitequë.
(Mr 16.19-20; Irag 1.9-12)
50Aique Jesos itsibataiganacari irogomere irooti cara Betaniaquë. Cara, itimagonaguitanaca ibaco jonoquë, yamanaqueri Iriri icanque:
—Pabati, jerica nogomerejeguica; pingantocobentaigueri, pomitocotaigueri.
51Cara icantocobentaseguiri Jesos, aito cara yáguëngani jonoquë yogainocanaca, ipeganaca. 52Aique irogomere ipigaiganaja Jerosarénquë, icaninabentasantaiguëri Atingomi. 53Carari, omagaro cataguiteri iátopiantaiguë cara oquibequë pongotsi irasi Tosorintsi icantaiguë:
—Icaninatasanoti Tosorintsi.
Aro ocarati ora nasanguenaquemi. Irocas
Currently Selected:
Irocas 24: not
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.