YouVersion Logo
Search Icon

Ducas 1

1
Mibi tantiamenuen dada uanu, Teopido, quiaid
(1.1-4)
1Matses dadpenshun: Nëmbo nasho ubitedishun isondaid dada uaquin tannu, quequin dada uapanëdash. 2Aidon Esuquidistun tauain naidbëtabi ambi naid utsitedi isbanquidon ambi: Chuibenneta, caidon chuibanacpaden dada uaidtedi nec. 3Esuquidistu chuibanquin dada uaid isbanquimbi Esuquidistu isnëdaidon chuibanaidtedi bëdambuen tantiashun aidtedi mibi bëdambuen chuibanquin umbitsen dada uaimbi, chuiquid tapa Teopido. 4Utsibon mibi Esus chuiquin tantiamenëdaid abimbo chiaid nec, quequin ma mimbi tantianu, queshun mibi chuiquin dada uaimbi.
I. UAN ACTEN MENTOANQUIDBËTA ESUS CHIAID
(1.5—2.52)
1. Tishendac, quequin chiaid
(1.5-56)
Uan acten mentoanquid tishte chiaid
5Nidaid Udea caid yacno Edodes cuëmëdquid isadaidbon chuiquid tapa icnubien Nuquin Papa ismequin nëish iua cuessunneshun pichicaquid Sacadias cuëmëdquid icpanëdash. Aidi Abiasbëtan Nuquin Papa tabadte shubu dapa yacnoshon nabanquid yec Adonën tsiuecquid nepanëdash. Aidën chido Isabed cuëmëdquid Adonën tsiuecquidbidi nepanëdash. 6Aidi aton bënëbëdi Nuquin Papan Chiaid tantiaquin nabanquidquio icpanëdash. Adquid icsho Nuquin Papan bëdambuen isaidquio aid daëd icpanëdash. 7Isabed bacuë tishesa yec machobudnubi aton bënëtsen tsësiobudquiopanëdash.
8Adashic Edusaden yacno nidash Nuquin Papa tabadte shubu dapa nuntanshun ambi nabantequid icnuc padpidembuec Sacadias puduedpanëdash. Abëtan naquidon: Aid uëshën mimbitsen nata, cac nepanëdash. 9Ambi nuadte bëda pichicate uëshë chonoc Sacadias aid pichicanuec Nuquin Papa tabadte shubu dapan puduedpanëdash. Ënden ambi abipadquid utsibobëtan nadenniacpadembi abi cuëmëdquid cuëmëdquidquien dada uaid tëchun sandoshon cadotanniac abia dada uaidëmpi puduenquid Sacadias cuëmëdquid icnuc nepanëdash.#1.9 Buan. 30.1-8bëta Ch.D.1. 7.48-50 isbanta. 10Adquid icnuc puduedshun Sacadiasën nuadte bëda pichicanubi umanuc Nuquin Papa tabadte shubu dapa daquënë uaid yacno Nuquin Papa chiec matses dadpen tabadpanëdash.
11Adnubien Nuquin Icbon budmiaid abëd icquidquio isadcuempanëdash. Isadcuenec nuadte bëda pichicate dayun abiucquio nidtuidpanëdash. 12Adec nidtuidec dacuëdampambo icsho isash Sacadias dacuëdec tantiadempambo icpanëdash. 13Adsho isash Nuquin Papabëd icquidquio nadpanëdash: Dacuëdenda, Sacadias. Bacuë bunquin mimbi chiannebued Nuquin Papan tantioshe. Min chido Isabedën min mado tishendac. Tishacsho Uan cuënta. 14Min chidon tishaid isash mibi bëdambo iquec cuishonquequiendac. Adecbidi bacuë tishaid tantiash matses dadpen cuishonquecuededendac. 15Min mado Nuquin Papan bëdambuen isaidquio iquendac. Acte paë uaid min madon aquenquio icquin isuidendac. Aid tishabicshobi Nuquin Papan aton Mayan Bëda meniaidquio min mado iquendac.#1.15 Aden Nuquin Papan acte paë uaid aquesa icmiaid ambi namiaidquio nasadedbo capanëdash. Aid chiaid istiadquiocquin I.T. 6.1-5 isbanta. 16Nuquin Papan Chiaid tantiaquidquio icquin aidën chiac isadaidbo dadpen Nuquin Papan Chiaid niac niacquid icbuedi: Cun Icbo Nuquin Papa nec. Aidën chiacpadombuen naimbi, quequin tantiabenendac. 17Min mado Nuquin Papan Chomiaid tishabi icnuc choendac. Tsusedpa Nuquin Papan oncamiampid Ediasën chiampicpadombuen dacuëdenquio icquin cuembo chuibanquidquio min mado iquendac. Aidën chuibanac chieshënnambuedi amëbëd aton bacuëbo tantiananuaindac. Nuquin Papan Chiaid niacbuedi min madon chiac Nuquin Papan Chiaid naquidquio iquendac. Nuquin Papan Chomiaid choeque. Bëdambuec tabadnuna, quequin chuibanendac, quepanëdash Nuquin Papabëd icquid.#1.17 Mad. 4.5-6 tantiaquin nëid dada uapanëdash.
18Aden Nuquin Papabëd icquidën chiaquien Sacadiasën: ¿Mitsipadembimbi mimbi chuibued: Abimbo iquec, quequin tantiape? Cun chido machobudnubi mabi tsësiobudquiopaboc, capanëdash.
19Adoaquien: Cabadied nebi. Abëd tabadquin Nuquin Papa nashunquidquio nebi. Aidëmbi ambi tantiacpadombuen mibi Chiaid Bëda tantiamenuen chomebued nebique.#1.19 Daniedën Cabadied isondaid dada uapampic. Dan. 8.16 bushcu uaidbëta Dan. 9.21 isbanta. 20Tantia. Chuinu. Min chidon bacuë tishendac, quequin umbi chuibued tantienquio icsho Nuquin Papan mibi eme uaindac. Min chidon bacuë tishan padpidec mibi onquianuaindac, quepanëdash Nuquin Papabëd icquid Sacadias chiec.
21Adnubien nuadte bëda pichicate quënënuësh Sacadias baded puduenenquiocsho isash: ¿Atotsi quiash puduenenquio icpec? quequin cainec umanuc utsibo tabadpanëdash. 22Aden iuen caimbudnubien puduenash onquenuequi cuëdenquiocpanëdash Sacadias. Adsho issun: Ushquin isacbimbuen isash nec, cabededpanëdash. Aden chuibededsho issun Sacadiasën ambi isbued tantiamequin chuinuequi onquenquio icquin mëdante uic uiccapanëdash.
23Adashic Nuquin Papa tabadte shubu dapa nuntanshun ambi nabantetedi nainash aton shubuno Sacadias niduapanëdash. 24Ambo choash iuec icnubien aton chido Isabedën bacuë usundopanëdash. Aden usundoash uëshë 5ted nidmec uanno nidenquio yec aton shubu nuntan icpanëdash. 25Adec ambo icquimbi Isabedën naden tantiapanëdash: Bacuë usundoenquien icpec, cabededbuedëmbi nëbi machobudshumbi umbi bacuë usundoacsho utsibon ubi bëdambuen isec. Ubi tantiaquin Nuquin Papan usundomiaid nebi, quepanëdash Isabed.#1.25 Nuquin Papan icsambuen isaid chido bacuë tishesa isadaidbon dampanëdash. Aden chiaid istiadquio icquin Ene. 30.23bëta Sam.1. 1.1-18 isbanta.
Esus tishte chiaid
26Aden Isabedën bacuë usundoaid uëshë 6ted nidmian nidaid Cadidea yacno shubu dadpen icquid Nasaded yacno Nuquin Papan abëd icquid Cabadiedbidi chomepanëdash. 27Ambobi chido dadan bedabicquid Madia cuëmëdquid icpanëdash. Adquid icsho abi bednuequid tsusedpa Dabidën tsiuecquid Ose cuëmëdquid icpanëdash. 28Adnubien Nuquin Papabëd icquid Cabadied ambo choshon: Mibi tantiaquin Nuquin Papan bëdambo icmiaidquio mibi nec. Nuquin Icbo mibëd iquec, capanëdash Cabadiedën Madia chuiquin.
29Aden chiaquien Madia: ¿Atotsi chuinuec nepeba? quec tantiadempambo yec otacquio tsadpanëdash. 30Adec tsadsho issumbien Cabadiedën: Madia, dacuëdenda. Mibi bëdambuen isquin Nuquin Papan tantiaid nad iqueque. 31Tantia. Chuinu. Bacuë usundoshon mimbi min mado tishendac. Tishshun Esus cuënta.#1.31 Isa. 7.14 tantiaquin nëid dada uapanëdash. 32Mimbi tishaid chuiquid tapa iquendac. Aden mimbi tishaid issun: Nuquin Papa Nadatiambocquidën Madombo nec, cabededendac. Tsusedpa Dabid chuiquid tapa Nuquin Papan icmiampicpadombuembidi chuiquid tapa aid icmeuaindac. 33Adoac chuiquid tapa abentsëcquiobi iquendac. Adquid iquec tsusedpa Acobon tsiuecquido isadaidbon chuiquid tapa yec ënëdenquio iquendac, quepanëdash Cabadied Madia chiec.#1.32-33 Sam.2. 7.16 iquec Isa. 9.7 iquec quiacbimbuecnuc Ducasën nëid dada uapanëdash.
34Adoaquien: ¿Mitsipadembimbi bacuë usundoshon tishpe? Mabi dadan chudambocquid nepayoc, quepanëdash Madia.
35Adsho tantiashumbien: Nuquin Papan Mayan Bëda budshun mibi usundomiac mimbi bacuë tishendac. Aden Nadatiambocquidën naidënquio usundomiaid icquin mimbi tishendac. Aden tishaid icsho: Nuquin Papa Nadatiambocquidën Madombo yec bëdamboshëcquidquio nec, utsibon cabededendac. 36Min chuchu Isabed machobudshun bacuë usundotiapimbo icbuedëmbi nëbi bacuë usundoac. Usundoenquien icpec, cabededbuedëmbi ambi bacuë usundoaid uëshë 6ted nidmiaid iquec. 37Utsin natiapimbo ictequid Nuquin Papan naidquio nec. Ambi natiapimbo ictequid nibëdec, quepanëdash Cabadied.#1.37 Ene. 18.14 chiacbimbuen Ducasën nëid dada uapanëdash. Adembidi chotaquën onqueten Ede. 32.17bëta 27 chiacbimbuen chuipanëdash.
38Adoaquien Madia: Ai, cun Icbon namiaidquio nebique. Ma mimbi chiacpadombuen Aidëmbi ubi tantiaquin napanuna, quepanëdash. Aden chiac Cabadied isadenquio yanec nidpanëdash.
Isabed isedec Madia nidaid
39Adashic atona sandoquin nacnenanec Madia nidaid cuëshë Udea yacnocquid macuësh yacno shubu daëdpactsëcquid yacno badedquio nidpanëdash. 40Adec nidash Sacadiasën shubun puduedquin aton chuchu Isabed istuidec: Mibi isnuec chobi, chuchu, quepanëdash Madia. 41Adsho Isabedën tantianubi aton bacuë cumapenec cuididiquepanëdash. Adec aton bacuë cuididiquenubi Nuquin Papan Mayan Bëdan tantiamiacpadec Isabed 42Madia chiec nadec cumapenec onquepanëdash: Chidobo dadpen icnubi mibi abentsëcquiobi Nuquin Papan bëdamboshë icmiaidquio mibi nec. Mimbi usunaid adecbidi bëdamboshë icmiaidquio nec. 43Cun Icbon tita iquequi ¿atotsi quiash ubi isnuec cho? 44Mibi isec chobi, mibi quesho umbi tantianubi cuishonquec cun bacuë cuididiquiosh. 45Nuquin Icbon chuimiacpadombuen chuisho tantiash: Adquid iquendabi, quequid yec mibi bëdambo iquec, quepanëdash Isabed Madia chiec.
Madia Nuquin Papa tantiec cuëdënaid
(Duc. 1.46-53; Sam.1. 2.1-10)
46Adashic Madia naden chiec cuëdëmpanëdash:
Nadatiambocquid icquin Mimbi naid tantiec bëdambo iquebi, Icbo.
47Abi yacno ubi tabadmequid Nuquin Papa nec, quequin tantiec cuishonquec bëdambo iquebi.#1.46-47 Isa. 61.10 ista. Isayasën chiacbimbuen Madian chuipanëdash.
48Ambi namiaid aton iua icsho ubi bëdambuen isquin Nuquin Papan dayun uaoshi.
Adquid icsho: Nuquin Papan bëdamboshë icmiaid nec, quequin ënenquio icquin cun matsesadon ubi tantiabededendac.
49Aden ubi tantiaquin nadatiambocquid icquin ubi nashunquid yec Nuquin Papa bëdamboshëcquidquio nec, caimbi.
Icsasaisambo nec.
50Aton matsesën tishaid tsibanquid tsibanquidquiec abi tantiaquido icsho issun:
cuidenquio icquin mimbi
bëdambuen isquin tantiendac.
51Nadatiambocquin nadednequidquio Nuquin Papa nec.
Adquid icquin matses: Umbentsëqui namequid nebi, quequid icsho issun Nuquin Papan aid namenquio iquendac.
52Matses chuiquid tapa icbuedobi dëniacshun namendac.
Utsin namiaid icbuedi chuiquid tapa Nuquin Papan icmendac.#1.52 Nuquin Papan Chiampid Sam.1. 2.8 chiampicbimbuen Ducasën chuipanëdash.
53Atona nibëdquido bunec tabadsho issun Nuquin Papan nashunendac.
Atona dadpen icquid atona nibëdquio icmeshunendac.
54Nuquin matses isadaidbo tantiaquin nashunquid Nuquin Papa nec.
Adquid icquin aido bëshunenquio icquin bëdambuen isquid nec.
55Aden tantiaquin Nuquin Papan ambi nuquin tsusedpa Abadauambëta
aton tsiuecquidtedi chiacpadombuen bëdambuen isquin nuqui tantiendac, quequin tantiec Madia cuëdëmpanëdash.#1.55 Nëidtedi tantiaquin Madia adec cuëdëmpanëdash. Nëidic Ene. 17.7bëta Ene. 26.3. Nëidic Cuëd. 105.8-9. Nëidic Miqueas 7.20. Aidtedi tantiaquin adec cuëdëmpanëdash. Aidtedi ista.
56Adashic Isabedbëd uëshë 3ted nidmec tabadash uëshë utsi nidbudtsëcnubi aton shubuno Madia niduapanëdash.
2. Uan acten mentoanquid tishaidbëta Esus tishaid chiaid
(1.57—2.52)
Uan acten mentoanquid tishaid
57Adnubien ambi tishte uëshën bacuë nëncuenshun Isabedën dada bacuë tishpanëdash. 58Aden bacuë tishenquio icbuedëmbi Nuquin Icbon bëdambuen isaid icquin nëbi aton bacuë tishosh, quesho tantiash aton matsesadobëd shubu utsin icquidotedi Isabedbëd cuishonquec bëdambo icpanëdash.
59Adnubien 7tedec ushtanquin Isabedën: Cun madon shui dëbid dëtemetannu, quec nidpanëdash. Adanec puduedacsho: Bacuëmpi aton papa Sacadias cuëmëdquidi cuënnuna, quesho tantiashun#1.59 Aden Nuquin Papan namiaid tantiatiadquiocquin Ene. 17.10-12bëta D.N.Ch. 12.3 isbanta. 60aton tita Isabedën: Padenquio. Abi cuëmëdquid Uan nec, capanëdash.
61Adoaquien ambocquido: Min matses Uan cuëmëdquid nibëdec. 62Sacadias chuimenu, quequin mëdante uic uiccaquin: Abi cuëmëdquid chui. Tantianu, capanëdash utsibon.
63Adoaquien: Dadauate bec cho, quequin uic uiccaquin tantiamiac meniac: Abi cuëmëdquid Uan nec, quequin dada uaquin Sacadiasën ismepanëdash.
Adoaquien: ¿Abimbobida capec? quec tantiadempambo yec tabadcuededpanëdash utsibotedi.
64Adnubien padpidembuen oncamiac: Nuquin Papan naid bëdambo iquec, quequin Sacadiasën onquequin chuipanëdash. 65Aden chuibansho tantiash: Dacuëdampamboshë iquec. ¿Atotsi quiash onquenquiocbuedëmbi nëbi onquequin Nuquin Papan naid chuibampec? quecuededpanëdash abëd icquido. Adembidi nidaid cuëshë Udea yacnocquid macuësh yacno tabadquid matsesën Sacadias onquecuenuaid chuibededpanëdash.
Aden tantianec aton shubuno nidanneshun ambi isbuedbëtabi ambi tantiabued chuipanëdash. 66Adoac: ¿Mitsipadquidquio ictequid aid bacuë nepash? Nuquin Papan tantiaidquien nechitash, quecuededpanëdash.
Nuquin Papa tantiec Sacadias cuëdënaid
67Adnubien Uanën papa Sacadias Nuquin Papan Mayan Bëdan oncamiac naden aton mado Uanën nate chuipanëdash:
68Cun matses isadaidbon tantiaid Nuquin Papa chuiquin: Mibi bëdamboshë iquec, canuna.
Utsin mëyanquin iuaido icsho choshon nuqui mënchiquendac.
69Aden Nuquin Papan abi yacno puduedmianquid nadatiambocquin nabanquid chomendac.
Aidi Nuquin Papan namiaid tsusedpa Dabidën tsiuecquid nendac.
70Aid chote Nuquin Papan tantiamiacpadombuen ëndenquimbo ambi oncamiaidon chuipampic.
71Aidëmbi nuqui chieshënquido nuqui mënchiquendac.
72Nuquin tsusedpabo bëdambuen isquin ambi aido chiampicpadombuen bëshunenquio icquin naindac.
73Aden nuquin tsusedpa Abadauan chiec:
Muainquiocquid icquin umbi chiacpadombuen naindambi, quepampic.#1.73 Nuquin Papan Abadauan chiampid istiadquiocquin Ene. 17.1-8 isbanta.
74Abi chieshënquidon chieshënsho min tsiuecquido mënchiquendambi.
Adoac dacuëdenquio yec umbi namiaido yanendac, quepampic.
75Aden ambi namiaid yec abi tantiaquid uënësabi yec bëdambuec tabadquid iquendac.
Aden chiec onquiashien aton mado chiec Sacadias nadec onqueuapanëdash:
76Nuquin Papan Chomiaidquio chuibanquidquio
mibia icsho issun utsibon: Nuquin Papan oncamiaidquio nec, mibi caindac, mado.
Chuiquid tapambo choec, queshun podquied nacnenacbimbuen:
Nuquin Icbombo choeque. Mimbi icsambuen naid ënash bëdambuec tabadta, quequin aid chuiquidquio mibi iquendac.#Mad. 3.1; Mat. 3.3; 11.10; Madc. 1.2-3; Duc. 3.4; 7.27; Uan 1.23.
77Adquid icquin nuquin matses chiec: Mibi cuidenquio yec mimbi icsambuen naid tantienquio yec
bëshunshun bëdambuen isquin Nuquin Papan mibi abëdi tabadmendac,
quequin chuibanquid mibi iquendac, mado.
78Mibi oncamequid Nuquin Papan nuqui cuidte bunenquio icquin matses tantiaquid icquin
badiadnuc uëshë chënquecunacbimbuecquid nuqui cuidmenquiocquid abucshun chomendac.#1.78 Mad. 4.2 tantiaquin nëid dada uapanëdash Aid isbanta.
79Aden chomiac choshon uëshëmbo icnuc isquin tantiacbimbuen matses abimbo tantiamendac.
Icsambuen naquidombo icsho Nuquin Papan cuidtequido nec, quequin tantiamendac.
Aden tantiamiac aid tantiaquid yanash dacuëdenquio yanec bëdambuec tabadendac,
quequin Sacadiasën chuipanëdash.#1.79 Isa. 9.2 tantiaquin nëid dada uapanëdash. Aid isbanta.
80Adashic Sacadiasën mado Uan canicuensho Nuquin Papan tantiamiaidquio iquec shubu nibëdacno capucuennepanëdash ambi isadaidbo chuibennete uëshë choabicnuc.

Currently Selected:

Ducas 1: mcfNT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy