YouVersion Logo
Search Icon

Uan 9

9
Esusën bëshuaid bëdanmiaid
1Adec cuenash capuquimbi Esusën dada bëshuaid istuidpondash. Aidi anin bëshuacchobi tishnëdaid nepondash. 2Aid istuidshumbimbi ubitedishun: En chui, Icbo. Tantianu. ¿Atotsi queshun nëid dada bëshuacchobi tishpanëdash? ¿Aton papabëtan anin icsambuen nabansho issunda Nuquin Papan cuidquin bëshu uanëdaid nepec? ¿Tishabi icshobi: Abibi icsatequid nec, quequin tantiaquinda Nuquin Papan bëshu uanëdaid nepec? capondambi.#9.2 Aton matsesën tantiacpadombuen Esusbëd icquido: Daicsaidbëd nënquido icsambuen naquidtedi nec. Icsambuen nasho Nuquin Papan cuidaid nec, quepanëdash. 3Adoaquien Esus: Padenquio. Aton papabëtan anin icsambuen nasho issun Nuquin Papan cuidquin bëshu uambo iquec. Adecbidi abibi icsatequid nec, quequin tantiaquin Nuquin Papan bëshu uambo icpanëdash. Nadatiambocquin nabanquin bëdanmesho issun: Ma matsesën: Nuquin Papa nadatiambocquin naquid nec, quequin tantianu, queshumbien Nuquin Papan napanëdash. 4Nëbi ubi chomiondaid Cun Pan chiacpadombuen naic chonoadnuna. Ubi Nuquin Papa yacno nidabi icnuc aden nanuna. Inchëshnuc chonoadtiapimbo yacbimbuec ubi nidan ubëd mibitedi chonoadtiapimbo iquendac. 5Aden chiashic: Matsesbëd tabadquin chëncaquin ismiacbimbuen matses Nuquin Papa bëdambuen tantiamequidquio nebi, 6quequin chuitanquin nidaidën uicchun pidtanquin nidaidbëta uicchun cabiuntsëcshun bëshuaid Esusën bëbitaccapondash.
7Adotanquimbic: Acte uëdëshcaid tiquidimbo icquid Sidoe caidën bëpamëdec nid, cac nidash bëpamëdtanec bëdambuen isec chopanëdash. Aid acte cun onqueten chomiaid quequin Sidoe capondash. 8Adec bëdanash aton shubuno nidacsho issun aton shubu anoentsëc icquidobëtan isenquio tsadec: Piucquid bec cho, quesho isbued utsibon istuidpanëdash. Aden istuidash: Podquied cuëman tsadec: Piucquid bec cho, quesho nuqui isbuedquiobien niacbipec, cabededpanëdash. 9Utsi utsiec: Ai, aidquiobi nec, quenubi utsibo: Padenquio. Aidbimbuecquidien nechitec, quesho tantiashien: Aidi nebi, quepanëdash bëshuacbued. 10Adsho tantiashun: ¿Mitsipaden isbeno? caquien: 11Esus cuëmëdquidën uicchun pidtanquin nidaidbëta uicchun cabiunshun bëbitaccashun: Acte tiquidimbo icquid Sidoe caidën bëpamëdec nid, cac nidash bëpamëdequi bëdanobi. Nëbi bëdambuen isembi, quepanëdash bëshuacbued. 12Adsho tantiashun: Mibi bëdanmequid ¿mitsimbo icpec? caquien: Tsaun, capanëdash.
Padiseobon bëshuacbued chuimiaid
13Chonoadtemaid uëshën bëdanmioshi, quesho tantiashun: ¿Abimboda capec? quetanquin: Ma cun chuiquidon mibi chuimenu, queshun padiseobo yacno bëshuacbued buampanëdash. 14Buanacshobien padiseobon: Chonoadtemaid uëshëmbi Esusën bëdanmiac caosh, quequin tantiaquin: 15¿Mitsipadec bëdano? caquien: Esusën nidaidbëta uicchun cabiunshun bëbitaccac acten bëpamëdec bëdanshun nëbi bëdambuen isembi, quepanëdash bëshuacbued.
16Adec: Bëpamëdec bëdanobi, quesho tantiashien padiseobo utsi utsiec nadec onquecuededpanëdash: Nuquin Papan Chomiaid icquin Aidën Chiaid niaquenquio ictsiash. Ma chonoadtemaid uëshën nëid bëdanmequin Nuquin Papan Chiaid niacpayoc, quenubien utsibo: ¿Nuquin Papa tantiesanda aden bëdanmepatsiash? Ma nadatiambocquin nabampaboc, quepanëdash. Adshumbic abitedishun: Esus icsambo iquec, cainquio icquin 17bëshuacbued chuiuapanëdash. Mibi bëdanmequid icsho: ¿Mitsi paden aid mimbi tantie? caquien: Nuquin Papan oncamiaid nec, quequin tantiembi, capanëdash bëshuacbuedën.
18Adoaquien cun matses isadaidbon chuiquido: Bëshuaidpenquien niash. Muequien neque. Anibëta amë chuimenun chomenuna, quetanquin 19-20chomeshun bëshuacbued ismequin: ¿Min madobida nec? capanëdash. Adoac: Ai, cun mado nec, quesho tantiashun anitsen chuiquin: ¿Bëshuacchobida tishonda? capanëdash. Adoaquien: Ai, bëshuacchobi tishondambi, capanëdash anin. Adshobien: Bëshuaid ¿mitsipadec bëdanosh? capanëdash. 21Adoaquien: Tsaun. ¿Tsundambien bëdanmechitash? Bëdanmesho isambo iccombi. Dada ënden caniaid neque. Aidi chuime, capanëdash bëshuacbuedën titan amëbëtambi. 22Nuquin Papan Chomiaid Quidistu caid Mesias Esus nec, quequido icsho Nuquin Papan Chiaid chuibante shubun puduedmenquien ictiad, quequin cun matses isadaidbon chuiquidon chiaid tantiash dacuëdquin: 23Dada ënden caniaid neque. Aidi chuime, capanëdash anin amëbëtan.
24Adoac cun matses isadaidbon chuiquidon padpiden bëshuacbued chomeuashun naden chuiuapanëdash: Nuquin Papan isquin tantianubi abimbo chuita. Esusën bëdanmioshi ¿quecta icco? Esus Nuquin Papan Chiaid niacquid yec icsambocquid nec, quequin tantiembi, quepanëdash. 25Adsho tantiashumbien bëshuacbuedën: Icsambuen naquid Esus nec, quequin tantienquio iquembi. Mabi bëdanmeboc. Isenquio icbuedëmbi mambi nëbi bëdambuen iseyoc, quequinuidtsëqui tantiembi, quepanëdash. 26Adsho tantiashumbien padpiden chuiuaquin: ¿Mitsipaden mibi bëdanmenuen naosh? caquien: 27Mambi mibi chuipaboc. Aden chiaqui ma mimbi tantienquio icpayoc. ¿Atotsi quiash padpidec: Ubi chui, mibi quepe? ¿Mibitedida Esus tantiaquido icte bune? capanëdash bëshuacbuedën.
28Adsho tantiash nëishtanquin: Mibien Esus tantiaquid nec. Mibi icsambo iquec. Ubitedien nuquin tsusedpa Moisesën chiampid tantiaquido nec. 29Moisesien Nuquin Papan chuiquin namepampic, quequin tantiembi. ¿Tsuntsin chiac mibi bëdanmequidën napash? Ma mibi bëdanmequid ¿mitsiuëshquio chopash? Umbi tantiacmaidquio neyoc, quequin chushcapanëdash chuiquidon. 30Adoaquien bëshuacbuedën: ¿Abimboda cai? Dadpenquio tantiembi, ma mibi quepaboc. ¿Adbuedida: Umbi tantiacmaidquio nec, mibitedi quepe? Mimbi tantiacmaidëmbini bëdanmiosh. 31Ambi icsambuen naid ënabi icquidën Abi chiannesho Nuquin Papan tantiashunenquio ictsiash. Abi tantiaquioquin Ambi chiacpadombuen naquidën Abi chiannesho Nuquin Papan nashuntsiash, quequin nuqui tantiec.#9.31 Chotaquën onqueten dada uaid Cuëd. 66.18 chuipanëdash. 32Anin bëshuacchobi tishaid bëdanmiac caosh, quesho tantiambo iccondambi. Adquid bëdanmequid nibëdpadennec. 33Nuquin Papan chomiacmaid icquin Esusën ubi aden bëdanmenquio ictsenosh, quepanëdash bëshuacbued. 34Adsho tantiash nëishtanquin: Bëshuacchobi tishaid yec mibi icsambuen naquid nec. ¿Adquid icquimbida mimbi ubitedi chuipe? Nëmbo Nuquin Papan Chiaid chuibante shubun padpidec pudueduainda, quequin cuenmepanëdash.
Ambi bëdanmebued istuidshun Esusën chiaid
35Adnubien: Mimbi bëdanmebued cuenmiac caosh, quesho tantiashun Esusën ambi bëdanmebued istuidpondash. Istuidshumbic: Matsesën Tishaid yec Nuquin Papan Chomiaid nec ¿quequinda tantie? capondash Esusën ambi bëdanmebued chuiquin. 36Adoaquien: Icbo ¿Tsutsi caic nec? Umbitsen aid tantianu. Ubi chui, capondash. 37Adoac Esus: Ubibi nebi. Mimbi isbued yec mibëd onquequidi nebi, caquien: 38Ai, Nuquin Papan Chomiaid Quidistu caid mibi nec, quequin tantiembi, quetanec Esus ismec dannëshën tinquebudpondash.
39Adshumbic Esusën naden chuipondash: Matses cuidquid nebi, quiash matsesbëd tabadec Nuquin Papa yacnouësh chondabi. Umbi bëshuaid bëdanmiac tantiesa icbuedëmbi ubi tantiabensho Nuquin Papan bëdambuen isec. Utsiboen: Nuquin Papa tantiaquiembi, quebuedombi bëshuacbimbuen ubi tantiatiapimbo icquin Nuquin Papa tantienquio iquec, quepondash Esus. 40Adsho tantiash ambo tabadquid padiseobo utsi utsiec: ¿Bëshuacbimbuen Nuquin Papa tantiesabodabi ne? quepondash. 41Adsho tantiashien: Bëshuacbimbuen Nuquin Papa tantiesabo icsho umbi tantiamiac Nuquin Papabëta ubi tantiasho Nuquin Papan mibi bëdambuen istsiash. Padnuen: Nuquin Papa tantiembi, quec muaquin Ambi Chiaid bëdambuen tantienquiocquid icsho Nuquin Papan cuidtequido mibi nec, quepondash Esus padiseobo chiec.

Currently Selected:

Uan 9: mcfNT

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy