João 7
7
Jesus jãvy ag tỹ ti ki ge sór tũ
1Tag pãte Jesus tóg Galiléia mĩ tĩ mũ. Judéia ra tĩg sór tũ tóg nĩ ver, ag tỹ tá ti tén sór kỹ, Judeu ag pã'i ag.
2Kejẽn tóg Judeu ag fénhta ũ tá krỹg mũ. Fénhta ẽn kurã ki ag tóg pãjó krẽm nỹtĩ, Jerusalém tá. 3Kỹ Jesus jãvy ag tóg ti mỹ: “Ẽmã mág ra tĩg nĩ, Jerusalém ra,” he mũ. “Ã tỹ tag hã ki milagre hynhan kỹ tá ã mré ke ag tóg vég tũ nĩgtĩ. 4Ẽg tỹ tỹ ũn mág nĩn kỹ ẽg tóg vẽnh kar rĩnve ẽg tỹ nén han ke mũ ẽn han tĩ. Hã ra ã tóg ag vatánh tá milagre hynhan tĩ,” he ag tóg mũ. 5Ag pijé ti ki ge kỹ nỹtĩ', hã kỹ ag tóg ti to é he mũ.
6Hã ra Jesus tóg ag mỹ: “inh kurã vỹ jun ja tũ nĩ ver, hã kỹ sóg tĩg sór tũ nĩ ver,” he mũ. “Ãjag hỹn kurã tũ nỹtĩ, jãvo sóg kurã nĩ. 7Ũ tỹ iso jũ mũ ag pijé ãjag to kórég nỹtĩ'. Inh ã to tóg kórég nỹtĩ, isỹ ag mỹ: ãjag jykre vỹ kórég nĩ, hen kỹ. 8Ha fénhta venh mũjẽg inhhã. Inh pijé tĩg sór mũ', ver'. Inh kurã vỹ jun ja tũ nĩ ver,” he tóg. 9Kỹ tóg ver ga tỹ Galiléia mĩ tĩ mũ.
Jesus tỹ fénhta venh tĩg
10Ti jãvy ag mũ kar kỹ tóg kejẽn Jerusalém ra tĩ mũ gé, vẽnh kar vatánh tá, vẽnh péju kỹ. 11Kỹ pã'i ag tóg fénhta ki ti jãvãnh mũ: “ti hẽ kã nĩ?“ hen kỹ. 12Vẽnh kar ag tóg ti to vĩ mũ. Ũ ag tóg: “ũn há vỹ tỹ ti nĩ,” he mũ. Jãvo ũ ag tóg: “vó, ẽg mỹ tóg ón tĩ,” he mũ gé. 13Hã ra ag tóg jamã há ra ti to vẽmén tũ nĩgtĩ, pã'i ag kamẽg kỹ.
14Fénhta kuju ki Jesus tóg kejẽn Topẽ ĩn ra tĩ mũ, ag kanhrãn jé. 15Kỹ ti vĩ tóg vẽnh kar mỹ e tĩ. “Vẽnh kanhrãn mág han ja tũ ti nĩ, hã ra tóg ki kanhró pẽ nĩ,” he ag tóg mũ ti to, pã'i ag.
16Kỹ Jesus tóg: “isỹ ãjag mỹ Topẽ vĩ tó vẽ,” he mũ. “Inh jykre pijé'. Ũ tỹ inh jẽnẽg mũ ẽn jykre vẽ. 17Ũ tỹ Topẽ vĩ ki króm sór mũ ag vỹ ki kanhró nỹtĩnh mũ, sỹ ti jykre tó mũn ki. Isỹ vẽsóg ki sỹ nén to jykrén mũ tó pijé'. 18Ũ tỹ vẽsóg ki ti tỹ nén to jykrén mũ ẽn tó kỹ tóg tỹ ũn mág nĩ sór mũ. Hã ra sóg ũ tỹ inh jẽnẽg mũ ẽn to: ũn mág vỹ tỹ ti nĩ, he mũ. Inh pijé vẽjykre vẽnh mỹ tó tĩ'. 19Moisés vỹ ãjag jyvẽn ja nĩgtĩ. Ãjag tỹ ne jé ti vĩ han tũ nĩ nẽ? Isỹ ti vĩ ki króm mũ ra ãjag tóg isén sór mũ',” he tóg.
20Kỹ ũn e ẽn ag tóg ti mỹ: “krĩ vẽnh mỹ ã tóg nĩ, ã tén sór tũ ẽg nĩ,” he mũ.
21Hã ra Jesus tóg ag mỹ: “milagre pir han ja inh nĩ, vẽnhkán ke kurã ẽn ki, kỹ tóg ãjag mỹ e tĩ,” he mũ. 22Moisés tóg ẽg mỹ: “gĩr mur pãte kurã tỹ 8 (ke) ki ti gré fár kym nĩ,” he ja nĩ. Hã kỹ ãjag tóg tỹ vẽnh kán ke kurã ra kym tĩ. Kórég tũ ti nĩ. Hã ra ũ tỹ ti krẽ gré fár kym vén mũ pijé tỹ Moisés nĩ ja nĩ'. Ti jógjóg ve ja vẽ. 23Ãjag tỹ Moisés vĩ ki króm jé ãjag tóg vẽnhkán ke kurã ki rãnhrãj tĩ. Hã ra ãjag tóg iso jũ sór mũ, isỹ vẽnhkán ke kurã ki ũn kaga pir tỹ há' hen kỹ. 24Ón kỹ ãjag tóg iso jũ sór mũ. Inh jykre vỹ ãjag mỹ kórég nĩ ve nĩ. Ãjag tỹ to jykrén há han ra ãjag tóg inh jykre há nĩ venh mũ vẽ,” he tóg.
Ag tỹ Jesus to: “ti mỹ tỹ Cristo nĩ vỹ?“ he
25Kỹ Jerusalém tá ke ag tóg Jesus to: “ti tén sór ja ag tóg nĩ,” he mũ. 26“Hã ra tóg jatun mỹ vẽnh kar mré vẽmén jẽ nĩ. Pã'i ag mỹ ti to: “Cristo vỹ tỹ ti nĩ, Topẽ tỹ ũn jẽnẽg mũ vỹ tỹ ti nĩ,” he tũ nĩ vỹ?“ he ag tóg mũ. 27“Cristo ẽn kãtĩg kỹ ẽg tóg ti tỹ hẽ tá kãtĩ mũ ki kagtĩg nỹtĩnh mũ. Hã ra tóg tỹ Nazaré tá ke nĩ, kỹ ti hỹn tỹ Cristo tũ nĩ,” he ag tóg mũ.
28Hã ra Jesus tóg Topẽ ĩn tá vẽnh kar kanhrãn mũ. Kỹ tóg jamã há ra: “ti tỹ hẽ tá kãtĩ mũ ki kanhró ẽg tóg nỹtĩ, he ãjag tóg mũ, iso. Hã ra ãjag tóg ũ tỹ inh jẽnẽg mũ ẽn ki kagtĩg nỹtĩ. 29Inh hã vỹ Topẽ ki kanhró nĩ. Ti hã tá sóg kãtére, ti tỹ inh mỹ: “ha ag venh tĩg,” hen kỹ,” he tóg.
30Kỹ ag tóg ag tỹ ti se sór mũ ra ti vóg tũ nĩ ver. Ti ter ke kurã vỹ jun ja tũ nĩ ver. 31Ag jãvo ũn e ag tóg ti ki ge mũ sir. Ti to ag tóg: “Cristo kãtĩg kỹ ti nẽji milagre hynhan ke mũ. Ti tỹ milagre hynhan vỹ e nỹtĩ. Ẽg mỹ tóg tỹ Cristo nĩ,” he mũ.
Pã'i ag tỹ Jesus se sór
32Kỹ Fariseu ag tóg ag vĩ tag mẽg mũ. Kỹ ag tóg pã'i ag mré ti senh ke to vẽmén mũ. Kỹ ag tóg porisa ag jẽnẽg mũ, ag tỹ ti se jé. 33Hã ra Jesus tóg: “ãjag mré sóg nĩ sĩ han ke mũ ver,” he mũ. “Tag pãte sóg tĩg ke mũ, isỹ ũ tỹ inh jẽnẽg mũ ẽn ve jé. 34Ẽn kã tóg ãjag tỹ inh venh há tĩnh mũ, hã ra ãjag tóg inh venh ke tũ nĩ. Ẽn tá junjun ke tũ ãjag tóg nĩ, isỹ hẽn ra tĩg ke mũ ẽn tá,” he tóg.
35Kỹ ag tóg jagnẽ mỹ: “ti hỹn hẽ ra tĩg sór mũ?“ he mũ. “Ẽg hỹn hẽ tá ti venh ke tũ nĩ? Ti hỹn hẽn ri ke mũn ga tỹ Grécia ra tĩg sór mũ, tá ẽg mré ke ag kanhrãn jé. 36Ne to ke nẽ, hỹn, hã vỹ: “ãjag tỹ inh venh há ra ãjag tóg inh venh ke tũ nĩ, he mũ?” he ag tóg mũ. Jesus vĩ vỹ ag mỹ e tĩ, hã kỹ ag tóg ti tỹ nén tó mũ ki kagtĩg nỹtĩ.
Topẽ kuprĩg tỹ goj ri ke nĩ
37Vãhã tóg fénhta tỹ kurã tỹ ẽgno tá krỹg mũ. Kurã mág pẽ vẽ, hã kỹ ag tóg e tãvĩ nỹtĩ, Jerusalém tá. Kỹ Jesus tóg jẽ kỹ vẽnh kar mỹ prẽr kỹ: “!..ãjag tỹ goj kron sór kỹ inh mỹ to vĩ, isỹ ãjag mỹ goj há ven jé..!“ he mũ. 38“!..Topẽ vĩ ki tag vỹ rán kỹ nĩ, ha mẽ: !..ãjag tỹ inh ki ge kỹ tóg ãjag kã ki goj ror han ke mũ, isỹ ãjag mỹ goj nĩm ke ti.. !..kỹ goj tag vỹ ãjag rĩnrĩr pẽ han ke mo..!“ he tóg. 39Ti tỹ ag mỹ Topẽ kuprĩg tón hã vẽ, hã to tóg: goj, he mũ. Topẽ kuprĩg tỹ tóg ag jagrẽn ke mũ, ũ tỹ ti ki ge mũ ag. Hã ra tóg fénhta ẽn kã ag mỹ ti jẽnẽ ja tũ nĩ ver, ti tỹ ver ti ter kar kỹ rĩr mãn ja tũ nĩn kỹ, ti tỹ ti panh ra tĩg mãn ja tũ nĩn kỹ ver.
Ag tỹ Jesus ki kagtĩg
40Kỹ Jesus vĩ mẽg mũ ũ ag tóg ti to: “Topẽ vĩ tó tĩ pẽ ẽn vẽ,” he mũ. 41Kỹ ũ ag tóg ti to: “Cristo vỹ tỹ ti nĩ, Topẽ tỹ ẽg mỹ ũn jẽnẽg mũ ẽn vỹ tỹ ti nĩ,” he mũ gé. Hã ra ũ ag tóg: “Cristo mỹ hỹn ga tỹ Galiléia tá kãtĩ mũ vỹ?“ he mũ. 42“Topẽ vĩ rá ki tóg: “Davi krẽ'krẽ vỹ tỹ ti nĩ, Cristo ti,” he mũ, “ẽmã tỹ Belém tá ke vỹ tỹ ti nĩ, Davi jamã ja ẽn tá,” he tóg, Topẽ vĩ tỹ rán kỹ nĩ ki. Hã kỹ tóg ẽg mỹ tỹ Cristo tũ nĩ,” he ag tóg. 43Hã kỹ ag tóg vẽnh kãpãm kỹ nỹtĩ, ti tugnĩn. 44Kỹ ag kã ũ ag vỹ ti se sór mũ, hã ra ag tóg ti kãgmĩg tũ nĩ, ti kamẽg kỹ.
Pã'i ag tỹ Jesus ki ge sór tũ
45Kỹ porisa ag tóg pã'i ag to vỹnvỹn ke mũ. Kỹ ag tóg ag mỹ: “hỹn, ti?“ he mũ. 46Kỹ ag tóg: “hã ra tóg vĩ há tãvĩ han mũ. Vẽnh vĩ tỹ ge mẽ ja tũ ẽg nỹtĩ, hã kỹ ẽg tóg ti kãgmĩ ja tũ nĩ,” he mũ. 47Kỹ pã'i ag tóg: “kỹ ãjag mỹ ti vĩ kri fi sór mũ', ti ón mũ ra?“ he mũ. 48“Ẽg mỹ ti vĩ kri fig mũ'? Vó, kri fig tũ ẽg nĩ. 49Ũ tỹ kri fig mũ ag tóg Topẽ vĩ rá ki kagtĩg nỹtĩ, kỹ Topẽ tóg ag mỹ vĩ kónãn ke mũ, ha vem nĩ,” he ag tóg mũ.
50Hã ra Nicodemos vỹ ag mré nĩ gé, ũ tỹ kuty tá Jesus mré vẽmén ja ẽn ti. Kỹ tóg ag mỹ: 51“ẽg tỹ ti vóg kónãn sór kỹ ẽg tóg ti ki jẽmẽ vén ke mũ,” he mũ. “Ti tỹ nén han ja to jykrén há han jé ẽg tóg ke mũ, ẽg tỹ kar kỹ ti vóg kónãn jé. Topẽ tỹ ẽg mỹ vẽjykre nĩm jan hã vẽ,” he tóg.
52Hã ra pã'i ag tóg: “ã hỹn tỹ Galiléia tá ke nĩ gé', hã kỹ ã tóg ti jy nĩgãn sór mũ',” he mũ. “Topẽ vĩ ki ve há han nĩ, kỹ ã tóg venh ke mũ. Galiléia tá ke ũ vỹ Topẽ vĩ tónh ke tũ pẽ nĩ,” he ag tóg mũ.
Currently Selected:
João 7: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido