1 Tesalonicenses 1
1
Xqꞌuebal xsahil xchꞌo̱leb
1La̱in laj Pablo. Cuochben laj Silvano ut laj Timoteo. Yo̱co chi tzꞌi̱bac e̱riqꞌuin la̱ex laj pa̱banel li cuanquex aran Tesalónica. La̱ex rehex chic li Yucuaꞌbej Dios ut li Ka̱cuaꞌ Jesucristo. Aꞌ taxak li usilal ut li tuktu̱quilal chicua̱nk e̱riqꞌuin, li naxqꞌue li Dios li kaYucuaꞌ ut li Ka̱cuaꞌ Jesucristo.
Tzꞌakal re ru lix pa̱ba̱leb laj Tesalónica
2Junelic nocotioxin chiru li Dios nak nocotijoc che̱rix che̱junilex la̱ex. 3Nak nocotijoc chiru li Dios, junelic cuan saꞌ kachꞌo̱l chanru le̱ cha̱bilal xban le̱ pa̱ba̱l. Cuan saꞌ kachꞌo̱l le̱ cha̱bil cꞌanjel xban nak nequexrahoc ut cuan ajcuiꞌ saꞌ kachꞌo̱l nak kꞌaxal cau e̱chꞌo̱l chixyoꞌoninquil li Ka̱cuaꞌ Jesucristo. 4Ex inherma̱n, raro̱quex xban li Dios ut nakanau nak sicꞌbil e̱ru xban. 5Nakanau aꞌan xban nak ma̱cuaꞌ caꞌaj cuiꞌ riqꞌuin a̱tin quicuulac li resil li evangelio e̱riqꞌuin. Riqꞌuin aj ban cuiꞌ lix cuanquil li Santil Musikꞌej ut xenau nak tzꞌakal ya̱l li xkachꞌolob che̱ru. Ac xeqꞌue retal chanru li kanaꞌleb nak xocuan saꞌ e̱ya̱nk che̱tenkꞌanquil. 6Xetzol e̱rib kiqꞌuin ut riqꞌuin li Ka̱cuaꞌ Jesucristo. Usta nabal li raylal xecꞌul, abanan xerabi li resilal riqꞌuin li sahil chꞌo̱lejil li quiqꞌueheꞌ e̱re xban li Santil Musikꞌej. 7Joꞌcan nak la̱ex chic aj cꞌamol be chiruheb chixjunileb laj pa̱banel li cuanqueb saꞌ li naꞌajej Macedonia ut Acaya. 8Anakcuan e̱ban la̱ex nak yalak bar qui-abi̱c resil ra̱tin li Dios. Ma̱cuaꞌ caꞌaj cuiꞌ Macedonia ut Acaya. Qui-abi̱c ban ajcuiꞌ saꞌ chixjunil li naꞌajej. Yalak bar qui-abi̱c resil nak la̱ex xepa̱b li Dios. Joꞌcan nak la̱o incꞌaꞌ chic tento nak takaye resil le̱ pa̱ba̱l. 9Yalak bar yo̱queb chixserakꞌinquil chanru nak coe̱cꞌul nak cocuulac e̱riqꞌuin ut yo̱queb chixserakꞌinquil chanru nak quecanab xlokꞌoninquil li yi̱banbil dios ut quepa̱b ut nequexcꞌanjelac chic chiru li tzꞌakal Dios, li yoꞌyo. 10Ut yo̱queb ajcuiꞌ xserakꞌinquil chanru nak yo̱quex chiroybeninquil nak ta̱cha̱lk chak toj saꞌ choxa li Jesucristo li Ralal li Dios, li quicuaclesi̱c cuiꞌchic chi yoꞌyo saꞌ xya̱nkeb li camenak xban li Dios ut aꞌan li ta̱colok ke chiru li rakba a̱tin li ta̱cha̱lk saꞌ kabe̱n.
Currently Selected:
1 Tesalonicenses 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.