Visimo 1
1
Seo ya visimo
1 #
1 Vim 4:32
Evi vikevyo visimo vya Solomoni mwene wa Isalele muna Ndaviti. 2Visimo evi vilongesa vanu kunangula, ngeci vazivuke mana na vilongesa, ngeci vanu vazivuke majwi akulova. 3Visimo vyasa kukulongesa kukala na mana akulinga vyuma vyavivwa mu ngila ya vushunga amo na vuvwa. 4Vyasa kunyanyamesa vaka- kulilongesa, nakwana mukwenje mana akuyongola mwamuvwa. 5Visimo evi vyasa kuwezelela ku mana a vaje valinawo, vyasa kutwamenena lalo vaka-kulilongesa, 6ngeci vase kuzivuka mwamuvwa mwanalumbunukila majwi a visimo, na majwi aje avendeka vaka-mana na tusau twavo.
Kunangula vakwenje
7 #
Yom 28:28; Mya 111:10; Vis 9:10 Kukomoka Shukulu Kalunga, kukekwo vushangumukilo vwa mana. Oloni vilema vakevo vayeluwisa mana nakuyeluwisa lalo vilongesa.
8Ove munange, tolilila vilongesa vya isho, co lalo kesi wivale vilongesa vya vanyoko. 9Omwo vilongesa vyavo vikapwa ngwe kalupusa kakavwa ku mutwe wove nambe ngwe sungu mu mukoshi wove.
10Munange, nga vaka-vuvi vakukokweya, kesi uvatave. 11Nambe nga vendeka ngwavo, “Ija kuno tuvandamene munu ngeci tumutsiye, tuvandamene vanu vakujeneka mulonga ngeci tuvatsiye! 12Tuvaleuleni voshe oku vayoya, ngwe vaje vashelumuka ku vukalo vwa vatsi, tuvatsindeni voshe ngwe vaje vavatsinda mu mbulu! 13Tukambata vufuko vwavo vwoshe vwakuliseza-seza, nakushulisa vinjuvo vyetu na vyuma vyakupukula! 14Ija ulipandakane netu, co tuvavoshe tukalipangela vije tukawana.”
15Munange, kesi wende na vanu vakufwa ngacije, nambe kulinga vije vivalinga vakevo. 16Simbu yoshe vanu ava vakalingi cuma cacivi. Vakevo vakalyanganya ngeci vatsiye. 17Kukwesi munu ata linimbwa oku kazila nakengelela valinakulita. 18Oloni vanu vakufwa ngacije valinakulitela mweto vakevo vavenya, mweto muje muvakatsa vakevo vavenya. 19Vufuko vuje uwana mu ngila ya muuka vukakutwala ku kutsa, eci cikeco cilingiwa ku munu uje ayoya mu ngila ya muuka.
Mana alinakusana
20 #
Vis 8:1-3
Tolilila, mana alinakusana mu vitapalo na ku mitambela ya vulandeselo, 21mana alinakutambeka ku vikolo vya mu nganda, na kuje kwoshe kuvalikungulwila amo vanu ngwawo, 22“Visimbu vingaijo eni vilema mukatwalao kulinga vulema? Visimbu vingaijo mukalikela kutomba nakujola mana? Kuma kumulilongesa ndi? Njimyana kunangula kwakuvwa nakumyana mana ange. 23Tolilileni omo njimyendekela, njimyana kunangula kwakuvwa. 24Njinakala nakumisana, nakumilanya ngeci mwije, oloni yeni kumwombileko mbunge. Kumwatolililile kuli yange. 25Munombwanesa kunangula kwange kwoshe, co kumwakele na cizango cakunjitava omo njamyendekelele. 26Ngecivene, njikamijola omo mukavindama, co njikamishendumuna lalo omo vyakujujwisa vikaija ali yeni, 27omo vyakujujwisa vikaija ali yeni ngwe lihunzi lyakama, mukuminenela vukalu na tuyando. 28Asinoni mukasana mana, oloni kunjikamikumbulula, mukanjishakezeka noku-noku, oloni kumukanjiwana. 29Omwo yeni mwazinda mana, co kumwakomokele Shukulu Kalunga. 30Yeni kumwashakele kunangula kwange nambe kumbako mbunge omo njamyendekelele. 31Ngecivene, mukawana vije vimwashakele, co mukakuta na vilinga vyeni. 32Vaka-kujeneka kuzivuka, vakatsi omwo vakavyana mana. 33Oloni woshe uje atolilila kuli yange, akakala mu kwoloka. Ikeye akakala mwamuvwa, nacimo cai cikamuzivisa lyova.”
Currently Selected:
Visimo 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006