Mbimbi 1
1
Vusiwa vwa Yelusalema
1Yelusalema, nganda ije yashulile na vanu,
ololo inapu ngundu!
Nganda ije vakele nakusingimika mu kaye mwoshe,
ololo inapu ngwe fwile.
Nganda ije yapwile ngwe lishano a vinganda vyoshe,
ololo inapu ngwe ndungo.
2Vutsiki vwoshe alinakulila,
co misozi yendi ilinakwolomokela ku vinana vyendi.
Vasamba vendi voshe vaje vakele navo,
naumo wai aliko ngeci amuzembeleke.
Vasamba vendi voshe#1:2 VASAMBA VENDI VOSHE: Vasamba va Isalele vaje vaalizivasanene navo akulivanga.
vanamwende vungungu,
ololo voshe vanamutengulukila nakumulwisa.
3Vanu va mu Yunda vanapu vinzinda,
vanaseze membo avo,
omwo kayando kakama manene
na mapakeso a muuka,
valinakuyoya mu mafuti eka,
kuvesi na mutambela wavo.
Vitozi vavo vanavazengeleka
ku mitambela yoshe,
noku kuvatewela kwai.
4Vitapalo vyakuya ku Siyone
vilinakulila ngwe vanu,
omwo naumo wai alinakwendamo
mukuya ku Njuvo ya Shukulu Kalunga,
mukulemesa a matangwa akujela.
Vambanda vaje vakele
nakwimbila kuje valinakuyanda,
co vaka-kukombelela valinakukemanga lika.
Vikolo vya mu nganda vili mupulungwa,
co Siyone ili mu vukalu.
5Vitozi vendi vanamufungulula,
co ali mu mavoko avo.
Shukulu Kalunga namunyanyamesa
omwo vuvi vwendi vwavungi,
vana vendi vanavafungulula nakuvatwala.
6Vuvwa vwa Yelusalema vunahu,
vantwama vendi vanapu ngwe vishonge,
vaje vanazeye na njala,
vaje nzili yavo ilinakuhwa,
omwo valinakutewa viyambi.
7A matangwa a tuyando,
Yelusalema alinakwanuka
vuyoye vwavuvwa vuje vwayoyele
a matangwa a kunima,
oloni napu ngundu.
Omo wakele mu mavoko a vitozi,
naumo wai wamukwasele.
Vaje vamufungulwile vajolele akuwa kwendi.
8Yelusalema navulumuna manene,
co napu wa mazilo,
voshe vaje vamusingimikile valinakumushendumuna.
Vanamumono ali mushelengwa,
akemanga nakuvandesa cihanga
cendi omwo shwamwa.
9Mazilo endi asholokele mu vuzalo vwendi,
oloni ikeye kombileko mbunge
kukujwala kwendi.
Kuwa kwendi kwapwile kwakukomokesa,
naumo wai wamuzembelekele.
Vitozi vendi vanahyana,
co atambeka kuli Shukulu Kalunga
ngeci amuzivileko mema ku mbunge.
10Vitozi vendi vamwivile vufuko vwendi vwoshe.
Wavamwene vakovela
mu Njuvo ya Shukulu Kalunga citona-mesho,
muje vene vavenya Shukulu Kalunga wavindikile
vaka-kujeneka kukulaela kukovelamo.
11Vanu vendi valinakukemanga
oku vashakezeka vyakulya,
valinakulandakana vufuko vwavo na vyakulya
ngeci vivayoyese.
Nganda ilinakutambeka ngwayo,
“Shukulu Kalunga, kenga kuli yange,
kenga omo njili mu tuyando twakama.”
12“Kuma eci kucesi nakulumbununa
cuma cimo kuli yeni
mulinakwita mu ngila ndi?#1:12 KUMA ECI...MULINAKWITA MU NGILA NDI?: Nambe, cuma eci kesi cilingiwe kuli yeni mulinakwita mu ngila.
Kengeni nga kuli umo
namono tuyando ngwe yange,
tuyando tuje nanjinenela Shukulu Kalunga
a simbu ya vukalu vwendi vwakama.
13“Watumine tuhya kutunda kwilu,
tuhya tuje twenyele mukati kange.
Ikeye wanjitelelele mweto,
co wanjikokelele asi,
wanjisezele njinatsi citunulu,
co njonwele nzili litangwa lyoshe.
14Ikeye wazivukile vuvi vwange vwoshe
co wavukutiiya amo vwoshe,
wavuzengelele ku mukoshi wange,
co vwanjizeyesele manene
omwo vulemu vwavwo.
Shukulu Kalunga wanjanene
ku mavoko a vitozi vange,
co njonwele kuvayeluwisa.
15“Shukulu Kalunga wayeluwisile
mashwalale vange va nzili,
watumine mbunga ya mashwalale
kunyongesa vakwenje vange.
Ikeye watsenene vanu vange ngwe cikamwino
ca mikolovozi ya vushuka vwa vinyu.
16“Omwo vyuma evi mukemwo njilila misozi.
Naumo wai anjizembeleka, nambe kunjitakamesa.
Vitozi vananjifungulula,
co vanu vange kuvesi na cuma cimo cije civanasala naco.
17“Njolola mavoko ange,
oloni naumo wai anjikwasa,
Shukulu Kalunga nanjisanena
vitozi ngeci vakunjilwise ku mitambela yoshe,
Vananjipwisa ngwe cuma ca mazilo.
18“Oloni Shukulu Kalunga napu wa vushunga,
omwo yange kunjononokele mashiko endi.
Yeni vanu muli kwoshe-ikwoshe njitolilileni,
kengeni vusiwa vwange.
Vakwenje vange na vambanda vange
vanavatwala ku vunzinda.
19“Njasanene vasamba vange,
oloni vavyanene kunjikwasa.
Vaka-kukombelela amo na vantwama
vatsililile mu vitapalo vya mu nganda,
mukushakezeka vyakulya ngeci vivayoyese.
20“Shukulu Kalunga,
kenga tuyando twange,
kenga kukemanga kwa mwonyo wange!
Mbunge yange ilinakulwa mu nulo,
omwo vusiwa vwa vuvi vwange.
Kuli kulitsiya mu vitapalo,
nameme mu vinjuvo muli kutsa.
21“Vanu vazivile kukemanga kwange,
oloni naumo wai wanjizembelekele.
Vitozi vange voshe vanavwaelela
omo yove unanena tuyando ali yange.
Nena vwasi litangwa lije liwakulaesele,
yandesa vitozi vange
ngwe munjilinakuyanda yange.
22“Vahise akuvulumuna kwavo kwoshe,
vanyanyamese,
ngwe muwanjinyanyamesele yange
omwo vuvi vwange.
Njilinakukemanga mu tuyando,
co cinyangavili cange coshe cinahu.”
Currently Selected:
Mbimbi 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006