2 Yowano 1
1
1Mukanda wakutunda kuli Mukulunu.
Kuli ndokazi wa cizemo na kuli vana vendi,#1 NDOKAZI WA CIZEMO NA KULI VANA VENDI: Eci cilumbununa cikungulukilo na vanu vaje vakalamo (kenga lalo vesi 4 na vesi 5). vaje vanjazema mwa vushunga. Co kesi yange lika, oloni voshe vaje vazivuka vushunga vakuzema, 2omwo vushunga vwakala muli yetu, co vukakala muli yetu myaka yoshe.
3Njambi Tatetu na Yesu Kilistu Muna Ishe, atwane kutetela na mema ku mbunge na kwoloka, evi vipwe vyetu mu vushunga na mu cizemo.
Vushunga na cizemo
4Njavwaelelele manene omo njawanene ngeci vamo vana veni valinakuyoya mu vushunga, ngwe muje mwatushikile Tate. 5#Yow 13:34; 15:12,17 Co ololo njikulomba yove ndokazi wa cizemo ngwange, tulizemeni umo na mukwavo. Eli kesi lishiko lyaliha njimisonekela, eli likelyo lishiko tunakala nalyo tunde akulivanga. 6Cizemo eci njendeka cilumbunuka ngeci tunapande kuyoya mukwononoka kushika kwa Njambi. Kushika, ngwe yeni voshe mwaziva laja tunde akulivanga, kunapu ngeci, yeni voshe munapande kuyoya mu cizemo.
7Omwo vaka-kukwisa vavangi vanashandokela mu kaye mwoshe, vanu vaje kuvatava ngeci Yesu Kilistu wezile mu cifwa ca vunu. Munu wa cifwa cangacije napu muka-kukwisa, ikeye napu Citozi ca Kilistu. 8Linyungeni yeni vavevya, kutewa muzimbalesa vije twapangelele,#8 VIJE TWAPANGELELE: Kunungulula kumo ngwavo, vije mwapangelele. oloni mukatambula cikandelela ceni camutunu.
9Munu woshe uje kakala na vilongesa vya Kilistu, oloni avipulakana, ikeye kesi na Njambi. Woshe uje akala na vilongesa ali na vyoshe vivali, lshe na Mwana. 10Ngecivene, nga munu umo aija kuli yeni, oloni kaminenela vilongesa evi, kesi mumutambule mu vinjuvo vyeni, nambe kesi mwendeke kuli ikeye ngweni, “Kwoloka kukale nove.” 11Omwo woshe uje avakandelela mu kwoloka alitombola navo mu vuvi vuje vuvakalingi.
Majwi akumanesela
12Njili na vyavingi vyakumileka, oloni kunjasa kuvisoneka a lipapelo na tinta, oloni njili na cinyangavili cakwija kuli yeni nakusimutwiya neni mesho na mesho, ngeci kuvwaelela kwetu kukapwe kwamutunu.
13Vana va ndokazi yeni wa cizemo#13 VANA VA NDOKAZI YENI WA CIZEMO: Eci cilumbununa cikungulukilo kuje kwakakungulukila muka-kusoneka ou mukanda. vanatumu viindu vyavo kuli yeni.
Currently Selected:
2 Yowano 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006