1 Samwele 1
1
Elekana na naanga yendi ku Shilo
1Kwakele munalume umo lizina lyendi Elekana, wa ku naanga ya Efalime, wakele mu limbo lya Lama, mu lifuti lya malundu lya Efalime. Wapwile muna Yelohame mutekulu wa Elihu, muna Tohu, wa ku cikota ca Zufe. 2Elekana wambatele vanakazi vavali, umo lizina lyendi Hana, co mukwavo lizina lyendi Penina. Penina wakele na vana, oloni Hana kakele na vana. 3Co a mwaka na mwaka Elekana wakele nakutunda kwimbo lyavo ku Lama waile nakulemesa nakukombelela kuli Shukulu Kalunga Muka-nzili yoshe ku Shilo, kuje kwakele vana va Eli, Hofene, na Finehase, vakevo vapwile vaka-kukombelela kuli Shukulu Kalunga. 4Co simbu yoshe omo Elekana wakele nakukombelela n̄ombelo yendi, wakele nakwana mutamba wa situ kuli munakazi wendi Penina, na mutamba ukwavo kuli vana vendi. 5Nameme wazemene Hana manene, oloni wamwanene mutamba umolika, omwo Shukulu Kalunga washokele shivu yendi. 6Muka-lifuwa lyendi Penina, washendumwine Hana manene, omwo Shukulu Kalunga washokele shivu yendi. 7Cuma eci calingiwile a mwaka na mwaka, omo vakele nakuya ku Njuvo ya Shukulu Kalunga, Penina ikeye wakele nakushangumuna Hana, co Hana wakele nakulila nakuvyana kulya vyakulya. 8Co munalume wendi Elekana wamwihwile ngwendi, “Hana, omwo vikajo ulinakulila? Omwo vikajo kuwesi nakulya? Omwo vikajo ulinakuvavalesa mbunge yove? Kuma yange munjakushaka yove kunjatuvakanene vana va vanalume likumi ndi?”
Hana na Eli
9A litangwa limo, omo vamanesele kulya nakunwa ku Shilo, co Hana wemanene. Eli muka-kukombelela, watumbamene ku mwela wendi kuyehi na cikolo ca Njuvo ya Shukulu Kalunga. 10Hana wavavalesele manene mbunge yendi, co walilile manene nakulombela kuli Shukulu Kalunga. 11#Kul 6:5 Co Hana walisingile cisingo ngwendi, “Yove Shukulu Kalunga Muka-nzili yoshe, kenga a tuyando twa ngamba yove! Njanuke kesi wivale ngamba yove! Nga unjana mwana wa munalume, co njikulaesa ngeci njikamukundika kuli yove mukuyoya kwendi kwoshe ngeci ikeye kakateula vin̄ambu vyendi.” 12Co omo Hana wakele nakulombela kuli Shukulu Kalunga simbu yakama, Eli wamwene ku kanwa kendi. 13Wakele nakulombelela mu mbunge, co tunwa lika twakele nakuyavula, oloni kazivile lijwi. Ngecivene, Eli wayongwele ngwendi napende, 14co wendekele kuli ikeye ngwendi, “Tangwa lika ukalikela kupenda? Likele kunwanwanwa vinyu.”
15Oloni Hana wamukumbulwile ngwendi, “Embwe mwane, kunjapendele. Kunjesi kunwa! Njinakala nakulombela, nakwana tuyando twange kuli Shukulu Kalunga. 16Kesi uyongole ngwove yange nji munakazi wakujeneka seo embwe. Njinakala nakulombela ngacije omwo njili mu vukalu manene.”
17Co Eli wendekele ngwendi, “Ya mu kwoloka, Njambi ya Isalele akwane evi viwunamulombo.”
18Co Hana wamukumbulwile ngwendi, “Njiwane kutetela ku mesho ove simbu yoshe.” Co waile, wakalile vyakulya, co kombwele lalo ku mesho endi.
Kusemuka kwa Samwele nakumukundika
19Alikaki mutondo-tondo Elekana, na naanga yendi valemesele Shukulu Kalunga, co velukile kwimbo lyavo ku Lama. Elekana walimwene na munakazi wendi Hana, co Shukulu Kalunga wakumbulwile lilombelo lya Hana. 20Ngecivene, Hana wakele na kafumba, co wakitile mwana wa munalume. Wamulukile lizina lyendi Samwele,#1:20 SAMWELE: Lizina eli mu ciHevelu linanunguluka ngwalyo, lizina lya Njambi, linalifu na lijwi lya mu ciHevelu ngwalyo, lomba. co walinungulwile ngwendi, “Njamulombele kuli Shukulu Kalunga.”
21Co omo simbu yetele lalo, Elekana na naanga yendi vaile ku Shilo nakukombelela kuli Shukulu Kalunga n̄ombelo ya a mwaka, na mwaka na n̄ombelo yakama ije yakulaesele. 22Oloni a simbu ije Hana kaile. Walekele munalume wendi ngwendi, “Omo mwanike akashumuka, co njikamutwala ku Njuvo ya Shukulu Kalunga, ngeci akakaleko simbu yoshe yakuyoya kwendi.” 23Elekana wamukumbulwile ngwendi, “Mwamuvwa, cuma cacivwa eci ciwunayongola kulinga, tumbama embo noo mwana nashumuka. Shukulu Kalunga lika akolese cikulaeso cendi ngeci cipwe ca vushunga.” Hana wakele embo nakulela munendi noo washumukile.
24Omo wamushumwine, waile nendi ku Shilo, amo na muna ngombe wa nkomba wa myaka itatu, na mutonga wa vunga vwa makilo likumi, na njeke ya cilambu yakushula ya vinyu. Co waile na Samwele ku Njuvo ya Shukulu Kalunga ku Shilo, nameme Samwele wapwile wamundondo. 25Co vatsiile uje muna ngombe, vatwalele Samwele kuli Eli. 26Co Hana wendekele kuli ikeye ngwendi, “Yove shukulu yange! Unanjanuka ndi? Yange uje munakazi iwamwene wemanene aa kuyehi nove, uje wakele nakulombela kuli Shukulu Kalunga. 27Mwana ou ikeye injalombele, co Shukulu Kalunga nanjana evi vinjamulombele. 28Ngecivene, njilinakumukundika kuli Shukulu Kalunga. Akapwe wa Shukulu Kalunga simbu yoshe yakuyoya kwendi.”
Co ikeye walemesele Shukulu Kalunga kuje vene.
Currently Selected:
1 Samwele 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006