YouVersion Logo
Search Icon

1 Vimyene 1

1
Mwene Ndaviti a simbu ya vukulukazi vwendi
1Ololo Mwene Ndaviti nakuluvala laja, co nameme vangamba vendi vakele nakumufwika kambilititi, oloni kasele kuziva ntwima. 2Ngecivene, vamyata vendi vendekele kuli ikeye ngwavo, “Shukulu, tutave tukutondele mumbanda wakukala amo nove nakukunyunga. Ikeye akalala kuyehi nove nakukutwiminina.” 3Vashakezekele mumbanda wamuvwa mu Isalele mwoshe, co vawanene mumbanda wa cifwa cangacije mu Shuneme lizina lyendi Avishange, co vamunenele kuli mwene. 4Wapwile mumbanda wamuvwa manene, co wanyungile mwene nakumupangela, oloni mwene kalimwene nendi embwe.
Andoniya ashaka kushwana litanda
5 # 2 Sam 3:4 Co Andoniya muna Hangite walyakele ikeye vavenya ku vukama wendekele ngwendi, “Yange njikapwa mwene.” Co walivwaeselele matemba na vanu vaka-kulonda a tuvalu, na vanu makumi atanu vaka-kwenda kulutwe lwendi. 6Ishe na simbu imo yai yamuluvalesele nakumwihula ngwendi, “Omwo vikajo unalingi ngacije?” Na ikeye lalo wapwile mukwenje wamuvwa manene, ikeye wakavele mu likosi lya Avisalome. 7Wendekele na Yowave muna Zeluya na Aviyatale muka-kukombelela, co vakevo valizivasanene kumukwasa mu vutumbe vwendi. 8Oloni Zandoke muka-kukombelela, na Mbenaya muna Yehoyanda, na Natane muka-kwimanena, na Shimei, na Lei, na vaka-kunyunga vakama va Ndaviti kuvalizivasanene kukwasa Andoniya.
9Litangwa limo Andoniya wakombelele n̄ombelo ya vimanga, na vingombe, na vana va vingombe vakununa a Limanya lya Linyoka, kuyehi na Enelongele.#1:9 ENELONGELE.Nambe, lisima lya kavwelu-vwelu lya Enelongele, nambe, lisima lya Longele. Walanyele vakwavo vana va Mwene Ndaviti, na vamyata va mwene vaje vatundile ku muyati wa Yunda kwija ku ciwano cakukombelela, 10oloni kalanyeleko ndolome yendi Solomoni wa ku lwale, nambe Natane muka-kwimanena, nambe Mbenaya, nambe vaka-kunyunga vakama va mwene.
Solomoni vamupwisa mwene
11 # 2 Sam 12:24 Asinoni Natane waile kuli Mbateshemba, vaina ya Solomoni, co wamwihwile ngwendi, “Kuma kuwazivile ngeci Andoniya muna Hangite nalipwisa mwene, oloni Mwene Ndaviti kazivuka cuma eci ndi? 12Nga ushaka kwamena mwonyo wove na mwonyo wa munove Solomoni, co njikunangula muunapande kulinga. 13Zambula uye kuli Mwene Ndaviti nakumwihula ngwove, ‘Shukulu, kuma kuwalisingile nange ngeci munange Solomoni ikeye akakushwana kupwa mwene ndi? Co cinaija vatijo ngeci Andoniya apwe mwene?’ ” 14Co Natane wendekele lalo ngwendi, “Simbu ucili nakwendeka na Mwene Ndaviti, yange njikakovela nakukolesa n̄anda yove.”
15Ngecivene, Mbateshemba waile nakumona mwene mu mulili wendi. Mwene wakuluvalele manene, co Avishange, mumbanda uje wa ku Shuneme, wakele nakumunyunga. 16Mbateshemba wakulamesele mutwe wendi nakukandelela kulutwe lwa mwene, co mwene wamwihwile ngwendi, “Vikajo ushaka?”
17Mbateshemba wakumbulwile ngwendi, “Shukulu, walikumiiye nakunjikulaesa mu lizina lya Shukulu Kalunga Njambi yove ngwove munange Solomoni ikeye akakushwana. 18Kenga, Andoniya lajoko napu mwene, co yove nacimo uzivuka cai. 19Nakombelela laja n̄ombelo ya vingombe vavangi, na vimanga, na vana va vingombe vakununa. Nalanyele ku ciwano vana vove va vanalume, na Aviyatale muka-kukombelela, na Yowave muka-kushika nzita yove, oloni kalanyeleko ngamba yove Solomoni. 20Shukulu, vanu va Isalele voshe valinakukenga kuli yove ngeci uvaleke iyajo akakushwana. 21Nga kuulingimo, co omo yove utsa yange na munange Solomoni vakatuyandesa ngwe tu vitozi.”
22Omo acili nakwendeka na mwene, co Natane wakovelele mu lipela. 23Valekele mwene ngwavo Natane muka-kwimanena wa Njambi naija, co Natane watsikamene a mavuli ku mesho a mwene. 24Asinoni Natane wehwile ngwendi, “Shukulu, kuma yove unendeka ngwove Andoniya ikeye akapwa mwene akatumbama a litanda lyove ndi? 25Lelo vene nai nakukombelela n̄ombelo ya vingombe vavangi, na vimanga, na vana va vingombe vakununa. Co nalanyele vana vove va vanalume voshe, na Yowave muka-kushika nzita yove, na Aviyatale muka-kukombelela. A simbu ino vene vali ku ciwano amo nendi nakutambeka ngwavo, ‘Mwene Andoniya ayoye!’ 26Oloni yange ngamba yove, na Zandoke muka-kukombelela, na Mbenaya, na ngamba yove Solomoni, katulanyeleko. 27Kuma yove shukulu wavwaesa vyoshe evi kulekako yetu vamyata vove iyajo akakushwana?”
28Mwene Ndaviti wendekele ngwendi, “Lekeni Mbateshemba aije.” Co Mbateshemba wezile kuli mwene. 29Asinoni mwene wendekele kuli ikeye ngwendi, “Njilisinga mu lizina lya Shukulu Kalunga wakuyoya, uje wanjovwele ku tuyando twange twoshe, 30ngeci lelo njikanyunga cisingo cije njalisingile mu lizina lya Shukulu Kalunga, Njambi ya Isalele, ngeci munove Solomoni ikeye akanjishwana.” 31Mbateshemba watsikamene nakukandelela, co wendekele ngwendi, “Shukulu yange Mwene Ndaviti ayoye ku myaka yoshe!”
32Asinoni Mwene Ndaviti wasanene Zandoke, na Natane, na Mbenaya. Omo vezile kuli mwene, 33co wendekele kuli vakevo ngwendi, “Yeni na vamyata vange va mu mbanja, co endeseni munange Solomoni a cimulu cange, mushelumwiseni ku lisima lya kavwelu-vwelu ku Ngihone, 34co kuje vene Zandoke muka-kukombelela, na Natane muka-kwimanena, vakamuvwavese mazi kupwa mwene wa mu Isalele. Co imbeni lupembo nakutambeka ngweni, ‘Mwene Solomoni ayoye!’ 35Co mukaveni omo akeluka kuno mukutumbama a litanda lyange. Ikeye akanjishwana kupwa mwene, omwo njinamwangula kupwa muka-kushwana Isalele na Yunda.” 36Co Mbenaya wakumbulwile mwene ngwendi, “Mukemwo cikalingiwa, Shukulu Kalunga Njambi yove akakolese cuma eci! 37Ngwe omo Shukulu Kalunga nakala amo nove shukulu, mukemwo akale amo na Solomoni nakwamesa vumwene vwendi kutuvakana vumwene vwove.”
38Ngecivene, Zandoke, na Natane, na Mbenaya, na vaka-kunyunga mwene valondesele Solomoni a cimulu ca Mwene Ndaviti, co vamushelumwisile ku lisima lya kavwelu-vwelu ku Ngihone. 39Zandoke wambatele lilulu lya mazi a olive lije lyanonele mu Mbalaka Mwakuliwanena, co wavwavesele Solomoni. Vembile lupembo, co vanu voshe vatambekele ngwavo, “Mwene Solomoni ayoye!” 40Asinoni vanu voshe vamukavele munima, vatambekele nakujolela nakwimba vimbendo, valingile muyoyo wakama, co livu lyajajele.
41Omo Andoniya na voshe vaje walanyele vamanesele ciwano, vazivile muyoyo. Omo Yowave wazivile lupembo, co wehwile ngwendi, “Muyoyo wavikajo owo uli mu nganda?” 42Omo kanda acimanese kwendeka, Yonatana, muna Aviyatale muka-kukombelela, wetele. Co Andoniya wamusanene ngwendi, “Ija kuno, u munalume wamuvwa, unapande kunena muzimbu wauvwa.”
43Yonatana wamukumbulwile ngwendi, “Kunjanenele muzimbu wauvwa embwe. Shukulu Mwene Ndaviti nashwanesa Solomoni kupwa mwene. 44Watumine Zandoke, na Natane, na Mbenaya, na vaka-kunyunga mwene kwendesa Solomoni. Co vakevo vamulondesele a cimulu ca mwene, 45Zandoke, na Natane vamuvwavesele mazi kupwa mwene kuje ku lisima lya kavwelu-vwelu ku Ngihone. Asinoni vakovelele mu nganda, co vatambekele nakujolela, co vanu oni valinakuliwuya. Owo ukewo muyoyo mwazivi. 46Solomoni ololo ikeye napu mwene. 47Co lalo vamyata va mu mbanja vanaile mukushangazala shukulu Mwene Ndaviti nakwendeka ngwavo, ‘Njambi yove atsimanese manene Solomoni kutuvakana yove, co aamese vumwene vwendi kutuvakana vwove.’ Co Mwene Ndaviti wakulamene a vulili vwendi nakulemesa, 48co walombelele ngwendi, ‘Tushangazaleni Shukulu Kalunga, Njambi ya Isalele, ou ku litangwa lya lelo nalingisa umo wa vatekulwila vange kunjishwana kupwa mwene, co nanjitavesa kuyoya ngeci njicimone!’ ”
49Asinoni vaje vanu vaalanyele Andoniya vazivile lyova, co voshe vakatukile nakuya, munu na munu waile ngila yendi. 50Andoniya, akuzivila lyova lya Solomoni, waile ku Mbalaka Mwakuliwanena, wakakwatele ku vimbinga vya mutula.#1:50 VIMBINGA VYA MUTULA: Vyakushongomoka vyavindondo vya ku vimbango viwana vya mutula vije vyafwile ngwe vimbinga. Munu woshe uje wakwateleko kuvamutsiile. 51Co valekele Mwene Solomoni ngwavo, “Andoniya ali na lyova ali yove ngeci nakakwatele ku vimbinga vya mutula nendeka ngwendi, ‘Njishaka Mwene Solomoni alisinge kuli yange ngeci kakanjitsii.’ ”
52Solomoni wakumbulwile ngwendi, “Nga ikeye napu wa kulongwa, kunjikamutsii, oloni nga kapwile wa kulongwa, co njikamutsiya.” 53Mwene Solomoni watumine munu ku mutula akashake Andoniya. Co Andoniya waile kuli mwene watsikamene nakukandelela ku mesho a mwene, co mwene wendekele kuli ikeye ngwendi, “Wasa kuya kwimbo lyove.”

Currently Selected:

1 Vimyene 1: MBB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy