Lucas 1
1
Jaꞌ Naj Lucas Jix Tzꞌibꞌentoj Jun Juun Tiꞌ Tet Naj Teófilo
1-4Jaꞌ tinaniꞌ xin, jaach Teófilo, chin tzꞌibꞌetoj jun juun tiꞌ ey jaach an, yet watxꞌ cha wotajne eloj, tol yel wan tzetyetal jix ja cuyel tuꞌ. Caxcꞌal ecꞌal ánima jix stzꞌibꞌentoj wan tzetyetal jix yun cu xol tiꞌ, jaꞌ chin naꞌ tol watxꞌ ta chi waltoj ey jaach masanil tzet jix yun yin xolilal yet tax jix ẍaꞌon el yich. Jaꞌ ebꞌ chi alon el skꞌane Dios tinaniꞌ, ecꞌal ebꞌ jix ilon wan tuꞌ yet tax jix ẍaꞌon el yich. Jaꞌ yin jix cu cuyle yu ebꞌ jon. Jix jin cuy masanil wan tiꞌ yin cꞌuancꞌulal yet watxꞌ chi skeꞌ jin tzꞌibꞌentoj ey jaach yin jichan.
Albꞌilcan Yu Jun Ángel Tol Oj Aloj Naj Juan Bautista
5Jaꞌ yet eyoc Herodes* yaawil bꞌey txꞌotxꞌ Judea, ey jun bꞌulan ebꞌ yakꞌomal xaambꞌal ebꞌ Israel tet Dios chi yij sbꞌi Abías. Ey jun winaj xol ebꞌ chi yij sbꞌi Zacarías. Elisabet sbꞌi yistil naj. Yicꞌaal to Aarón pax ix. 6Watxꞌ sbꞌeybꞌal ebꞌ scawanil yul sat Dios. Jijem ebꞌ tet ẍejbꞌanil cꞌal tet sley Naj Kaawil. Yuxan cꞌam junoj mac chi skeꞌ yaloni, tol ey junoj spenail ebꞌ. 7Cꞌam junoj yuninal ebꞌ, yutol man uneꞌwom oj ix Elisabet tuꞌ. Yetoj pax oj icham ánima xa ebꞌ scawanil.
8Jaꞌ yet jun cꞌual, jix aapnoj stiempoal yakꞌwi servil Zacarías yetoj jaywanxa ebꞌ yetbꞌi, yet chi akꞌle servil Dios yu ebꞌ Israel, 9jix yaoc puesto ebꞌ, jaxca cꞌaltaꞌ sbꞌeybꞌal ebꞌ junjuntaj el, yu xeclo el mac oj chaꞌon jun opiso tuꞌ. Jaꞌ yibꞌan Zacarías jix eyi. Yuxan jix octoj naj yul stemplo Naj Kaawil. Jix bꞌet yakꞌon tzꞌaꞌ poom sukꞌukꞌi sabꞌ. 10Jaꞌ yet jix yakꞌon tzꞌaꞌ tuꞌ, masanil ebꞌ ánima eyoc tituꞌ ey can ebꞌ stiꞌ templo txaloj. 11Jaꞌ yet eyoctoj tuꞌ, jix jul xꞌoxon ecꞌ sbꞌa jun yángel Naj Kaawil tet Zacarías tuꞌ. Jix julecꞌ wojan bꞌey jun pacꞌ smeẍail snusbꞌanil poom tuꞌ bꞌey yetcꞌulal swatxꞌ kꞌabꞌ Zacarías. 12Jaꞌ yet jix yilon yin jun ángel naj tuꞌ, caw jix qꞌueya scꞌul. Jix xiwcan a naj yu. 13Catuꞌ jix yalon jun ángel tuꞌ tet naj jaxca tiꞌ:
—Zacarías, manche jaach xiwi, jix yabꞌ Dios ja txa. Yuxan, jaꞌ ja wistil Elisabet, oj aloj jun swinaj unin. Juan oj ja wakꞌ yij sbꞌi naj. 14Caw oj tzala je cꞌul yin. Ecꞌal ánima oj tzala a yet oj yabꞌeni tol jix ali jun je yuninal. 15Jaꞌ jun unin tuꞌ, caw miman oj yun yeloc apnoj yul sat Dios. Man oj yucꞌ vino, man oj yucꞌ an. Eyxa oc Santo Espíritu yin naj yet oj aloj naj. 16Ecꞌal ebꞌ Israel oj swaꞌne oc sbꞌa yin Naj Kaawil Dios junelxa yu jun ja cꞌaal tuꞌ. 17Jaꞌ naj Juan tuꞌ oj bꞌabꞌoj sattaj Naj Kaawil. Jaxca cꞌal snaꞌbꞌal naj Elías cꞌal yipal naj, queytuꞌ oj yun snaꞌbꞌal cꞌal yipal naj ja cꞌaal. Yuxan oj tenchanele ebꞌ mame, cꞌal ebꞌ uninale yet ey jowal xol ebꞌ, yet watxꞌ chi tan eloj. Jaꞌ oj qꞌuexon pax snaꞌbꞌal ebꞌ, yet watxꞌ ey ebꞌ listo xa yeoc yet oj jul Naj Kaawil, ẍi jun ángel tuꞌ. 18Jix yalon Zacarías tuꞌ tet jun ángel jaxca tiꞌ:
—¿Tzet oj yun wotajne eloj ta tol yel wan cha wal tiꞌ? Yutol jain tiꞌ, caw icham jin xa an, yetoj ix wistil an, ixnamxa pax ix, ẍi naj tet jun ángel tuꞌ.
19Jix yalon jun ángel tuꞌ tet naj:
—Jain, Gabriel jin an. Yakꞌomal jin servil Dios an. Jain jix jin chejletej yu jul walon jun kꞌane tiꞌ ey jaach an. 20Tinaniꞌ, ma xa skeꞌ ja kꞌanabꞌ niꞌoj, masantaꞌcꞌal oj aloj jun unin jix wal tuꞌ an. Yutol ma ja waoc yin ja cꞌul tzet jix wal tuꞌ an, yuxan queytuꞌ oj ja wunne. Jato yet oj apnoj stiempoal catuꞌ oj yunen jun tiꞌ, ẍi jun ángel tuꞌ tet naj.
21Jaꞌ ebꞌ ánima chi yechbꞌane yeltej Zacarías tuꞌ. Jix qꞌueya scꞌul ebꞌ yutol caw miman tiempo jix bꞌet octoj naj yul scalubꞌal Dios yul templo. 22Jaxa yet jix eltej, ma xa skeꞌ skꞌanabꞌ tet ebꞌ. Jix snaꞌon el ebꞌ conobꞌ tuꞌ tol ey junoj tzetyetal jix xꞌox Dios tet naj. Skꞌabꞌ xacꞌal jix xꞌox yin yecheloj, yutol jix maji el stiꞌ naj. 23Jix aapnoj stiempoal jix lawi yakꞌle servil yu naj Zacarías, catuꞌ jix paxtoj ebꞌ bꞌey sna. 24Man to peyxa oj tuꞌ, catuꞌ jix yijon oc unin ix Elisabet. Joebꞌ xꞌaaw ey xacꞌal ecꞌ ix bꞌey sna. Jix cꞌoli snaꞌoꞌtanen jaxca tiꞌ: 25“Yu yipal Naj Kaawil, yuxan queytuꞌ chi wun an, yet watxꞌ cꞌamxa chi al-le jin kꞌumal yu ánima, yutol cꞌam wuneꞌ an,” ẍi ix.
Jix Al-le Tet Ix María Yu Jun Ángel Tol Oj Aloj Naj Jesús
26Wajebꞌ xa xꞌaaw yijon oc jun unin ix Elisabet tuꞌ, catuꞌ jix chejletej ángel Gabriel yu Dios bꞌey conobꞌ Nazaret, bꞌey txꞌotxꞌ Galilea. 27Jix julecꞌ bꞌey jun ix kꞌopo chi yij sbꞌi María. Cꞌamto chi yiꞌle sbꞌa yetoj junoj winaj. Jaꞌ jun ix tuꞌ, eyxa swa kꞌane ix yetoj jun winaj chi yij sbꞌi José, icꞌaale to yei naj yu naj rey David. 28Jix octoj jun ángel tuꞌ bꞌey eyecꞌ ix. Jix yalon tet ix jaxca tiꞌ:
—Tzalaan cꞌal, yutol caw xaan jaach yu Naj Kaawil Dios. Eyoc Dios ja wetoj. Yel xacꞌal miman swatxꞌcꞌulal Dios jix yakꞌ ey jaach sattaj masanil ja wet ixal, ẍi ángel Gabriel. 29Jaꞌ yet jix yilon oc ix yin jun ángel tuꞌ, jix qꞌueya scꞌul ix. Jix snaꞌontej ix tzet chi yal yeloc apnoj tzet jix yal jun ángel tuꞌ. 30Catuꞌ jix yalon pax jun ángel tuꞌ tet ix jaxca tiꞌ:
—María, manche jaach xiwi, yutol miman swatxꞌcꞌulal Dios jix xꞌox ey jaach. 31Jaꞌ tinaniꞌ, oj oc jun unin ja win, oj aloj jun winaj unin ja wu. Jesús, oj ja wakꞌ yij sbꞌi. 32Caw miman winaj oj yun yelocoj. Oj bꞌinaoj tol scꞌaal jun yel xacꞌal miman yeloc apnoj, jaꞌton Dios. Jaꞌ Dios Kaawil tuꞌ, oj aon oc naj yin reyal. Catuꞌ oj oc can sqꞌuexeloj naj rey David, naj yichmam naj. 33Oj oc Yaawiloj xol ebꞌ ja wet conobꞌ Israel yin tobꞌalkꞌinal. Cꞌam bꞌakꞌin oj lawoj jun yopiso tuꞌ, ẍi jun ángel tuꞌ tet ix.
34—¿Tzet oj yun skeꞌon jun cha wal tuꞌ? Jain tiꞌ cꞌamto wichamil, ẍi ix María tet jun ángel tuꞌ.
35—Jaꞌ Santo Espíritu oj jul ja wibꞌan. Jaꞌ yipal Naj yel xacꞌal miman yeloc apnoj, jaꞌ oj eyol yenel ja wibꞌan. Yuxan, jaꞌ jun unin oj aloj tuꞌ yet cꞌal Dios yei. Oj bꞌinaoj, tol Scꞌaal Dios Naj. 36Catuꞌ jaꞌ ja wican Elisabet, caw ixnamxa ix, oj aloj pax jun swinaj unin. Chi yal ebꞌ ánima tol cꞌam bꞌakꞌin oj yil junoj unin ix. Tol wajebꞌ xa pax xꞌaaw yijon oc unin ix tinaniꞌ. 37Yutol masanil chi cꞌal skeꞌ yu Dios, ẍi jun ángel tuꞌ tet ix.
38Catuꞌ jix takꞌwi ix María:
—Ẍejabꞌ Kaawil wei, yuxan yun ojabꞌ jaxca jix ja wal tuꞌ, ẍi ix tet jun ángel tuꞌ: Jix lawi tuꞌ xin, catuꞌ jix too jun ángel tuꞌ.
Yet Jix Bꞌet Il-le Ix Elisabet Yu Ix María
39Txenxane tiempo catuꞌ jix too María bꞌey jun conobꞌ eey xol wan tzalquiltaj txꞌotxꞌ yul yet Judea. 40Jix apni ix bꞌey sna naj Zacarías. Jix akꞌle scawil scꞌul ix Elisabet yu ix. 41Jaꞌ yet jix yabꞌen Elisabet skꞌanabꞌ ix María tuꞌ, catuꞌ jix bꞌilwi a jun unin eyxa oc yin ix tuꞌ. Catuꞌ caw eyoc Santo Espíritu yin ix Elisabet tuꞌ. 42Catuꞌ jix yalon ix yin ipal jaxca tiꞌ:
—Jaach tiꞌ, yel miman swatxꞌcꞌulal Dios jix xꞌox ey jaach sattaj masanil ebꞌ ix ket ixal. Miman pax swatxꞌcꞌulal oj xꞌox tet jun oj aloj ja wu. 43Jain tiꞌ, cꞌam niꞌoj weloc apnoj, jal jaach tiꞌ xin, xutx jaach Naj Kaawil. Ilaꞌ tol chach jul pax kꞌanabꞌ wetoj an. 44Asanne cꞌal jix wabꞌen ja kꞌanabꞌ yet jix jaach juli, jix bꞌilwi a jun unin eyxa oc win tiꞌ an. Quichan xacꞌal tol chi tzala chi wabꞌ an. 45Jaach tiꞌ, jix ja waoc yin ja cꞌul tol oj yun tzet jix yal Naj Kaawil ey jaach. Yuxan, caw tzalacꞌulal ja wei, ẍi Elisabet tuꞌ tet ix María. 46Jix yalon María jaxca tiꞌ:
—Chi wal watxꞌ kꞌane tet Naj Kaawil yin masanil jin cꞌul.
47Caw chi tzala jin cꞌul yin Dios cu Colomal.
48Jain tiꞌ, yakꞌomal jin servil Dios an. Cꞌam niꞌoj weloc apnoj, jix okꞌ pax scꞌul Dios win an. Yuxan oj yal ebꞌ ánima tobꞌalkꞌinal tol Dios jix xꞌox swatxꞌcꞌulal ey jin an.
49Yutol jaꞌ Dios, caw miman yipal. Miman swatxꞌilal jix xꞌox ey jin an. Cꞌam junojxa bꞌie jaxca sbꞌi Dios.
50Tobꞌalkꞌinal chi okꞌ scꞌul yin mac jijem tet.
51Jix xꞌox eloj tol caw miman yipalil. Jix cancan ebꞌ chi yecꞌbꞌane sbꞌa yalan yu Dios.
52Jix iꞌle can el ebꞌ yaaw yin yopiso, jal ebꞌ cꞌam yeloc apnoj, jix iꞌle a can ebꞌ.
53Jix yakꞌ no scꞌul ebꞌ ey swail. Jal ebꞌ bꞌeom, cꞌam niꞌoj tzet jix akꞌle tet ebꞌ catuꞌ jix ujteletoj ebꞌ.
54Jix oc ketoj jaon Israel jon tiꞌ, jaon yakꞌomal jon servil tiꞌ. Ma toj qꞌueycꞌulal yokꞌ scꞌul kin.
55Jaxca yalon can tet ebꞌ kichmam, yutol yakꞌnaj can stiꞌ tet naj Abraham, cꞌal tet jantaj ebꞌ yicꞌaal yin junelne, ẍi ix María tuꞌ.
56Oxebꞌ mi xꞌaaw jix bꞌetecꞌ ix María tuꞌ bꞌey Elisabet, catuꞌ jix meltzotej bꞌey sna tuꞌ junelxa.
Yalubꞌal Naj Juan Bautista
57Jaꞌ yet jix jul xacꞌal stiempoal yali yuneꞌ ix Elisabet, winaj unin jun jix ali. 58Jaꞌ yet jix yabꞌen ebꞌ ánima scawilal cꞌal ebꞌ yican tol jix xꞌox swatxꞌcꞌulal Naj Kaawil tet ix, jix tzala a ebꞌ yetoj ix. 59Jujubꞌixi tax ali, catuꞌ jix apni ebꞌ bꞌey sna naj Zacarías, yu yale oc jun yechel chi yij sbꞌi circuncisión* yin swinajil jun unin tuꞌ. Jix yoche ebꞌ jix yij sbꞌi jun unin yin Zacarías, yet watxꞌ chi oc sqꞌuexeloj smam tuꞌ. 60Jaxa ix txutxe tuꞌ jix alon tet ebꞌ jaxca tiꞌ:
—Cꞌamaj, Juan oj yijaꞌ, ẍi ix tet ebꞌ.
61—¿Tzet yuxan queytuꞌ oj ja wakꞌ yijaꞌ? Cꞌam junoj je yetbꞌi queytuꞌ yoc sbꞌi, ẍi ebꞌ tet ix.
62Jaꞌ yet jix skꞌanlen ebꞌ tet smam naj unin tuꞌ yin yechel tzet bꞌieal chi yoche chi yij naj. 63Catuꞌ jix skꞌanon niꞌoj tzetyetal bꞌey chi stzꞌibꞌe ey tuꞌ. Catuꞌ jix stzꞌibꞌen eyoj; “Juan chi yij sbꞌi jun unin tiꞌ,” jix stzꞌibꞌen eyoj. Tuxa cꞌal jix qꞌueya scꞌul masanil ebꞌ yet jix yilon jun tuꞌ. 64Jaꞌ yet jix stzꞌibꞌen jun tuꞌ naj Zacarías, catuꞌ jix jajcha a stiꞌ yu chi skeꞌ skꞌanabꞌi. Jix yalon watxꞌ kꞌane naj tet Dios tuꞌ. 65Yuxan, caw chi qꞌueya scꞌul jantaj ebꞌ ánima ey scawilal. Catuꞌ jix abꞌcha skꞌumal jun tiꞌ bꞌey masanil jun tzalquiltaj txꞌotxꞌ bꞌey txꞌotxꞌ yul yet Judea tuꞌ. 66Jaꞌ masanil ebꞌ jix abꞌen wan tuꞌ, catuꞌ jix snaꞌoꞌtane ebꞌ, tzet yei. Jix yalon ebꞌ jaxca tiꞌ:
—¿Tzet oj yun yeloc jun unin tiꞌ? ẍi ebꞌ.
Queytuꞌ jix yal ebꞌ yin naj yutol chi skeꞌ yilon ebꞌ tol eyoc yipal Naj Kaawil yin jun unin tuꞌ.
Sbꞌit Naj Zacarías
67Jaꞌ smam jun unin tuꞌ, jaꞌton naj Zacarías. Caw eyoc Santo Espíritu yin. Yuxan jix akꞌle kꞌanabꞌ a yu. Jix yalon jaxca tiꞌ:
68Kalwej watxꞌ kꞌane tet Naj Kaawil, cu Diosal jaon Israel jon tiꞌ. Yutol jix jul ku, jaon sconobꞌ jon tiꞌ, yu cu scolon eloj.
69Oj yatej jun cu Colomal caw miman yipal. Jaꞌ snan xol ebꞌ yicꞌaal naj David, naj yakꞌomal servil Dios, jaꞌ xol ebꞌ oj aloj.
70Jaxca tuꞌ jix yute yalon can Dios yet peyxa, yet jix yakꞌbꞌalnen ebꞌ ẍejabꞌ, jaꞌton ebꞌ profeta,* sicꞌbꞌil el yu Dios.
71Jix yal can Dios tol oj cu scolel yul skꞌabꞌ ebꞌ chi jowi oc kin, cꞌal yul skꞌabꞌ jantaj ebꞌ chi chichon oc scꞌul kin.
72Albꞌil pax can tol oj okꞌ scꞌul yin ebꞌ kichmam. Man oj toj qꞌueycꞌulal jun swa kꞌane jix yakꞌ yetoj ebꞌ, yutol jaꞌ jun swa kꞌane tuꞌ, asan Dios ey yet.
73Queytuꞌ jix yute yakꞌon can stiꞌ tet kichmam Abraham yet jix slocon sbꞌi tet.
74Jix yalcanoj tol oj cu scolel yul skꞌabꞌ ebꞌ chi jowi oc kin, yet watxꞌ cꞌam chi cu xiwwej kakꞌon servil Dios.
75Queytuꞌ oj kute yet watxꞌ, watxꞌ ojabꞌ cu bꞌeybꞌal, asanne ojabꞌ yin Dios chi kaoc cu cꞌul tobꞌalkꞌinal.
76Jal jaach tiꞌ xin, jaach jin cꞌaal, oj jaach oc ẍejabꞌoj Dios miman yeloc apnoj. Yutol oj jaach bꞌabꞌoj sattaj Naj Kaawil, catuꞌ oj cꞌoli swaꞌnen snaꞌbꞌal ebꞌ ánima, jaxca chi yun swaꞌxi junoj bꞌe.
77Jaach oj ja wakꞌ naꞌcha el yu ebꞌ sconobꞌ tzet oj yun scolcha ebꞌ, catuꞌ oj elcan spenail ebꞌ yibꞌan.
78Yutol camcꞌulnebꞌil jon yu Dios. Caw chi okꞌ scꞌul cu Diosal kinwej. Jaxca chi yun yaol cꞌu, catuꞌ chi cu stzejtaneni, jaxca tuꞌ oj yun sjul jun chejbꞌiltej yu Dios tuꞌ.
79Yu stzejtanen spixan ebꞌ eyecꞌ xol kꞌejkꞌinal tuꞌ. Ebꞌ lalan stoo bꞌey camich. Jaꞌ oj txꞌoxon pax ey jon tzet chi yun cu bꞌeybꞌalneni, yet watxꞌ yin watxꞌcꞌulal chi cu ecꞌ yetoj, ẍi naj Zacarías.
80Jaꞌ jun unin tuꞌ, jix chꞌibꞌ cꞌal aoj, jix jul snaꞌbꞌal, catuꞌ jix bꞌetle ecꞌ bꞌey cusiltaj txꞌotxꞌ, masantaꞌcꞌal jix aapnoj stiempoal xꞌoxon a sbꞌa tet ebꞌ yet Israelal.
Currently Selected:
Lucas 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.