Judas 1
1
Yichbꞌanil Scarta Naj Judas
1Jain Judas jin tiꞌ an, yakꞌomal jin servil Jesucristo an. Wuẍtaj jin bꞌa yetoj Jacobo. Tol chin tzꞌibꞌetoj jun jin carta tiꞌ ey jex, jex awtebꞌil xa yu cu Mam Dios. Camcꞌulnebꞌil jex xa yu. Teynebꞌil jex xa yu Jesucristo. 2Chi woche caw chi okꞌ scꞌul cu Mam Dios je yin. Chi woche caw miman swatxꞌcꞌulal chi yakꞌ je yin, catuꞌ caw miman pax scamcꞌulal chi yakꞌ ey jex tituꞌ.
Jaꞌ Ebꞌ Cuywam Pena Sbꞌeybꞌal Xol Ebꞌ Creyente
3Jex jin camcꞌulnebꞌil, jix woche jix waletoj junojxa jin carta ey jex an, yu walontoj je yabꞌ yu cu colbꞌanil. Jaꞌ tinaniꞌ, ey jun tzetyetal caw sowalil oj waltoj ey jex. Chi waltoj ey jex an, caw che yakꞌ je yip, je yaꞌilnen wan cuybꞌanile bꞌey jix kaoc cu cꞌul yin, yet watxꞌ cꞌam chi calchatoj spenail xol. Yutol jaꞌ mac jon yet jon xa Dios, jaꞌ ey jon akꞌbꞌil can wan cuybꞌanile tuꞌ yin junelne. 4Chi waltoj wan tiꞌ ey jex yutol ey mac jix oc cu xol yin ewantajil. Jaꞌ ebꞌ tuꞌ caw pena ebꞌ. Ilaꞌ, tol chi yal ebꞌ jaxca tiꞌ: “Colbꞌil jon xa yu swatxꞌcꞌulal Dios, yuxan chi cꞌal skeꞌ kunen yal cꞌal tzet spenailal chi yoche cu cꞌul,” ẍi ebꞌ. Asan Jesucristo chi cu ijbꞌani, asanne Naj Kaawil. Caw chi intajnele el Naj yu ebꞌ. Jaꞌton ebꞌ tuꞌ tzꞌibꞌebꞌilcan skꞌaneal yul An Juun Tzꞌibꞌebꞌilcan yet peyxa, tol sowalil oj tojcan ebꞌ bꞌey syaꞌilal. 5Caxcꞌal je yotaj xa jun oj waltoj tiꞌ an, chi woche che naꞌtej niꞌojxa wetoj an. Jaꞌ ebꞌ wet Israelal peyxa, colchanaj el ebꞌ bꞌey Egipto masanil yu Naj Kaawil. Jal yet jix lawi jun tuꞌ, jix qꞌueyle el ebꞌ ma yaoc scꞌul yin Naj. 6Yetoj pax oj, naꞌwejtej tzet yeoc wan ebꞌ ángel, ebꞌ jix smimanbꞌane sbꞌa yin yopiso, tol jix sbꞌejcan slugar ebꞌ. Jaꞌ tinaniꞌ cꞌanani yeoc ebꞌ spixle yetoj cadena. Preso yeoc ebꞌ xol kꞌejkꞌinal yu Dios, masantaꞌcꞌal oj jul jun cꞌual caw miman yeloc apnoj, catuꞌ oj naꞌle oc yin ebꞌ. 7Naꞌwej pax tej tzet yunnaj ebꞌ a Sodoma yetoj ebꞌ a Gomorra, cꞌal wanxa conobꞌlaj scawilal tuꞌ. Toonaj ebꞌ yin amulal. Tol tax chi mulwi ebꞌ yetoj yet winajil. Jaxca ebꞌ ángel pena tuꞌ, quey pax tuꞌ ebꞌ. Txꞌoxbꞌanile yeoc ebꞌ tet masanil ánima tinaniꞌ, yutol lalan yabꞌen syaꞌilal ebꞌ xol kꞌakꞌ yin junelne.#Génesis 19:1-24. 8Jal ebꞌ eyecꞌ cu xol tiꞌ tinaniꞌ, jacꞌal spenail chi yil snaꞌoꞌtane ebꞌ. Yuxan, chi yatoj sbꞌa ebꞌ xol spenail. Cꞌam yeloc apnoj yopiso Naj Kaawil yul sat ebꞌ. Tucꞌal chi bꞌuchwa pax ebꞌ yin wan ebꞌ caw miman yeloc apnoj bꞌey satcan. 9Chi cu naꞌtej jun sat ángel chi yij Miguel. Yakꞌlenaj jowal yetoj diablo yet junel, yet jix steelen sbꞌa yetoj yu smimanil naj Moisés. Caxcꞌal miman yopiso Miguel tuꞌ, ma cꞌal stecꞌbꞌa sbꞌa sbꞌuchwa yin diablo tuꞌ. Ma yal spenail. Jaxca cꞌal tiꞌ jix yute yalon tet naj jaxca tiꞌ: “Jaꞌ ojabꞌ Naj Kaawil chach tzuoni,” ẍi tet. 10Jal ebꞌ tiꞌ, comon cꞌal chi bꞌuchwa ebꞌ yin junoj mac man yotaj oj. Jaꞌ wan tzet yotaj ebꞌ, asan tzet yotaj junoj noꞌ noꞌ cꞌam snaꞌbꞌal. Jaꞌ yin wan tiꞌ chi cꞌal yakꞌ etex el sbꞌa ebꞌ. 11Caw okꞌbꞌalcꞌule ebꞌ, yutol laan tzet chi yun ebꞌ jaxca tzet jix yun naj Caín. Caw acꞌul oc yin Dios cꞌal yin yuẍtaj.#Génesis 4:3-8. Tucꞌal chi xon cantoj sbꞌa ebꞌ tet junojxa mactxequel yu cꞌal tumin, jaxca yutenaj sbꞌa naj Balaam.#Números 22:1-35. Jaxca yunnaj naj Coré, akꞌbꞌil camoj, yutol yakꞌlenaj jowal yetoj Dios,#Números 16:1-35. quey pax tuꞌ oj yun yakꞌle cam ebꞌ yu spital oj ebꞌ. 12Qꞌuixwiltaj yeecꞌ ebꞌ je xol yet junne chex lowi, yu je txꞌoxon el je camcꞌulal. Yutol comon cꞌal chi oc low ebꞌ je xol, cꞌam niꞌoj chi xiw ebꞌ. Jaxca junoj ilom meꞌ jaꞌcꞌal chi yil sbꞌa, queytuꞌ ebꞌ. Jaxca junoj tajin asun tucꞌal chi ecꞌ jototoj oj yu kaꞌeꞌ, queytuꞌ ebꞌ. Laan ebꞌ jaxca junoj teꞌ cꞌam chi satni. Tucꞌal chi taj aoj, catuꞌ chi cami. Chi lawi tuꞌ, catuꞌ chi tokꞌle atej yetoj xeꞌ masanil, catuꞌ chi cam xacꞌal el junelne. 13Jaxca yipal ya pomna sat jaꞌ mar, queytuꞌ ebꞌ, yutol cꞌamxa chi tencha ebꞌ yin spenail. Jaxca somal jaꞌ chi elcan stiꞌlaj, jaꞌ inen oc kꞌalem, queytuꞌ ebꞌ, yu wan tzet qꞌuixwiltaj chi yun tuꞌ. Kꞌinaloj ey junoj weycan chi qꞌueytoj yin sbꞌe, queytuꞌ ebꞌ. Sowalil oj apnoj ebꞌ xol kꞌejkꞌinal yin junelne. Catuꞌ oj eyoj ecꞌ ebꞌ tituꞌ yin tobꞌalkꞌinal. 14Jaꞌ naj Enoc, naj yet sjuj icꞌaale yet tax cꞌal Adán, jaꞌ Dios jix akꞌle can yal skꞌaneal ebꞌ eyecꞌ cu xol tiꞌ yu naj. Ẍi can naj jaxca tiꞌ: “Abꞌwej. Jaꞌ yet oj jul Naj Kaawil, ecꞌal ebꞌ yángel oj jul yetoj.#Génesis 5:21-24. 15Jato yet tuꞌ oj naꞌle oc yin masanil ánima. Oj akꞌle syaꞌilal ebꞌ penawom yu spenail ebꞌ tuꞌ. Cꞌal ebꞌ pena chi alon yin Naj Kaawil tuꞌ, ebꞌ cꞌam swatxꞌil snaꞌbꞌal, oj akꞌle pax syaꞌilal ebꞌ yu,” ẍi can naj Enoc tuꞌ. 16Jaꞌ ebꞌ eyecꞌ cu xol tiꞌ, jowal cꞌal yeoc ebꞌ. Comon cꞌal chi yal spenail ebꞌ yin junojxa mactxequel. Asan yin wan tzet chi yoche oc ebꞌ yetoj smimanil, asan yin tuꞌ chi yaoc snaꞌbꞌal ebꞌ. Jelan ton chi yute sbꞌa ebꞌ skꞌanabꞌi. Yal cꞌal mac chi alon oc ebꞌ watxꞌil, yutol chi yoche ebꞌ chi yakꞌ ganar niꞌoj tzet yin ebꞌ.
Wan Tzet Chi Chejle Yun Ebꞌ Yuninal Xa Dios
17Jal pax jaex tiꞌ, jex jin camcꞌulnebꞌil, naꞌwejtej wan oj waltoj ey jex tiꞌ an. Jaꞌ tax peyxa albꞌilcan yu ebꞌ ẍejabꞌ Naj Kaawil Jesucristo jaxca tiꞌ: 18“Jaꞌ yet slawubꞌal tiempo, ey mac comon cꞌal oj bꞌuchwaoj. Oj yun ebꞌ wan spenail chi yoche ocoj,” ẍi can ebꞌ. 19Oj poꞌocha ebꞌ yet xa Dios yu ebꞌ. Asan yin tzet chi yoche oc ebꞌ yetoj smimanil chi yaoc snaꞌbꞌal ebꞌ yin. Man eyoj oc Yespíritu Dios yin ebꞌ. 20Jal jex, jaex tiꞌ, jex jin camcꞌulnebꞌil, tecꞌan ojabꞌ cꞌal che yute je bꞌa yin jun cuybꞌanile jix je yaoc je cꞌul yin, yutol asan jun cuybꞌanile tiꞌ yet Dios. Caw chex txali cꞌal, yet watxꞌ chi chꞌibꞌ je naꞌbꞌal yetoj yipal Santo Espíritu. 21Caw che yil cꞌal je bꞌa, yet watxꞌ cꞌam chex el yin scamcꞌulal cu Mam Dios. Kechbꞌanewej sjul jun cꞌual yet oj txeclo a smimancꞌulal Naj Kaawil Jesucristo kin, catuꞌ oj yakꞌon cu kꞌinal tol ey cꞌal yin tobꞌalkꞌinal. 22Cu jejwej snaꞌ ebꞌ chi yakꞌ caabꞌcꞌulal, catuꞌ chi stecꞌbꞌan pax sbꞌa ebꞌ junelxa. 23Yetoj pax ebꞌ jaxca tol eytoj xol kꞌakꞌ, cu colwej el ebꞌ. Jaxca tol lalan cu tokꞌon can eltej ebꞌ xol kꞌakꞌ tuꞌ. Ey pax wanxa ebꞌ sowalil chi okꞌ cu cꞌul yin. Xiwoj jonwej yu ebꞌ. Yutol ey smey chi cu etex el yu sbꞌeybꞌal ebꞌ tuꞌ. Cu yaawej el wan spenail chi el yunen ebꞌ tuꞌ, jaxca chi kute cu yaon el junoj pichile caw tzꞌiltaj.
Kalwej Watxꞌ Kꞌane Tet Dios
24-25Junne Dios ey, jaꞌton Naj cu Colomal. Asan naj jelan. Chi skeꞌ yu cu steyneni, yet watxꞌ cꞌam bꞌey chi cu oc yin man tzꞌajanoj. Catuꞌ oj cu yiꞌontoj sattaj. Oj cu apnoj bꞌey swatxꞌilal yin cꞌam cu penail. Caw oj cu tzala yet tuꞌ. Kalwej yin Jesucristo tol jaꞌ Dios caw miman swatxꞌilal, caw miman yeloc apnoj. Caw ey yopiso. Asanne Naj, Yaaw yin masanil. Jaꞌ Kaawil Jesucristo jix txꞌoxon wan tiꞌ ey jon. Queytuꞌ Dios yet cꞌamto chi swaꞌne jun yul yibꞌankꞌinal tiꞌ. Jacꞌalaꞌ Naj tinaniꞌ. Jacꞌalaꞌ Naj yin tobꞌalkꞌinal. Amén.
Currently Selected:
Judas 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.