Juan 8
8
1Jal pax Jesús tuꞌ xin, jix toocan bꞌey wonan Olivolaj.
Skꞌaneal Jun Ix Amul Ix
2Jaꞌ yet jix kꞌinibꞌi a yet yewial tuꞌ, jix apni pax Jesús bꞌey stemplo Dios junelxa. Jaꞌ yet jix apni Naj tuꞌ, masanil ebꞌ ánima eyecꞌ tituꞌ jix yamcha oc scꞌatan Naj. Catuꞌ jix ey chotan Naj scuyon ebꞌ. 3Catuꞌ jix iꞌletej jun ix ix scꞌatan Naj yu ebꞌ cuywam yin sley Moisés tuꞌ yetoj ebꞌ Fariseo tuꞌ. Lalan smulwi ix, catuꞌ jix michꞌcha el ix yu ebꞌ, jix iꞌletej ix scꞌatan Naj yu ebꞌ. Jaꞌ sattaj masanil ebꞌ ánima jix oc linan jun ix tuꞌ. 4Catuꞌ jix yalon ebꞌ tet Naj jaxca tiꞌ:
—Jaach cuywam, jaꞌ jun ix ix tiꞌ, lalan smulwi yet jix ilcha el ku jon. 5Jaꞌ sley Moisés chi aloni, tol jaꞌ ebꞌ ix ix queytuꞌ sbꞌeybꞌal jaxca tiꞌ, sowalil chi kꞌojchꞌennele can cam ebꞌ. Jal jaach, ¿tzet ja chi jaach tiꞌ? ẍi ebꞌ tet Jesús. 6Tucꞌal jix slan kꞌanle ebꞌ jaxca tuꞌ, yu yakꞌle porobꞌal Naj yu ebꞌ, yutol chi yoche ebꞌ, tol chi akꞌle queja Naj yu ebꞌ. Jaꞌ Jesús tuꞌ, tucꞌal jix ey noanoj, catuꞌ jix tzꞌibꞌli ey yetoj yiximal skꞌabꞌ sat txꞌotxꞌ. 7Catuꞌ jix skꞌanlen ebꞌ tet Naj jaxca tiꞌ:
—¿Tzet wal chi yun jun tiꞌ xin? ẍi ebꞌ tet Naj.
Yuxan jix a linan Naj, catuꞌ jix yalon tet ebꞌ jaxca tiꞌ:
—Ta ey junoj jex cꞌam niꞌoj je penail, jaꞌ ojabꞌ chi bꞌabꞌi skꞌojon oc chꞌen chꞌen yin ix, ẍi Naj tet ebꞌ. 8Jix lawi yalon jaxca tuꞌ, jix ey pax noan junelxa. Catuꞌ jix tzꞌibꞌli ey junelxa sat txꞌotxꞌ. 9Jaꞌ yet jix yabꞌen ebꞌ tzet jix yal tuꞌ, jix snaꞌon sbꞌa junjun ebꞌ, tol ey spenail junjun ebꞌ. Yuxan, junjuntaj xacꞌal jix yun spaxtoj ebꞌ. Jaꞌ ebꞌ ichamtaj winaj jix bꞌabꞌi ẍaꞌel yich yeltoj, catuꞌ tzajan yeltoj ebꞌ achꞌe. Xꞌojli xacꞌal Jesús jix can bꞌey linan oc ix ix tuꞌ. 10Catuꞌ jix a linanoj, jix yiloni, xꞌojli xacꞌal ix ix tuꞌ linan can ocoj, catuꞌ jix yalon tet ix jaxca tiꞌ:
—Txo ix, ¿bꞌeytuꞌ ey ebꞌ chach akꞌon queja tuꞌ? ¿Cꞌam mi junoj mactxequel jix akꞌon queja ja win? ẍi Jesús tet ix.
11—Cꞌam mactxequel, Mamin, cꞌam junoj, ẍi ix.
—Yetoj jin pax oj, man oj wakꞌ queja ja win an. Asiꞌ manche xa ja wun mul junelxa, ẍi Jesús tet ix.
Jaꞌ Jesús Chi Akꞌon Sajkꞌinal Yin Spixan Ebꞌ Ánima
12Catuꞌ jix yalon Jesús xol ebꞌ ánima tuꞌ jaxca tiꞌ:
—Jain tiꞌ, jaxca sajkꞌinal weoc xol ebꞌ ket animail bꞌey yul yibꞌankꞌinal tiꞌ. Jaꞌ mac chi oc jin cuywom oj an, oj wakꞌ sajkꞌinal bꞌey spixan. Yu jun sajkꞌinal tuꞌ, yuxan oj ẍaꞌ skꞌinal ebꞌ tol ey cꞌal yin tobꞌalkꞌinal. Ma xa ecꞌabꞌ ebꞌ xol kꞌejkꞌinal, ẍi Jesús. 13Catuꞌ jix yalon ebꞌ Fariseo tuꞌ tet Naj jaxca tiꞌ:
—Jaach tiꞌ, yul cꞌal ja wet cha waloni tol ey ja wopiso. Yuxan cꞌam yeloc apnoj niꞌoj ja wet cha wal tuꞌ, ẍi ebꞌ tet Jesús. 14Yuxan jix yal pax Naj tet ebꞌ jaxca tiꞌ:
—Caxcꞌal mi yul wet chi walon an, tol ey wopiso, caw yel chi wal pax an. Yutol jain tiꞌ, caw wotaj bꞌey jix jin tit an. Yetoj pax oj, wotaj bꞌey oj jin toj an. Jaex tiꞌ, man je yotaj oj bꞌey titnaj jin an, catuꞌ man pax je yotaj bꞌey oj jin toj. 15Jaex tiꞌ, tucꞌal comon che naꞌoc yin junoj mactxequel yin eymanil. Jain tiꞌ, cꞌam mac chin naꞌoc yin. 16Kꞌinaloj ta ey mac chi woche chin naꞌoc yin, jichan cꞌal chi yun jin naꞌon oc yin, yutol man jin txꞌojli oj chin naꞌon oc yin. Junne ey jin Mam wetoj an, yutol jaꞌ jix jin chejontej. 17Jaꞌ cu ley eyecꞌ yul cu kꞌabꞌ chi aloni, ta tol ey cawanoj testigo laan cꞌal yaloni, sowalil chi cu chaꞌ kabꞌ tzet chi yal ebꞌ. 18Ilaꞌbꞌi, ey cawan mac chi yakꞌ sbꞌa testigoal win an. Chi wakꞌ jin bꞌa testigoal win an. Testigo pax jin Mam wetoj an, yutol jaꞌ chejnen jintej, ẍi Jesús tet ebꞌ.
19—¿Bꞌeytuꞌ ey ja Mam tuꞌ xin? ẍi ebꞌ tet Naj.
Jix yalon Jesús tet ebꞌ jaxca tiꞌ:
—Jaex tiꞌ, man je yotaj oj mac jin txequel. Man je yotaj oj pax jin Mam tuꞌ an. Kꞌinaloj ta je yotaj mac jin txequel, je yotaj pax jin Mam tuꞌ, ẍi Naj tet ebꞌ. 20Jaꞌ yul stemplo Dios, bꞌey scawilal chabꞌal saꞌbꞌeal tet Dios, jaꞌ tituꞌ jix yal Jesús wan tiꞌ. Jaꞌ tituꞌ jix cuywa xol ánima. Cꞌam junoj mac jix oc mitxꞌan yin, yutol cꞌamto chi jul scꞌual scami.
Ma Skeꞌ Je Too Bꞌey Oj Jin Toj, Ẍi Jesús
21Jix yal Jesús tet ebꞌ junelxa jaxca tiꞌ:
—Oj jin toj, jain tiꞌ. Oj to jin je seyecꞌoj, jaꞌ xol je penail oj jex camoj. Catuꞌ ma skeꞌ je yapni bꞌey oj jin apnoj tuꞌ, ẍi Jesús tet ebꞌ. 22Yuxan jix yal ebꞌ yaawil yeoc bꞌey Judea tuꞌ jaxca tiꞌ:
—Tejan oj yakꞌ cam sbꞌa yul yet, yuxan chi yalaꞌ tol ma skeꞌ kapni bꞌey oj apnoj tuꞌ, ẍi ebꞌ. 23Catuꞌ jix yalon pax Naj tet ebꞌ jaxca tiꞌ.
—Jaex tiꞌ, a sat txꞌotxꞌ jex, yutol yet jex yul yibꞌankꞌinal tiꞌ. Jain tiꞌ, man yet oj jin jun yul yibꞌankꞌinal tiꞌ, yutol a satcan jin an. 24Yuxan jix wal ey jex an, tol xol je penail oj jex camoj. Ta cꞌam che yaoc yin je cꞌul, Tol Jain ton tiꞌ jaxca jix wute waloni, yin je penail oj jex camoj, ẍi Jesús tet ebꞌ.
25—¿Mac jaach txequel xin? ẍi pax ebꞌ tet Naj.
Catuꞌ jix yalon jaxca tiꞌ:
—Albꞌilxa wu an yet tax yalantoj ey jex, mac jin txequel. 26Caw ey tzetyetal chi skeꞌ walon je yin, catuꞌ chi skeꞌ jin naꞌon oc je yin, asan pax tzet yalnaj ey jin jun mac jix jin chejontej, asan chi wal tet ebꞌ ánima yul yibꞌankꞌinal tiꞌ. Caw yel tzet chi yalaꞌ, ẍi Jesús tet ebꞌ. 27Ma pax naꞌcha el yu ebꞌ, tol jaꞌ yin cu Mam Dios chi yalaꞌ. 28Yuxan jix yal pax Naj tet ebꞌ jaxca tiꞌ:
—Jato yet oj jin je tꞌunbꞌan a yin culus, catuꞌ oj naꞌcha el je yu, tol Jain ton Akꞌbꞌil Wopiso xol ebꞌ ket animail yu Dios. Catuꞌ oj je yotajnen eloj, tol man yul oj wet chi wunen wan tiꞌ. Asan wan cuybꞌanile yalnaj jin Mam ey jin an, jaꞌ chi wal an. 29Jaꞌ jun chejnen jintej tuꞌ, jaꞌ eyoc wetoj an. Jaꞌ jin Mam tuꞌ, cꞌam chin sbꞌejcan jin txꞌojli, yutol asan tzet chi ẍaꞌ scꞌul, asan chi cꞌal wun an, ẍi Jesús tet ebꞌ. 30Jaꞌ yet jix yalon Naj wan tiꞌ, ecꞌal ebꞌ jix yaoc scꞌul yin.
Ebꞌ Yuninal Xa Dios Yetoj Ebꞌ Eyto Oc Yin Spenail
31Catuꞌ jix yalon Jesús tuꞌ tet ebꞌ Israel jix yaoc scꞌul yin Naj tuꞌ jaxca tiꞌ:
—Ta ey cꞌal oc je naꞌbꞌal tobꞌalkꞌinal yin tzet chi wal an, jaꞌcaw jin cuywom jex ton sicꞌlebꞌil. 32Catuꞌ oj je yotajnen el skꞌane Dios tol caw yel. Yu jun yel tuꞌ, oj jex jajcha eloj, ẍi Jesús tet ebꞌ. 33Catuꞌ jix yalon pax ebꞌ tet Naj jaxca tiꞌ:
—Jaon tiꞌ, yicꞌaal jon pax naj Abraham ja wetoj. Cꞌam juneloj jix cu oc smooso oj junoj ánima. ¿Yuxan, tzet yuxan cha walaꞌ, tol oj cu jajcha eloj? ẍi ebꞌ.
34—Caw yel chi wal ey jex an, yal cꞌal mac tol jacꞌalaꞌ yunen spenail, caw eyoc ebꞌ yin yakꞌomaloj servil spenail tuꞌ. 35Kꞌinaloj ey junoj mactxequel eyoc yakꞌomaloj servil junoj ánima tinaniꞌ. Jaꞌ jun mooso tuꞌ, ma skeꞌ yeecꞌ yetoj jun ánima tuꞌ junelne. Jal pax junoj scꞌaal junoj ánima, caw scꞌaal ton junelne. 36Yuxan, ta jain chex jin jajel yin je penail, caw yel oj jex ton jajcha eloj, yutol Scꞌaal jin. 37Jain tiꞌ, wotaj toni, tol yicꞌaal jex naj Abraham wetoj an. Ilaꞌ, che yoche chin je yakꞌ pax camoj, yutol jaꞌ tzet chi wal ey jex, cꞌam yeloc apnoj yul je sat. 38Jaꞌ tzet ilbꞌil wu bꞌey jin Mam, jaꞌ chi wal ey jex. Jaex tiꞌ, txꞌoj je mam. Jaꞌ yochwan je mam tuꞌ che yunne, ẍi Jesús tet ebꞌ.
39—Jaon tiꞌ, yicꞌaal jon pax naj Abraham, ẍi ebꞌ tet Jesús.
—Ta yel yicꞌaal jex naj Abraham tuꞌ. Tzet yuxan cꞌam che yun tzet jix yun naj. 40Asan wan tzetyetal yel albꞌil yu Dios ey jin an, chi wal ey jex. Ilaꞌ, che yoche chin je yakꞌ pax camoj. Jaꞌ naj Abraham tuꞌ, cꞌam juneloj queytuꞌ jix yute sbꞌa. 41Jaex tiꞌ, jaꞌ tzet chi yun je mam, jaꞌ che yun yetoj, ẍi Jesús tet ebꞌ.
—Jaon tiꞌ, man comon winaj jon. Junne cu Mam, jaꞌton Dios, ẍi ebꞌ tet Jesús. 42Man yeloj tol jaꞌ Dios je Mam. Ta yel jaꞌ Dios je Mam, ey je camcꞌulal win an, yutol jaꞌ bꞌey Dios jix jin tit an, catuꞌ jix jin jul titiꞌ. Man tucꞌal oj jix jin jul yul wet an, jaꞌ Dios jix jin chejontej. 43¿Tzet yuxan cꞌam chi naꞌcha el je yu tzet chi wal ey jex tiꞌ an? Cꞌam chi naꞌcha el je yu, yutol cꞌam chi yal je cꞌul che chaꞌ je yabꞌ tzet chi wal tiꞌ an. 44Jaꞌ je mam jaex tiꞌ, jaꞌton naj diablo, yuxan, asan yin naj che yaoc je naꞌbꞌal. Asan tzet chi yoche naj diablo che yunne. Makꞌom cam ánima xa naj diablo yet tax jix waꞌxi yul yibꞌankꞌinal tiꞌ. Cꞌam niꞌoj yeloc apnoj junoj tzetyetal yel yu naj, yutol cꞌam junoj tzetyetal yel chi yalaꞌ. Jaꞌ yet chi yakꞌon junoj lekꞌtiꞌal, jaꞌ bꞌey snaꞌbꞌal chi tita, yutol caw lekꞌtiꞌ naj. Jaꞌ ey yet masanil lekꞌtiꞌal. 45Jal jin xin, caw yel wan tzetyetal chi wal ey jex an, cꞌam pax che chaꞌ je yabꞌe. 46¿Mac junoj jex chi skeꞌ je txꞌoxon oc niꞌoj jin penail? Caw yel wan chi wal ey jex tiꞌ an, yuxan, ¿tzet yuxan cꞌam che chaꞌ pax je yabꞌe? 47Jaꞌ ebꞌ yet Dios, chi yakꞌ xiquin ebꞌ tet skꞌane. Jal jex pax jaex tiꞌ, man jex yetoj Dios. Yuxan, cꞌam chi yal je cꞌul che yakꞌ je txiquin tet, ẍi Jesús tet ebꞌ.
Eyxa Ecꞌ Jesús Yet Cꞌamto Chi Ali Naj Abraham
48Catuꞌ jix yalon pax ebꞌ yaawil yeoc bꞌey Judea tuꞌ tet Naj jaxca tiꞌ:
—Ilaꞌ xin, yel chi kalaꞌ. Tejan tol a Samaria jaach. Tejan ey junoj pena espíritu eyoc ja win, ẍi ebꞌ tet Jesús.
49—Cꞌamaj, cꞌam junoj pena espíritu eyoc win an. Tol lalan jin jijen tzet chi yal jin Mam. Tucꞌal chex bꞌuchwa win. 50Jain tiꞌ, cꞌam chi woche tol miman xacꞌal weloc apnoj. Ey pax jun mactxequel chi aloni tol miman weloc apnoj yul sat. Jaꞌ jun tuꞌ oj alon oj mactxequel chi alon yin yel cꞌal mactxequel chi alon yin man yeloj. 51Caw yel chi wal ey jex, jaꞌ mac chi jijen tzet chi wal an, cꞌam bꞌakꞌin oj cam ebꞌ, ẍi Jesús tet ebꞌ.
52—Jaꞌ tinaniꞌ, caw kotaj sicꞌlebꞌil tol ey junoj pena espíritu eyoc ja win. Jaꞌ naj Abraham, yetoj cꞌal ebꞌ ẍejabꞌ Dios yet peyxa, jix cam masanil ebꞌ, catuꞌ cha walon pax oj: “Ta ey mac chi jijen tzet chi wal an, man oj cam ebꞌ,” ja chi to wal pax oj. 53¿Tumi yel ecꞌbꞌan ja wopiso yintaj kichmam Abraham tuꞌ, cꞌal yintaj ebꞌ ẍejabꞌ Dios yet peyxa? Ilaꞌbꞌi, jix cam pax ebꞌ tuꞌ. ¿Mac jaach txequel ja naꞌon tinaniꞌ? ẍi ebꞌ tet Jesús. 54Yuxan jix yal Jesús tet ebꞌ jaxca tiꞌ:
—Ta yul cꞌal wet chi wiꞌon a can jin bꞌa, cꞌam niꞌoj weloc apnoj. Jaꞌton jin Mam chi aloni tol ey weloc apnoj. Jaꞌton jin Mam tuꞌ che yaloc je Diosaloj. 55Caxcꞌal mi che yaloc je Diosaloj, man pax je yotaj oj naj. Jal jin jain tiꞌ, caw wotaj Dios tuꞌ. Kꞌinaloj ta chi wal an, tol man wotaj oj Dios. Lekꞌtiꞌ jin jaxca jex tuꞌ. Caw yel wotaj Dios. Jaꞌ tzet chi yalaꞌ, chin jije. 56Jaꞌ kichmam Abraham, jix tzala aoj, yutol albꞌil tet naj, tol oj yil jin juli. Jix ton yilaꞌ, yuxan jix yakꞌ tzala scꞌul naj, ẍi Jesús tet ebꞌ.
57—¿Tumi ilbꞌil yin Abraham ja wu? Cꞌamto chach apni pax yin 50 abꞌil, ẍi ebꞌ tet Jesús.
58—Caw yel chi wal ey jex an, jaꞌ yet cꞌamto chi ali naj Abraham tuꞌ, ey jin xa ecꞌ jain tiꞌ an, ẍi Jesús tet ebꞌ.#8:58 Tuxa chi lawi caabꞌ mil abꞌil scam naj Abraham yet jix yalon Jesús jun tiꞌ. 59Jix lawi tuꞌ xin, jix cꞌoli sicꞌon a chꞌen ebꞌ, catuꞌ jix yochen ebꞌ jix skꞌojchꞌenne camoj. Jix yewbꞌan el sbꞌa Naj tet ebꞌ. Catuꞌ jix eltej yul stemplo Dios tuꞌ.
Currently Selected:
Juan 8: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.