YouVersion Logo
Search Icon

Juan 18

18
Smitxꞌbꞌanil Jesús
(Mateo 26:47-56; Marcos 14:43-50; Lucas 22:47-53)
1Jix lawi yalon Jesús wan tiꞌ, catuꞌ jix too yetoj ebꞌ scuywom tuꞌ. Jix too yetoj ebꞌ bꞌey skꞌaxepal jun jobꞌe chi yij Cedrón, bꞌey ey wan teꞌ awbꞌeal teꞌ. Jaꞌ tituꞌ jix apni ebꞌ xol teꞌ. 2Jaꞌ naj Judas, naj tꞌinan yaon oc Jesús yul skꞌabꞌ camich, yotaj naj jun lugar tuꞌ, yutol ecꞌal el jix bꞌet Jesús yetoj ebꞌ scuywom tituꞌ. 3Yu jun tuꞌ, yuxan jix too naj tituꞌ, yetoj jun bꞌulan soldado, cꞌal wan ebꞌ steynemal stemplo Dios. Jix chejletoj yu ebꞌ yaawil yakꞌomal xaambꞌal ebꞌ Israel tet Dios. Cꞌal yetoj ebꞌ Fariseo. Tzejbꞌil oc sta ebꞌ, iꞌbꞌil pax oc slámpara ebꞌ, catuꞌ yetbꞌi pax oc ebꞌ smitxꞌkꞌabꞌil jowal, catuꞌ jix apni ebꞌ. 4Jal Jesús xin, yotaj xa jantaj tzet tꞌinan oj jul yibꞌan. Yu jun tuꞌ, yuxan jix eltej yu ẍaꞌon ebꞌ jix apni tuꞌ, jix skꞌanlen tet ebꞌ jaxca tiꞌ:
—¿Mactxequel che seyaꞌ? ẍi Jesús tet ebꞌ. 5Jaꞌ Jesús a Nazaret, jaꞌ chi cu seyaꞌ, ẍi ebꞌ tet Naj.
—Jain ton xin, ẍi Jesús tet ebꞌ.
Yaman Judas yetoj ebꞌ, naj lalan yaon oc Naj yul skꞌabꞌ camich. 6Jix lawi cꞌal yalon Jesús tet ebꞌ jaxca tuꞌ, jix too tecꞌton ebꞌ yintaj, jix too pacꞌna ebꞌ tuꞌ. 7Jix skꞌanlen Jesús tet ebꞌ junelxa:
—¿Mactxequel che sey xin? ẍi Jesús tet ebꞌ junelxa.
—Jaꞌ Jesús a Nazaret, jaꞌ chi cu seyaꞌ, ẍi ebꞌ tet Naj junelxa.
8—Jix wal ey jex, tol jain toni. Ta jain chin je seyecꞌoj, bꞌejwej can el ebꞌ eyecꞌ wetoj tiꞌ an, ẍi Jesús tet ebꞌ. 9Jaxca ton tuꞌ jix yun xin, yet watxꞌ chi yun tzet jix yal Jesús yin ebꞌ scuywom, yet jix yalon jaxca tiꞌ: “Jaꞌ ebꞌ jix ja wakꞌ ey jin tiꞌ an, cꞌam junoj ebꞌ jix qꞌueycan eloj,” ẍi.#Juan 6:39. 10Jix yiꞌon atej yespada naj Simón Pedro yul stzꞌuumal tuꞌ, jix stzokꞌon oc yin jun naj chi yij Malco, naj smooso naj yaawil yakꞌomal xaambꞌal ebꞌ Israel tet Dios. Jaꞌ xiquin naj bꞌey swatxꞌ jix el yu. 11Catuꞌ jix yalon Jesús tet naj Pedro tuꞌ jaxca tiꞌ:
—Aeytoj ja wespada yul stzꞌuumal. ¿Chim ja naꞌ tol man oj wakꞌ jin bꞌa yul skꞌabꞌ jun syaꞌilal chi sbꞌej cu Mam Dios wibꞌan tiꞌ an? ẍi Jesús tet naj.
Jix Iꞌletoj Jesús Sattaj Naj Anás
(Mateo 26:57-58; Marcos 14:53-54; Lucas 22:54)
12Jix mitxꞌle Jesús yu ebꞌ soldado cꞌal yu naj coronel yetoj ebꞌ policía a Judea tuꞌ, catuꞌ jix cal-le ey Naj yu ebꞌ. 13Catuꞌ jix iꞌletoj naj yu ebꞌ bꞌey sna naj Anás, naj sniꞌ naj Caifás. Jaꞌ naj Caifás tuꞌ, yaawil yakꞌomal xaambꞌal ebꞌ Israel tet Dios yet jun abꞌil tuꞌ. 14Jaꞌton jix alon tet ebꞌ yaawil yeoc bꞌey Judea tuꞌ, tol sowalil chi cam junoj mactxequel sqꞌuexeloj masanil ánima.
Jix Yiꞌel Jesús Naj Pedro Yin
(Mateo 26:69-70; Marcos 14:66-68; Lucas 22:55-57)
15Jaꞌ yet jix iꞌletoj Jesús yu ebꞌ, tzajan oc Simón Pedro yintaj, yetoj junxa scuywom Jesús. Jaꞌ junxa scuywom tuꞌ, yotaj sbꞌa yetoj naj yaawil yakꞌomal xaambꞌal ebꞌ Israel tet Dios. Yu jun tuꞌ, yuxan jix octoj naj yetoj Jesús bꞌey yamakꞌil sna naj. 16Jal pax naj Pedro xin, jix cancan stiꞌ puerta. Jaꞌ junxa scuywom Jesús tuꞌ, jix elol bꞌey linan can oc Pedro tuꞌ, catuꞌ jix yalon tet ix ix chi teynen stiꞌ na tuꞌ, tol chi octoj naj Pedro tuꞌ yetoj ebꞌ. 17Catuꞌ jix yalon ix teynem stiꞌ na tuꞌ tet naj jaxca tiꞌ:
—Jaach tiꞌ, tejan scuywom jaach jun winaj jix mitxꞌle tiꞌ, ẍi ix tet Pedro tuꞌ.
—Cꞌamaj. Man jin scuywomoj, ẍi naj, jix tzꞌaj yalon tet ix. 18Jaꞌ yet jun tiempoal tuꞌ, stiempoal siic. Yu jun tuꞌ, yuxan jix yaoc skꞌakꞌ yetoj ebꞌ mooso cꞌal ebꞌ policía. Catuꞌ jix oc linan ebꞌ kꞌaẍnoj. Jix oc pax linan naj Pedro kꞌaẍnoj yetoj ebꞌ.
Jix Bꞌetecꞌ Jesús Sattaj Naj Anás
(Mateo 26:59-66; Marcos 14:55-64; Lucas 22:66-71)
19Jaꞌ naj yaawil yakꞌomal xaambꞌal ebꞌ Israel tet Dios, jix skꞌanlen el tet Jesús jaxca tiꞌ:
—¿Mactajtxequel ebꞌ ja cuywom? ¿Tzettaj cuybꞌanile cha wakꞌ scuy ebꞌ? ẍi naj tet Jesús. 20Catuꞌ jix yalon Jesús tuꞌ tet ebꞌ jaxca tiꞌ:
—Jaꞌ wan jin cuybꞌanil tiꞌ, jix walel xol ebꞌ ánima masanil. Masanil cꞌal tiempo chi walel yul-laj snail cu culto, cꞌal yul stemplo Dios, cꞌal bꞌey chi syambꞌa sbꞌa ebꞌ ket Israelal masanil. Cꞌam junoj tzetyetal jix wal yin ewantajil. 21¿Tzet yuxan jaꞌ ey jin cha kꞌanle? Kꞌanle tet ebꞌ jix abꞌen walon eltej tuꞌ. Yal ojabꞌ ebꞌ ey jaach, tzettaj ẍi wan jin cuybꞌanil tuꞌ. Yutol yotaj xa ebꞌ, tzettaj jix waleloj, ẍi Jesús tet naj. 22Jix lawi cꞌal yalon Jesús wan tuꞌ, catuꞌ jix tzakꞌletoj sat Jesús tuꞌ yu jun naj steynemal stemplo Dios eyecꞌ tituꞌ. Catuꞌ jix yalon naj tet Jesús jaxca tiꞌ:
—¿Tzet yuxan queytuꞌ cha wute takꞌwoj ja bꞌa tet naj yaawil yakꞌomal xaambꞌal tet Dios? ẍi naj tet Jesús tuꞌ.
23—Ta ey tzet pena jix wal jix ja wabꞌe, alaꞌ tzetyetal pena jix wal tuꞌ. Ta watxꞌ cꞌal jix wute kꞌanabꞌ jin bꞌa tet, ¿tzet yuxan comon cꞌal chin ja makꞌa? ẍi Jesús tet naj. 24Jix lawi tuꞌ xin, catuꞌ jix akꞌle iꞌletoj Naj bꞌey Caifás yu naj Anás tuꞌ, jaꞌton naj yaawil yakꞌomal xaambꞌal ebꞌ Israel tet Dios. Kꞌalbꞌil cꞌal naj yet jix yiꞌontoj ebꞌ.
Jix Yiꞌel Jesús Naj Pedro Yin Yet Scaelal, cꞌal Yet Yoxelal
(Mateo 26:71-75; Marcos 14:69-72; Lucas 22:58-62)
25Linan cꞌal oc naj Pedro kꞌaẍnoj stiꞌ kꞌakꞌ yetoj ebꞌ policía, catuꞌ jix yalon ebꞌ tet jaxca tiꞌ:
—Jaach tiꞌ, tejan tol scuywom jaach Jesús, ẍi ebꞌ tet naj. Catuꞌ jix yiꞌon el yin, jix yalon jaxca tiꞌ:
—Cꞌamaj, ma jin scuywomoj, ẍi Pedro, jix tzꞌaj yaloni. 26Jix lawi tuꞌ, ey jun smooso naj yaawil yakꞌomal xaambꞌal ebꞌ Israel tet Dios, yican to sbꞌa yetoj naj tzokꞌbꞌil el xiquin yu naj Pedro tuꞌ. Jaꞌ naj jix alon tet Pedro tuꞌ jaxca tiꞌ:
—Jaach tiꞌ, ¿tumi manaj jaach jix wil ja wecꞌ yetoj Jesús bꞌey xol-laj wan teꞌ awbꞌeal teꞌ? ẍi naj tet naj Pedro tuꞌ. 27Jix yiꞌon pax el naj Pedro tuꞌ yin junelxa. Jix lawi cꞌal yalon jaxca tuꞌ, jix okꞌa noꞌ caẍlan.
Jaꞌ Yet Jix Iꞌletoj Jesús Sattaj Naj Pilato
(Mateo 27:1-2, 11-14; Marcos 15:1-5; Lucas 23:1-5)
28Jaꞌ yet jix sajbꞌi a xin, catuꞌ jix iꞌle eltej Jesús yu ebꞌ yul sna naj Caifás tuꞌ, catuꞌ jix iꞌletoj naj yu ebꞌ bꞌey sdespacho naj yaaw. Jaꞌ sley ebꞌ a Judea tuꞌ, tol cꞌam chi skeꞌ yoc ebꞌ yul sdespacho naj yaaw tuꞌ. Jaꞌ chi yute snaꞌon ebꞌ, tol chi tzꞌilbꞌi el ebꞌ yul sat Dios ta chi octoj ebꞌ. Catuꞌ cꞌamxa chi skeꞌ slow ebꞌ yet skꞌin Pascua chi jul tuꞌ. 29Yu jun tuꞌ, yuxan jix eltej naj yaaw tuꞌ stiꞌ sdespacho tuꞌ, jaꞌton naj chi yij Pilato. Jix kꞌanabꞌ naj snan xol ebꞌ tuꞌ jaxca tiꞌ:
—¿Tzet spenail jun winaj chi jul je yakꞌ ey jin tiꞌ an? ẍi naj.
30—Ta man penaoj jun winaj tiꞌ, ma skeꞌ comon cꞌal oj kiꞌtej ey jaach, ẍi ebꞌ. 31Yuxan jix yal Pilato jaxca tiꞌ:
—Iꞌwejtoj Naj jaex tiꞌ. Catuꞌ che naꞌon oc yin Naj jaex tiꞌ tituꞌ, yin jatacꞌalaꞌ yalon je ley, ẍi Pilato tet ebꞌ.
—Jaꞌ jaon Israel jon tiꞌ, cꞌam chi skeꞌ tol comon cꞌal chi kaoc camich yibꞌan junoj mactxequel, ẍi ebꞌ tet naj. 32Jaxca ton tiꞌ jix yun yelcan apnoj tzet jix yal Jesús, tzet utbꞌil oj yun scami. 33Jix pax oc Pilato tuꞌ yul sdespacho tuꞌ, catuꞌ jix awtele octoj Jesús tuꞌ yu. Jix skꞌanlen el tet naj jaxca tiꞌ:
—¿Tumi jaach tiꞌ, Sreyal jaach ebꞌ Israel? ẍi naj tet Jesús.
34¿Yul cꞌal mi ja wet chi tita, yuxan cha kꞌanle el jun tiꞌ ey jin an, ma ey mac jix alon ey jaach? ẍi Jesús tet naj.
35—¿Tumi Israel jin cha wilaꞌ? Jaꞌ ebꞌ ja wet conobꞌ, cꞌal ebꞌ yaawil yakꞌomal xaambꞌal ebꞌ tet Dios, jaꞌ ebꞌ jix jaach jul aon oc yul jin kꞌabꞌ. ¿Tzet jix ja loc ja win? ẍi naj tet Jesús.
36—Jain tiꞌ, manaj yul yibꞌankꞌinal tiꞌ Rey jin an. Kꞌinaloj ta jaꞌ yul yibꞌankꞌinal tiꞌ rey jin an, chim a waan ebꞌ wakꞌomal servil yin jowal, yet watxꞌ cꞌam chin ale oc yul skꞌabꞌ ebꞌ yaawil yeoc bꞌey Judea, yuxan manaj titiꞌ, Rey jin an, ẍi Jesús tet naj.
37—¿Tumi caw yel rey jaach xin? ẍi Pilato tet Jesús.
—Jaꞌtoni, Rey jin ton jaxca ja walon tiꞌ. Jain tiꞌ, chin julecꞌ yul yibꞌankꞌinal tiꞌ, yu jul walon tzetyetal caw yel. Yu chꞌan jun tuꞌ, yuxan jix jin ali. Masanil cꞌal ebꞌ eyxa oc yin jun kꞌane jaꞌcaw yel, chi yakꞌ xiquin ebꞌ tet tzet chi wal an, ẍi Jesús. 38Catuꞌ jix yalon Pilato tuꞌ tet Naj jaxca tiꞌ:
—A… ¿tzetyetal jun yel cha wal tuꞌ? ẍi Pilato tet Jesús.
Jix Ale Xacꞌal Oc Camich Yibꞌan Jesús
(Mateo 27:15-31; Marcos 15:6-20; Lucas 23:13-25)
Jix lawi yalon jaxca tuꞌ xin, catuꞌ jix el pax tej stiꞌ sdespacho bꞌey eyecꞌ ebꞌ a Judea tuꞌ. Jix yalon eltej xol ebꞌ tuꞌ jaxca tiꞌ:
—Jaꞌ jun winaj tiꞌ, cꞌam niꞌoj spenail chi wil an. 39Ey pax jun je ley, tol jaꞌ yet junjun kꞌin Pascua tiꞌ, che kꞌan jajcha junoj preso yei, catuꞌ chin jajon eloj. Yu jun tuꞌ xin, ¿cꞌam mi wal chi yal je cꞌul jaꞌ jun je reyal jaex Israel jex tiꞌ chin jajel tinaniꞌ yet jun abꞌil tiꞌ? ẍi naj tet ebꞌ. 40Yu jun tuꞌ, jix a yaw ebꞌ masanil, jix yalon ebꞌ jaxca tiꞌ:
—Jaꞌ jun winaj tiꞌ, cꞌam chi koche. Jaꞌ ojabꞌ naj Barrabás chi jajchai, ẍi ebꞌ tet Pilato. Caw elkꞌom pax naj Barrabás tuꞌ.

Currently Selected:

Juan 18: knj

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy