Juan 12
12
Skꞌaneal Yet Jix Secoc Jun Ambꞌal Sukꞌukꞌi Sabꞌ Ix María Yin Jesús
(Mateo 26:6-13; Marcos 14:3-9)
1Jobꞌix oj toj yoc jun kꞌin Pascua bꞌey Jerusalén, jix apni Jesús bꞌey Betania bꞌey caan naj Lázaro, naj jix pitzcꞌu a yu Jesús. 2Jaꞌ yet jix apni Jesús tuꞌ, jix oc jun miman loꞌo yu ebꞌ yetoj Naj. Jaꞌjun naj Lázaro tuꞌ, jix low yetoj ebꞌ. Jaꞌ ix Marta chi iꞌwi eltoj loꞌbꞌe. 3Jal ix María xin, iꞌbꞌil oc nan litro ambꞌal sukꞌukꞌi sabꞌ yu ix, chi yij nardo.#12:3 Nardo, jaꞌ jun tujan sukꞌukꞌi sabꞌ chi tit bꞌey txꞌotxꞌ India. Yu caw naat chi tita, yuxan caw ey stool. Chi cꞌubꞌale yul wan neet tol watxꞌ smajil. Jaꞌ jun ambꞌal tuꞌ caw ey stool. Jix apni cꞌal ix bꞌey Jesús, catuꞌ jix secon oc ix yin yajan Naj. Jix lawi cꞌal tuꞌ, jix sjoꞌontaj ix yetoj xil sjolom. Jun txolan jix noel yul jun na tuꞌ yu sabꞌ. 4Jaꞌ jun scuywom Jesús chi yij Judas, scꞌaal Simón Iscariote, naj tꞌinan yaon oc Jesús yul skꞌabꞌ camich. Jaꞌ jix alon jaxca tiꞌ:
5—Jaꞌ jun ambꞌal sukꞌukꞌi sabꞌ tiꞌ, jaxca mi wal stool scꞌu junoj mulnawom yul abꞌil, queytuꞌ stool jun ambꞌal tuꞌ.#12:5 Jix yal Judas: “Trescientos denario”. Tol oj wal jix cu txoneloj, catuꞌ chi kakꞌon stool tet ebꞌ mebꞌa, ẍi naj, chi tzꞌaj yaloni. 6Tucꞌal chi tzꞌaj yalaꞌ. Man yeloj tol chi okꞌ scꞌul naj yin ebꞌ mebꞌa. Yutol cꞌubꞌam tumin yei, yu jun tuꞌ, yuxan jaꞌ jix ochen jix tzꞌaj cꞌubꞌa stool tuꞌ, catuꞌ chi yiꞌon can el niꞌoj yet yin chꞌen, yutol elkꞌom naj. 7Jix yalon Jesús tet naj jaxca tiꞌ:
—Bꞌej ja tzuon ix. Yutol jaꞌ jun yambꞌal ix sukꞌukꞌi sabꞌ tiꞌ, jix scꞌubꞌa ecꞌ ix, yu jin bꞌonle yet scꞌual jin mujbꞌanil. 8Jaꞌ ebꞌ mebꞌa tuꞌ, ey cꞌal ecꞌ ebꞌ je yetoj. Jal jin xin, man tobꞌalkꞌinal oj ey jin ecꞌ je yetoj, ẍi Jesús tet naj.
Ebꞌ Jix yoche Tol Chi Makꞌle Cam Naj Lázaro
9Ecꞌal ebꞌ Israel jix abꞌeni, tol eyecꞌ Jesús bꞌey Betania, yuxan jix too ebꞌ yilaꞌ. Man asanne oj Jesús chi yoche chi yil ebꞌ, chi yoche pax chi yil yin naj Lázaro ebꞌ, yutol jix pitzcꞌu a naj xol ebꞌ camnaj yu Jesús. 10-11Yu spitzcꞌubꞌail naj Lázaro tuꞌ, yuxan ecꞌal ebꞌ Israel jix yaoc scꞌul yin Jesús. Cꞌamxa chi yaoc scꞌul ebꞌ yin ebꞌ yakꞌomal xaambꞌal ebꞌ Israel tet Dios. Yu jun tuꞌ, yuxan jix slatiꞌne el sbꞌa ebꞌ yaawil yakꞌomal xaambꞌal ebꞌ tuꞌ, catuꞌ chi yochen ebꞌ chi smakꞌ cam naj Lázaro tuꞌ pax oj.
Jaꞌ Yet Jix Oc Jesús Bꞌey Conobꞌ Jerusalén
(Mateo 21:1-11; Marcos 11:1-11; Lucas 19:28-40)
12Ecꞌal ánima jix apni bꞌey Jerusalén yu skꞌin Pascua. Jaꞌ yet jun cꞌual tuꞌ, jix yabꞌen ebꞌ tol lalan yapni Jesús tituꞌ. 13Yu jun tuꞌ, ecꞌal ebꞌ jix iꞌon el xaj teꞌ chꞌibꞌ. Jix yiꞌontoj ebꞌ, catuꞌ jix too ebꞌ ẍaꞌon Jesús. Jix a yaw ebꞌ yin ipal, jix yalon ebꞌ jaxca tiꞌ:
—Yuwal dios. Kalwej watxꞌ kꞌane tet jun chejbꞌiltej yu Dios tiꞌ.#Salmos 118:25, 26. Kalwej watxꞌ kꞌane tet Naj cu Reyal jaon Israel jon tiꞌ, ẍi ebꞌ. 14Jix ilcha jun noꞌ bꞌuru yu Jesús tuꞌ. Catuꞌ jix a yibꞌan noꞌ jaxca yecan stzꞌibꞌelecan yul An Juun bꞌey chi yal jaxca tiꞌ:
15Jex a Sión, manche jex xiwi.
Ilwej sjul je Reyal.
Eya yibꞌan jun noꞌ yuneꞌ bꞌuru, ẍi An Juun tuꞌ.#Zacarías 9:9. 16Jaꞌ yet jun cꞌu tuꞌ, ma naꞌcha el wan tiꞌ yu ebꞌ scuywom Jesús. Jato yet jix iꞌle paxa Jesús tuꞌ satcan, catuꞌ jix snaꞌontej ebꞌ, tol skꞌaneal Jesús tzꞌibꞌebꞌilcan yul An Juun tuꞌ, jaxca cꞌal ye can stzꞌibꞌelecan tuꞌ, queytuꞌ jix yun yelocoj. 17Jaꞌ ebꞌ eyecꞌ yetoj Jesús, yet jix yawten eltej Lázaro bꞌey mujan octoj, yet jix pitzcꞌu aoj, jix yalel tzet jix yil ebꞌ tuꞌ. 18Yu jun tuꞌ, yuxan jix too ebꞌ ánima tuꞌ, stoo ẍaꞌon Jesús, yutol jix yabꞌ skꞌaneal jun milagro jix yun Naj. 19Jix yalon ebꞌ Fariseo jaxca tiꞌ:
—Jaꞌ tinaniꞌ cꞌamxa tzet watxꞌ chi kunne. Ilaꞌla, masanil ánima chi oc yetoj, ẍi ebꞌ.
Ey Wan Ebꞌ Griego Chi Yoche Chi Yil Yin Jesús
20Ey wan ebꞌ Griego jix apni bꞌey Jerusalén bꞌey kꞌin tuꞌ, yu yiꞌon ey sbꞌa ebꞌ tet Dios. 21Jaꞌ ebꞌ tuꞌ, jix apni ebꞌ scꞌatan naj Felipe a Betsaida yul yet Galilea. Catuꞌ jix yalon ebꞌ tet naj jaxca tiꞌ:
—Cha wamigo, chi koche chi kil yin Jesús, ẍi ebꞌ. 22Jix too naj Felipe yalon tet naj Andrés, catuꞌ jix too ebꞌ scawanil yalon tet Jesús. 23Catuꞌ jix yalon Jesús tuꞌ tet ebꞌ jaxca tiꞌ:
—Jain tiꞌ, Akꞌbꞌil Wopiso xol ebꞌ ket animail yu Dios, jaꞌ tinaniꞌ, lalan sjul yorail xeclo eloj, tol yel miman weloc apnoj. 24Caw yel chi wal ey jex, kꞌinaloj ey junoj ixim sbꞌakꞌ tiriw chi can yibꞌan txꞌotxꞌ. Tucꞌal chi can jaxca tuꞌ. Ta chi mujlei, jaxca tol chi cami, chi a pax juloj, mimanxa sbꞌakꞌ chi yakꞌa. 25Jaꞌ mac asanne skꞌinal ey yeloc apnoj yul sat, oj lawoj can el skꞌinal tuꞌ. Jal pax mac cꞌam yeloc apnoj skꞌinal yul sat yul yibꞌankꞌinal tiꞌ xin, jaꞌton ebꞌ tuꞌ oj ẍaꞌ skꞌinal tol ey cꞌal yin tobꞌalkꞌinal. 26Ta ey mac chi ochen chin akꞌon servil, tzajlo ojabꞌ wintaj an, yet watxꞌ jaꞌ bꞌey ey jin ecꞌoj, jatuꞌ oj ey pax ecꞌoj. Ta ey mac chin akꞌon servil, jaꞌ jin Mam, oj pajtzen tet ebꞌ, miman oj yun yeloc ebꞌ, ẍi Jesús.
Jix Yaltej Jesús Tzet Oj Yun Scami
27Jaꞌ tinaniꞌ, caw chi oc pitzꞌan cuscꞌulal yin jin pixan. ¿Tzet oj wute walon an? ¿Tumi oj wal tet Dios jaxca tiꞌ, “Mamin, col jin el yul skꞌabꞌ jun syaꞌilal oj jul wibꞌan tiꞌ an,” tumi taꞌ jin chi? Yutol yu ton jun tiꞌ, yuxan chin jul an. 28Mamin, txeclo ojabꞌ eloj, tzet utbꞌil tol miman ja weloc apnoj, ẍi Jesús.
Jix lawi tuꞌ xin, jix yabꞌen yoc jun kꞌane ebꞌ bꞌey satcan, jix yal jaxca tiꞌ.
Jix jin txꞌoxlei, tol miman weloc apnoj. Jaꞌ tinaniꞌ xin, oj jin txꞌox junelxa, ẍi jun kꞌane tuꞌ. 29Jaꞌ ebꞌ ánima eyecꞌ tituꞌ, jix yabꞌ jun tuꞌ ebꞌ, yuxan ey ebꞌ jix alon jaxca tiꞌ:
—Tejan cꞌu jun jix bꞌilwi tuꞌ, ẍi ebꞌ. Ey ebꞌ xin:
—Tejan ángel junoj jix kꞌanabꞌ eytej tet Jesús tiꞌ, ẍi ebꞌ. 30Yu jun tuꞌ, yuxan jix yal Jesús tet ebꞌ jaxca tiꞌ:
—Man wu oj, yuxan jix al-le eytej wan tiꞌ, tol je yu, jaex tiꞌ. 31Jaꞌ yet chi jul stiempoal yu chi naꞌle oc yin ebꞌ yet yul yibꞌankꞌinal tiꞌ. Jaꞌ yet tuꞌ oj jin kꞌojon el jun chi akꞌwi mandar yul yibꞌankꞌinal tiꞌ yin yopiso. 32Jal jain tiꞌ xin, jaꞌ yet oj jin iꞌle aoj, oj wawtetej masanil ánima ey jin an, ẍi Jesús. 33Jix yal Naj jaxca tuꞌ, yu tzet utbꞌil oj yun scami. 34Catuꞌ jix yalon ebꞌ ánima tet Naj jaxca tiꞌ:
—Jaꞌ yul an ley eecꞌ ey jon, jatuꞌ jix kabꞌ tzet utbꞌil tol jaꞌ jun Cristo, ey cꞌal ecꞌ yin tobꞌalkꞌinal. Yu jun tuꞌ, ¿tzet yuxan cha walaꞌ, tol jaꞌ jun Akꞌbꞌil Yopiso yu Dios xol ebꞌ ket animail, sowalil oj iꞌle aoj? ¿Mactxequel jun Akꞌbꞌil Yopiso yu Dios cha wal tuꞌ? ẍi ebꞌ tet Naj. 35Catuꞌ jix yalon tet ebꞌ jaxca tiꞌ:
—Jain chi wakꞌ sajkꞌinal bꞌey je pixan, jain ey jin ecꞌ je nan je xol tinaniꞌ, niꞌanxane wal tiempo ey jin ecꞌoj. Caw che waꞌne je bꞌeybꞌal, yajbꞌan tol ey jin to ecꞌ jayebꞌoj xa cꞌual je yetoj. Ta cꞌamaj, oj somcha el je cꞌul. Jaxca junoj mactxequel chi bꞌey xol kꞌejkꞌinal, cꞌam chi skeꞌ yilon bꞌey chi toi, queytuꞌ oj yun je yeloc apnoj. 36Jain tiꞌ, laan jin jaxca sajkꞌinal an. Yu jun tuꞌ, yuxan awej oc je cꞌul win an, yajbꞌan tol ey jin to ecꞌ je yetoj, catuꞌ chi wakꞌon sajkꞌinal bꞌey je pixan yin junelne, ẍi Jesús tet ebꞌ. Jix lawi cꞌal yalon wan tiꞌ, catuꞌ jix eli. Jix yewbꞌa el sbꞌa tet ebꞌ.
Ma Yaoc Scꞌul Ebꞌ Israel Yin Jesús
37Caxcꞌal ecꞌal milagro jix xꞌox Jesús tet ebꞌ, toj wal yu jun tuꞌ chi yaoc scꞌul ebꞌ yin Naj. 38Queyton tuꞌ jix yun yeloc tzet albꞌilcan yu naj Isaías, ẍejabꞌ Dios, yet jix yalon can jaxca tiꞌ:
Mamin, ¿mac wal junoj jix yaoc yin scꞌul tzet jix kalaꞌ? Caxcꞌal jix ja txꞌox ja wipal tet ebꞌ, cꞌam pax ebꞌ jix yaoc scꞌul ja win, ẍi can Isaías tuꞌ yul An Juun Tzꞌibꞌebꞌilcanoj.#Isaías 53:1.
39Yuxan ma cꞌaltaꞌ skeꞌ yaon oc ebꞌ yin scꞌul. Ilaꞌ, tol albꞌil pax yu naj Isaías junelxa jaxca tiꞌ:
40Jaꞌ Dios, jaxca tol jaꞌ chi majchen sat ebꞌ, chi akꞌon cawxo snaꞌbꞌal ebꞌ, yet watxꞌ jaxca tol cꞌam chi ilwi ebꞌ, catuꞌ cꞌam chi naꞌcha el yu ebꞌ, yet watxꞌ cꞌamxa chi skeꞌ sqꞌuexon snaꞌbꞌal ebꞌ.
Yu jun tuꞌ, jaꞌ Dios, ma yakꞌ lawoj spenail ebꞌ, ẍi Isaías tuꞌ.#Isaías 6:10.
41Yalnaj can naj Isaías wan tiꞌ, yutol yilnaj swatxꞌil Jesús, yuxan jaꞌton skꞌaneal tiꞌ albꞌilcan yul An Juun Tzꞌibꞌebꞌilcanoj. 42Caxcꞌal albꞌilcan jaxca tuꞌ, ey pax ebꞌ Israel tuꞌ jix yaoc scꞌul yin Jesús. Man asanne oj ebꞌ comon ánima, ey pax ebꞌ yaaw, ecꞌal ebꞌ jix yaoc yin scꞌul. Asan tol cꞌam chi xꞌoxel sbꞌa ebꞌ, yutol chi xiw ebꞌ tet ebꞌ Fariseo, yutol tala chi ujtele eltej ebꞌ yul snail sculto ebꞌ yu ebꞌ. 43Jix yute sbꞌa ebꞌ jaxca tuꞌ, yutol chi yoche ebꞌ tol miman yeloc apnoj ebꞌ yul sat ánima. Cꞌam chi snaꞌ ebꞌ ta tol ey yeloc apnoj ebꞌ yul sat Dios.
Jaꞌ Skꞌane Jesús Oj Naꞌon Oc Yin ebꞌ Ánima
44Jaꞌ Naj Jesús, yin ipal jix kꞌanabꞌ eltej xol ánima jaxca tiꞌ:
—Jaꞌ ebꞌ chi yaoc scꞌul win an, man asanne oj win chi yaoc scꞌul ebꞌ. Chi ya pax oc scꞌul ebꞌ yin jin Mam jix jin chejontej. 45Jaꞌ ebꞌ chin aon oc yin scꞌul, lalan pax yaon oc jun mac jix jin chejontej ebꞌ yin scꞌul. 46Jain tiꞌ, jix jin jul yu wakꞌon sajkꞌinal yin spixan ebꞌ ánima yul yibꞌankꞌinal tiꞌ, yet watxꞌ jaꞌ ebꞌ chi yaoc scꞌul win an, cꞌamxa kꞌejkꞌinal yin spixan ebꞌ. 47Jaꞌ ebꞌ chi abꞌen jin kꞌane, ta cꞌam chi sjije ebꞌ, man jain oj, oj waoc syaꞌilal ebꞌ. Yutol man yu oj waon oc syaꞌilal ánima, yuxan jix jin jul yul yibꞌankꞌinal tiꞌ. Jix jin jul yu jin colon el ebꞌ, yuxan jix jin jul an. 48Jaꞌ ebꞌ cꞌam weloc apnoj yul sat, ebꞌ cꞌam chi sjije jin kꞌane, eyxa jun tujan oj aon oc syaꞌilal ebꞌ, jaꞌton jin kꞌane chi wal tiꞌ an. Jaꞌ jin kꞌane tiꞌ, oj aon oc syaꞌilal ebꞌ yet slawubꞌ cꞌual. 49Yutol man yul oj wet chin kꞌanabꞌ jin txꞌojli. Jaꞌ jin Mam, jun jix jin chejontej, jaꞌ chi akꞌon ẍejbꞌanil ey jin tzet chi wal an. 50Wotaj an, yu ẍejbꞌanil tuꞌ, chi skeꞌ ẍaꞌon can skꞌinal ebꞌ tol ey cꞌal yin tobꞌalkꞌinal ta chi yaoc ebꞌ yin scꞌul. Yu jun tuꞌ, jaxca jix yun yalon jin Mam ey jin an, queytuꞌ chi wute walon pax an, ẍi Jesús.
Currently Selected:
Juan 12: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.