Colosenses 1
1
Yichbꞌanil Scarta Naj Pablo
1-2Jaꞌ tinaniꞌ xin, jain Pablo tiꞌ, ẍejabꞌ Jesucristo jin an, yutol jaxca tuꞌ jix el yin scꞌul Dios. Eyecꞌ kuẍtaj Timoteo wetoj titiꞌ an. Chi katoj scawil je cꞌul, jex yet jex xa Dios bꞌey conobꞌ Colosas ketoj. Chin tzꞌibꞌetoj jun jin carta tiꞌ ey jex, jex wuẍtaj, jex wanabꞌ yin Cristo sicꞌlebꞌil. Chi woche chi xꞌox swatxꞌcꞌulal cu Mam Dios ey jex, catuꞌ ey pax watxꞌcꞌulal snan je xol.
Jix Txali Naj Pablo Yu Ebꞌ Creyente
3Jaꞌ yet chi cu txali junjuntaj el je yu, chi kalon yu diosalil tet Dios, Naj smam Naj Kaawil Jesucristo. 4Yutol jix kabꞌe, tol che yaoc je cꞌul yin Cristo, catuꞌ ey pax je camcꞌulal yin masanil ebꞌ yet xa Dios ketoj. 5Che yun jaxca tuꞌ yutol lalan je yechbꞌanen je tzetyetal cꞌubꞌabꞌilxa ecꞌ yu Dios bꞌey satcan. Jix je yabꞌ yu jun tuꞌ yet jix je yabꞌen jun skꞌaneal yet colbꞌanile caw yel. 6Jaꞌ jun skꞌaneal yet colbꞌanile albꞌilxa je yabꞌ tuꞌ, lalan yal-le el bꞌey junjun conobꞌ bꞌey yul yibꞌankꞌinal tiꞌ. Jaꞌ yu jun kꞌane tuꞌ, yuxan watxꞌ chi eloc ebꞌ chi abꞌeni, catuꞌ chi chꞌibꞌ sbꞌisil ebꞌ chi yaoc scꞌul yin skꞌane Dios. Quey pax tuꞌ lalan yunen je xol tituꞌ, yet tax jix bꞌabꞌi je yabꞌen skꞌaneal swatxꞌcꞌulal Dios, catuꞌ jix naꞌcha el je yu sicꞌlebꞌil. 7Jaꞌ naj Epafras, jix jex cuyon yin jun skꞌaneal tiꞌ. Jaꞌ naj Epafras tuꞌ, caw camcꞌulnebꞌil ku. Jaꞌ naj chi akꞌon servil Cristo ketoj. Jijem cꞌal chi yute sbꞌa yin yakꞌon servil Cristo ketoj cꞌal je yu. 8Jaꞌ jix alon ey jon, tzet utbꞌil tol caw ey je camcꞌulal yu Yespíritu Dios yin ebꞌ yet xa Dios. 9Yuxan, jaꞌ yet tax jix kabꞌen je kꞌaneal, cꞌam cꞌal chi cu bꞌej cu txali je yu. Chi cu kꞌan tet Dios je yu, tzet utbꞌil tol oj naꞌcha el sicꞌlebꞌil je yu tzet chi yoche Dios che yunne, cꞌal tzet utbꞌil tol chi akꞌle je jelanil yu Yespíritu, catuꞌ yu Naj, yuxan chi naꞌcha el je yu tzet chi yoche Dios je yin. 10Ta chex eloc jaxca chi yun cu kꞌanon tet Dios tuꞌ, watxꞌ oj je yute je bꞌeybꞌal, jaxca smoo chi el kuneni, jaon yet jon xa Naj Kaawil, yet watxꞌ caw chi tzala Naj je yetoj. Caw watxꞌ oj el je yuneni, jaxca junoj teꞌ teꞌ watxꞌ satni, catuꞌ oj chꞌibꞌ je naꞌbꞌal yin yet Dios. 11Chi cu txali pax je yu, yet watxꞌ chi yakꞌ Dios yipalil ey jex. Caw miman yipal Dios. Ta jaxca tuꞌ, oj techa masanil tzettaj yetal je yu, catuꞌ oj jex tzalabꞌoj yet chi techa wan tuꞌ je yu. 12Catuꞌ che yalon yu diosalil tet cu Mam Dios, yutol jaꞌ jix waꞌnen oc cu naꞌbꞌal, yet watxꞌ ey kalon ket yetoj masanil ebꞌ eyxa yalon yet ẍaꞌon tzet oj yakꞌ Dios, jun eyoc yin sajkꞌinal.
Watxꞌ Xa Keoc Yetoj Dios Tinaniꞌ
13Jaꞌ cu Mam Dios jix cu colon el yul skꞌabꞌ kꞌejkꞌinal, catuꞌ jix cu yiꞌon oc yul skꞌabꞌ Scꞌaal, Naj camcꞌulnebꞌil yu. 14Jaꞌ Naj Scꞌaal jix cu colon can el yetoj ẍiqꞌuil. Chi yal yeloc apnoj, tol Dios jix yakꞌ mimancꞌulal yu cu penail. 15Caxcꞌal cꞌam chi skeꞌ kilon oc yin cu Mam Dios, jaꞌ Scꞌaal Dios tiꞌ, chi txꞌoxon Dios ey jon, tzet utbꞌil yei, yutol laan yetoj. Jaꞌ Scꞌaal tuꞌ, yel miman yeloc apnoj Naj yintaj masanil tzettaj yetal waꞌnebꞌil yu. 16Yutol jaꞌ jix akꞌbꞌalnele yu Dios yet jix waꞌxi masanil tzettaj yetal bꞌey satcan, yetoj tzettaj yetal sat txꞌotxꞌ tiꞌ. Wan tzettaj yetal chi skeꞌ kiloni, cꞌal wan tzettaj yetal cꞌam chi skeꞌ kiloni. Jacꞌal ton Naj jix waꞌnen masanil. Cꞌal yetoj masanil wan cꞌam chi kiloc yin ey yopiso, ebꞌ eyoc yaawilal, ebꞌ ey yipalil. Caxcꞌal cꞌam chi skeꞌ kilon oc yin ebꞌ, jaꞌ Naj Scꞌaal jix waꞌnen pax ebꞌ yu yakꞌle servil Naj yu ebꞌ. 17Jaꞌ yet cꞌamto jun yul yibꞌankꞌinal tiꞌ, cꞌal satcan, eyxa cꞌaltaꞌ Cristo. Yu Naj, yuxan watxꞌ yecꞌ masanil tzettaj yetal. 18Jolome yeoc Naj yibꞌan iglesia,* jal jaon iglesia jon tiꞌ, jaxca tol smimanil Naj kei. Jaꞌ Naj chi akꞌon cu kꞌinal yet watxꞌ miman yeloc apnoj Naj yintaj masanil. Jaꞌ Naj bꞌabꞌel pitzcꞌunaj a xol ebꞌ camnaj. 19Caw tzꞌajaji yeoc Dios yin Cristo sicꞌlebꞌil, yutol jaxca tuꞌ chi yoche. 20Chi yoche pax Dios, tol junxane chi yun can el masanil tzetyetal yetoj yu Cristo. Tzetyetal ey satcan, cꞌal tzetyetal ey bꞌey yul yibꞌankꞌinal tiꞌ. Chi yal yeloc apnoj, tol yu Naj Scꞌaal ey watxꞌcꞌulal snan cu xol yetoj Dios. Yu chi yun jun tuꞌ, yuxan jix cam Cristo yin teꞌ culus. Jix el ẍiqꞌuil Naj. 21Jaꞌ yet yalantoj, naat ey jon el yin Dios, caw acꞌul jon oc yin. Yutol pena kutenaj cu naꞌbꞌal yul sat, catuꞌ cꞌam swatxꞌil cu bꞌeybꞌal yet tuꞌ. 22Jal tinaniꞌ xin, ey watxꞌcꞌulal snan cu xol yetoj Dios, yutol jix cam Cristo yetoj smimanil. Jaxca tuꞌ jix yunne, yet watxꞌ chi cu oc yetoj, yet watxꞌ cꞌam niꞌoj cu penail, cꞌal cu cꞌam watxꞌilal yul sat yet chi cu yakꞌon Cristo tet Dios. 23Oj yun Cristo jaxca tuꞌ, ta yin tobꞌalkꞌinal chi kaoc yin cu cꞌul jun skꞌaneal yet colbꞌanile. Sowalil caw tecꞌan che yute je naꞌbꞌal. Manche je bꞌej je yaon oc je cꞌul yin jun skꞌaneal yet colbꞌanile je yabꞌnaj xa.
Lalan Smulna Naj Pablo Xol Ebꞌ Yet Creyenteal
Jaꞌ jun skꞌaneal yet colbꞌanile tiꞌ, lalan yal-le el bꞌey masanil yul yibꞌankꞌinal tiꞌ. Jain Pablo jin tiꞌ, lalan walon pax el an. 24Jaꞌ tinaniꞌ, lalan wilon syaꞌil yu je watxꞌiloj. Caw chin tzalai, yutol jaꞌ yet chi wabꞌen syaꞌil yin jin mimanil tiꞌ, lalan jin tzꞌajtzen wan jix yal can Cristo tol oj wabꞌ yu yiglesia. Jaꞌ jun iglesia tuꞌ, jaxca tol smimanil Cristo. 25Jix jin ale oc yakꞌomaloj servil ebꞌ wet creyenteal, yutol jix yakꞌ Dios jun wopiso tiꞌ, yu chin colwa je yin, yet watxꞌ chi yabꞌ masanil ánima skꞌaneal, jun jix xꞌoxel Dios. 26Jaꞌ yet cꞌamto jun yul yibꞌankꞌinal tiꞌ, ewan cꞌuan yeoc jun skꞌaneal tiꞌ yu Dios. Jal pax tinaniꞌ, jix yakꞌ kotajne el jaon yet jon xa tiꞌ. 27Yutol jix el yin scꞌul Dios yakꞌon kotajnen eloj. Caw miman yeloc apnoj cꞌal miman swatxꞌilal jun tzetyetal ey tet masanil ebꞌ ánima. Jaꞌ jun cꞌam mac otajnen yet yalantoj, jaꞌton jun tiꞌ, chi yoche chi kotajne eloj, tol eyxa oc Cristo yin cu pixan junjun jon. Yu Cristo, yuxan chi kaoc yipoj cu cꞌul, tol oj tzꞌajna cu watxꞌil jaxca swatxꞌil Dios. 28Jaon tiꞌ, jaꞌton skꞌaneal Cristo chi kaleloj. Chi cu tenchane ebꞌ ánima, catuꞌ chi cu cuyon pax can junjun ebꞌ yetoj jantaj sjelanil Dios chi yakꞌ ey jon, yutol chi koche tol caw chi tecꞌanbꞌi snaꞌbꞌal junjun ebꞌ eyoc yul skꞌabꞌ Cristo. 29Yu wan tiꞌ, yuxan caw chin mulna yetoj yipal Cristo chi yakꞌ ey jin an, yu chi oc masanil ebꞌ yin stecꞌanil sattaj Dios.
Currently Selected:
Colosenses 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.