Wiripu 1
1
Haga Wẽtup 1
Kuekatu Pauru Tipoꞌoro Tawa Wiripi Piaria Pe
1Uiwyriaꞌin tawa Wiripu piaria mesup atipoꞌoro miwan ehewowi. Uito ti Pauru iꞌewyte uhaꞌyru Timoteu toineꞌen mesuwe uiwywo. Miꞌi kuekatu toꞌe hap ipoꞌoro wy. Uruto ti Tupana mipoꞌoro Aipotypot koro Iesui eropat haria sese uruto. Mesuwat einapin hamuat hap atipoꞌoro ehewowi yne Tupana mepytꞌin tawa Wiripu piaria muꞌe hamo. Iꞌewyte eiꞌakag koꞌi kape iꞌewyte aiꞌapykok haria kape yne Aipotypot Iesui mohey haria kape atipoꞌoro mesuwat uimiwan are. 2Pyno meiũpepyi uruhẽtup Tupana pe ehewowi -Uruꞌywot etum o Esaꞌyru mohey haria pe tawa Wiripu totiaria pe woꞌokyꞌe hap iꞌewyte woꞌowese hap urukaꞌiwat urupotypot Iesui motypot hamuat hap uruhẽtup. Etiꞌatupoityro miꞌiria egyiꞌat hamo urutoꞌe. 3Tupana karãpe arewanetup aiwyriaꞌin tawa Wiripu piaria kape miꞌi hawyi uimowepiit kahato. Arehum ewowi are Tupana pe ehewowi are. 4Pywo uiwyriaꞌin karãpe ahẽtup Tupana pe eipoityro hamuat hap miꞌi turan uiwepiit kahato hap wywo ahẽtup ehupi are. 5Katupono uimowepiit kahato eipe katupono saꞌawyꞌi mesup te uipowyro kahato haria eipe. Miꞌi pote arehum kahato Tupana kape ehupi katupono Tupana potpap nug hap uiatnuat powyro haria eipe. 6Saꞌawyꞌi watomohey Iesui hawyi Tupana miehakyeraꞌat hanuaria watopyhuꞌat. Tohaꞌawynug ahehakyeraꞌat hap hawyi yt aiꞌatoiat hin i e. Yne eꞌat pe haꞌawytepyi mesup te mukiꞌite ahehakyeraꞌat kuap hat Iesui topyhuꞌat. Poꞌog poꞌog yne eꞌat pe aimoesaika kahato tewaku hap nug hamo. Ahehakyeraꞌat kahato haꞌawyte mesup te Haꞌyru taꞌaipok Aipotypot no hap kape mesuwat yi kape taꞌaipok hap kape ahehakyeraꞌat hamuat wuatꞌi eꞌat piat hap kape. Yt uheso hin i are. Topyhuꞌat kahato aipyꞌa pe Iesui wuatꞌi eꞌat pe. Ipotpap kahato aiwanetup hawe aimoewaku kahato hamo. Yne eꞌat pe miꞌi hap koꞌi wyti waku watomohey e.
7Uiwanetup hawe iꞌewyte uipyꞌa pe waku kahato eipe. Waku miꞌi tã areꞌe katupono uikai kahato eipe Iesui potpap nug haria uito ewy eipe pote are. Eweimohey kahato Iesui ehay uito ewy pote uiwanetup hawe waku kahato eipe are. Karãpe iraniaꞌin tiꞌatumohit eipe Iesui ehay moherep ehepiat pote yt eiwemoti hin i. Yt eiwepyk hin i iꞌatumikyryꞌi kahato pykai maꞌato poꞌog eweiꞌatumuꞌe. -Waku watomohey Iesui ehay pakup waku watoꞌe ahewanikaptia pe yt kat i aiwemoti hap wywo are. Waku watiꞌatumuꞌe miitꞌin katupono Tupana aiꞌairo tehay moherep hamo. -Tupana urunug ehay Esaꞌyru etiat moherep haria areꞌe aat kaꞌap Tupana pe. Saꞌawyꞌi Tupana ahytpok kahato tehay wakuat Iesui etiat hytpok hamo miitꞌin me. Maꞌato koran uipyhik taꞌyn suraraꞌin woꞌopyhyp hawe maꞌato miꞌi pykai ahytpok te sehay wakuat Iesui etiat meiũpe woꞌopyhik hawe.
8Worohoꞌokyꞌe kahato eipe. Tupana tikuap yt uheso i hap. Aikotã aikotã Aipotypot Iesui eikyꞌe hap ewy uito worohoꞌokyꞌe haty uipyꞌa piat wywo worohoꞌokyꞌe. 9Miꞌi tã areꞌe Tupana pe -Uruꞌywot etum no esaika hap emohey haria pe tawa Wiripu piaria pe iꞌatuwoꞌokyꞌe hamuat hap poꞌog poꞌog yne eꞌat pe areꞌe Tupana pe ehupi. Atikyꞌesat yne miꞌiria ehay yne pywuat kuap haria wo hap poꞌog poꞌog saꞌawyꞌi wuat kai. Taꞌi atikyꞌesat kahato miꞌiria ikuap kat som waku kat som yt naku i hap kuap hamo ewanetup hap oktan. 10Etum iꞌatuepe esaika hap poꞌog wakuat airo hamo. Miꞌi tã etunug pote eꞌewy tukupteꞌen yt kat i saꞌag nug hap iꞌatukai. Miꞌi tupono Esaꞌyru taꞌaipok Morekuat no mesuwat yi kape turan uwe waku uwe yt e hamo Wiripu piaria emohey haria yt teꞌeruwemoti hin i miꞌi hap eꞌat pe. 11Tupana etunug o miꞌiria waku nug hanuaria wo are. Etunug miꞌiria iꞌatuieineꞌen hap tote wakuat eiam mo kahato are. Atikyꞌesat miꞌiria aikotã Esaꞌyru Iesui ewaku hap ewy tukupteꞌen. Ewaku hap ewywuat wo etiꞌatunug miꞌiria. Tupana miꞌi etunug mote emotypot haria wo kahato tukupteꞌen miꞌiria are. Waku kahato En iꞌatuꞌe aru ewowi iraniaꞌin areꞌe Tupana pe. Pyno mio tã ahẽtup mesuwe ehetiatno Tupana pe.
12Uheꞌywytꞌin uheinytꞌin atikyꞌesat eweikuap uhetiat morekuat uipyhik taꞌyn woꞌopyhik hawe areineꞌen maꞌato miꞌi pykai sehay wakuat Iesui etiat yt taꞌatupyhyp hin i. Yt taꞌatupyhyp kuap i ihay maꞌato uipyhik hawe areineꞌen pote poꞌog ikuap haria teꞌeropyhuꞌat. 13Miꞌi pote koitywy morekuat esurara sem iꞌyat wato piaria sehay Iesui etiat kuap haria wo raꞌyn tukupteꞌen. Iꞌewyte iraniaꞌin mesuwarote woꞌopyhyp haria uikuap taꞌyn. -Taꞌi Pauru morekuat tipyhyp taꞌyn katupono Iesui tutunug Toporekuat no iꞌatuꞌe. 14Miꞌi hawyi iraniaꞌin Iesui mohey haria yt teꞌerokenꞌẽ hin i aikotã saꞌawyꞌi wuat ewy. -Pauru toineꞌen woꞌopyhik hawe iꞌewyte aito waku watoineꞌen iꞌewywuat iꞌatuꞌe. Miꞌi hawyi yt teꞌeruwemoti hin i Aikaꞌiwat Iesui ehay moherep hamo. Poꞌog poꞌog hesaika rakaria tukupteꞌen mio imohey haria wo poꞌog poꞌog saꞌawyꞌi wuat kai. Iꞌatuehay pirik -Iesui ti Morekuat iꞌatuꞌe yt uwe pupi i teꞌerokenꞌẽ taꞌatuhenoi. 15Taꞌatumoherep kahato taꞌatuehay wo Aipotypot etiat. Iraniaꞌin Tupana mohey hap kaipyi iꞌewyte uikyꞌe pote taꞌatumuꞌe miitꞌin poꞌog saꞌawyꞌi wuat kai. Iraniaꞌin ihayꞌywyi uhetiat pote taꞌatuꞌatumuꞌe miitꞌin poꞌog saꞌawyꞌi wuat kai. Iraniaꞌin yt uikyꞌe i pote uimohit teran taꞌatuehay wo. Miꞌi hawyi taꞌatukyꞌesat miitꞌin muꞌe hap poꞌog uikawiat hap. 16Maꞌato iꞌatu kahato uikyꞌe haria. Miꞌiria tikuap taꞌyn Tupana miꞌairo uito hap. Taꞌatukuap Tupana uipoꞌoro tehay wakuat moheg miitꞌin wanetup hawiat miitꞌin pya piat tehay pywuat kuap hamo. Miꞌi pote uikyꞌe haria miꞌiria. 17Maꞌato toĩ iraniaꞌin taꞌatumoherep sehay wakuat Iesui etiat wen maꞌato yt kat i Iesui kyꞌe hap iꞌatuete. Iꞌatuehay se kahato wen maꞌato teꞌeruwemowato hap yn taꞌatukat taꞌatuwanetup hawe. Yt Iesui motypot haria hin i miꞌiria taꞌatupyꞌa pe. Miꞌi tã watunug mote meiũran Pauru emiitꞌin yt uwe i iꞌatuꞌe raꞌyn taꞌatuwanetup hawe. Pauru mimuꞌeria yne aipo pe hawyi haty kahato topyhuꞌat Pauru ete woꞌopyhik hawe teꞌeroꞌe taꞌatuwanetup hawe uimohit reran haype. Miꞌi pote Iesui ete taꞌatumuꞌe miitꞌin taꞌatuehay se wywo uipohari teran haype. 18Karãpe taꞌatumoherep Iesui Aiporekuat nuat yt taꞌatumohey i pykai miꞌi hawyi uimowepiit kahato hap toineꞌen katupono iꞌatuehay kaipyi miitꞌin Iesui kuap haria tukupteꞌen. Pyno yt arewanetup hin i sio miꞌiria Iesui kyꞌe hap mywo taꞌatumuꞌe miitꞌin sio teꞌeruwemowato hap mywo taꞌatumuꞌe miitꞌin. Yt atikuap i kat hamo miitꞌin taꞌatuꞌatumuꞌe maꞌato miitꞌin taꞌatumuꞌe Iesui etiat hap pote uimowepiit hap topyhuꞌat yt atikuap pykai i kan hamo taꞌatumuꞌe hap are.
19Pyno waku ewehẽtup o aheTupana kape -Etihep o Pauru woꞌopyhik hap wyi eweiꞌe o are. Mio tã eweiꞌe pote atikuap arẽtem aru mesuwepyi morekuaria woꞌopyhik hap kaipyi are. Taꞌi atikuap aru Aipotypot Iesui tipoꞌoro Topaꞌãu uihep mesuwepyi hamo uiꞌapypok hamo are. 20Yt karãpe i atoiat teran Aikaꞌiwat potpap nug hap uhepiat uipotpap nug hap. Uikuꞌuro hap kape Tupana mowepiit hap yn uiwanetup hap yne eꞌat pe atikyꞌesat. Iꞌewyte mesuwe uipyhik hawe atimotypot teran Tupana maꞌato poꞌog mesuwe atikyꞌesat iraniaꞌin kai. Yt kat i uiwemoti hap atikyꞌesat maꞌato areineꞌen neran miitꞌin pupiat yt uikenꞌẽ i hap wywo. Atimotypot teran Aipotypot mesuwe. Aipotypot Iesui motypot hatno areineꞌen neran uipyꞌa pyi uiwanetup hap kaipyi uhehay kaipyi. Yne uiminug koꞌi kaipyi atikyꞌesat imotypot hap uheineꞌen hap turan. Iꞌewyte uikuꞌuro turan imotypot hatno areineꞌen neran are. 21Pyno ahenoi ehepe kat hamo areineꞌen mesuwat yi tote. Aipotypot Iesui motypot hamo yn areineꞌen uito. Miꞌi eropat hamo yn areineꞌen. Uikuꞌuro hawyi poꞌog atikuap Iesui mesuwarotiat kai. Miꞌi tupono waku poꞌog areineꞌen uikuꞌuro hawyi. 22Miꞌi pote atiꞌairo teran uikuꞌuro hap. Miꞌi hawyi areto Iesui kape kat pote areineꞌen neran iwywo maꞌato miꞌi pykai yt worohoꞌoꞌatoiat reran i eipe katupono uikuꞌuro hawyi yt uwe i uito mesuwe eimuꞌe hanuat yt naku i. Miꞌi pote yt areto teran i. Poꞌog waku areineꞌen motꞌi mesuwarote miitꞌin miat Iesui etiat muꞌe hamo are. 23Maꞌato areto teran Aipotypot kape atipy kape. Atoiat reran uheineꞌen hap mesuwe katupono poꞌog waku itote. Pyno poꞌog waku uikuꞌuro are maꞌato -Miꞌi e hap yt ereꞌe i mio tã e. Waĩꞌe uiwanetup hawe areꞌe. 24Poꞌog waku ereineꞌen mesuwe e uiwanetup hawe. Waku poꞌog ereineꞌen Iesui mohey haria powyro hamo e uiwanetup hap. Ereineꞌen no mesuwat yi tote e uhepe. 25Pyno areineꞌen hap atikuap taꞌyn. Arepyhuꞌat eipyꞌasetpiat hamo eimotag hamo imohey hap etiat eimowepiit hamo are. Miꞌi hamo arepyhuꞌat mesuwat yi tote eipyꞌasetpe. 26Meiũran aru areineꞌen eiwywo i raꞌyn. Miꞌi hap eꞌat pe ti aru waku pe watoineꞌen. Miꞌi hap eꞌat pe aru areineꞌen eipyꞌasetpe. Miꞌi hap eꞌat pe ti aru watuwehum kahato Aipotypot Iesui ete tutunug muap ehewowi hawyi are.
Waku Aiwoꞌokyꞌe Hap Wywo Wahenoi Tupana Ehay
27Karãpe watimoherep sehay wakuat Aipotypot etiat miitꞌin me miꞌi turan waku aiweꞌeg wo o aikotã aikotã watoineꞌen iꞌatupyꞌasetpiat turan. Waku iweꞌeg kahato rakaria ewy watoineꞌen. Yt naku i watiꞌatumuꞌe miitꞌin yt naku i nug haria aito pote. Aimimuꞌeria yt tikyꞌesat i ahehay Iesui etiat taꞌatupuẽti yt naku i nug haria aito pote. Yt teke i iꞌatuewaure kaꞌa pe wakuat Iesui etiat aheineꞌen hap yt ikahu i pote are. Atikyꞌesat kahato wakuaria wo o eweikupteꞌen sio areineꞌen eipyꞌasetpe sio yt. Waku eweikupteꞌen wakuat nug haria wo o itote yt uiwywuat pykai i. Miꞌi hawyi yt areineꞌen i eipyꞌasetpe pykai sehay wakuat atikuap aru iraniaꞌin wẽ pyi ehetiat eiminug koꞌi piat hap wyti aru hap atikuap. -Taꞌi yt taꞌatuꞌatoiat hin i te Iesui mohey hap iꞌatuꞌe aru uhepe. Toꞌoꞌewyꞌewy wẽtup miit piit ewy iꞌatupotpap e hap aru atikuap wy ehetiat. Taꞌi suraraꞌin ewy tuꞌuka kahato saꞌag ete e hap aru atikuap wy. Iꞌewyte taꞌatukyꞌesat yne miitꞌin Iesui ehay wakuat mohey haria iꞌatuꞌe aru uhepe meiũpe yt heremo i areineꞌen eipyꞌasetpe pykai are. 28Yt erahaꞌat teiꞌo yi kape ewanikaptia pupi. Eweikupteꞌen wanikaptia pyꞌasetpe pote surara ewywuat ereineꞌen yt kat i eha yi kape. Miꞌi hawyi meremo taꞌatukuap -Taꞌi miꞌiria ti Tupana mowato haria iꞌatuꞌe. Miꞌiria poꞌog urukai iꞌatuꞌe taꞌatuwanetup hawe teꞌerokenꞌẽ haype. Iꞌewyte eipe ti eweikuap taꞌyn Tupana toineꞌen eiwywo eipowyro hamo. Eweikuap taꞌyn Iesui ehehakyeraꞌat hat sese topyhuꞌat.
29Are paĩ waku kahato Tupana ainug Tosaꞌyru mohey hatno. Waku kahato are. Waku wy Aipotypot Iesui eropat hamo are. Iꞌewyte waku wahoꞌopot miitꞌin mikyryꞌi hap ete imohey hat aito pote. 30Pyno ahoꞌopot kahato mesuwe woꞌopyhik hawe aikotã surara tuꞌuka hap turan ewy. Pyno eweikupteꞌen o uiꞌewy ahiag wuꞌuka hap surara ewywuat eiwuꞌuka kahato itote ahiag akit hamuat tawa Wiripu tote aikotã eweiꞌakasa uito hap ewy. Aikotã saꞌawyꞌi wuat hap ewy miꞌi hap ewy waku eweikupteꞌen uhaipepiaria eweikupteꞌen surara ewywuat. Yt atoiat hin i te mesuwe ahiag wywuat wuꞌuka hap. Areineꞌen woꞌopyhyp hawe pykai atuuka atuuka te. Taꞌi miꞌi hap eweikuap taꞌyn kat pote yne ikuap are.
Currently Selected:
Wiripu 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.