Iuwãu 10
10
Haga 10
1Miꞌi hawyi Iesui tiꞌatumuꞌe kahato hãꞌãkap wuo -Pywo pe ti areꞌe ehepe seroꞌok e hat ti aihũ Uweiria yat pe yt teke kuap i heꞌokenꞌypy sese puo maꞌato kokawiat iꞌahotꞌe hawuo yn teke kuap seroꞌok e hat e. 2Maꞌato ikaꞌiwat sese teke teꞌokenꞌypy sese puo e. 3Karãpe ikaꞌiwat hoꞌokenhypꞌok teran naꞌyn hawyi tuut tohũria yat eꞌokenꞌypy kape miꞌi ti ihũria tikuap yt seroꞌok e hat i hap. Miꞌi hawyi tohoꞌokenhypꞌok e. Miꞌi hawyi ikaꞌiwat tiꞌatukay kay towat tohũria iꞌatuwat iꞌatuset upi e. Miꞌi hawyi ihũria tikuap taꞌatukaꞌiwat ehay ihay ete. Miꞌi hawyi toimoherep muap hãpyk kahato tohũria yat kaipyi e. 4Toiporenoꞌẽ yne hawyi ihũria ikohyewyry taꞌatukaꞌiwat ewatꞌypmo kat pote taꞌatukuap taꞌatukaꞌiwat ihay ete e. 5Maꞌato wẽtup ok yt Uweiria apykok hat i ehay pupi teꞌerokenꞌẽ pote ikohyeput neꞌi yt taꞌatukuap i ihay pote e Iesui woꞌonapin haria pe. 6Maꞌato wanetup haria yt tikuap i kat e Iesui ihay sehay iãꞌãkap wuo pote toꞌe i raꞌyn Iesui iꞌatuepe. 7-Pywo pe ti Uito ti okenꞌypy ewy Uweiria uimohey haria wehytꞌok hamo e. 8Iraniaꞌin ti uimohey haria kay kay haria uihũria eroꞌok haria ewy tukupteꞌen e maꞌato uihũria yt taꞌatukuap i seroꞌok e haria ehay iꞌatuehay ete taꞌatukay kay hap e. Yt teꞌeruwanetup seroꞌok e haria ehay kape e. 9Uito ti okenꞌypy ewywuat miꞌi tupono uwe uwe uimohey miꞌi hat tipuẽti aru tehakyeraꞌat hap sese are aikotã hũria apykok hat hoꞌokenhypꞌok mekewat hũria yat iꞌatuporenotem hamo iꞌatupoi hamo. Miꞌi hawyi wãtym i turan toiꞌatunug i raꞌyn iꞌatuꞌyat pe e. Miꞌi hap ewywuat uihũria uimohey haria apykok hat kahato areineꞌen e. 10Maꞌato seroꞌok e hat wyti tuut hũria u hamo iꞌatuꞌauka hamo heꞌeroꞌok hamo e. Maꞌato Uito ti ariot uimohey haria ieineꞌen hap ium hamo poꞌog poꞌog ikahu saꞌawyꞌi te wuat kawiat ium hamo e. 11Uito areineꞌen uimohey haria apykok hat. Uito atiꞌatuꞌapykok kahato uihũria iꞌatukyꞌe haype e. Miꞌi pote uiꞌauka hamuat iꞌatuehakyeraꞌat hamo. 12Maꞌato wẽtup ok hũria apykok hat ti tokenꞌẽ wewuatꞌi Awahuru koꞌi pupi yt ikaꞌiwat sese i pote yt towatnuat sese i hũria pote yt toiꞌatukyꞌe i haꞌup kyewi yn ipotpap pote teput neꞌi Awahuru koꞌi õꞌẽ pote. Miꞌi hawyi Awahuru tiꞌatusytpok kahato raꞌyn Uweiria e. 13Pyno haꞌup kyewiat neꞌi tokaꞌiwat hũria apykok hat ipoityꞌi hawyi tohokꞌiwat neꞌi tokaꞌiwat hũria. Miꞌi hawyi Awahuru koꞌi tiꞌatuuka kahato raꞌyn taꞌatusytpok taꞌyn maꞌato haꞌup kyꞌesat hat potiat ipotpap takat pote yt ikyꞌe sese neꞌi tokaꞌiwat hũria miꞌi pote teput neꞌi are e. 14Maꞌato ti Uito hũria apykok hat wakuat sese areineꞌen. Uihũria uimohey haria uikuap kahato haria wo tukupteꞌen e. 15Aikotã Uiꞌywot uikuap kahato hat toineꞌen. Iꞌewyte Uito Uiꞌywot kuap hat areineꞌen. Miꞌi hap ewy uihũria kyꞌe kahato hat areineꞌen pote uiꞌauka hamuat iꞌatuehakyeraꞌat hamo e. 16Yt torannia i te uihũria uimohey haria wo meiũwat ywania kaipyi paĩ maꞌato iꞌewyte atiꞌatukay kay aru miꞌiria uimohey hanuaria wo wẽtup ywania kaipyi e. Miꞌiria aru toꞌowywo tukupteꞌen katupono uimohey haria wẽtup sok yn iꞌatuꞌywania pykai e. Miꞌi hawyi wẽtup ok yn iꞌatuꞌapykok hat topyhuꞌat mekewat eꞌat pe miꞌi ti Uito e.
17Uikuꞌuro hamuat wyti uimohey haria uihũria ehakyeraꞌat hamo e. Miꞌi tupono Uiꞌywot uikyꞌe kahato e. Miꞌi tã atunug hawyi aru areineꞌen iraꞌyn e. 18Yt we i toineꞌen uheineꞌen hap hep hanuat. Uito uiwewi aru uiꞌauka hap e. Pyno uimikyꞌesat ewy atunug e. Toineꞌen uhesaika hap uiwewi uikuꞌuro hamuat hap. Iꞌewyte toineꞌen uhesaika hap uheineꞌen iraꞌyn hamuat e. Miꞌi hap Uiꞌywot mikyꞌesat ewy atunug e. Saꞌawyꞌi toꞌe uhepe Uiꞌywot -Atikyꞌesat ekuꞌuro Uhaꞌyru e. Miꞌi hawyi ereineꞌen i hap atikyꞌesat e uhepe e. Miꞌi pote Uiꞌywot imikyꞌesat ewy atunug e. 19Mio tã e pote itotiaria Iuteu ywania akagnia tuꞌuka kahato raꞌyn taꞌatuehay wo. 20-Hesoꞌok taꞌyn wyti Iesui iꞌatuꞌe katupono ahiag wyti tuete iꞌatuꞌe iraniaꞌin me. Kat poteĩ pyno eweikuap teran ipotmuꞌe hap iꞌatuꞌe miitꞌin me hesoꞌok taꞌyn ahiag eiam Iesui pote iꞌatuꞌe. 21Maꞌato iraniaꞌin -Yt wyti iꞌatuꞌe maꞌato ahiag emiit pote ti ren yt ihay hãpyk i iꞌatuꞌe. Aikotã ten ahiag timoewaku yt ihapytig i rakat Iesui ewy iꞌatuꞌe Iuteu ywania akagnia pe.
Mowepiit Hap Eꞌat Woꞌonapin Haria Taꞌatuhẽtup Iesui Kape
22Meiũran hawyi Iesui toineꞌen Ierusarẽi me iꞌaman mot ewaty pe Tupana motypot yat ienuk iwato hap ete putꞌok e raꞌyn. Iuteu ywania tunug i raꞌyn ienuk hap tawa Ierusarẽi me. 23Miꞌi turan Iesui hewyry itote Tupana motypot yat iwato rakat pe morekuat saꞌawyꞌi wuat Sarumau eꞌoken upi hewyry. 24Miꞌi turan Iuteu ywania akagnia teꞌeruwaꞌatunug i raꞌyn Iesui kape iꞌauri wo apo iꞌatuꞌe hamo -Kat poteĩ yt heremo i ehay iꞌatuꞌe. Uruwesat ro uwe sese En iꞌatuꞌe katupono uruikuap teran ewẽ pyi Tupana Mipoꞌoro uruporekuat nuat apo En sio apo yt iꞌatuꞌe. 25-Karania wo i raꞌyn ahenoi ehepe uwe Uito hap wen maꞌato ti yt uimohey i eipe e Iesui. Iꞌatu kahato raꞌyn wakuap sese yt miitꞌin minug kuap ewywuat i atunug uipo wo ehehamo uwe Uito moherep hamo uwe Uiꞌywot moherep hamo. Pywo Uiꞌywot set upi atunug yne uwe Uito moherep hamo e. 26Maꞌato ti yt uimohey i eipe katupono yt uihũria i eipe pote e. 27Uimohey haria ti inug kahato uimikyꞌesat ewy aikotã hũria Uweiria koꞌi tunug aikotã taꞌatuꞌapykok hat mikyꞌesat ewy e. Miꞌi hap ewy uhupi tuwat uimohey haria e. 28Atiꞌatumoieineꞌen aru uimohey haria e. Yt karamuo i raꞌyn ti aru iꞌatukahuro sese e uiwywo yn naꞌyn teꞌeropyhuꞌat wuatꞌi eꞌat pe e. Miꞌi hawyi ti aru yt uwe i raꞌyn heꞌeroꞌok kuap uipo pyi uimohey haria katupono atiꞌatuꞌapykok kahato uihũria e. 29Kat pote Uiꞌywot poꞌog hesaika wuatꞌi kai e. Iꞌewyte Uiꞌywot wyti uimohey haria apykok hat kahato toineꞌen e. Miꞌi pote ti yt uwe i ihep kuap Uiꞌywot po pyi uihũria e. 30Uiꞌywot Uito ti wẽtup ok yn e Iesui. 31Mio tã e pote taꞌatusat i raꞌyn nu koꞌi yi totiat Iesui auka mak mak wuat hamo. 32Maꞌato Iesui toꞌe -Kat poꞌypyi uiꞌauka teran nu wo e. -Ipoityꞌi kahato raꞌyn tig atunug wakuap Uiꞌywot mikyꞌesat ewywuat ehehamo e. Kat e hap uiminug poꞌypyi uiꞌauka teran e. 33-Yt eminug wakuap koꞌi poꞌypyi i ti uruiꞌauka teran En iꞌatuꞌe maꞌato eꞌe hap poꞌypyi iꞌatuꞌe. En ni miit kawiat neꞌi maꞌato ti ewewi erenug Tupana wo iꞌatuꞌe. 34Miꞌi hawyi Iesui toꞌe iꞌatuepe -Saꞌawyꞌi ti einapin hawe mio tã toꞌe miwan me -Eipe ti Tupana koꞌi e Tupana e. 35Pyno watikuap taꞌyn kat e Tupana hãpyk yn tohenoi. Miꞌi kaipyi watikuap taꞌyn iwan me tohenoi raꞌyn yne ihay pywo piat hap yn e. Eipe ti Tupana koꞌi e ti Tupana saꞌawyꞌi tomiꞌairoria tehay enoi haria pe e. 36Miꞌi tupono kat hamo uhatyꞌi hatyꞌi Uito Tupana saꞌyru areꞌe pote. Pywo Uiꞌywot uiꞌairo hawyi uipoꞌoro meikowo mesuwat mytyyp kape. Miꞌi pykai yt naku i kahato En eweiꞌe yt etimotypot i Tupana eweiꞌe uhepe. 37Yt atunug i Uiꞌywot misepap ewywuat pote rasom yt uimohey i eipe maꞌato atunug imisepap ewywuat pote waku uimohey haria wo eweikupteꞌen e. 38Maꞌato yt uimohey i haria eipe pote waku maꞌato Uiꞌywot misepap ewy uiminug kape eiwaꞌakasa hawyi uiminug wakuap koꞌi upi waku eweimohey e. Waku eweikuap Uito Uiꞌywot wẽtup ok yn hap e. 39Miꞌi pote taꞌatupyhik teran i raꞌyn maꞌato tuweꞌaputsit neꞌi Iesui.
40Mio tã e rakirẽ Iesui toto raꞌyn Iutãu hy sakpo saꞌawyꞌi wuat Iuwãu ieineꞌen miitꞌin iꞌatusetꞌok hap kape. 41Miꞌi turan miitꞌin tõꞌẽ tõꞌẽ hewowi. Miꞌi hawyi teꞌeroꞌe toꞌope -Iuwãu ahetꞌok hat yt kat mowato hap koꞌi i toimoherep ahepe Tupana kaipyi. Yt karãpe i Tupana yn misepap kuap hap ewywuat tutunug ahehamo wen maꞌato mekewat imienoi Iesui etiat pywuat kahato rakat tohenoi ahepe Iuwãu iꞌatuꞌe toꞌope. 42Miꞌi hawyi itote typyꞌi raꞌyn Iesui mohey haria pakuptia teꞌeropyhuꞌat Iutãu hy sakpo.
Currently Selected:
Iuwãu 10: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.