Korosi 1
1
Haga Wẽtup 1
1Uiwyriaꞌin uito ti Iesui potpoꞌoro Pauru. Mesup atipoꞌoro uimiwan ehewowi tapyiꞌaria tawa Korosi piaria Iesui potpoꞌororia kape. Mesup Tupana emiitꞌin sese eipe are Iesui mohey potꞌi haria eipe. Uito ti Aipotypot eropat hat sese uito. Uito Tupana miꞌairo sese Imipoꞌoro Tosaꞌyru Iesui moherep hamuat. Tomikyꞌesat ewy uiꞌairo. 2Miꞌi pote kuekatu e hap atipoꞌoro ehewowi. Iꞌewyte aiwy Timoteu tuwehay poꞌoro ehewowi urumiwan me. Uruhẽtup ehewowi -Uruꞌywot Tupana etum no woꞌokyꞌe hap woꞌowese hap tawa Korosi piaria pe urutoꞌe. Ereineꞌen o itote hegyiꞌat kahato Esaꞌyru mohey haria piat hatno urutoꞌe.
Waku Kahato Iesui Ahehakyeraꞌat Hat
3Urukaꞌiwat Iesui Ywot waku kahato En katupono Emipoꞌoro Esaꞌyru urukaꞌiwat nuat kahato urutoꞌe. Waku sakpoꞌe En katupono etiꞌatuehakyeraꞌat raꞌyn uruwyriaꞌin tawa Korosi piaria urutoꞌe Tupana pe. 4Urumowepiit kahato miꞌiria katupono miꞌiria emimowaku koꞌi. Miꞌiria Esaꞌyru Emipoꞌoro mohey haria kahato. Emipoꞌoro urupotypot upiat haria kahato miꞌiria urutoꞌe. Waku sese En Tupana katupono etunug naꞌyn miꞌiria emepytꞌin kyꞌe kahato haria urutoꞌe Tupana pe.
5Uhekatuwyria gaꞌatpo mekewat sehay pywuat wakuat Iesui etiat putꞌok e ehetawa pe hawyi eiwewaure kaꞌa kahato. Eweikuap taꞌyn hawyi -Taꞌi miꞌi watomohey pote ti watoineꞌen aru wuatꞌi eꞌat pe atipy pe eweiꞌe raꞌyn Tupana e hap ewy eweiꞌe. -Tupana atunug aru eꞌe hap ewy eweiꞌe. Mio tã eweiꞌe raꞌyn hawyi Iesui mohey haria sese eweipyhuꞌat. Waku kahato katupono iꞌewyte woꞌokyꞌe kahato haria kahato eweipyhuꞌat eipe. 6Koitywy mesuwat Iesui etiat ainapin hap aimoehapyhotꞌok kahato wuatꞌi miitꞌin me mesuwat yi totiaria pe. Tuwesytpok kahato ihay wakuat aikowo aikowo tuwat Tupana ehay wuatꞌi puo. Miꞌi hawyi miꞌiria wy waku pe raꞌyn tukupteꞌen. Tupana mipoityro wo raꞌyn tukupteꞌen. Miꞌi hap ewy raꞌyn eweikupteꞌen eweikuap taꞌyn sehay hawyi. Eipe ti eweikuap taꞌyn Tupana tum ehepiat wuatꞌi eꞌat piat eheineꞌen hamuat hap. Eweikuap taꞌyn yt kat saꞌup i tegyiꞌat hap tutum neran hap eweikuap taꞌyn. 7Gaꞌatpo mehin Epawai toineꞌen eipyꞌasetpe turan tohenoi kahato raꞌyn Tupana egyiꞌat hap etiat. Taꞌi miꞌi ti Aipotypot eropat hat sese uruto ewywuat kahato aipotpap upiat kahato uhyt Epawai. Iꞌewyte eiwoꞌomuꞌe kahato hat miꞌi. Yt ipohep hin i wakuat sehay enoi hap ete ehepe. Miꞌi kaipyi eweipuẽti raꞌyn Tupana egyiꞌat hap. 8Miꞌi hawyi mehin Epawai urumuꞌe kahato mesuwe aikotã eweikupteꞌen itote -Tawa Korosi piaria ti woꞌokyꞌe kahato haria e uruepe. Tupana Paꞌãu kaipyi toꞌokyꞌe kahato e ehetiat uruepe mehin Epawai.
Pauru Ihay Tupana Kape Korosi Piaria Powyro Hap
9Miꞌi e hap uruikuap hawyi uruhẽtup kahato Tupana kape eipowyro hamuat uhyt Epawai e hap uruikuap hawyi. Mesup te uruhẽtup ehupi -Tupana urutoꞌe etum tawa Korosi piaria pe emikyꞌesat nug hap kuap hamuat urutoꞌe. Iꞌewyte etum no iꞌatuweꞌeg kahato hap eweꞌeg hap oktan ewanetup hap ewy urutoꞌe Tupana Paꞌãu me. 10-Tupana uruikyꞌesat kahato tawa Korosi piaria Epaꞌãu eiam kahato wo eweꞌeg hamo iꞌewyte emikyꞌesat nug kuap hap urutoꞌe mesuwe uruhẽtup. Uruikyꞌesat miꞌiria aikotã iꞌyp iꞌywa kahato rakat ewy hewo hewo kahato hap ewy wyti uruikyꞌesat kahato miꞌiria Tupana urutoꞌe. Pyno uruikyꞌesat miꞌiria wakuap yn nug haria En ewy hap uruikyꞌesat. Iꞌewyte uruikyꞌesat ekuap hap ihatꞌok ewy ewy putꞌok e Esaꞌyru mohey haria ete urutoꞌe uruhẽtup Tupana pe. 11Tupana Paꞌãu hesaika kahato yne esaika hap apy tote. Miꞌi pote aito ahesaika kahato Tupana Paꞌãu poꞌog poꞌog aipytꞌatnug hawyi. Miꞌi hawyi watopyhuꞌat hesaika hap wywo. Miꞌi hawyi aimoesaika wuatꞌi saꞌag miat aiꞌakit hap pun hamo. Miꞌi hawyi wyti iꞌewyte wahupit kuap yne iꞌatumikyryꞌi hap koꞌi. Miꞌi hawyi perupꞌi puo watomohey wuatꞌi eꞌat pe motꞌi kahato Tupana Paꞌãu toineꞌen aikai pote. 12Miꞌi hawyi watuwehum aiwepiit kahato hap wywo Aiꞌywot Tupana kape katupono Aiꞌywot atipy piat aimohãpyk aiwanetup hap. Miꞌi hawyi -Wakuaria wo raꞌyn miꞌiria e ahepiat pe. Uhemiitꞌin sese miꞌiria e. Uhekareꞌen aru atum yne iꞌatuepe. Uhetawa hẽtyhot rakat atum aru iꞌatuepe e. Iꞌatueowakai waku pe yne raꞌyn e ahepiat Topaꞌãu eiam koꞌi pe.
13Saꞌawyꞌi ahiag potmuꞌeria wo watoineꞌen. Yt watuweꞌaputsit kuap i ipo pyi. Iꞌe hap yn watunug kuap. Iꞌypyryp wiat ieineꞌen haria ewywuat watoineꞌen. Saꞌawyꞌi hoꞌowasat rakaria wo watoineꞌen maꞌato Aiꞌywot atipy piat tipohari raꞌyn aito ahiag po pyi. Miꞌi hawyi aherokosap Tosaꞌyru eropat haria wo raꞌyn. Tomikyꞌe kahato emiit no raꞌyn ainug. Waku kahato are. 14Miꞌi hawyi waure wo raꞌyn Tupana toineꞌen aiminug saꞌag koꞌi kai. Iesui aikyiꞌat tosuu wo ahehakyeraꞌat hamo. 15Tupana sese ti yt heremo i ahowawi. Miꞌi hawyi toipoꞌoro ahowawi Tosaꞌyru wẽtup ok tuwemoherep hamo Aiporekuat nuat. Imipoꞌoro Haꞌyru ti iꞌewywuat sese topyhuꞌat. Iꞌywot yt heremo pykai i maꞌato Haꞌyru wataꞌakasa hawyi watikuap taꞌyn Haꞌyru hawyi watikuap taꞌyn Toꞌywot ewy raꞌyn hap. Miꞌi hawyi yt heremo i rakat heremo raꞌyn. Haꞌyru ti poꞌog naꞌyn torannia iraniaꞌin kai ipotputꞌok e. Torannia Tupana minug kai ipotputꞌok e. Poꞌog naꞌyn yne ieineꞌen haria hewyry rakaria yi totiat atipy piat kai poꞌog Haꞌyru. 16Tosaꞌyru ehay wo tutunug yne yne. Yt kat kawiat i tutunug. Atipy piaria yne toimoherep iꞌewyte yne yi totiaria Haꞌyru inug. Yne heremo rakaria inug iꞌewyte yt heremo i rakaria atipy piaria akag koꞌi inug. Tuꞌisaria yne imiꞌairoria tukupteꞌen. Morekuaria iꞌewyte imiꞌairoria. Waikiru aat waty yi iminug koꞌi yne Tosaꞌyru ehay wo yne tutunug. Mesup tutum naꞌyn yne yne Tosaꞌyru pe. 17Haꞌyru toineꞌen yne iminug koꞌi eꞌyian mete. Wẽtup ok yn naꞌyn topyhuꞌat Tosaꞌyru wywo. Haꞌyru esaika hap wywo toiꞌatumopyhuꞌat yne yne aat waikiru waty yi yne yne. Tosaꞌyru ehay wo toiꞌatumowoꞌosat yne. Toiꞌatumoheg yne Tosaꞌyru ehay wo yne tominug koꞌi. 18Miꞌi hawyi wuatꞌi puo Tupana mohey haria akag wo topyhuꞌat raꞌyn Haꞌyru. Tomohey haria akag akag wo toineꞌen. Miꞌi hawyi yne aito imohey haria ipiit ewy watopyhuꞌat maꞌato Iesui aiꞌakag wo topyhuꞌat aikotã aiꞌakag me watuwewanetup hap ewy aipiit tutunug miꞌi hap ewy watunug iꞌe hap ewy. Tomohey hanuaria Saꞌawyꞌi nug hat ti Iesui. Ahesaika hap Haꞌyru kaipyi yn tuut aimoesaika hamuat. Ahehãite hap iꞌewyte Haꞌyru tunug wy. Ikuꞌuro sese aikawiatno hawyi Tupana tomoieineꞌen i raꞌyn guꞌuro pyi. Yt uwe hin i te tuwẽtem guꞌuro pyi turan tuwẽtem guꞌuro pyi katupono Tupana tikyꞌesat Tosaꞌyru yian mete wuat miitꞌin wẽtem hap. Miꞌi saꞌawyꞌi wyti putꞌok e guꞌuro hakpo guꞌuro hap. 19Pyno aito wẽtup yn imikyꞌesat ewywuat Tupana wywo Haꞌyru wywo Ipaꞌãu wywo watomohey Haꞌyru hawyi. 20Tupana atoiat haria yne aitoria saꞌawyꞌi iꞌewyte atipy piaria ahyt Tupana atoiat haria saꞌawyꞌi. Miꞌi hawyi Tupana watunug ahewanikap mo. Miꞌi pote wẽtup eꞌat pe toꞌe Tosaꞌyru pe -Woronug En muap ewywuat miitꞌin aipok uhowawiat hamuat. Ekuꞌuro ariaꞌyp posak ete hawyi taꞌat yne esuu raꞌyn hawyi uiwaure haria uikat kuap taꞌyn. Miꞌi esuu wo atiꞌatumowehik yne miitꞌin emohey haria uhowowi i raꞌyn e mesuwarotiat yi totiaria iꞌewyte atipy piaria uiꞌatoiat haria e. Miꞌi hawyi aru woꞌowese hap i raꞌyn topyhuꞌat e Tupana Tosaꞌyru pe.
21Saꞌawyꞌi watoineꞌen pya kahato Tupana kai yt naku i nug haria kahato aiwanetup hawe iꞌewyte aipiit no. Miꞌi pote watunug Tupana ahewanikap mo katupono wakuat kahato Tupana pote. 22Maꞌato koran wyti Tupana ainug naꞌyn towyriaꞌin no kahato. Aipotypot piit ikuꞌuro ariaꞌyp posak ete hawyi Tupana tunug Tosaꞌyru muap tuwewawiat aiꞌaipok hamuat. Ipiit aiwatnuat ewy ikuꞌuro hawyi Tupana tekyi kahato tuwewawi Tosaꞌyru mohey haria. Koitywy ihamo raꞌyn watoineꞌen. Koitywy toꞌe ahepe -Yt kat i te saꞌag atipuẽti eikai e. Waku puo raꞌyn eweikupteꞌen uiwanetup hawe aikotã yt karãpe i eweiꞌaparap uhepe hap ewy eipe e ahepe. Koran uiwyriaꞌin no raꞌyn eipe e Tupana ahepe. 23Pyno aiwy raꞌyn Tupana. Yt nakuap i watoiat raꞌyn hawyi waku aikyꞌe hat sese watomohey wuatꞌi eꞌat pe. Saꞌawyꞌi watikuap mekewat Iesui etiat sehay wakuat ehay hawyi watomohey raꞌyn Iesui. Miꞌi hawyi watoineꞌen aru wuatꞌi eꞌat pe e hap ewy watomohey. Miitꞌin teꞌeruwekyryꞌi ahetiat pykai imohey hap yt watoiat hin i. Iheg me kahato watoineꞌen imohey hap ete. Saꞌawyꞌi watomohey kahato. Pyno koitywy yt naku i raꞌyn imohey hap watoiat sehay waku kahato Iesui etiat. Miꞌi atikuap saꞌawyꞌi hawyi uheropat kahato aat kaꞌap wuatꞌi miitꞌin kape miꞌi moherep hamo aikope aikope miitꞌin tukupteꞌen hap upi yne ywania pe ahytpok miꞌi ehay wakuat mesuwat yi wato hap oktan. Miꞌi hamo yn uinug uito Pauru. 24Koitywy hoꞌopot hat ewy areineꞌen mesuwe. Uipiit satyꞌi kahato areineꞌen katupono woꞌopyhik hawe areineꞌen hatek takat ewy. Miꞌi pykai uiwepiit yn katupono eikawiatno ahoꞌopot. Saꞌawyꞌi Aipotypot Iesui hoꞌopot kahato aikawiatno tomohey haria etiatno. Koitywy watoineꞌen wẽtup mepyt sok ewy Iesui upi katupono tohoꞌopot aikawiatno. Miꞌi hap ewy kahato ahoꞌopot Iesui mohey haria kawiatno. 25Miꞌi pote Tupana toꞌe uhepe -Woronug en uimohey hatno uheropat hatno. Atikyꞌesat etomoherep wuatꞌi pe uhehay e. Miꞌi tã etunug mote emimuꞌeria waku pe tukupteꞌen. Miꞌi pote etiꞌatumuꞌe ro uhehay wo wuatꞌi ywania pe e Tupana uhepe. Uito ti Pauru.
26Mesuwat sehay wakuat yt uwe i ikuap saꞌawyꞌi. Nimuaria yt uwe i mesuwat yi tote ikuap mesuwat sehay etiat. Tupana yt tomoherep i miitꞌin muo mekewat eꞌat pe maꞌato mesup heremo raꞌyn wuatꞌi Iesui mohey haria pe raꞌyn. 27Koitywy Tupana toꞌe -Saꞌawyꞌi yt uwe i kape atimoherep uhehay pakup e. Kurin ikuap haria saꞌawyꞌi maꞌato koitywy Uhaꞌyru mohey haria kape atimoherep taꞌyn uhehay ikahu kahato rakat sehay hekat rakat wuatꞌi ywania mesuwat yi totiat kapiat sehay wakuat e. Saꞌawyꞌi migꞌi wo toineꞌen maꞌato mesup atimoherep taꞌyn ehepe e Tupana ahepe. Etunug no Uhaꞌyru Eporekuat no eipyꞌa pe pote eweikupteꞌen aru uhehamo mesuwe atipy pe uimimotypot koꞌi wo e Tupana ahepe. 28Miꞌi tupono koitywy wuatꞌi ywania pe -Ewetunug no Iesui Eiporekuat no urutoꞌe wuatꞌi miitꞌin me. Eiweꞌeg wo o watoꞌe. Eweikuap o mesuwat sehay wakuat watoꞌe wuatꞌi pe. Miꞌi hawyi yne Tupana esaika hap wywo waku watoineꞌen weꞌeg haria wo iraniaꞌin pyꞌasetpe katupono watikyꞌesat kahato miꞌiria yne yne Tupana wywuat ieineꞌen haria wo. Watekyi teran kahato miitꞌin aiweꞌeg hap wywo Tupana kape. Watikyꞌesat miꞌiria Tupana kuap haria. Watikyꞌesat miꞌiria Haꞌyru mohey sese haria. Watikyꞌesat miꞌiria wẽtup wanetup hap ewy yn Aipotypot Iesui wywo. 29Uito Pauru arepotpap kahato miitꞌin mohãpyk Iesui mohey hap etiat hamo. Uipiit sakup hap wywo aremosoꞌopot kahato miꞌi nug hamo yne uhesaika hap wywo. Iꞌewyte yne Aipotypot miium uhesaika hap wywo arepotpap katupono Tupana Paꞌãu uipiit pyi ipotpap kahato topotpap nug hamo are. Uiwyriaꞌin tawa Korosi piaria pywo pe ti areꞌe teran ehepe arepotpap saꞌawyꞌi pyi mesup te arepotpap kahato. Worohoꞌonug Aipotypot Iesui emiit no yt eipe yn i maꞌato iꞌewyte iraniaꞌin ywania torannia atiꞌatumuꞌe teran Iesui ete.
Currently Selected:
Korosi 1: mav
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.