YouVersion Logo
Search Icon

2 Peteru 1

1
Haga Wẽtup 1
Tupana Hegyiꞌat Kahato Ahewowi
1Uito ti Peteru Aipotypot Iesui eropat hat sese uito. Uito Iesui mipoꞌoro miitꞌin muꞌe hanuat ihay moherep hat uito. Uito ti 12 ok hap Iesui emiit uito. Iꞌewyte imohey haria napin hat uito. Aimimohey ikahu rakat moherep hat uito. Hekat kahato rakaria ewywuaria watukupteꞌen katupono imohey hap saꞌup iwato kahato hap ewy topyhuꞌat imohey hap kaipyi. -Uhaꞌyru mohey haria ti eipe uiwanetup hawe uipyꞌa pe e Tupana ahepe. Miꞌi pote atum yne wakuat ehepe e Tupana. 2Atikyꞌesat kahato eipe Iesui kuap kahato haria wo eweikupteꞌen. Taꞌi eweikuap Aipotypot Iesui hawyi Tupana tum neꞌen neꞌen neꞌi tegyiꞌat hap ehepe. Iꞌewyte tutum woꞌowese hap tutum yt kat saꞌup i. Aipoityro kahato Tupana tuwehay pyi. Iwese pote tutum yne ahepe. Tutum iwato kahato typy sakpo itote. Toimoꞌẽ kahato tegyiꞌat hap are. Tutum ahepe wuatꞌi tokuap hap Tosaꞌyru kuap hap kaipyi tutum yne yne ahepe are. 3Tutum ahepe yne yne towatnuat yt kat saꞌup i. Tesaika hap toieineꞌen hap tewaku hap tutum ahepe are. Watikuap Haꞌyru Iesui hawyi tutum yne yne tomotypot hamuat hap tutum. Taꞌi iꞌewyte watomohey Iesui hawyi Tupana aiꞌairo topotpoꞌororia koꞌi wo are. 4Tutum ahepe tehay wakuat. Koitywy mio tã e ahepe -Atum aru yne yne ehepe e. Pywo yt uheso hin i e. Worohoꞌokyꞌe haype e. Taꞌi saꞌawyꞌi ti watoineꞌen yi totiaria ewy neꞌi yt naku i hap nug haria wo are. Katupono yt watuwẽtem kuap i ti aipiit mikyꞌesat seko saꞌag myi. Aiminug saꞌag yt nakuat i po pe yn watoineꞌen. Maꞌato koitywy ti watuwẽtem naꞌyn mekewat kaipyi Tupana piat ainug pakup i raꞌyn hap kape. Miꞌi tupono ti koitywy aito ipakup takaria wo raꞌyn watoineꞌen Tupana toꞌe hap ewy -Worohoꞌonug ti aru eipe ipakup takaria wo e hap ewy watukupteꞌen are mesuwe.
5Pyno toineꞌen naꞌyn aikai Iesui mohey hap. Miꞌi tupono ti Tupana tikyꞌesat poꞌog Tosaꞌyru ewywuat watopyhuꞌat hap uiwyriaꞌin are. Iꞌewyte aikaipyi toikyꞌesat aiwanetup hap aheko Tosaꞌyru ewywuat ikahu rakat yn toikyꞌesat. Miꞌi hawyi toikyꞌesat ahepiat tokuap hap aikotã aiwoꞌoꞌewy ewy hap toikyꞌesat are. 6Waku hawyi iꞌewyte toikyꞌesat aiwewaĩ kuap hap toikyꞌesat. Miꞌi hap watikuap hawyi toikyꞌesat aiwoꞌokyꞌe hap. Iꞌewyte toikyꞌesat yt aipohep i tomohey hap etiat hap toikyꞌesat. Miꞌi watunug kuap hawyi toikyꞌesat aito toiãꞌãkap koꞌi ewy hap toikyꞌesat are. 7Miꞌi toineꞌen hawyi toikyꞌesat aiwoꞌokyꞌe sese hap aikotã watikyꞌe aheywyt aheinyt hap ewy aikywyt aikypyꞌyt hap ewy are. Miꞌi watunug kuap hawyi toikyꞌesat aiwoꞌokyꞌe potꞌi sese hap. Itag saꞌawyꞌi te wuat imohey hap kaipyi hap toikyꞌesat are. 8Miꞌi tã watukupteꞌen mote ti aru ikahu kahato watoineꞌen are. Miꞌi hawyi ti aru hekat kahato rakaria wo watoineꞌen Tupana motypot hanuaria aito hawyi are. Miꞌi hawyi ti ihãite rakatno watukupteꞌen are. Miꞌi hawyi aikotã mekewat mikoi haat kahato rakat ewy watoineꞌen are. Miꞌi hawyi ti aru watukupteꞌen Aikaꞌiwat Iesui kuap haria kahato are. Miꞌi hawyi ti aru Aiporekuat no kahato topyhuꞌat Aikaꞌiwat are. 9Maꞌato meimuẽwat wakuat koꞌi yt iwato i aikai pote ti aru yt ihapytig i rakaria wo watoineꞌen uiwyriaꞌin katupono saꞌawyꞌi yt eweikuap hin i Iesui eipe. Miꞌi turan ti yt ihapytig i rakaria ewy eweikupteꞌen. Yt kat i heremo Tupana etiat uiwyriaꞌin saꞌawyꞌi mekewat eꞌat pe. Saꞌawyꞌi wuat eiminug saꞌag koꞌi yn topyhuꞌat. Miꞌi pote ti yt ihapytig i rakaria ewywuaria wo eweikupteꞌen. Miꞌi pote ti eiminug saꞌag koꞌi tukupteꞌen ne eiꞌymyẽpe katupono ti kurin kat Iesui mohey hap kaipyi wyti yt watikuap i mekewat pywuat sese hap. Yt watoꞌe kuap i pywo sio yt katupono yt watomowato i Iesui mohey hap ahepiat pote. 10Pyno uheꞌywytꞌin uheinytꞌin eiwemuꞌe ro haty wo mekewat Tupana miꞌairo sio uito sio yt hap kuap ehepiat hamo are. Miꞌi hawyi ti aru eweimowato ro mekewat seko pakup i eiwanetup hawe hawyi ti aru eweikuap taꞌyn -Pywo ti rat uito Tupana emiit no areineꞌen e hap eweikuap. Uito ti Tupana miꞌairo areineꞌen hap eweikuap. Miꞌi hawyi ti aru eweimowato mekewat seko pakup i eiwanetup hawe uiꞌe hap ewy. Miꞌi hawyi ti aru eweikuap kahato raꞌyn -Pywo ti Iesui watnuat uito hap eweikuap are. Miꞌi pote ti aru yt karãpe i raꞌyn eweiꞌatoiat mekewat ahehakyeraꞌat hap mohey hap kaipyi. 11Miꞌi hawyi ti aru mekewat eꞌat putꞌok e turan -Ereke ro e Tupana. Aikotã aiwy sese pe watoꞌe -Ereke ro watoꞌe hap ewy ti aru topyhuꞌat. Miꞌi hawyi ti aru itote watukupteꞌen naꞌyn wuatꞌi eꞌat pe raꞌyn aikope Iesui toineꞌen Aiporekuat no ahehakyeraꞌat hap tote. Miꞌi hawyi ti aru Aikaꞌiwat yat pe raꞌyn watukupteꞌen.
Areineꞌen Ne Eimuꞌe Hamo
12Miꞌi pykai yt uipohep hin i eimoweꞌeg hamo. Yt eweiwaure teiꞌo Tupana piat einapin hap koꞌi are yn katupono eweikuap taꞌyn saꞌawyꞌi te. Miꞌi tupono poꞌog waku watikuap pakup i hap poꞌog waku. Waku watikuap kahato aipyꞌa pe. 13Pyno ti waku wuatꞌi eꞌat pe pywo aiꞌe hap yn. Pyno toꞌiro watuwemuꞌe i muꞌe i kahato iwan miat ete. 14Pyno koitywy areineꞌen eipyꞌasetpe Tupana Paꞌãu uipiit piat wywo maꞌato yt atikuap i karamuo yt uwe i raꞌyn uipiit piat hap. Meiũran taꞌat hawyi yt uwe i raꞌyn. Koitywy uiꞌyat toineꞌen ne. Miꞌi tupono areineꞌen eimuꞌe hamo. Pyno saꞌawyꞌi wuat meimuẽwat eimiwaure koꞌi koitywy atimopakup i. Morohoꞌomuꞌe pakup i raꞌyn. Meimuẽwat eimiwaure koꞌi ahenoi pakup i raꞌyn. Pyno uito ti eimuꞌe hat. Meiũran yt uwe i mesuwe katupono uheiam ikuꞌuro rakat nuat neꞌi. Aikotã aiꞌyat ipotꞌi raꞌyn hawyi watipun hap ewy areineꞌen. Katupono Uikaꞌiwat Iesui toꞌe uhepe -Wuatꞌi eꞌat pe eieineꞌen hap yt pya i e. Porap yn naꞌyn ekuꞌuro hap e. Mio tã toꞌe hamo Uikaꞌiwat tuwemoherep wuatꞌi eꞌat pe uhepe. 15Miꞌi tupono morohoꞌomuꞌe poꞌog poꞌog katupono uikuꞌuro hawyi eiwanetup hawe uimienoi topyhuꞌat rẽ -Taꞌi Peteru mienoi ewy kahato ti tuut irane Aiporekuat Iesui iꞌe hap ewy eweiꞌe aru uikuꞌuro hawyi.
16Pywo ti rat urutaꞌakasa hap sese Iesui ieineꞌen hap. Miꞌi kape urueha wo urutaꞌakasa are. Uruto uruikuap kahato Miꞌi Miit katupono uruewyry kahato iwywo are. Iesui hesaika kahato hap uruikuap taꞌyn are. Yt urumuꞌetu wuat hap kaipyi hin i uruiꞌatumuꞌe eipe Iesui ete are. Pywo ti rat urutaꞌakasa raꞌyn Tupana Mipoꞌoro Wuatꞌi Potypot Koro wuat. Waku kahato Miꞌi Miit poꞌog poꞌog torannia miitꞌin kai are. Uruikuap kahato Miꞌi uruewyry aat kaꞌap hawyi. Uruikuap kahato Tupana Mimotypot sese Iesui hap. Urumimoherep Iesui etiat ehepe yt urumuꞌetu wuat hap kaipyi i maꞌato urueha wuat uruꞌakasa hap kaipyi uruiꞌatumuꞌe eipe Miꞌi Miit sese ete are. 17Pyno saꞌawyꞌi Tupana henoi atipy kaipyi uruehamo Tosaꞌyru etiat tohenoi. Mio tã e Aiꞌywot Tupana itote -Miꞌi ti Uhaꞌyru sese uimikyꞌe kahato e. Uimowepiit sese Miꞌi Miit e. Pywo ti rat uimotypot kahato hat Miꞌi e Tupana teiam ywyhig muo ikytsig nakat ikahu rakat kaipyi mekewat tomotypot hap teiam kaipyi mio tã e are. 18Pyno saꞌawyꞌi te mio tã e Tupana atipy kaipyi uruehamo. Taꞌi urutukupteꞌen Iesui wywo mekewat yityꞌok wakuat hap tote turan mio tã toꞌe. 19Saꞌawyꞌi wuaria Tupana ehay moherep haria tiꞌatumuꞌe kahato Tupana Mipoꞌoro Aiporekuat nuat ete. Mesup wẽtup ihay poꞌog hesaika miꞌiria kai katupono koitywy Iꞌywot ihay atipy kaipyi uruehamo -Miꞌi ti Uhaꞌyru sese uimowepiit hat sese Miꞌi Miit e atipy kaipyi ahowawi. Taꞌi Tupana kaipywiat ti sehay poꞌog hesaika torannia iraniaꞌin mienoi koꞌi kai are. Miꞌi pote waku watomohey kahato miꞌi e hap katupono miꞌi Tupana wẽ kaipywiat sehay sese are. Pywuat sese ti topyhuꞌat miꞌi e hap poꞌog torannia kai are. Miꞌi tupono eiwanetup kahato o mio tã e Tosaꞌyru piat hap kape are uiwyriaꞌin e. Katupono ti mekewat sehay ti Tupana ehay moherep haria timoherep kahato Tupana Mipoꞌoro Aiporekuat nuat hap etiat. Aikotã ariãty iꞌypyryp wiat hẽtyhot hap ewywuat. Pyno miꞌi sehay eweikuap eipyꞌa pe Tupana Saꞌyru hap miꞌi hawyi aikotã aat tuwemoherep hune pyi hẽtyhot tuerut hap ewy eipyꞌa pyi wyti aru hẽtyhot hap tuwemoherep are. Aikotã waikiru wato tuwẽtem hunete miꞌi hap ewy eipyꞌa pyi tuwẽtem hẽtyhot tuerut eweimohey raꞌyn Iesui Tupana Saꞌyru hap hawyi. 20Pyno ahenoi hamuat Tupana ehay aikope pyi tuut saꞌawyꞌi hap mekewat miwan miat. Pyno ti yt miitꞌin wanetup hap kaipyi i tuut are. Yt yne miitꞌin mikuap kaipyi i tuut miꞌi wuat are. Yt miitꞌin muꞌetu wuat kaipyi hin i ti. 21Pyno miitꞌin wakuaria Tupana kuap haria kaipyi ti tuwẽtem Tupana ehay. Saꞌawyꞌi yian mete taꞌatuhenoi Tupana Paꞌãu mienoi aikotã aikotã hamuat koꞌi. Taꞌi Tupana Paꞌãu mienoi koꞌi ahepiat ti taꞌatumoherep kahato raꞌyn.

Currently Selected:

2 Peteru 1: mav

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy