Josua 1
1
Yawe hemi talem Josua fo faetem olketa pipol blong Kenan
1Bihaen long taem wea Mosis hu hemi wakaman blong Yawe hemi dae finis, Yawe hemi tok long wanfala man wea bifoa hemi mektu lida hu hemi helpem Mosis. Man ya nao Josua, hu hemi san blong Nun. 2Yawe hemi tok olsem long Josua, “Wakaman blong mi, Mosis, hemi dae finis nao, bat distaem, yu wetem olketa pipol ya mas mekredi fo katkros long Jodan Riva, mekem yufala go insaet long lan wea mi stat fo givim long yufala.#Diutronomi 1:5-8. 3Lan wea bae yufala wakabaot go long hem ya, mi bin makem finis fo yufala, olsem wea mi bin promis finis bifoa long Mosis. 4Lan wea bae mi givim long yufala, hemi stat long drae eria ya long saot, go-go kasem olketa hil ya long Lebanon long not. An stat long bikfala Yufretis Riva long ist, an gotru long distrik blong olketa laen blong Het, go-go kasem Mediterenian Si long west. 5Mi talem long yu, long ful laef blong yu, bae no eniwan save winim yu long faet. Bae mi gohed fo lukaftarem yu, olsem wea mi bin lukaftarem Mosis bifoa. An oltaem bae mi stap wetem yu, an bae mi no save lusim yu o letem yu stap nating.#Diutronomi 11:24-25; 31:6, 8; Hibrus 13:5.
6“Yu mas stanap strong olowe, an yu mas no fraet, bikos yu nao bae yu lidim olketa pipol ya fo go insaet long lan wea mi bin promisim finis long olketa grani blong yufala bifoa, wea bae mi givim long yufala.#Diutronomi 31:6, 7, 23. 7Yu mas stanap strong olowe, an yu mas no fraet. Yu mas obeim evri Lo wea wakaman blong mi ya Mosis hemi givim long yu. An yu mas no lusim eni pat long lo ya, mekem eniples yu go long hem, olketa samting wea bae yu duim hemi save gohed gudfala. 8Oltaem, yu mas ridim buk blong Lo an yu mas tisim olketa pipol abaotem olketa toktok wea hemi stap insaet. An long de an naet yu mas tingting gudfala falom olketa toktok ya, mekem yu save duim evrisamting wea Lo hemi talem. Sapos yu duim olsem, olketa waka blong yu bae hemi save gohed gudfala. 9Mi talem finis long yu. Yu mas stanap strong olowe an yu mas no fraet, an tingting blong yu mas no wikdaon, bikos eniples wea yu go long hem, mi Yawe, God blong yu bae mi stap wetem yu.”
Josua hemi talem pipol fo mekredi fo krosim Jodan Riva
10Josua hemi tokstrong olsem long olketa lida blong Israel, 11“Yufala mas goraon long olketa pipol ya, an tok olsem long olketa, ‘Yufala mas mekredi long samfala kaikai, bikos long mektri de bae yumi katkros long Jodan Riva, fo tekova long lan wea Yawe hu hemi God blong yumi hemi promisim finis fo givim long yumi.’”
12Josua hemi kolem traeb blong Ruben wetem traeb blong Gad, an haf long traeb blong Manase an hemi tok olsem long olketa, 13“Yufala mas tingim gudfala olketa toktok wea Mosis hu hemi wakaman blong Yawe, hemi bin talem long yufala. Hemi talem dat Yawe hu hemi God blong yumi, bae hemi givim disfala lan ya long ist saet blong Jodan Riva fo yufala. An disfala lan wea yumi stap long hem distaem bae hemi kamap ples blong yufala nao fo stap kuaet long hem. 14Olketa waef blong yufala wetem olketa pikinini blong yufala an olketa animol blong yufala bae i stap long hia, long lan wea Mosis hemi givim finis long yufala long disfala saet long Jodan Riva. Bat evri man long yufala hu i save faet, olketa mas karim evrisamting blong olketa fo faet. Olketa mas go fastaem long mifala fo katkros go long narasaet fo helpem mifala long faet, 15go-go kasem taem wea yumi winim olketa lan long saet blong Jodan Riva long west. Hem nao lan wea Yawe hu hemi God blong yumi hemi bin promisim fo givim long mifala. An taem wea mifala tu i tekova long lan wea Yawe bin givim long mifala, oraet bae yufala kambaek moa long disfala ples. Nao bae yufala save stap long disfala saet blong Jodan Riva long ist, long lan blong yufala wea Mosis, disfala wakaman blong Yawe hemi givim finis long yufala.”#Nambas 32:28-32; Diutronomi 3:18-20; Josua 22:1-6.
16Den olketa ansa olsem long Josua, “Evrisamting wea yu talem long mifala, bae mifala duim nao, an evriples wea yu laek fo sendem mifala, bae mifala go long hem nao. 17Bae mifala obeim yu, olsem wea mifala bin obeim Mosis bifoa. Letem Yawe hu hemi God blong yumi hemi stap wetem yu olowe, olsem wea hemi bin stap wetem Mosis bifoa. 18An eniwan hu hemi agensim yu, o hemi no obeim olketa strongfala toktok blong yu, bae hemi mas dae. Yu mas stanap strong olowe an yu mas no fraet.”
Currently Selected:
Josua 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.