YouVersion Logo
Search Icon

Jon 13

13
Jisas wasim lek blong olketa disaepol blong hem
1Distaem hemi kasem las de bifoa Fist blong Pasova. An Jisas hemi save nao dat hemi kasem taem fo hemi lusim disfala wol fo gobaek long Dadi blong hem moa. Jisas hemi lavem olowe olketa long disfala wol wea olketa falom hem, an hemi gohed fo lavem olketa go-go kasem taem hemi dae.
2Long taem olketa kaikai long ivining, Seitan hemi putum tingting insaet long maen blong Jiudas finis fo hemi mas givim Jisas go long han blong olketa enemi.#13:2 “Seitan hemi putum tingting …” Nara wei fo talem moa, “Seitan hemi tingim finis wea Jiudas bae hemi givim Jisas go long han blong olketa enemi.” Disfala Jiudas hemi san blong Saemon Iskariot. 3Nao Jisas hemi save finis wea Dadi blong hem hemi givim evrisamting long han blong hem finis. An hemi save tu dat hemi kamaot long God, an bae hemi gobaek moa long God. 4So Jisas hemi lusim tebol ya, an hemi tekemaot longfala kaleko blong hem an hemi tekem wanfala taol an taemap raonem hem seleva. 5Hemi kapsaetem wata long wanfala dis an hemi stat fo wasim lek blong olketa disaepol blong hem nao. An hemi mekem olketa drae wetem disfala taol wea hemi taemap raonem hem. 6Taem hemi kam long Saemon Pita, Pita hemi sei long hem olsem nao, “?Waswe Masta, bae yu wasim lek blong mi ya?”
7Nao Jisas hemi ansarem hem olsem, “Long distaem, yu no save yet wanem mi duim long yufala ya, bat bihaen nao bae yu save.”
8Nao Pita hemi tok long hem olsem, “!Bae yu nating save wasim lek blong mi ya! !Nomoa nao!” Jisas hemi sei long hem, “Sapos mi no wasim lek blong yu, yu no blong mi nao ya.”
9Taem ya, Saemon Pita hemi sei long hem nao, “Oo Masta, yu no wasim lek blong mi nomoa, bat yu mas wasim olketa han an hed blong mi tu.”
10Bat Jisas hemi sei long hem, “Man hu hemi suim an hemi klin finis, hemi no save wasim bodi blong hem moa ya. Lek blong hem nomoa hemi mas wasim.#13:10 “Lek blong hem nomoa hemi mas wasim.” Samfala olfala kopi long Jon olketa no garem disfala toktok. Yufala klin finis, bat no evriwan long yufala.” 11Jisas hemi save finis nao long man hu bae hemi givim hem go long han blong olketa enemi. Dastawe nao hemi sei no evriwan long olketa nao hemi klin ya.
12Taem#Luk 22:27. Jisas hemi wasim lek blong olketa finis an hemi werem moa kaleko blong hem, hemi go an sidaon moa. An hemi sei long olketa disaepol blong hem olsem, “?Waswe, yufala save wanem mi bin duim long yufala? 13Yufala kolem mi Tisa an Masta, an hemi gud fo yufala kolem mi olsem ya bikos hemi tru. 14Nao sapos mi, wea mi Tisa an Masta blong yufala, mi wasim lek blong yufala, yufala tu i mas wasim lek blong olketa nara man long yufala. 15Disfala samting wea mi duim long yufala ya, hemi fo som gudfala wei long yufala, mekem yufala save duim semsamting tu. 16Mi#Matiu 10:24; Luk 6:40; Jon 15:20. talem yufala tru samting nao, no eni wakaman hemi hae winim bos blong hem ya, an no eni niusman hemi hae winim man hu hemi sendem hem go. 17Yufala save nao long olketa samting ya, an bae yufala hapi tumas ya sapos yufala falom.
18“I#Sams 41:9. no evriwan long yufala nao mi tokabaotem, bikos mi savegud long yufala wea mi siusim finis ya. Bat disfala toktok blong Buktambu hemi mas kamtru, wea hemi sei, ‘Man hu hemi kaikai wetem mi, hemi spoelem mi moa.’ 19Mi talem long yufala distaem nao wanem bae hemi hapen, mekem taem hemi hapen bae yufala biliv wea ‘Mi nao Mi Stap Olowe’.#13:19 “Mi nao Mi Stap Olowe” Disfala toktok ya God nao hemi yusim fastaem abaotem hem seleva taem hemi stori wetem Mosis. Lukim Eksodas 3:14. 20Mi#Matiu 10:40; Mak 9:37; Luk 9:48; 10:16. talem yufala tru samting nao, man hu hemi kaen tumas long eniwan wea mi sendem kam, hemi kaen tumas long mi tu ya. An eniwan hu hemi kaen tumas long mi, hemi kaen tumas long God hu hemi sendem mi kam tu.”
Jisas talemaot dat Jiudas bae givim hem go long olketa enemi
(Matiu 26:20-25; Mak 14:17-21; Luk 22:21-23)
21Taem Jisas hemi talem olketa samting ya finis, tingting blong hem hemi filsore tumas nao, an hemi tok olsem nao, “Mi talem yufala tru samting nao, bae wanfala long yufala hemi givim mi go long han blong olketa enemi blong mi.”
22Long taem ya, olketa disaepol i lukluk long olketa seleva nao, bikos olketa barava no save hu nao Jisas hemi minim ya. 23Nao disfala disaepol wea Jisas hemi lavem tumas#13:23 “disfala disaepol wea Jisas hemi lavem tumas” Long Jon 21:24 hemi sei disfala man nao hemi raetem disfala buk ya, an plande pipol tingse hem nao disfala aposol Jon ya. ya, hemi sidaon go kolsap long Jisas. 24So Saemon Pita hemi mekem go saen long disaepol ya, fo mekem hem askem Jisas abaotem hu nao hemi minim ya.
25So disfala disaepol hemi tane go long Jisas an hemi askem hem olsem. “?Masta, hu nao disfala man ya?”
26Nao Jisas hemi ansarem hem olsem, “Bae mi putum go lelebet bred insaet long supsup ya an bae mi givim go long man ya nao.” An Jisas hemi putum go lelebet bred ya insaet long supsup ya, an hemi givim go long Jiudas nao, san blong Saemon Iskariot. 27Taem Jiudas hemi tekem disfala bred ya, Seitan hemi go insaet long hem nao. An Jisas hemi tok olsem long Jiudas, “Yu duim kuiktaem wanem yu mas duim ya.” 28Olketa nara man hu i sidaon raonem tebol ya, olketa nating save waswe nao Jisas hemi tok go olsem long Jiudas. 29Jiudas, hemi man fo lukaftarem seleni blong olketa ya. So diswan hemi mekem samfala disaepol fo tingse Jisas hemi talem Jiudas fo go an baem samfala samting fo olketa yusim long olketa bikde ya, o fo hemi givim samfala samting long olketa pipol hu i pua.
30Taem Jiudas hemi tekem disfala bred ya finis nomoa, hemi goaot kuiktaem nao. An long taem ya, hemi naet finis nao.
Niufala lo
31Taem Jiudas hemi goaot finis, Jisas hemi sei, “Long distaem, bae olketa mekhae long San Blong Man nao, an bae olketa mekhae long God tu bikos long hem ya. 32An sapos olketa mekhae long God bikos long San Blong Man, bae God seleva tu hemi mekhae long hem ya. An bae hemi mekhae long hem long distaem nao. 33Yufala#Jon 7:34; 8:21. olketa pikinini blong mi, bae mi no stap longtaem wetem yufala ya. An olsem mi talem finis long olketa bikman blong olketa Jiu, mi talem long yufala tu, ‘Bae yufala lukaotem mi, bat bae yufala no save go long ples wea bae mi go long hem.’ 34Mi#Jon 15:12, 17; 1 Jon 3:23; 2 Jon 5. givim niufala lo long yufala. Yufala mas lavem yufala evriwan. Mi lavem yufala, an long sem wei ya, yufala tu mas lavem yufala evriwan. 35Sapos yufala lavem yufala evriwan, bae evri pipol i luksave dat yufala nao olketa disaepol blong mi.”
Jisas talemaot dat Pita bae talem hemi nating save long hem
(Matiu 26:31-35; Mak 14:27-31; Luk 22:31-34)
36Nao Pita hemi askem Jisas olsem, “?Masta, wea nao bae yu go long hem ya?”
Jisas hemi ansarem hem olsem, “Distaem, yu no save falom mi go long ples wea bae mi go long hem, bat bae yu falom mi bihaen.”
37Pita hemi askem hem moa olsem, “?Masta, waswe nao mi no save falom yu distaem? !Mi redi nomoa fo dae fo helpem yu ya!”
38Jisas hemi ansarem hem olsem, “?Waswe, bae yu barava wiling fo dae fo helpem mi? Mi talem yu tru samting nao, long taem kokorako hemi no krae yet, bae trifala taem nao yu sei yu nating save long mi.”

Currently Selected:

Jon 13: SIPB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy