Aesaea 1
1
Fastoktok
1Olketa toktok ya, hemi profesi wea Yawe hemi talem long Profet Aesaea, san blong Amoj, fo hemi talemaot long olketa pipol blong Jerusalem wetem olketa pipol blong Jiuda. Profet ya hemi talemaot olketa toktok ya long taem blong King Yusaea, an long taem blong King Jotam, an long taem blong King Ehas, an long taem blong King Hesekaea. Olketa evriwan ya i king long Jiuda.#2 Kings 15:1-7; 15:32—16:20; 18:1—20:21; 2 Kronikols 26:1—32:33.
Yawe hemi jajem olketa pipol blong hem
2Yawe nao hemi tokstrong olsem,
“!Skae an graon! !Yutufala lisin kam long toktok blong mi!#Diutronomi 4:26; 30:19; Sam 50:4.
Stat long taem wea olketa pikinini blong mi i smolfala,
mi bin lukaftarem olketa gudfala,
bat distaem olketa agensim mi nao.
3Buluka hemi save long ona blong hem,
an dongki hemi save dat ona blong hem nao hemi fidim hem.
Bat olketa pipol blong Israel i no save long mi nao.
Ya, olketa pipol blong mi i no save long enisamting.”
4 (Profet) !Maekrangge! Distaem, yufala pipol blong mi i barava nogud tumas nao, an wei blong yufala hemi ravis tu. Yufala pipol fo sin olowe nomoa. An yufala lusim Yawe finis. Ya, yufala les long Holi God blong Israel. Hem nao hemi olsem yufala stap farawe from God. 5?Waswe nao yufala gohed nomoa fo agensim hem? Sapos yufala olsem, bae hemi gohed nomoa fo panisim yufala. Yufala olsem man hu hemi garem bikfala kil long hed blong hem, an hemi no save tingting stret. 6Ya, yufala olsem man wea hemi sik stat long hed blong hem go kasem lek blong hem. Hemi garekil evriwea long bodi blong hem, an hemi garem olketa soa long bodi blong hem. An no eni man hemi klinim olketa soa ya, o putum meresin long olketa, o paselem olketa.
7Olketa enemi blong yufala i bonem finis olketa taon blong yufala an spoelem finis kantri blong yufala. Olketa enemi ya i gohed fo stilim olketa kaikai long gaden blong yufala long ae blong yufala nomoa. An olketa gohed fo spoelem ples blong yufala. 8Distaem, Jerusalem wetem olketa pipol blong mi hu i stap long hem, hemi stap seleva olsem wanfala smolfala lif haos wea man hemi wakem long gaden blong hem. Jerusalem nao hemi olsem wanfala taon wea olketa enemi i raonem finis. 9Sapos Yawe hu hemi garem evri paoa hemi no bin sevem samfala long yumi, bae yumi olsem nao olketa pipol blong Sodom an Gomora wea olketa bin lus finis.#Jenesis 19:24-25; Rom 9:29.
10!Lisin kam gudfala long Mesij blong Yawe,#Jeremaea 1:2; Esikiel 1:3; Hosia 1:1; Joel 1:1; Jona 1:1; Maeka 1:1; Sefenaea 1:1; Hagae 1:1; Sekaraea 1:1; Malakae 1:1. yufala lida an pipol blong Jerusalem! !Yufala i barava olsem nao olketa lida an pipol blong Sodom an Gomora! !Tingting gudfala long olketa tising blong God blong yumi!
11Hem ya toktok blong Yawe. Hemi tok olsem, “Oltaem nomoa yufala gohed fo mekem sakrifaes long mi. ?Waswe, yufala tingse mi hapi wetem olketa samting ya? Mi taet nao long olketa sipsip wea yufala gohed fo bonem ya, an mi les tu long olketa gris blong olketa gudfala animol blong yufala. Mi barava les tumas long olketa blad blong olketa man buluka an olketa nanigot an olketa sipsip ya wea yufala gohed fo kilim olketa.#Emos 5:21-22. 12?Hu nao talem yufala fo kam wosipim mi? ?Waswe nao yufala go olobaot olsem insaet long haos blong mi? 13Mi nating laekem olketa ofaring wea yufala gohed fo givim kam long mi. An taem mi smelem insens#1:13 “insens” Insens hemi wanfala spesol paoda wea hemi smel naes tumas taem olketa prist i bonem long hot sakol insaet long Tambuhaos. blong yufala ya mi barava wande fo toraot nao. So bikos yufala gohed nomoa fo duim olketa ravis samting olsem, mi nating laekem tu fo lukim olketa Fist long Niumun an olketa Sabat de an olketa narafala de wea yufala save holem olketa miting long hem. 14Mi barava heitem olketa Fist long Niumun an olketa tambu de ya blong yufala. Olketa samting ya i mekem mi taet tumas nao olsem wea hemi hevi tumas long mi.
15“Sapos yufala liftimap han blong yufala fo prea kam long mi, bae mi tanem fes blong mi from yufala. Nomata yufala mekem staka prea kam long mi, bae mi no save lisin long yufala bikos yufala gohed fo duim olketa ravis samting olsem wea han blong yufala hemi fulap finis long blad. 16Yufala mas mekem yufala seleva klin. Yufala mas stop nao fo duim olketa ravis wei ya. 17Yufala mas lanem nomoa olketa wei wea hemi stret. Yufala mas kipim disfala wei fo duim olketa samting long stretfala wei, an yufala mas stretem nogud wei blong pipol hu i gohed fo spoelem olketa narafala pipol. Yufala mas helpem olketa pikinini wea mami an dadi blong olketa i dae finis, an olketa wido tu.”
18Hem ya toktok blong Yawe. Hemi tok moa olsem, “!Olketa! Yufala mas kam distaem mekem yumi stretem disfala samting. Nomata sin blong yufala hemi barava had tumas fo aotem olsem blad long waet kaleko, bat mi save mekem yufala fo kamap barava klin nomoa olsem snou o hea blong sipsip wea hemi waet fogud. 19Sapos yufala obeim mi, bae mi mekem yufala fo stap gudfala an yufala save garem olketa gudfala kaikai long olketa gaden blong yufala. 20Bat sapos yufala agensim mi, bae mi letem olketa enemi i kam faetem yufala an kilim yufala dae.”
Yawe nao hemi tok.
Pipol long Jerusalem i no obeim God
21 (Profet) !Olketa blong Jerusalem! Long bifoa yufala save obeim tumas olketa toktok blong Yawe, bat distaem yufala les nao long Yawe olsem juri woman wea hemi les long hasban blong hem. Fastaem, wei blong olketa pipol long taon ya hemi stret, bat distaem olketa kamap nogud tumas nao. Nomata pipol hu i kilim man dae i kamap plande tu. 22Fastaem, yufala olsem gudfala silva, bat distaem, yufala olsem ravis wea olketa pipol i redi fo torowem. Ya, bifoa yufala olsem nambawan waen, bat distaem, yufala olsem waen wea hemi fulap long wata. 23Olketa lida blong yufala i les fo obeim toktok blong mi an olketa fren wetem olketa man fo stil. Oltaem olketa barava hapi fo tekem seleni wea olketa nogud man i nilam olketa long hem. An olketa nating helpem olketa pikinini wea mami an dadi blong olketa i lus, wetem olketa wido tu.
24Dastawe nao Lod Yawe, hu hemi strongfala God blong Israel an hu hemi garem evri paoa, hemi talemaot disfala mesij. Hemi tok olsem, “Distaem yufala i enemi blong mi, an bae yufala no mekem eni moa trabol fo mi. Bae mi sensimbaek long yufala olketa nogud samting wea yufala bin duim long mi. 25Bae mi panisim yufala fo evri nogud samting wea yufala bin gohed fo duim an bae mi mekem yufala fo kamap klin moa, olsem taem wea man hemi bonem silva fo tekemaot olketa ravis long hem. 26An bae mi putumap olketa niufala lida wetem olketa niufala bikman olsem wea yufala bin garem bifoa. Long datfala taem, bae olketa pipol i save dat yufala pipol long Jerusalem i duim olketa samting wea hemi barava stret. Olketa save tu dat oltaem nomoa yufala tinghevi long Yawe.”
27 (Profet) Sapos yufala gohed fo jajem olketa pipol long stretfala wei, bae yufala kamap fri moa. An sapos yufala duim olketa samting wea hemi stret fogud, bae Yawe hemi sevem olketa pipol hu i tanem tingting blong olketa from sin blong olketa. 28Bat bae Yawe hemi kilim dae olketa hu i sin, an hu i agensim hem.
29Bae hemi mekem yufala fo sem fogud bikos yufala wosipim olketa narafala god andanit long olketa tambu ok tri an long tambu gaden blong yufala. 30Bae yufala dae, olsem strongfala ok tri wea hemi kamap drae, o gaden wea hemi no garem wata long hem. 31Bae olketa strongfala man blong yufala i olsem lif wea hemi barava drae fogud, an bae waka blong olketa hemi kamap olsem smolfala hot sakol. Bae faea hemi bonem olketa strongfala man ya, wetem waka blong olketa, an bae no eniwan save kilim dae disfala faea.
Currently Selected:
Aesaea 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.