Esikiel 1
1
Yawe hemi siusim Esikiel fo kamap profet
(1:1—3:21)
Profet Esikiel hemi lukim fas spesol drim
1Mi nao Esikiel, san blong Busi, an mi wanfala prist. Long mekfaev de long mekfoa mans long mekteti yia,#1:1 “mekteti yia” Hemi no klia wataem nao disfala mekteti yia hemi tokabaotem. Samfala pipol tingse hemi 31 Julae 567 B.K. long kalenda blong yumi. God nao hemi openem skae an som long mi samfala samting long spesol drim. Long datfala taem, mi bin stap saet long Keba Riva long lan long Babilonia wetem olketa narafala pipol wea olketa blong Babilonia bin fosim olketa fo lusim lan blong olketa an kam stap long Babilonia.#Aposol 7:56; Revelesin 19:11.
2-3Oraet, faefala yia bihaen long taem wea olketa bin fosim King Jehoeakin fo lusim lan blong hem an kam stap long Babilonia, mi stap saet long Keba Riva ya. An long mekfaev de long mans,#1:2-3 31 Julae 593 B.K. Yawe hemi talemaot Mesij blong hem long mi, an hemi tasim mi long paoa blong hem.#2 Kings 24:10-16; 2 Kronikols 36:9-10.
4Taem mi luk go, mi lukim wanfala bikfala klaod blong saekloun hemi gohed fo kamdaon from not. Bikfala laetning hemi laet kamaot from klaod ya, an skae raonem hemi barava braet fogud. An long ples wea laetning ya hemi gohed fo laet kam long hem, wanfala samting hemi saen tumas kam long hem olsem bras wea hemi saen fogud. 5Midol long saekloun ya, mi lukim fofala laef samting wea i luk olsem man.#Revelesin 4:6. 6Bat evriwan long olketa hemi garem fofala fes an fofala wing. 7Lek blong olketa hemi stret an long daon hemi olsem lek blong buluka. Olketa lek ya i saen fogud olsem bras wea man hemi saenem. 8Olketa laef samting ya evriwan i garem fofala fes an fofala wing, an andanit long evri wing, olketa garem han olsem man. 9Evriwan long fofala ya, hemi stretem tufala wing blong hem fo tasim go en long wing blong narawan long tufala saet long hem, wea hemi mekem fofala kona long wanfala skuea. Taem olketa muv go long eni saet, olketa muv olsem wanfala samting nomoa, an no eniwan long olketa hemi tane fo muv long saet wea olketa go long hem.
10Olketa laef samting ya i garem fofala fes long hed blong olketa. Long frant olketa garem fes blong man, long raet saet olketa garem fes blong laeon, long lef saet olketa garem fes blong buluka, an long bihaen olketa garem fes blong igol.#Esikiel 10:14; Revelesin 4:7. 11Olketa evriwan i stretem tufala wing blong olketa long antap, mekem en blong tufala wing blong wanfala hemi tasim en long wing blong narawan. Olketa kavarem bodi blong olketa long nara tufala wing moa wea olketa garem. 12Olketa laef samting ya evriwan i go stret long saet wea paoa blong God hemi mekem olketa fo go long hem, bat no eniwan long olketa hemi tane taem olketa go long wanfala saet o long narafala saet. 13Olketa laef samting ya i saenaot olsem olketa sakol long faea wea hemi laet bikfala. Wanfala samting olsem faea wea hemi laet bikfala hemi gohed fo muv olobaot long midol long olketa laef samting ya. Faea ya hemi gohed fo sutim aot faea olsem laetning.#Revelesin 4:5. 14Olketa laef samting ya i gohed fo muv go an kambaek kuiktaem tumas olsem flas blong laetning.
15Taem mi luk go long fofala laef samting ya, mi lukim fofala wil wea i stap long lan, wanfala long saet blong fofala laef samting evriwan.#Esikiel 10:9-13. 16Evriwan long fofala wil ya i luk semsem nomoa, an evriwan hemi saen olsem barava spesol ston olketa kolem tasis. An fofala wil ya evriwan i garem narafala wil insaet long hem. 17Taem olketa wil ya i muv, olketa save muv long eni saet wea fofala laef samting ya i muv long hem, an no eniwan long olketa hemi tane taem olketa go long wanfala saet o long narafala saet. 18Rim blong olketa wil ya hemi hae fogud an save mekem man hemi fraet tumas, bikos evriwan hemi garem plande ae wea i stap raonem olketa.#Revelesin 4:8. 19Taem olketa laef samting ya i muv, olketa wil ya i muv tu wetem olketa. An taem olketa muv goap insaet long ea, olketa wil ya i muv goap tu wetem olketa. 20Eni ples wea paoa blong God hemi mekem olketa laef samting ya fo muv go long hem, olketa wil ya tu i muv long hem bikos paoa blong olketa laef samting ya hemi stap long olketa wil ya. 21So, evritaem olketa laef samting ya i muv, o stap kuaet, o goap long ea, olketa wil ya i duim nao barava semsamting wea olketa duim, bikos paoa blong olketa laef samting ya hemi stap long olketa wil ya.
22Antap long hed blong olketa laef samting ya, wanfala samting olsem bikfala ruf wea hemi saen fogud olsem glas nao hemi stap. An taem man hemi lukim, hemi save mekem man hemi fraet tumas.#Revelesin 4:6. 23Olketa stanap andanit long ruf ya, an evriwan i stretem go tufala wing blong hem fo tasim go wing blong narawan, an kavaremap bodi blong olketa long nara tufala wing blong olketa. 24Taem olketa flae, mi herem noes long wing blong olketa hemi here olsem noes blong bikfala wev taem hemi brek antap long rif. An hemi olsem tu noes blong bikfala ami taem olketa faet, an hemi olsem tu voes blong God hu hemi garem evri paoa. Taem olketa stanap kuaet, olketa daonem wing blong olketa.#Revelesin 1:14-15; 19:6.
25Taem olketa stanap kuaet olsem, saon blong wanfala voes hemi kamdaon from antap long ruf ya wea hemi stap ovam hed blong olketa. 26Antap long ruf ya, wanfala samting olsem bikfala sea blong king wea olketa wakem long disfala barava spesol ston olketa kolem sapia, hemi stap long hem. An mi lukim samting wea hemi luk olsem wanfala man nao hemi sidaon long hem.#Esikiel 10:1; Revelesin 4:2-3. 27Stat long ples blong strap long man ya an goap long bodi blong hem, hemi saen tumas olsem bras wea hemi saen fogud, an hemi olsem wea faea hemi gohed fo laet bikfala insaet. Stat long ples blong strap an godaon long bodi blong hem, hemi olsem bikfala faea, wea hemi saen bikfala raonem man ya.#Esikiel 8:2. 28Disfala laet wea hemi saen bikfala raonem hem hemi barava luknaes tumas olsem olketa kala blong renbo. Bikfala laet ya hemi saen long bikfala paoa blong Yawe.
Taem mi lukim nomoa disfala samting, mi leidaon long daon nao wetem fes blong mi long graon, nao mi herem wanfala voes hemi tok kam long mi.
Currently Selected:
Esikiel 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.