Eksodas 1
1
Olketa pipol blong Ijip i mekful tumas long olketa blong Israel
1Jekob, wea narafala nem blong hem nao Israel, an olketa san blong hem i bin go long Ijip wetem olketa famili blong olketa. Hem nao nem blong olketa san blong Israel: 2Ruben, Simion, Livae, Jiuda, 3Isaka, Sebulun, Benjamin, 4Dan, Naftali, Gad, an Asa. 5An long datfala taem, Josef hu hemi wanfala brata blong olketa, hemi stap finis long kantri ya. Namba blong olketa man long laen ya hemi kasem seventi.#Jenesis 46:5-27. 6Bihaen, Josef wetem olketa brata blong hem an olketa pikinini blong olketa i stap long Ijip, go-go olketa evriwan i dae finis. 7Nomata olsem, olketa grani blong olketa wetem olketa hu i bon kam bihaen, olketa garem plande pikinini, wea namba blong olketa hemi kamap plande tumas, an olketa kamap strong fogud mekem olketa fulumapem lan ya.#Jenesis 47:27.
8Oraet, longtaem bihaen, wanfala deferen man hemi kamap king long Ijip, an hemi nating save nomoa long wanem Josef hemi bin duim long Ijip bifoa. 9An king ya hemi tok olsem long olketa pipol blong hem, “Olketa pipol blong Israel i gohed fo kamap plande tumas nao, an olketa gohed fo kamap strong moa winim yumi tu. 10Yumi mas faendem wanfala wei fo stopem olketa, nogud olketa spoelem yumi. Sapos yumi no duim olsem, taem eni faet hemi kamap, bae olketa joen wetem olketa enemi blong yumi, faet agensim yumi an bae olketa winim yumi, an ranawe from ples ya.”
11So olketa blong Ijip i putum samfala had bos fo fosim olketa blong Israel fo waka olsem slev. Olketa duim olsem fo mekful long olketa. Long disfala wei olketa fosim olketa fo wakem tufala bikfala taon long Pitom an Rameses, wea king hemi kipim kaikai an olketa narasamting long hem. 12Bat nomata olsem, namba blong olketa blong Israel hemi gohed fo kam antap moa, an olketa kamap strong moa long evri ples long kantri ya. Nao olketa blong Ijip i gohed fo fraet moa long olketa. 13So olketa blong Ijip i fosim olketa fo wakahad tumas winim bifoa, 14an gohed fo mekem laef blong olketa nogud tumas. Olketa gohed fo fosim olketa blong Israel fo wakem olketa brik, an fo wakem olketa bikfala haos long olketa taon, an fo wakem olketa gaden blong olketa, an oltaem, olketa spoelem olketa an nating sore long olketa nao.
15Nao king ya hemi kolem tufala woman blong olketa Hibru#1:15 “Hibru” Toktok ya, hemi toktok wea olketa blong Ijip long datfala taem i kolem olketa long laen blong Israel. Lukim long Jenesis 39:14,17; 40:15; 41:12. wea tufala gohed fo helpem olketa woman blong olketa, taem olketa bonem pikinini. Nem blong tufala ya nao, Sifra an Pua. 16Hemi tok olsem long tufala, “Distaem, taem yutufala helpem olketa woman blong yufala Hibru wea i bonem pikinini, sapos yutufala lukim dat pikinini hemi boe, yutufala mas kilim dae, bat sapos hemi gele, letem hem laef.”
17Bat tufala no save duim olsem wea king hemi talem, bikos tufala tinghae long God. Taem olketa pikinini boe blong olketa i bon, tufala letem olketa fo laef nomoa. 18Nao king hemi kolem tufala moa, an hemi tok olsem long tufala, “!Tufala! ?Waswe nao yutufala letem olketa pikinini boe ya fo laef nomoa?”
19Tufala tok olsem, “O king, bat mifala Hibru woman i deferen from olketa woman blong Ijip. Hemi isi nomoa taem mifala bonem pikinini, an mifala save bonem kuiktaem tu. Dastawe nao, taem wanfala long mitufala i no kasem ples ya yet, pikinini blong hem hemi bon finis nao.” 20-21Bikos tufala ya i gohed fo tinghae olsem long God, God hemi gud long tufala, an hemi mekem wea tufala garem olketa pikinini blong tufala. An olketa long laen blong Israel i gohed fo kamap plande moa, an olketa gohed fo kamap strong moa. 22So king hemi tokstrong long olketa pipol blong hem olsem, “Sapos eni Hibru woman hemi bonem pikinini boe, yufala mas torowem pikinini ya long Nael Riva fo hemi dae, bat letem evri pikinini gele hemi laef.”
Currently Selected:
Eksodas 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.