2 Kronikols 1
1
King Solomon hemi askem God fo mekem hem waes
(1 Kings 3:1-15)
1Nao Solomon hu hemi san blong King Deved, hemi kamap wanfala barava strongfala king, bikos Yawe hu hemi God blong hem, hemi stap wetem hem an hemi mekem hem fo garem paoa.
2King Solomon hemi sendem toktok go long olketa deferen komanda blong ami, an olketa bikman long Israel, an olketa lida long olketa laen, an olketa narafala pipol blong Israel. 3Hemi talem olketa fo go wetem hem long tambuples long taon long Gibeon. Olketa go long dea, bikos Tambu Haostent hemi stap yet long hem. Hem nao Tambu Haostent wea Mosis hu hemi wakaman blong Yawe, hemi bin wakem long drae eria. 4Bat Tambu Boks blong God, hemi stap finis long wanfala haostent long Jerusalem. Hem nao haostent wea King Deved hemi bin putumap long taem wea olketa bin go long Kiriat-Jearim fo karim kam Tambu Boks ya.#2 Samuel 6:1-17; 1 Kronikols 13:5-14; 15:25—16:1. 5Long frant blong Tambu Haostent blong Yawe long Gibeon, Olta fo Bonem Sakrifaes wea Besalel hemi bin wakem long bras hemi stap. Besalel ya hemi san blong Uri hu hemi san blong Hua. Nao Solomon an olketa bikman ya i go wosipim Yawe long dea, an askem hem fo lidim olketa.#Eksodas 38:1-7. 6Long frant blong Tambu Haostent ya, Solomon hemi mekem olketa prist fo bonem 1,000 sakrifaes long olta ya.
7Long datfala naet, God hemi kam long Solomon long wanfala spesol drim, an hemi tok olsem long hem, “Enisamting wea yu askem long mi, bae mi givim long yu.”
8-9Solomon hemi ansa olsem, “Yawe God, oltaem nomoa, yu bin kaen tumas long dadi blong mi, Deved. An distaem yu mekem mi fo sensim hem fo kamap king. Promis wea yu bin mekem bifoa wetem dadi blong mi, plis yu mekem hem fo kamap. Yu bin mekem mi fo king finis, an mi gohed fo rul ovarem olketa pipol wea i plande fogud an no eniwan hemi save kaontem olketa.#Jenesis 13:16; 28:14; 1 Kronikols 27:23. 10Plis, mi laekem fo yu givim waes an save long mi, mekem mi save lidim olketa pipol blong yu long stretfala wei. Sapos nomoa, bae mi no save rul ovarem olketa.”
11Yawe hemi tok olsem long hem, “!Yu bin siusim wanfala stret samting! Yu no askem mi fo mekem yu kamap risman an garem olketa gudfala samting, an yu no askem mi fo mekem yu garem biknem, o longfala laef, o fo mi kilim olketa enemi blong yu. Bat yu askem mi fo waes an save, mekem yu save rul ovarem olketa pipol blong mi wea mi bin mekem yu king blong olketa. 12So bae mi givim yu waes an save, an bae mi mekem yu fo kamap risman, an fo yu garem staka gudfala samting, an fo yu garem biknem. Bae mi onarem yu winim olketa king wea i rul fastaem long yu, an winim olketa wea bae i rul bihaen long yu.”
13Den Solomon hemi lusim disfala tambuples long Gibeon wea Tambu Haostent hemi stap long hem, an hemi gobaek long Jerusalem. Hemi gohed fo rul ovarem pipol blong Israel.
King Solomon hemi ris tumas
(1 Kings 10:26-29)
14Solomon hemi garem 1,400 kaat fo faet an 12,000 hos. Hemi kipim samfala long Jerusalem, an hemi putum olketa narafala long samfala spesol taon long Israel.#1 Kings 4:26. 15Solomon hemi mekem silva an gol fo kamap plande fogud long Jerusalem olsem ston nating nomoa. An hemi mekem timba blong sida tri hemi kamap plande fogud olsem enikaen timba wea hemi grou olobaot nomoa long olketa hil.
16Olketa bisnisman blong Solomon i baem olketa hos blong hem from Musri an Kue.#1:16 “Musri an Kue” Musri an Kue i tufala olfala nem blong eria wea tude olketa kolem Kapadosia an olketa Taurus maonten long Teki. 17An olketa baem olketa kaat fo faet long Musri tu. Long Musri, praes blong wanfala kaat fo faet hemi 600 silva seleni, an praes blong wanfala hos hemi 150 silva seleni. An olketa bisnisman blong Solomon i salem olketa hos an kaat fo faet go long olketa king long laen blong Het, an long olketa king long Siria.#Diutronomi 17:16.
Currently Selected:
2 Kronikols 1: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.