RISIMU RA TINSIMU 1
1
1Risimu ra tinsimu, ri nga ra Solomoni.
2A a ndzi ntswontswe hi ku ntswontswa ka nomu wa yena!
Hikuva rirhandzu ra wena ri nandziha ku tlula vhinyo.
3Maakha ya wena ya ni risuna leri nun'hwelaka;
Vito ra wena ri fana ni mafurha lama chuluriweke;
Hikwalaho vanhwanyana va ku rhandza.
4Ndzi koke, hi ta ku landzela hi le ndzhaku!
Hosi a yi ndzi tise etindlwini ta yona;
Hi ta tsaka, hi tsakela wena,
Hi ta dzunisa rirhandzu ra wena leri tlulaka vhinyo;
Va ku rhandza hakona, lava ku rhandzaka.
5Ndzi wa ntima, kambe ndzi sasekile, n'wina, vanhwanyana va Yerusalema,
Ndzi fana ni matende ya le Kedari, ni tinguvu ta mitsonga ya Solomoni.
6Mi nga ndzi languti, hikuva ndzi wa ntima,
Hikuva dyambu ri ndzi hisile;
Vana va manana, va ndzi kariherile;
Va ndzi endla muhlayisi wa vhinya;
Kambe vhinya leyi nga ya mina hi xiviri a ndzi yi rindzanga.
7Ndzi byele, wena la rhandziwaka hi moya wa mina,
Laha u riselaka kona, laha u vundziselaka mitlhambi ya wena ninhlekanhi;
Hikuva ndzi nga fana ha yini ni wansati la hambukelaka
Emitlhambini ya vanakuloni xana?
8Loko u nga swi tivi, wena la sasekeke exikarhi ka vavasati,
Famba u landzelela mitila ya mitlhambi,
U risa swimbutana swa wena emahlweni ka mitsonga ya varisi.
9Ndzi ku fanisile, murhandziwa wanga,
Ni ntlawa wa tihanci leti kokaka tigolonyi ta Faro.
10Marhama ya wena ma sasekile exikarhi ka tinxaxa ta swingwavila,
Ni nhamu ya wena hi mikarara ya vuhlalu.
11Hi ta ku endlela tiketana ta nsuku ti ni tikunupu ta silivhere.
12Kakuloko hosi ya ha tshamise etafuleni ra yona,
Narda ya mina yi ri karhi yi humesa ku nun'hwela ka yona.
13Murhandziwa wa mina u le ka mina ku fana ni nyandza ya mirhi,
Leyi tshamaka exifuveni xa mina.
14Murhandziwa wa mina u le ka mina ku fana ni xitluka xa troena
Evhinyeni ya le Eni-Gedi.
15Vona, u sasekile, murhandziwa wa mina, u sasekile!
Mahlo ya wena ma fana ni ya tuva.
16Murhandziwa wa mina vona, u sasekile, wa rhandzeka!
Byetlelo bya hina hi lebya rilambyana.
17Xivava xa yindlu ya hina i xa kedari;
Kutani timbalelo ta hina i ta kipresi.
Currently Selected:
RISIMU RA TINSIMU 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.