MARKA 1
1
Ta dyondzo ya Yohane Mukhuvuri.
1Masungulo ya Evhangeli ya Yesu Kriste. 2 Hilaha ku tsariweke hi muprofeta Esaya leswaku: “Vonani, ndzi rhuma emahlweni ka wena ntsumi ya mina, leyi nga ta lunghisa ndlela ya wena.” 3 Rito ra loyi a huwelelaka emananga ri ku: “Lunghisani ndlela ya Hosi, mi lulamisa magondzo ya yena.” 4Yohane a humelele emananga, a khuvula vanhu, a dyondzisa ta nkhuvulo wa ku hundzuka loku yisaka eku rivaleriweni ka swidyoho. 5Kutani vanhu va tiko ra Yudiya ni ra Yerusalema a va ta eka yena, a va khuvuriwa hinkwavo enambyeni wa Yordani, va ri karhi va tivula swidyoho swa vona.
6Yohane a a ambele voya bya kamela, a tibohile xisuti hi vamba ra dzovo, a dya tinjiya ni vulombe bya nhova. 7A a dyondzisa, a ku: “Wa ta un'wana, endzhaku ka mina loyi a ndzi tlulaka hi matimba, loyi ndzi nga faneriki ku korhama emahlweni ka yena, ndzi tshunxa tinghole ta tintanghu ta yena. 8Loko ndzi ri mina, ndzi mi khuvula hi mati, kambe yena u ta mi khuvula hi Moya lowo Kwetsima.”
Ta ku khuvuriwa ni ku ringiwa ka Yesu.
9Emikarhini yoleyo, Yesu a huma eNazareta, muti wa Galeliya, a ya khuvuriwa eYordani hi Yohane. 10Kakuloko a huma ematini, a vona tilo ri pfuriwa, Moya wu xikela henhla ka Yesu, wu fana ni tuva; 11kutani rito leri humaka ematilweni ri twakala, ri ku: “U N'wananga la rhandziwaka, loyi ndzi titsakelaka ha yena.” 12Kutani hi nomu lowu Moya wu n'wi susumetela emananga; 13a ya tshama emananga hi masiku ya mune wa makume, a ri karhi a ringiwa i Satana, a ri exikarhi ka swivandzana, tintsumi a ti n'wi tirhela.
Ta Yesu loko a sungula ku dyondzisa, a vitana vadyondzisiwa lavo rhanga.
14Kuteloko Yohane a bohiwile, Yesu a fika eGaleliya, a vula Evhangeli ya ku fuma ka Xikwembu, a ku: 15“Mikarhi yi hetisekile, ku fuma ka Xikwembu ku tshinerile; hundzukani mi pfumela Evhangeli.”
16Loko a a ri karhi a famba, a lulama ni lwandle ra Galeliya, a vona Simoni na Andriya, makwavo, va hoxa rikoka ra vona elwandle, hikuva a va ri vaphasi va tinhlampfi. 17Yesu a ku eka vona: “Ndzi landzeni, ndzi ta mi endla vaphasi va vanhu.” 18Va hatlisa va tshika tinkoka ta vona, va n'wi landza. 19Kutani a ya emahlweni, a kuma Yakobo, n'wana Zebediya, na Yohane makwavo va ri ebyatsweni, va bohelela tinkoka ta vona. 20Kuteloko a va vitanile va siya tata wa vona, Zebediya, ebyatsweni swin'we ni vatirhi, va n'wi landza.
Ta Yesu loko a dyondzisa Kapernawume.
21Kutani va nghena eKapernawume. Kute hi siku ra Savata, Yesu a nghena esinagogeni, a dyondzisa. 22Kambe va hlamala hi dyondzo ya yena, hikuva a a va dyondzisa swa nga hi vuhosi, ku nga ri kukota vatsari.
23Esinagogeni ya vona, munhu a a ri kona la ngheniweke hi moya wa thyaka, a huwelela, a ku: 24“Mhaka ya hina na wena hi yihi, Yesu wa Nazareta? U tile ku hi lovisa xana? Ndza ku tiva leswaku u Mukwetsimi wa Xikwembu.” 25Kambe Yesu a wu tshinya, a ku: “Miyela, u huma eka yena.” 26Kutani moya wa thyaka wu n'wi tsekatsekisa hi matimba wu huwelela hi rito lerikulu, kutani wu huma eka yena. 27Hinkwavo va hlamala, va vutisana, va ku: “I yini? I dyondzo leyintshwa xana, leswi a tshinyaka hi vuhosi hambi yi ri mimoya leya thyaka, kutani ya n'wi yingisa?” 28Ku twakala ka yena ku hatlisa ku hangalaka hi matlhelo hinkwawo ya Galeliya.
29Enkarhini wolowo, Yesu a huma esinagogeni, a ya na Yakobo na Yohane endlwini ya Simoni na Andriya. 30Mukon'wana wa Simoni a a etlele emasangwini, a vabya hi ku hisa ka miri, kutani va hatlisa va n'wi vula ka Yesu. 31Yesu, kuteloko a tshinele a n'wi khoma hi voko a n'wi pfuxa; hi nomu lowu dari ri n'wi tshika kutani a va tirhela.
Ta Yesu loko a fambafamba Galeliya, a hanyisa vavabyi.
32Nimadyambu, loko ri perile va tisa ka Yesu hinkwavo lava ngi va ri ni mavabyi, ni lava ngi va ri ni mademona. 33Muti hinkwawo wu hlengeletana enyangweni. 34Kutani a horisa vanhu lavo tala, lava vabyaka hi mavabyi layo tala, a hlongola ni mademona layo tala, kambe a nga pfumelanga leswaku mademona ma vula leswaku ma n'wi tiva.
35Nimpundzu a pfuka bya ha ri vusiku, a huma endlwini, a ya mananga, a ya khongela kona. 36Kambe Simoni ni lava ngi va ri na yena va ya n'wi lava. 37Kuteloko va n'wi kumile va ku eka yena: “Hinkwavo va ku lava.” 38Yesu a ku eka vona: “A hi yeni kun'wana, emitini leyi yi hi rhendzeleke, ndzi ta dyondzisa na kona, hikuva ndzi tele swona.” 39A dyondzisa emasinagogeni ya vona, etikweni hinkwaro ra Galeliya a ri karhi a hlongola mademona.
40Munhu wa nhlokonho a ta eka yena, a n'wi khongela, a khinsama hi matsolo emahlweni ka yena, a ku: “Loko u swi rhandza, u nga ndzi basisa.” 41Yesu a n'wi twela vusiwana, a tshambuluta voko, a n'wi khumba, a ku eka yena: “Ndza swi rhandza, u basisiwa.” 42Loko a vurisile sweswo, nhlokonho yi n'wi sukela, a basisiwa. 43Kutani Yesu a n'wi laya hi matimba, a n'wi tlherisa hi ku hatlisa, a ku eka yena: 44“U nga tshuki u byela munhu nchumu, kambe famba u tikombisa ka muprista, u tlangela ku horisiwa ka wena hi leswi lerisiweke hi Muxe, xi ta va xikombiso eka vona.” 45Kambe yena loko a sukile, a sungula ku vula timhaka leto tala, a hangalasa leswi endliweke; kutani Yesu a tsandzeka ni ku nghena emutini a nga tiviwi, kambe a titshamela handle emananga, kutani vanhu va huma ematlhelweni hinkwawo, va va ka yena.
Currently Selected:
MARKA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.