YouVersion Logo
Search Icon

YOHANE 13

13
Ta Paseka. Ta Yesu loko a hlantswa milenge ya vadyondzisiwa va yena.
1Nkhuvo wa Paseka loko wu lave ku va kona, Yesu, hi ku tiva leswaku nkarhi wa yena wu fikile wa ku suka emisaveni, ni ku ya eka Tata wa yena, leswi a nga rhandza vanhu va yena va le misaveni, u va rhandze ni ku yisa eku heteleleni. 2Kuteloko ka ha laleriwa, hikuva Diyavulosi a a rhangile a nghenisa embilwini ya Yudasi Iskariyota, n'wana Simoni, ku navela ku n'wi xenga. 3Yesu, hi ku tiva leswaku Tata wa yena u vekile hinkwaswo emavokweni ya yena, ni leswaku u humile eka Xikwembu, kutani u ya eka Xikwembu, 4a suka a yima exilalelweni, a tshunxa nguvu ya yena, a teka nceka, a titsimba ha wona. 5Kutani a chela mati enkambaneni, a sungula ku hlantswa milenge ya vadyondzisiwa va yena, a sula hi nceka lowu a titsimbeke ha wona. 6A ta ni ka Simoni Petro; yeloyi a ku eka yena: “Hosi, xana wena u ta ndzi hlantswa milenge xana?” 7Yesu a n'wi hlamula, a ku: “Sweswi, a ku twisisi lexi ndzi xi endlaka, kambe u ta xi twisisa endzhaku.” 8Petro a ku eka yena: “U nga ka u nga ndzi hlantswi milenge, ni siku ni rin'we!” Yesu a n'wi hlamula, a ku: “Loko ndzi nga ku hlantswi, a wu na mhaka na mina.” 9Simoni Petro a ku eka yena: “Hosi yi nga vi milenge ntsena, kambe na wona mavoko ni nhloko.” 10Yesu a ku eka yena: “La hlantswiweke a nga na ku hlantswiwa loko yi nga ri milenge ntsena, kutani u ta basa hinkwako; loko mi ri n'wina, mi basile, kambe a hi hinkwenu.” 11Hikuva a a tiva la nga ta n'wi xenga; hikwalaho a nga te: “A mi basanga hinkwenu.”
12Kuteloko a hlantswile milenge ya vona, a tekile ni nguvu ya yena, a tlhela a ya tshama etafuleni, a ku eka vona: “Xana ma swi twisisa leswi ndzi mi endleke swona-ke? 13Mi ndzi vula Mufundhisi ni Hosi, swona ma vurisa, hikuva ndzi yena. 14Kutani loko mina ndzi nga Hosi ni Mufundhisi, ndzi mi hlantswile milenge, na n'wina mi fanele ku hlantswana milenge. 15Hikuva ndzi mi vekele ntila, leswaku mi endla kukotisa leswi ndzi mi endleke swona.
16“Ndzi vurisile ndzi ri eka n'wina: Nandza a hi nkulu eka hosi ya yena ni murhumiwa a hi nkulu eka la n'wi rhumeke. 17Loko mi tiva timhaka teto, mi katekile loko mi ti endla. 18 A ndzi vuri n'wina hinkwenu, ndzi tiva lava ndzi va hlawuleke; kambe hileswaku Tsalwa ri ta endleka leri nge: ‘La dyaka vuswa na mina, u ndzi khadlanyile hi xirhendze.’ 19Ndzi mi byela mhaka leyi, kaharhi sweswi, yi nga si humelela, leswaku siku yi humelelaka, mi ta pfumela leswaku hi mina Kriste. 20Ndzi vurisile ndzi ri eka n'wina: La amukelaka loyi ndzi n'wi rhumaka, u mukela mina; la ndzi amukelaka, u amukela la ndzi rhumeke.”
Ta Yesu loko a boxa ku xenga ka Yudasi.
21Kuteloko Yesu a vurile timhaka teto, a vaviseka emoyeni, a tiyisa, a ku: “Ndzi vurisile ndzi ri eka n'wina: Un'wana wa n'wina u ta ndzi xenga.” 22Kwalaho vadyondzisiwa va yena va langutana, va kanakana leswaku u hlambanyisa mani xana. 23Kambe un'wana wa vadyondzisiwa va yena, loyi Yesu a n'wi rhandzaka, a tiseketele exifuveni xa Yesu. 24Kutani Simoni Petro a n'wi tshunyeta ku vutisa leswaku a vula mani. 25Yeloyi, kuteloko a korhamile exifuveni xa Yesu, a n'wi vutisa, a ku: “Hosi, i mani xana?” 26Yesu a hlamula, a ku: “Hi loyi ndzi nga ta n'wi nyika xiphemu loko ndzi petile.” Kuteloko a petile, a xi nyika Yudasi Iskariyota, n'wana Simoni. 27Kuteloko a tekile xiphemu, Satana a nghena eka yena. Kutani Yesu a ku eka yena: “Leswi u swi endlaka, hatlisa u swi endla.” 28Kambe a ku vanga na un'we wa lava tshameke eswakudyeni, la nga twisisa laha marito lawa ma yisaka kona. 29Hikuva van'wana a va anakanya leswaku leswi Yudasi a nga yena mutameri wa nkwama wa mali, kumbe Yesu a a n'wi byela ku xavela nkhuvo leswi va swi pfumalaka, hambi ku ri ku nyika xisiwana leswo karhi. 30Kuteloko a tekile xiphemu, a hatlisa a huma, byi ri vusiku.
Ta Yesu loko a khongotela vadyondzisiwa va yena ku rhandzana.
31Kuteloko a humile, Yesu a ku: “Sweswi, N'wana wa Munhu u dzunisiwile, kutani Xikwembu xi dzunisiwile ha yena. 32Loko Xikwembu xi dzunisiwe ha yena, na xona Xikwembu xi ta n'wi dzunisa eka xona, kambe xi ta hatlisa xi n'wi dzunisa.
33“Vana vanga, ndza ha ri na n'wina ku nga ri kungani, mi ta ndzi lava, kambe hilaha ndzi nga byela Vayuda hakona, ndzi ku: ‘Laha ndzi yaka kona, mi nga ka mi nga ti sweswi, ndzi vurisa sweswo eka n'wina.’ 34Ndzi mi vekela nawu lowuntshwa, hileswaku mi rhandzana; kukotisa leswi ndzi mi rhandzeke, rhandzanani, na n'wina. 35Kungakuloko mi rhandzana, hilaha hinkwavo va nga ta tiva leswaku mi vadyondzisiwa va mina.”
36Simoni Petro a ku eka yena: “Hosi, u ya kwihi?” Yesu a n'wi hlamula, a ku: “Laha ndzi yaka kona, u nga ka u nga ndzi landzi sweswi; kambe ndzhaku u ta ndzi landzela kona.” 37Petro a ku eka yena: “Hosi, ndzi nga tsandzeka ha yini ku ku landza sweswi, xana? A ndzi ta tshika vutomi bya mina hikwalaho ka wena.” 38Yesu a n'wi hlamula, a ku: “U ri u nga tshika vutomi bya wena hikwalaho ka mina xana? Ndzi vurisile ndzi ri eka wena: Nkuku loko wu nga si ringa, u ta va u ndzi landzurile kanharhu.

Currently Selected:

YOHANE 13: TSO29

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy