VAKOLOSA 1
1
Ku xeweta.
1Pawulo, muapostola wa Yesu Kriste hi ku rhandza ka Xikwembu, na Timotiya makwerhu;
2Eka vamakwerhu lava nga eka Yesu Kriste, vakwetsimi ni vapfumeri lava nga eKolosa;
Tintswalo ni ku rhula a swi ve na n'wina, swi huma eka Xikwembu Tatana, ni le ka Hosi Yesu Kriste.
Pawulo a khensa rirhandzu ni ku pfumela ka Vakolosa.
3Hi khensa Xikwembu, tata wa Hosi ya hina Yesu Kriste, emikhongelweni leyi hi nga rhuteriki ku mi khongelela ha yona, 4hi ri karhi hi byeriwa ku pfumela ka n'wina eka Yesu Kriste, ni rirhandzu ra n'wina eka vakwetsimi hinkwavo, 5hikwalaho ka ku tshemba loku mi vekeriweke kona ematilweni, loku mi rhangeke mi ku yingisa hi rito ra ntiyiso ra Evhangeli, 6leyi fikeke eka rikwenu kukotisa leswi yi fikeke ematikweni hinkwawo, laha yi vekaka mihandzu kona, kukotisa leswi yi swi endlaka exikarhi ka n'wina, ka hari mpfhuka mi yingisa mi vuya mi twisisa tintswalo ta Xikwembu kunene; 7hilaha mi dyondzisiweke hakona hi Epafra, murhandziwa wa mina, ni nakulorhi emitirhweni ni le vulandzeni, 8la nga exikarhi ka n'wina, nandza la dzunekaka wa Kriste; hi yena la nga hi tivisa rirhandzu leri nga eka n'wina hi Moya.
9Hikwalaho, na hina, mpfhuka hi yingisa sweswo, a hi rhutelangi ku mi khongelela, ni ku mi kombelela leswaku mi tala hi ku tiva ku rhandza ka xona, hi vutlhari hinkwabyo, ni ku anakanya hinkwako ka Moya; 10leswaku mi famba hi mukhuva lowu fanelaka Hosi, mi n'wi tsakisa hinkwako, mi veka mihandzu emitirhweni leyo saseka hinkwayo, mi va mi kula eku tiveni ka Xikwembu, 11mi ri karhi mi tiyile ematlhelweni hinkwawo hi matimba yo kwetsima ya xona, mi ta va ni ku chivirika hinkwako ni ku yingisela, mi ri ni ku tsaka. 12Khensani Tatana la nga mi endla lava lulameleke ku va ni ku averiwa endzhakeni ya vakwetsimi eku vonakaleni; 13kutani u hi humesile ematimbeni ya munyama, a hi nghenisa eku fumeni ka N'wana wa yena la rhandziwaka, 14yeloyi hi nga ni ku kutsuriwa ha yena, ku nga ku rivaleriwa ka swidyoho.
Vukulukumba bya Kriste.
15Hi yena a nga xifaniso xa Xikwembu lexi nga voniwiki, mativula ya hinkwaswo leswi nga endliwa. 16Hikuva swilo hinkwaswo swi tumbuluxiwile ha yena, le matilweni ni la emisaveni, leswi voniwaka ni leswi nga voniwiki, ni xiluvelo, ni vuhosi, ni tindhuna, ni vafumi. Hinkwaswo swi tumbuluxiwe hi yena, kambe swi endleriwe yena.
17Hi yena la nga emahlweni ka swilo hinkwaswo, kutani hinkwaswo swi yimisiwe hi yena. 18Kambe hi yena nhloko ya miri wa Kereke; hi yena ku sungula ni mativula exikarhi ka vafi, a ta va lowo rhanga ematlhelweni hinkwawo. 19Hikuva swi tsakisile Xikwembu leswaku ku tala hinkwako ku tshama eka yena; 20ni ku hlanganisi swilo hinkwaswo hi yena, hambi swi ri leswi nga emisaveni, hambi swi ri leswi nga ematilweni hikuva hi yena la endleke ku rhula hi ngati ya xihambano xa yena.
21Na n'wina, a mi ri ekule khale, a mi ri valala hi miehleketo ya n'wina ni mitirho leyo biha ya n'wina; 22kutani u mi hlanganisile hi miri wa yena wa nyama, hi rifu ra yena, a ta mi humesa emahlweni ka yena mi basile, mi nga ri na xivati ni nandzu; 23loko kunene mi tiya emasungulweni ya ku pfumela, mi nga tsekatseki, mi nga cukumeti ku tshemba ka Evhangeli leyi mi yi tweke, yi nga yona leyi nga vuriwa eka swivumbiwa hinkwaswo swa le hansi ka tilo, yoleyo mina Pawulo ndzi endliweke nandza wa yona.
Mitirho ya Pawulo.
24Sweswi, ndzi titsakela emaxangwini lama ndzi humelelaka hikwalaho ka n'wina, kutani ndzi hetisa emirini wa mina, leswi seleke swa ku xaniseka ka Kriste, hikwalaho ka miri wa yena yi nga Kereke. 25Ndzi endliwile nandza wa yona hi ku avela loku Xikwembu xi ndzi aveleke kona hikwalaho ka n'wina, ndzi va ndzi mi letela rito hinkwaro ra Xikwembu; 26xi nga xihundla lexi fihliweke emikarhini hinkwayo, ni le tinxakeni hinkwato, kambe sweswi, xi humeseriwe vakwetsimi va xona, 27valavo Xikwembu xi rhandzeke ku va tivisa rifuwo ra ku kwetsima ka xihundla xolexo exikarhi ka vamatiko; xi nga leswaku Kriste u le ka n'wina, yena ku nga ku tshemba ka ku kwetsima. 28Hi yena yeloyi hi n'wi vulaka, hi ri karhi hi pfuxa vanhu hinkwavo, hi dyondzisa vanhu hinkwavo eku tlhariheni hinkwako, hi ta humelerisa vanhu hinkwavo va nga lava hetisekeke eka Kriste. 29Hi leswi ndzi swi tirhelaka, loko ndzi lwa hi matimba ya yena lama tirhaka ngopfu eka mina.
Currently Selected:
VAKOLOSA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.