2 TIMOTIYA 1
1
Ku xeweta ni ku khensa.
1Pawulo, muapostola wa Yesu Kriste, hi ku rhandza ka Xikwembu, hikwalaho ka ku tshembisiwa ka vutomi lebyi nga ka Yesu Kriste;
2Eka Timotiya, n'wananga la rhandziwaka; tintswalo, ni ku tsetselela, ni ku rhula, a swi ve na wena, swi huma eka Xikwembu Tatana, ni ka Yesu Kriste, Hosi ya hina.
3Ndzi khensa Xikwembu lexi ndzi xi tirhelaka hi ripfalo lero basa kukotisa vatatana va khale, hikuva a ndzi rhuteri ku ku anakanya emikhongelweni ya mina, vusiku ni nhlekanhi, ndzi ri karhi ndzi anakanya mihloti ya wena, 4kutani ndzi navela ngopfu ku ku vona leswaku ndzi va ni ku tsaka; 5ndzi anakanya ni ku pfumela loku baseke loku nga eka wena ni loku ngi ku akile khale eka Luwisa kokwa wa wena, ni ka Yunika mana wa wena; kutani ndzi tshemba ngopfu leswaku ku kona, ni ka wena.
Timotiya a khongoteriwa ku tiya ni ku chivirika.
6Hikwalaho, ni sweswi, ndza ha ku tsundzuxa ku pfuxa, u kondletela ku nyika ka Xikwembu loku nga eka wena hi ku tlhandleka ka mavoko ya mina. 7Hikuva Xikwembu a xi hi nyikangi moya wa vutoya, kambe i moya wa matimba, ni wa rirhandzu, ni wa vutlhari. 8Hikwalaho, u nga tshuki u va ni tingana hikwalaho ka vumbhoni bya Hosi ya hina, hambi ku ri hikwalaho ka mina, mubohiwa wa yona; kambe u amukela swin'we na mina ku vaviseka ka Evhangeli, hi matimba ya Xikwembu, 9lexi hi hanyiseke, kutani xi hi vitanile hi ku vitana loku kwetsimaka, ku nga ri hikwalaho ka mitirho ya hina, kambe hi ku tirhandzela ka xona, ni tintswalo leti hi ti nyikiweke ha Yesu Kriste, mikarhi yi nga si va kona, 10kutani sweswi ta ha ku vonakisiwa hi ku humelela ka Mulondzovoti wa hina, Yesu Kriste, la heriseke matimba ya rifu, la humeseke vutomi eku vonakaleni, ni ku tshama loku nga heriki hi Evhangeli, 11yoleyi ndzi vekiweke muvuri, ni muapostola, ni mufundhisi wa yona eka vamatiko.
12Na swona, hikwalaho ka mhaka leyi, ndzi twisiwa ku vaviseka loku; kambe a ndzi khomiwi hi tingana hakona, hikuva ndzi tiva loyi ndzi pfumeleke eka yena, kutani ndzi tshembisisa swinene leswaku u ni matimba ya ku ndzi hlayisela leswi ndzi swi vekeke eka yena; siku leri ri ko ri humelela. 13Tiyisela entileni wa timhaka ta ku hanyisa, leti u ti tweke eka mina, eku pfumeleni ni le rirhandzwini leri nga eka Yesu Kriste. 14U hlayisa hi Moya lowo Kwetsima lowu akeke eka hina, leswinene leswi u vekeriweke swona.
Vapfumeri van'wana.
15Wa swi tiva leswaku hinkwavo va Asiya va ndzi fularhele; exikarhi ka vona ku na Figelo na Hermogene. 16Hosi a yi tsetselele yindlu ya Onesiforo hikuva u ndzi chavelele kanyingi kambe a nga vanga na tingana hikwalaho ka ku bohiwa ka mina. 17Kambe siku a fikaka eRhoma, u ndzi lave hi nghinghiriko a ko a ndzi kuma. 18Hosi a yi n'wi humesele tintswalo emahlweni ka Hosi siku leriya! Kambe hinkwaswo leswi a ndzi tirheleke swona Efesa, wa swi tiva swinene.
Currently Selected:
2 TIMOTIYA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.