YouVersion Logo
Search Icon

2 SAMIELE 1

1
Ta Davhida loko a rila Sawulo na Yonatani hi risimu.
1Kuteloko Sawulo a file, ni loko Davhida a vuyile eku hlaseleni ka Vaamaleke, Davhida a tshama masiku mambirhi eSikilaga. 2Siku ra vunharhu, ku fika munhu la humaka enyimpini, eka Sawulo, tinguvu ta yena ti handzuriwile, a a ri ni ntshuri enhlokweni; a ta eka Davhida, kutani a wela ehansi, a khinsama. 3Davhida a ku eka yena: “U pfa kwihi?” Kutani a ku eka yena: “Ndzi balekile enyimpini ya Israele.” 4Davhida a ku eka yena: “Ku humelele yini xana? Ndzi byele!” Kutani a ku: “Tiko ri chavile, ri tsutsumile enyimpini, kutani vanhu lavo tala va tiko va wile, va file; na yena Sawulo na Yonatani, n'wana wa yena, va file.” 5Davhida a ku eka jaha leri n'wi vikelaka timhaka teto: “U swi tivisa ku yini leswaku Sawulo u file ni n'wana wa yena Yonatani xana?” 6Kutani jaha leri n'wi vikelaka timhaka ri ku: “A ndzi tshuka ndzi hundza entshaveni ya Gilibowa; kutani waswivo, Sawulo a tiseketela hi tlhari, kutani tigolonyi ni vakhandziyi va tihanci a va n'wi susumeta ngopfu. 7Kavaloko a hundzuka a ndzi vona, a ndzi vita; kutani ndzi ku: ‘Hi mina loyi!’ 8A ku eka mina: ‘U mani xana?’ Ndzi hlamula, ndzi ku: ‘Ndzi wa ka Amaleke.’ 9Kutani a ku: ‘Tshinela u ndzi dlaya, hikuva ndza titivala, hambi moya wa mina wa ha ri kona hinkwawo eka mina.’ 10Kavaloko ndzi n'wi tshinelela, ndzi n'wi dlaya, hikuva a ndzi tiva leswaku a nga ka a nga hanyi leswi a weke; kutani ndzi tekile harhi leyi ngi yi ri enhlokweni ya yena, ni sindza ra le vokweni, ndzi swi tisile halenu eka hosi yanga.”
11Kavaloko Davhida a handzula tinguvu ta yena, ni vanhu hinkwavo va yena va endlisa sweswo; 12kutani va rila, va endla nkosi, va titsona swakudya ri ko ri pela, hikwalaho ka Sawulo na Yonatani, n'wana wa yena, ni tiko ra Yehovha, ni yindlu ya Israele, hikuva a va wile hi tlhari.
13Kutani Davhida a vutisa jaha leri n'wi runguleleke timhaka leti, a ku: “U wa ka mani xana?” A hlamula, a ku: “Ndzi n'wana wa muluveri, wa ka Amaleke.” 14Davhida a ku eka yena: “A ku chavanga ha yini ku tlakusa voko ehenhla ka muhlawuriwa wa Yehovha ku n'wi dlaya xana?” 15Kutani Davhida a vitana un'wana wa vanhu va yena, a ku eka yena: “Tshinela u n'wi dlaya!” Kavaloko a n'wi tlhava, a fa. 16Davhida a ku eka yena: “Ngati ya wena yi le nhlokweni ya wena, hikuva nomu wa wena wu ku landzurile, wu te: ‘Hi mina ndzi dlayeke muhlawuriwa wa Yehovha.’ ”
17Kavaloko Davhida a endla risimu leri, ehenhla ka Sawulo ni le henhla ka Yonatani, n'wana wa yena, a ku, a ri dyondzisiwe vana va Yuda. 18I risimu ra vurha: “Ri tsariwile ebukwini ya La Lulameke:
19“Mburhi ya wena Israele,
yi tlhaviwile eswitsungeni swa wena!
Tinhenha ti wile hi mukhuva wihi xana?
20Mi nga tshuki mi vikela Gati,
Mi nga vuli mahungu emitsendzeleni ya Axikeloni.
Vanhwanyana va Vafilista
va nga ta tsaka,
Vanhwana va vukhuna va nga ti tsakisisa.
21“Tintshava ta Gilibowa!
A ku nga vi na mberha ni mpfula ehenhla ka n'wina,
A ku nga vi na nsimu ya mihlengo!
Hikuva ku cukumetiwe kona switlhangu swa tinhenha.
Xitlhangu xa Sawulo,
Kukotisa loko ngi xi nga cheriwanga hi mafurha.
22Vurha bya Yonatani a byi tlhelanga endzhaku
Emahlweni ka ngati ya lava tlhaviweke,
Emahlweni ka mafurha ya tinhenha;
Ni banga ra Sawulo a ri tlhelanga ntsena.
23“Sawulo na Yonatani,
varhandziwa ni lava tsakisaka evutomini bya vona,
A va hambananga eku feni ka vona;
A va tlula magama hi ku vevuka,
A va tlula tinghala hi matimba.
24“Vanhwana va Israele! Rilani Sawulo,
La mi ambexeke hi xivunguvungu,
La bombiseke tinguvu ta n'wina hi nsuku.
25“Tinhenha ti wile hi ku yini enyimpini?
Yonatani u dlayiwe hi ku yini eswitsungeni?
26“Mbilu yanga yi vavisekela wena Yonatani, makwerhu!
A u ndzi tsakisa ngopfungopfu.
Rirhandzu ra wena a ri ndzi nandzihela
Ku tlula rirhandzu ra vavasati.
27“Tinhenha ti wile hi ku yini?
Matlhari ya tona ma lahlekile hi ku yini?”

Currently Selected:

2 SAMIELE 1: TSO29

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy