3 yaJohane 1
1
Singeniso
1 Lencwadzi iphuma kuMbonisi.
Iya kuGayusi lotsandzekako, lengimtsandza ngeliciniso. 2Wena lotsandzekako, ngiyakhuleka kutsi konkhe kukuhambele kahle, nekutsi uphile kahle, njengobe ngati kutsi uyaphila emphefumulweni wakho. 3 Ngajabula kakhulu nakufika labanye bazalwane bafakaza ngekutimisela kwakho ecinisweni, njengobe uhamba ecinisweni. 4Kute kujabula lengingaba nako lokwengca loko: kuva kutsi bantfwabami bahamba ecinisweni.
Gayusi uyadvunyiswa
5Wena lotsandzekako, ukwenta ngekwetsembeka konkhe lokwentela bazalwane, ikakhulu etihambini, 6 labafakaze ngelutsandvo lwakho ebandleni. Utabe wente kahle ngekubahlinzeka ngako konkhe labangahle bakudzinge, ngiko loko lokufanelekile emsebentini waNkulunkulu. 7 Ngobe baphuma egameni laKhristu bangatsatsi lutfo kulabangakholwa kuye. 8Ngako-ke sifanele kubasita bantfu labanjalo, kuze sibambisane nabo emsebentini weliciniso.
Kutiphatsa dlephu kwaDiyotrefesi
9 Kukhona lengakubhalela libandla, kodvwa-ke Diyotrefesi lotsandza kutibeka embili uyala kusemukela. 10 Ngako-ke nangifika lapho, ngiyawuvumbulula konkhe lokubi lakwente kitsi ngemavi lamabi, asihleba. Kodvwa loko akumenelisi, ngobe ujinge angabemukeli bazalwane; nalabo labafuna kubemukela, uyabavimbela abancume nasebandleni.
Kudvunyiswa kwaDemetriyusi
11 Wena lotsandzekako, ungasilandzeli sibonelo lesibi, kepha ubolandzela sibonelo lesihle. Umuntfu lowenta lokulungile waNkulunkulu; kepha umuntfu lowenta lokubi akazange asambone Nkulunkulu.
12Demetriyusi unconywa ngibo bonkhe bantfu, ngisho neliciniso imbala liyamncoma; natsi siyamfakazela, futsi nawe uyati kutsi bufakazi betfu buliciniso.
Imikhontiso yekugcina
13 Benginetintfo letinyenti lebengingakubhalela ngato, kodvwa angifisi kutibhala phansi, 14ngobe ngetsemba kutsi ngitakubona masinyane, sikhulume nawe umlomo nemlomo.
15Kuthula akube nawe. Bonkhe bangani bayakuhambisa. Hambisa bangani, ngamunye ngamunye.
Currently Selected:
3 yaJohane 1: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.