John Ooba Tsꞌet Ha Hónkat-un 1
1
1Ndi khuni ꞌi Sizi Gri dune buba tsꞌet ha hónla-i ꞌuntꞌoh. Yakꞌusda yutlꞌa ídanꞌai be ꞌulhnane bunalhtsꞌet ha hóokat ha. ꞌAwet nilhdukw daóotanelh-un, ꞌet huwun. Dulizas ꞌen dude ꞌulhna-un John ꞌen yughe nílhꞌaꞌ. 2John ꞌen Yakꞌusda ooghuni yughu yalhduk-un ꞌuntꞌoh. Sizi Gri ndet howu yailhduk-un huwun dune budániꞌ, ꞌinkꞌez tsꞌiyai honꞌen-un, ꞌet cha ubudániꞌ. 3Mbe ndi ꞌudustlꞌus yukꞌuyalhduk-un ꞌinkꞌez ndi nus be hootꞌen-i khuni hidántsꞌone huyoontun de, tube ꞌukꞌenus hoonzoo-un bughá whutaltsꞌulh, ꞌawet nilhdukw suliꞌ ꞌet huwa.
Lhtakꞌantꞌit-un dune Yakꞌusda ba ꞌilhunaoodulhne, hadih ꞌubulhni
4Yun kꞌut Asia tsꞌe Yakꞌusda ba lhtakꞌantꞌit-un lhelhdun keyoh dune ꞌilhunaoodúlhne, nohni si John nohtsꞌo kꞌeꞌ usges whe njan dudusni: Mbe la ꞌuntꞌoh ꞌinkꞌez ꞌantꞌeꞌ-un, ꞌinkꞌez whuz de tíyalh, ꞌen ye unzoo-i ꞌinkꞌez nedzi bet whudizghel ꞌinkꞌez lhtakꞌantꞌi nududeh-i Yakꞌusda yukꞌusda but ꞌuntꞌoh, ꞌenne cha ye unzoo-i ꞌinkꞌez nedzi ba dóghel-i oohtꞌeꞌ.
5Sizi Gri ꞌen cha whuz unꞌa ꞌunohúlhni. ꞌEn ꞌuntꞌoh soo tsꞌihꞌun unꞌa whunénulhtun-un unli. ꞌEn ꞌuja ꞌudechoo whuzdli-un yaidlane toh dunadija-un ꞌuntꞌoh. Ndi yun kꞌut lerwene kꞌuneꞌ bulꞌen. ꞌEn nekꞌentsiꞌ ꞌinkꞌez duduzkaiꞌ be nelubeshi tunáyuzguz.
6OoBá Yakꞌusda ꞌen ba lerwene ꞌinkꞌez lubretne neyulhtsi. ꞌIlhiz ꞌinkꞌez ꞌilhiz wheni ꞌen dótiꞌ, ꞌinkꞌez hoolhtus whe kꞌuneꞌ neꞌoolꞌen. ꞌEt ndo honeh.
7Whunulhꞌen! Kwꞌus toh whuz de tiyalh.
Tsꞌiyanne hitiꞌelh.
Mbene oola ꞌinkꞌez ooke lugloo cho hikunúnilhtꞌone, ꞌenne cha hiyutilhꞌelh.
ꞌInkꞌez ndi yun kꞌut lhelhdoh didowhne,
ꞌen gha khuna hutitso.
ꞌEt ndó tanelh, ꞌet ndó honeh.
8NeMoodihti njan ndutni, “Si ꞌustꞌoh Alpha ꞌinkꞌez Omega usdli. ꞌUdechoo wheꞌ whuditꞌen-un ꞌinkꞌez ꞌetsul ꞌuwhutánelh-un, ꞌen ꞌustꞌoh. Mbe usdli ꞌinkꞌez ꞌistꞌeꞌ-un, ꞌinkꞌez whusatíyalh-un ꞌustꞌoh, ꞌinkꞌez tsꞌiyai-i anus ulhtus-un ꞌustꞌoh.”
John noo Patmos huyulhni, ꞌi kꞌut ꞌadinꞌai whe Sizi Gri inꞌen
9Si John nohulhutsin ꞌustꞌoh. Dzoh nahdeh te si cha nohbulh dzoh nuszut. Yakꞌusda lerwe unli-un ꞌinkꞌez Sizi Gri ooba howa whúlnaꞌ ꞌet hoontsꞌi neba whulh ínyin-un, si cha whuz unꞌa za nohbulh susyin. Yakꞌusda ooghuni be yásduk ꞌinkꞌez Sizi Gri tꞌehinoozeh huwa cha, ꞌet huwa ndi noo Patmos huyulhni-i, ꞌi kꞌut ꞌustꞌoh inleꞌ whe, 10ꞌet ꞌoh daꞌ neMoodihti oodzin, ꞌet ꞌantsꞌi Ndoni bulh sulh wheóodande léꞌusja. ꞌEt stꞌa tsꞌe dune tube yatilhduk, be tsꞌujih-i kꞌunꞌa, ꞌet whudástsꞌo. 11ꞌEt njan ndutni, “Si Alpha ꞌinkꞌez Omega usdli. ꞌUdetso-un ꞌinkꞌez ꞌudekꞌez-un ꞌustꞌoh. Ndet whunilhꞌen-un ꞌudustlꞌus kꞌut ꞌukꞌé hoonges ꞌinkꞌez lhtakꞌantꞌit-un Yakꞌusda ba ꞌilhunaoodulhne, yun kꞌut Asia hudilhtsꞌi, ꞌenne ndi ꞌudustlꞌus butsꞌo tlꞌa yonlelh. Ndi bukeyoh hooziꞌ ꞌuntꞌoh: Ephesus, Smyrna, Pergamos, Thyatira, Sardis, Philadelphia, ꞌinkꞌez Laodicea whuz cha.”
12Ndi khuni saniz de tsꞌe be yáduk-i dástsꞌo whe ootsꞌu nasuzꞌa. Whuz nasuzꞌa whe ndi lhtakꞌantꞌi-i be hootꞌen-i nanusaꞌa-i gold be ꞌulya, ꞌi tísꞌen. 13ꞌInkꞌez nyoo lhtakꞌantꞌi-i be hootꞌen-i nanusaꞌa-i toh, Yinka Dune Yeꞌ dultꞌoh-un ꞌet usyin. Oonaih ooke tꞌayanaih-i, ꞌi be usda. Se gold bulh ꞌulya-i, ꞌi be ootsꞌi toh ꞌon doh whuya ye tsꞌudilhꞌoo. 14Ootsi ꞌinkꞌez ootsighaꞌ ꞌusbai gha kꞌunꞌa ꞌulhyul, ꞌinkꞌez yus kꞌunꞌa ꞌulhyul. Oona ꞌantsꞌi kwun kꞌunꞌa tizdi doútꞌen. 15Ooke ꞌantsꞌi dulkꞌun tꞌeh tsáhazdanꞌai-i ndoútꞌen. Ooghuni ꞌantsꞌi too natájilh léꞌutni. 16Oola nailhni tsꞌunkꞌus lhtakꞌantꞌi sum ꞌi yoontun. ꞌEt saluzti ꞌi oozá huyanꞌa. Lhchꞌaz tsꞌe ookꞌa hoonli. ꞌInkꞌez oonin sa ulhtus-i kꞌunꞌa be hóodatꞌen.
17Tísꞌen whe oobut dasúsai hukwꞌunꞌa naztsꞌut. Dula nailhni tsꞌunkꞌus ꞌi be skꞌé dilni ꞌinkꞌez ꞌusulhni, “Niljut íloh! ꞌUdechoo ꞌinkꞌez ꞌudekꞌez-un ꞌustꞌoh. 18Khuna-un ꞌustꞌoh. Dasúsai inleꞌ ꞌinkꞌez sunilhꞌen, ꞌilhiz ꞌinkꞌez ꞌilhiz wheni khusna. ꞌEt ndo honeh! Hades ꞌinkꞌez yatsꞌadlah-un whulugli nusdle.
19Ndet la honꞌen-un ꞌukꞌé hoonges. Hoonli ꞌuntꞌoh-i ꞌinkꞌez nduwhi hukwꞌelhꞌaz nus dawhútanelh-un, ꞌet cha ꞌukꞌé hoonges. 20Ndi lhtakꞌantꞌi sum snailhni slakꞌet inꞌen-i, ꞌinkꞌez lhtakꞌantꞌi nanusaꞌa-i gold be ꞌulya-i be hootꞌen-i cha, ꞌi ooghun wheꞌ hoontꞌoh hooyoh-un, ꞌet njan ndúhoontꞌoh: Lhtakꞌantꞌi sum ꞌi lhtakꞌantꞌit-un Yakꞌusda ba ꞌilhunaoodulhne, ꞌenne bulizas ꞌuntꞌoh. ꞌInkꞌez lhtakꞌantꞌi be hootꞌen-i, inꞌen-i, ꞌi lhtakꞌantꞌit Yakꞌusda ba ꞌilhunaoodulhne ꞌuntꞌoh.”
Currently Selected:
John Ooba Tsꞌet Ha Hónkat-un 1: crx
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.