YouVersion Logo
Search Icon

John 2

2
Sizi huwa ꞌítꞌen túneꞌ ꞌutꞌen ꞌet huwa la dunene ꞌen Gri ꞌúntꞌoh tꞌehonózin
1ꞌEt whulh tat dzin whe Galilee yun kꞌut ꞌet ꞌilhoghun keyoh Cana huwhútni, ꞌet keyoh ꞌet la lhghuskene ba honílhni. ꞌEt Sizi ooloo ꞌen cha ꞌet usda. 2Sizi ꞌinkꞌez yugha hodulꞌehne tubulh ꞌenne cha bughu nahúzdil. 3ꞌEt njan lhghuskene ba honílhni whutoh ꞌet la ndi tsꞌekoo tooꞌ ntsool súliꞌ. ꞌEt Sizi ooloo yughu ninya ꞌinkꞌez yúlhni, “ꞌAw tsꞌekoo tooꞌ lhuhítꞌiꞌ.”
4Sizi ꞌet uyúlhni, “Tsꞌeke ꞌet di ha ꞌet ndusúdini? ꞌAw ꞌawhuz sba ꞌet nelhódiszit, ꞌawhuz stsꞌó dizulh whe ꞌuhoontꞌoh,” yúlhni.
5ꞌEt ooloo ndunne ꞌustlénne ubúlhni, “Daja nohbulhni la ꞌoh te neꞌóohtꞌen.”
6ꞌEt njan lhkꞌuta tse oosaꞌ cho, too huye súlhdzo wheni, ꞌet ꞌusdla. ꞌI la Lizwifne bube ꞌutꞌen kꞌoh hukwꞌunꞌa lanaꞌhuldoh wheni.
7ꞌEt Sizi ndunne ꞌustlenne ubúlhni, “Ndi tse oosaꞌ cho tsꞌiyawh too be nadulhbun.” ꞌInka soo tsꞌiyawh oodah whutsꞌun yanahídilhbun.
8“Dugweꞌ íhkaih ꞌinkꞌez mbe la njan howunli-un, ꞌen ootsꞌu yihkalh,” ubúlhni. ꞌInka hiloh hitsꞌu whinkai.
9Ndi too tsꞌekoo tooꞌ suliꞌ-i, ꞌaw ntsꞌez de ha huyalhdzo ndun howunli-un tꞌéoonúszun, ꞌet hoontsꞌi ndunne ꞌustlénne huyínkaine, ꞌenne tꞌehonínzun. ꞌInkꞌez ndet la howunli-un yunahóozdlih whe dune ꞌat utꞌí-un, ꞌen ꞌanih yudániꞌ, 10ꞌinkꞌez uyúlhni, “Dune tsꞌiyanne ndi tsꞌekoo tooꞌ ꞌuzooꞌ-i, ꞌi cho howu há yulhdzoh, ꞌet hukwꞌelhꞌaz sooltsuk hutni te, ꞌet ꞌandit za hukwꞌelh-i ꞌuntꞌoh-i tsꞌekoo tooꞌ ꞌi bughu há yulhdzoh. ꞌEt nyun ndi ꞌuzooꞌ-i, ꞌi ꞌudekꞌoh whutsꞌun ontun!” yúlhni.
11Njan keyoh Cana Galilee yun kꞌut whuzꞌai ꞌet soo ꞌudechoo Sizi huwa ꞌítꞌen te naꞌditꞌen, ꞌinkꞌez dádiltiꞌ la ꞌet whúbunilhtan. ꞌI gha la yugha hodulꞌehne ꞌen ghun buba ꞌalhaꞌ yintꞌoh suliꞌ.
Jerusalem lugliz whucho Sizi ooketne tenábuninyoot
12Hukwꞌelhꞌaz Sizi keyoh Capernaum huwhutni tsꞌe whinya. Ooloo, bulhutsinke, ꞌinkꞌez yugha hodulꞌehne cha, ꞌaw saꞌ iloh ꞌet hudáltsꞌiꞌ.
13ꞌAwet whenghoh whudizulh ndet daꞌ Lizwifne buyoh Yakꞌusda oolizas Butus Lhuséya whúnahulnih-un,#2:13 Nawhudizulh totsuk ꞌilhunahodulh, ꞌinkꞌez ndi ꞌusbai kꞌus unzoo-i nahayutꞌulh. Njan whewhúnahulni ꞌoh daꞌ Yakꞌusda yun kꞌut Egypt tsꞌe ha nabanla daꞌ. ꞌet Sizi Jerusalem tsꞌu whínya. 14ꞌEt lugliz whucho whunaꞌulhyó-un whambez tsꞌe oozya ꞌet la dune ꞌeꞌóoketne ꞌubunilhꞌen. Khunai-i, musdoos, ꞌusbai te, ꞌinkꞌez dutꞌaiyaz te, dove huyúlhni, huye ꞌóoket, ꞌinkꞌez dune sooneya lhkꞌe nádudzaihne, ꞌenne cha ꞌet ꞌuhutꞌen. 15Tlꞌoolhyaz be tutsus ꞌinla. ꞌI be khuna-i tsꞌiyawh tenaíninyoot. Sooneya lhkꞌe nádudzaihne cha buzooneya nus wheyantsut, ꞌinkꞌez buludab cha yun tizdla. 16ꞌInkꞌez dutꞌaiyaz be óoketne ubúlhni, “Ndowhi tenánuhle! ꞌAw sBá ooyoh ꞌet ꞌeꞌóoket bayoh whulhtsi iloh!” ubúlhni.
17ꞌEt ndunne yugha hodulꞌehne whunahilni ooghun ꞌukꞌu nusguz-i daja ni la, ꞌet ndutni, “Njan nyoh hukwaꞌ nuszun kꞌet ꞌantsꞌi syo tsꞌe duskꞌun le ꞌustꞌoh.”
18ꞌEt Lizwifne ꞌuhuyúlhni, “Njan ntsꞌoh te la neꞌíntꞌen-un di gha ꞌíntꞌen hooncha túneꞌ ꞌintꞌen, ꞌet whunénilhtun?”
19ꞌEt Sizi ubúlhni, “Njan yoh whudíztiꞌ-un nohni musai whulhtsi ꞌinkꞌez tat dzin inleꞌ de, ꞌet dunaóodutásꞌalh.”
20ꞌEt ndunne Lizwifne úhuyúlhni, “Njan yoh whudíztiꞌ-un dit whunizyat ꞌon ꞌat lhkꞌu tat yus kꞌut whe lhaóodulya. ꞌEt daja ninzun wheꞌ dini, tat dzin whutoh za dunaoodutánꞌalh dini,” huyúlhni. 21ꞌEt njan Sizi yoh whudíztiꞌ-un howu yalhduk whe, didutchꞌoh duyustꞌe ꞌi ghu yalhduk whe ꞌutni ínleꞌ. 22ꞌEt huwa la Sizi Gri dazsaine butoh dunadija whe yugha hodulꞌehne whunahilni daja ubúlhni inleꞌ daꞌ, ꞌinkꞌez Yakꞌusda ooghuni ꞌukꞌu nusguz-i ꞌinkꞌez khuni ꞌi Sizi ye yaílhduk-i bulh daja ni la tsꞌiyawh buba ꞌálhaꞌ ꞌuhoontꞌoh.
23ꞌAwhuz Jerusalem ꞌet ꞌutꞌen whe Butus Lhusuya-un, ꞌet whutoh neꞌwhutꞌen-un, whulohne mbene la Sizi yunilhꞌenne ntsꞌo tula neꞌútꞌen-un, ꞌet huwa kꞌus lhane booziꞌ buba ꞌalhaꞌ yintꞌoh suliꞌ. 24ꞌEt hoontsꞌi Sizi didutchꞌoh ꞌaw dunene butꞌanílhnitan, tꞌewhunínzun dune dahíntꞌoh la ꞌet huwa. 25ꞌInkꞌez ꞌaw ꞌuyoonne dune dahíntꞌoh la ꞌet hidóniꞌ ꞌaítꞌoh, didutchꞌoh dunene dahíntꞌoh la tꞌewhunínzun ꞌet huwa.

Currently Selected:

John 2: crx

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy